Nýtt skip Vinnslustöðvarinnar (VSV) kom til hafnar í Vestmannaeyjum í gærmorgun og mun fá nafnið Gullberg VE 292. Það er keypt frá Noregi og hét áður Garðar. Skipið er 70 metra langt, þrettán metra breitt og lestarplássið er 2.100 rúmmetrar. Garðar á sér sögu á Íslandi, annars vegar sem Margrét EA í eigu Samherja og hins vegar sem Beitir NK í eigu Síldarvinnslunnar.
Starfsmaður skipaeftirlitsdeildar er í Vestmannaeyjum í dag þar sem hann er að upphafsskoða skipið fyrir skráningu á skipaskrá.
CCQ er nýtt innra gæðakerfi Samgöngustofu. Innleiðing gæðahandbókar okkar í CCQ hefur staðið yfir undanfarna mánuði með skipulagðri þjálfun fyrir ritnotendur. Þjálfunin hefur hingað til miðað að ábyrgðaraðilum skjala og því starfsfólki sem kemur að uppfærslu gæðaskjala. Einstaka deildir hafa fengið þjálfun sem lesnotendur en til stendur að bjóða öllu starfsfólki slíka þjálfun að sumri loknu. Yfirfærsla gæðaskjala er hafin hjá nokkrum deildum og mun standa yfir næstu mánuði. Markmiðið er að öll gæðaskjöl, verklagsreglur og stefnuskjöl verði komin úr Gæsku og yfir í CCQ í haust.
Ábendingakerfið Bendill er hluti af CCQ en þar hafa borist margar ábendingar um ýmis málefni frá því við innleiddum kerfið. Sumar hverja snúa að brotnu verklagi en aðrar að öðrum málefnum sem snerta okkar daglega vinnuumhverfi og hvernig við getum bætt það.
Í dag eru liðin 20 ár síðan Siglingaöryggisstofnun Evrópu (EMSA) var sett á stofn með Evróputilskipun Nr. 1406/2002 þann 27. júní 2002. Af þessu tilefni hefur EMSA opnað sérstaka vefsíðu þar sem tímamótanna er minnst, sagan rifjuð upp og fjallað er um hlutverk stofnunarinnar. Nýjasta tölublað fréttabréfs EMSA er einnig tileinkað þessum tímamótum.
Ísland er aukaaðili að Siglingaöryggisstofnun Evrópu – EMSA í gegnum EES-samninginn. EMSA (Euroopean Maritime Safety Agancy) stuðlar að því að komið verði á betra samstarfi milli aðildarríkja ESB, Noregs og Íslands og þróar og miðlar bestu starfsvenjum. Það stuðlar aftur að því að efla í heild sinni siglingaöryggiskerfi auk þess að draga úr hættunni á sjóslysum, sjávarmengun og mannskaða á sjó.
Siglingaöryggisstofnunin gegnir hlutverki tækniaðila sem sér Evrópusambandinu og aðildarríkjum stofnunarinnar fyrir nauðsynlegum úrræðum til að herða með skilvirkum hætti reglur um almennt siglingaöryggi og varnir gegn mengun frá skipum. Stofnunin aðstoðar framkvæmdastjórn ESB við það verkefni að uppfæra og þróa löggjöf Bandalagsins á sviði siglingaöryggis og varna gegn mengun frá skipum. Hún veitir einnig stuðning til að tryggja samleitna og skilvirka framkvæmd slíkrar löggjafar í aðildarríkjunum.
Til að störf, sem stofnuninni eru falin, séu vel af hendi leyst heimsækja starfsmenn hennar aðildarríkin til að fylgjast með því hvernig kerfi siglingaöryggis og varna gegn mengun frá skipum starfa í heild sinni. Þessar heimsóknir fara fram í samræmi við stefnu sem stjórn stofnunarinnar setur og skulu stjórnvöld aðildarríkjanna greiða fyrir þeim.
Stafræna umsókn um bráðabirgðaskírteini er nú að finna á Ísland.is en slík umsókn er fyrsta skrefið að því að hefja ökunám. Einstaklingar geta sótt um frá 16 ára aldri en þá geta tilvonandi ökumenn fyrst hafið ökunám til almennra ökuréttinda. Ferlið er stafrænt þar sem ökunemi skráir ökukennara og greiðir fyrir skírteinið. Allar upplýsingar úr umsókn eru skráðar beint í ökuskírteinaskrá. Ökunemi skilar inn mynd til sýslumanns í kjölfar umsóknar og læknisvottorði ef við á. Námsheimild er þá veitt í kjölfarið og ökunemi getur hafið nám með sínum ökukennara.
Árið 2021 sóttu 6.056 einstaklingar um að hefja ökunám og verður áhugavert að sjá hversu margir velja nú að fara í gegnum stafrænt ferli.
„Við höfum lagt mikla áherslu á að bæta þjónustuna og færa hana á stafrænt form. Þetta skref er eitt af mörgum sem miða að því að bæta þjónustu okkar við fólk,“ segir Sigurður Ingi Jóhannsson innviðaráðherra.
Áður var stafræn umsókn um fullnaðarökuskírteini gerð aðgengileg á Ísland.is auk þess sem ökukennarar geta staðfest niðurstöður akstursmats með stafrænum hætti, en slík staðfesting er nauðsynleg svo gefa megi út fullnaðarökuskírteini.
„Stafræna leiðin einfaldar bæði umsóknarferlið fyrir umsækjendur sem og umsýslu hjá sýslumönnum. Þetta leiðir af sér betri pappírslausa þjónustu sem hægt er að nýta sér þegar hentar óháð opnunartíma,“ segir Kristín Þórðardóttir, sýslumaður á Suðurlandi og formaður sýslumannaráðs.
Í framhaldi af þessum áfanga er unnið að því að opna stafræna ökunámsbók sem verið hefur í prófunum. Með stafrænni ökunámsbók geta ökukennarar skráð inn tíma og framvindu ökunáms. Einnig er unnið að því að ökuskólar staðfesti nám með stafrænum hætti. Lokaáfangi verkefnisins er svo rafræn próftaka fyrir bókleg ökupróf.
„Við höfum lagt mikla áherslu á þetta verkefni samhliða því að tryggja gæði námsins og þar með umferðaröryggi okkar allra. Með stafrænum ökunámsferli gerum við ökunám á Íslandi markvissara og umhverfisvænna í takt við nútímatækni og þarfir samfélagsins.“ segir Jón Gunnar Jónsson, forstjóri Samgöngustofu.
Stafræn umsókn um bráðabirgðaskírteini er liður í stóru samstarfsverkefni innviðaráðuneytisins, Samgöngustofu, sýslumanna, Ríkislögreglustjóra og Stafræns Íslands um stafrænt ökunámsferli frá A-Ö.
Sækja um bráðabirgðaökuskírteini. Stafrænt ökuskírteini | Ísland.is (island.is)
Samhliða hefur verið opnuð upplýsingasíða fyrir ökukennara á Ísland.is. Upplýsingasíða fyrir ökukennara | Ísland.is (island.is)
Það eru hún Erla Vinsý sem velur föstudagslagið að þessu sinni. Um val sitt segir hún:
Ég vel lagið Freed from desire með GALA. Ég heyrði þetta lag í fyrsta skipti þegar ég var í fríi með fjölskyldunni á Mallorca árið 1996 og þá var ekki aftur snúið. Þetta lag er mitt „go to“ partýlag og ef ég kemst í lagalistann í partýum þá fær þetta lag að spilast að minnsta kosti 10-12 sinnum yfir kvöldið.
Njótið vel og góða helgi.
Ég skora á Egil Vigni Reynisson að velja næsta föstudagslag.
Eins og áður hefur komið fram verðum við í samstarfi með Bylgjulestinni í sumar og munu átta helgar sumarsins verða tileinkaðar tilteknum umferðaröryggismálum. Fyrsta helgin var nýliðin helgi 18 – 19. júní og síðasta helgin verður 5 – 7 ágúst.
Um hverja helgi verður lögð sérstök áhersla á tiltekið umferðaröryggisþema og eru þau þessi:
Dagskrá Bylgjunnar verður rík af hverskonar umfjöllunum um þessi atriði og hefur Samgöngustofa látið útbúa 24 útvarpsauglýsingar tengdar þessum áhersluatriðum. Auk þess hefur dagskrágerðarfólk Bylgjunnar upplýsingar (texta) sem hefur verið tekinn saman og það getur talað út frá í kynningum sínum. Hér má heyra dæmi um auglýsingar (trailer):
Innslag – Hinn bílstjórinn:
Innslag – Slá inn símanúmer:
Bylgjulestin lagði af stað í ferð sína um landið um síðustu helgi og er Samgöngustofa með í því verkefni. Áhersla verður á ákveðna þætti í umferðaröryggi eftir því hvar og hvaða hátíð eða atburður er heimsóttur. Fyrsti viðkomustaður var Akranes en dagskráin er svona í sumar:
Frétt á visir.is um fyrsta stoppið á Akranesi.
Í frétt á vef innviðaráðuneytisins er sagt frá því að út er komin lokaskýrsla starfshóps um smáfarartæki en Sigrún Henríetta Kristjánsdóttir var fulltrúi okkar í þessum starfshópi.
Í lokaskýrslunni eru kynntar sex tillögur til úrbóta til að auka öryggi notenda smáfarartækja og annarra vegfarenda og styðja við notkun fjölbreyttra umhverfisvænna fararskjóta með öruggum hætti. Lagt er til að skýr mörk verði sett varðandi ölvun ökumanna, aldursmörk ökumanna verði 13 ár og bannað verði að breyta hámarkshraða ökutækja. Þá er lagt til að umferðarfræðsla verði með skýrum hætti hluti aðalnámskrár grunnskóla. Skýrslan verður höfð til hliðsjónar við undirbúning frumvarps til breytinga á umferðarlögum sem lagt verður fram á Alþingi næsta vetur.
Smáfarartækjum, aðallega rafhlaupahjólum, hefur fjölgað ört á síðustu árum. Í skýrslunni segir að þægindi og aukin vitund um umhverfisáhrif umferðar stuðli að þessum vexti en ávinningur samfélagsins felist m.a. í minni umferðartöfum í þéttbýli og minni mengun frá umferð.
Athugun á slysagögnum leiddi í ljós að slys eru algeng. Árið 2021 var hlutfall þeirra sem voru á rafhlaupahjóli meðal alvarlega slasaðra orðið 17% en akstur á rafhlaupahjólum er innan við 1% af allri umferð. Þá kom í ljós að 40% þeirra sem slasast alvarlega á rafhlaupahjóli voru á ferð á milli kl. 23 og 04 á föstudags- og laugardagskvöldum. Margir þeirra reynast einnig ölvaðir við komu á slysadeild Landsspítala. Í könnun um aksturshegðun kom í ljós að 40% ungra vegfarenda (18-24 ára) hafa ekið tækjum undir áhrifum áfengis. Loks er algengt að börn undir 10 ára aldri komi á slysadeild eftir óhöpp við akstur rafhlaupahjóla.
„Við þurfum að hafa hraðar hendur við að tryggja umferðaröryggi allra þeirra sem kjósa að nota smáfarartæki. Tillögur starfshópsins eru því mikilvægt innlegg í endurskoðun umferðarlaga með tilliti til þessa nýja ferðamáta,“ segir Sigurður Ingi Jóhannsson, innviðaráðherra.
Tillögur hópsins til úrbóta eru eftirfarandi:
Skýrsla starfshópsins var unnin í samráði við ýmsa hagsmunaaðila og að loknu opnu samráði á samráðsgátt stjórnvalda.
Nýja útlitið okkar er smám saman að taka yfir það gamla og nú er nýja merkið komið yfir aðalinnganginn sem og á öðrum stöðum. Snorri og Ólöf flögguðu nýju fánunum á mánudaginn í síðustu viku og þá fór nýja útlit vefsins okkar einnig í loftið. Það er að ýmsu að huga og gamla merkið er notað á ýmsum vefum annarra stofnanna og höfum við sett okkur í samband við ýmsa aðila og beðið þá um að skipta út. Ef þið verðið vör við gamla merkið einhversstaðar á víðnetinu eða eruð með ábendingu um staði sem ekki er búið að skipta út hjá okkur megið þið endilega senda ábendingu á samskipti@samgongustofa.is.
Nýja hönnunarstaðlinn má nálgast hér.
Nú er sjötta rafræna veggspjaldið í röðinni 12 hnútar komið út og er umfjöllunarefnið nú sú hætta sem sjómenn geta staðið frammi fyrir ef vöntun er á nauðsynlegum öryggisbúnaði. Það að tiltækur öryggisbúnaður sé fyrir alla um borð í skipum getur skipt sköpum á ögurstundu.
Líkt og áður hefur komið fram er með þessum veggspjöldum reynt að koma í veg fyrir að mannlegir þættir eins og gleymska, kæruleysi, gömul og úreld viðhorf og margt fleira í mannlegu eðli dragi úr öryggi sjómanna. Við hvetjum alla sjómenn og sjófarendur til að kynna sér þetta og skoða sérstaklega þær fyrirbyggjandi aðgerðir sem tilgreindar eru á spjaldinu.
Athuga skal reglulega ástand öryggisbúnaðar og hvort nóg sé af honum fyrir alla um borð. Betra er að hafa of mikið af honum en of lítið. Einnig er mikilvægt að um borð í bátnum eða skipinu séu verkfæri og varahlutir sem hægt er að grípa til ef eitthvað bilar. Einnig er mikilvægt að menn kynni sér nýjungar í öryggisbúnaði og tileinki sér þær.
12 hnútar eru unnið með helstu sérfræðingum í öryggismálum sjómanna, sem eru skólastjóri, kennarar og leiðbeinendur Slysavarnaskóla sjómanna. Við viljum þakka sérstaklega fyrir stuðningur ykkur við þetta verkefni en dreifing og kynning á þessu er mjög mikilvæg og getur leitt til mun betri öryggismenningar á sjó.
• Íslenska spjaldið nr. 6 má nálgast á síðunni: www.samgongustofa.is/12hnutar
• Enska spjaldið má nálgast á síðunni: www.icetra.is/12knots
Farsýslan og Samgöngustofa bauð í sameiningu til fjölskyldudags í Húsdýragarðinum í gær. Starfsfólk, makar og börn fengu frítt inn í garðinn og veittur var 50% afsláttur af aðgangi að leiktækjum. Boðið var upp á grillaðar pylsur og drykki og var mikil ánægja með framtakið og starfsfólk, börn og barnabörn skemmtu sér vel í blíðviðrinu.
Hér að neðan eru nokkrar myndir frá gærdeginum:
Andlitsmálningin alltaf vinsæl
Í frétt í Fréttablaðinu á miðvikudaginn kom fram að Microsoft hefur nú formlega lagt niður vafran Internet Explorer. Vefstjóri hefur orðið var við að sumir hér innanhúss eru ennþá að nota vafrann góða og fannst því tilvalið að setja hér inn þessa stuttu frétt til upplýsingar 🙂
Fréttin hljóðar svo:
Internet Explorer lagt niður eftir daginn í dag
Netvafri Microsoft verður lagður niður eftir daginn í dag, 27 árum eftir útgáfu vafrans. Microsoft tilkynnti í fyrra áform sín um að leggja vafrann niður. BBC greinir frá þessu.
Internet Explorer var fyrst gefið út árið 1995 og náði hámarki sínu árið 2004 þegar 95 prósent tölvunotenda notaði vafrann. Í dag eru það hins vegar Google Chrome, Safari frá Apple og Mozilla Firefox sem fara með stærstu hlutdeildina á tölvumarkaði í dag.
SJÁ EINNIG
Microsoft í sókn gegn sínum eigin netvafra
Notendur sem vilja halda áfram að nota vafra frá Microsoft er bent á að nota vafrann sem Microsoft gaf út árið 2015, en sá vafri heitir Microsoft Edge.
Í umfjöllun BBC um málið segja þau upprisu snjallsíma hafa verið endalok Internet Explorer, en allir símar frá Apple höfðu Safari vafrann uppsettann í símann við kaup og Google Chrome var svoleiðis í Android símum. Apple og Android símar höfðu of stóra hlutdeild á símamarkaði til þess að Microsoft gæti keppt við þá með Internet Explorer.
Árið 2020 notuðu 9,1 prósent tölunotenda Internet Explorer og Edge samtals, taka má því svoleiðis að Edge sé að drífa þessa tölu upp.
Eins og fram hefur komið hefur verið samþykkt ný heildarstefna Samgöngustofu fyrir tímabilið 2022 til 2024 og er hún vegvísir til þeirrar framtíðar sem við viljum byggja á komandi árum.
Af þessu tilefni hefur Samgöngustofa opnað sérstakan stefnuvef stefna.samgongustofa.is, þar sem hægt er að kynna sér stefnuna betur. Stefnuvefurinn er mikilvægur vettvangur til að hafa stefnuna aðgengilega fyrir okkur sem störfum eftir henni og ekki síður fyrir ytri samstarfsaðila sem tengjast starfi stofnunarinnar, en gott samstarf er lykilatriði væntinga og árangurs. Stefnuvefurinn verður lifandi vefur þar sem m.a. má sjá helstu verkefni í vinnslu sem miða að því að tryggja framgang stefnunnar.
Í Fréttablaðinu í dag er viðtal við Þórhildi Elínu um rafhlaupahjól sem hafa verið mikið til umræðu að undanförnu. Tilefnið er skýrsla starfshóps um smáfarartæki sem gefin var út á föstudaginn. Í skýrslunni eru tillögur um aðgerðir til að gera búnað, umhverfi og notkun smáfarartækja öruggari. Viðtalið er hér á eftir:
Þórhildur: Allt of auðvelt að gera hjólin hraðskreiðari
Starfshópur um smáfarartæki gaf á föstudaginn var út fullgerða skýrslu með tillögum um aðgerðir til að gera búnað, umhverfi og notkun smáfarartækja öruggari. Er þar helst átt við rafmagnshlaupahjól, sem hafa verið mjög áberandi í íslenskum samgöngum frá árinu 2020.
Hjólin hafa verið undir smásjá vegna hás hlutfalls þeirra í umferðarslysum síðustu árin, en hlutfall alvarlegra þeirra sem voru á rafhlaupahjóli meðal alvarlegra slasaða í umferðarslysum var 17 prósent þrátt fyrir að akstur rafhlaupahjóla sé innan við eitt prósent af heildarumferð.
Ein tillaga í skýrslunni snýr að hámarkshraða rafhlaupahjólanna og að því að bann verði lagt við breytingum á hraðastillingu þeirra. Rafhlaupahjól eru yfirleitt hönnuð með innbyggðan 25 km hámarkshraða á klukkustund en hægt er að fara mikið hraðar á þeim með því að rjúfa hraðainnsigli á þeim.
„Það er algengt og kannski allt of auðvelt að taka af þessar hraðatakmarkanir þannig að hjólin komist miklu hraðar en gert er ráð fyrir,“ sagði Þórhildur Elín Elínardóttir, samskiptastjóri hjá Samgöngustofu, við Fréttablaðið. „Við höfum reynt að leggja okkar á vogarskálarnar með því að tala við foreldrana. Ekkert foreldri vill bera ábyrgð að hafa barnið sitt á fleygiferð úti á göngustígum á hraða sem það ræður engan veginn við. Við sjáum það að því hraðar sem fólk fer á hvaða farartæki sem er því skemmri tíma hefur það til að bregðast við ef út á bregður. Í annan stað er það þannig að því aflmeira farartæki sem þú stýrir, því meiri ábyrgð berðu gagnvart þínu samferðafólki úti í umferðinni.“
Í viðtali við Fréttablaðið varðandi slys þar sem rafskútu var hjólað á gangandi vegfaranda í síðustu viku hafði Guðbrandur Pétursson, aðstoðaryfirlögreglustjóri hjá umferðardeild lögreglunnar, fundið að því að ekki væru til viðurlög við því að breyta hámarkshraða smáfarartækja með því að rjúfa innsiglin. „Eigandi eða notandi ber ábyrgð þegar þetta er gert en það eru engin sektarákvæði. Ákærusviðið hefur verið að skoða þetta með okkur. En það er erfitt viðfangs eins og regluverkið er núna.“
„Þessi tæki eru náttúrlega frábær mjög gagnleg og umhverfisvæn og góður kostur til að komast milli staða í staðinn fyrir einkabílinn,“ sagði Þórhildur. „Þau taka minna pláss og það getur verið hollt að anda að sér góðu súrefni á meðan maður kemur sér milli staða. Sem viðbót í samgönguflóruna eru rafhlaupahjólin að mörgu leyti frábær tæki. En við sjáum í slysatölunum er að samhliða aukinni notkun hafa þær rokið upp. Tilgangurinn með tillögunum er að finna hvernig við getum hámarkað nytsemina og dregið sem mest úr slysahættunni.“
Þórhildur benti á að miðað við slysatölur væri það annars vegar ölvunarakstur og hins vegar aldur ökumanna sem hefði reynst skeinuhættur við akstur rafhlaupahjóla. Hvort tveggja er meðal þess sem úrbótatillögur starfshópsins snúast að, en í skýrslunni er stungið upp á bæði því að refsivert verði að stjórna smáfarartæki með meira en 0,5 ‰ áfengismagn í blóði og að aldursmörk ökumanna verði 13 ár.
„Þessi skýrsla er einvörðungu fyrsta skref,“ sagði Þórhildur. „Öll útfærsla er eftir. Tillögurnar miða að því að lagaleg umgjörð verði skýrð betur og ef unnið verður úr þessum tillögum mættum við gera ráð fyrir því að þá myndi það birtast í umferðarlögum annars vegar og reglugerðum hins vegar. Í tillögunum er meðal annars lagt til að umferðarfræðslan verði hluti af aðalnámskrá.“
„Samgöngustofa sinnir nú þegar fræðslu gagnvart börnum og unglingum í samstarfi við skóla og leikskóla en hvernig slík fræðsla yrði útfærð frekar yrði samvinnuverkefni skólanna. það er ekki einnar stofnunar eða eins manns verk að uppfræða börn um góða hegðun í umferðinni. Þetta er samfélagsmál og þetta er umferðarmenningarmál. Að slíkri fræðslu þurfa mjög margir að koma.“
Samhliða nýrri ásýnd Samgöngustofu höfum við nú opnað nýjan hönnunarvef, honnun.samgongustofa.is, þar sem hægt er að nálgast lógóið í ýmsum formum ásamt ýmsum hönnunarskjölum. Á vefnum er m.a. hægt að nálgast:
Upplýsingar um hönnunarstaðalinn og eldri hönnunarstaðal er hægt að nálgast hér á innri vefnum.
Nú hefur verið opnaður nýr stefnuvefur, stefna.samgongustofa.is, með nýrri heildarstefnu Samgöngustofu fyrir tímabilið 2022 til 2024 og er hún vegvísir til þeirrar framtíðar sem við viljum byggja á komandi árum. Framtíðarsýnin vísar til þess að Samgöngustofa ætlar að vera samferða á þessari leið, bæði ytri hagaðilum og starfsfólki í að gera gott samfélag enn betra og samgöngur öruggari. Stefnan og stefnuáherslur byggja á fjórum meginverkefnum stofnunarinnar:
Kjarninn í starfsemi Samgöngustofu er öryggi í samgöngum. Íslenskt þjóðfélag er í stöðugri mótun og aðlögun er nauðsynleg til að framþróun verði. Markmiðin ættu alltaf að vera framfarir milli ára og að staða okkar sé hið minnsta jafngóð og þeirra þjóða sem fremstar standa. Þáttur í þeirri vegferð er að stuðla sem best að öryggi fólks á ferðinni, óháð samgöngumáta. Margt hefur áunnist en alltaf má gera betur og okkar að vera samferða á þeirri leið.
Af þessu tilefni hefur Samgöngustofa opnað sérstakan stefnuvef þar sem hægt er að kynna sér stefnuna betur. Stefnuvefurinn er mikilvægur vettvangur til að hafa stefnuna aðgengilega fyrir okkur sem störfum eftir henni og ekki síður fyrir ytri samstarfsaðila sem tengjast starfi stofnunarinnar, en gott samstarf er lykilatriði væntinga og árangurs. Stefnuvefurinn verður lifandi vefur þar sem m.a. má sjá helstu verkefni í vinnslu sem miða að því að tryggja framgang stefnunnar.
Samhliða nýju stefnunni fær Samgöngustofa nýja ásýnd og nýtt merki er nú kynnt til sögunnar ásamt öllu öðru kynningarefni. Í nýju merki Samgöngustofu rennur þrískipting Samgöngustofu (sigling, umferð og flug) saman í eina sjónræna sterka heild sem myndar bókstafinn S. Litirnir eru nútímalegir, ferskir og afgerandi. Nýja útlitið hentar vel í öllu stafrænu efni enda hefur áhersla á stafræna miðlun aukist á undanförnum árum. Lögð er áhersla á að við þurfum að vera samferða í þeirri vegferð okkar að gera samgöngur á Íslandi öruggari og umhverfisvænni, hvort sem við ferðumst í lofti, á láði eða legi. Hvort sem við keyrum, fljúgum, siglum, hjólum, notum rafskútur, bíla, flugvélar eða skip, þá eigum við öll samleið í því að sækjast eftir metnaðarfullum markmiðum hvað öryggi varðar.
Skipuriti Samgöngustofu hefur verið breytt til að styðja við þessa vegferð og styrkja enn frekar starfsemina á hverju fagsviði. Flug, siglingar og umferð tilheyra hvert fyrir sig sérstöku sviði sem njóta munu stuðnings stjórnsýslusviðs og skrifstofu forstjóra. Þannig verður athyglin skýrari á einstaka málaflokka og samlegð náð þar sem sameiginlegir fletir liggja. Vegferðin er hafin og margir þræðir sem þarf að spinna í nánu samstarfi við ytri hagaðila.
Fram undan eru spennandi tímar hjá Samgöngustofu, gangi okkur öllum vel við að tryggja öruggar samgöngur til framtíðar á Íslandi. Verum öll samferða í þeirri vegferð.
Stefna Samgöngustofu 2022-2024
Nýtt skipurit Samgöngustofu
Nýr hönnunarvefur Samgöngustofu
Eins og kom fram í föstudagspósti Jóns Gunnars þá munu vefirnir okkar, www.samgongustofa.is og www.icetra.is, fá nýja útlitið í dag og reiknar Hugsmiðjan með að hefja störf við breytingarnar á milli kl. 9 og 10. Það er áætlað að það taki um hálftíma að breyta útlitinu og getur verið að vefirnir líti skringilega út á einhverjum tímapunkti á þessum hálftíma en það á ekki að raska t.d. því að fólk komist á Mitt svæði.
Það geta alltaf komið upp einhver vandkvæði við svona breytingar og munum við fara vel yfir vefina í dag til að sjá hvort eitthvað hafi óvænt farið úr skorðum en vonandi gengur þetta allt eins og best verður á kosið.
Við erum ekki að gera strúktúrs- eða efnisbreytingar að þessu sinni, hér er aðallega um útlitsbreytinar að ræða. Forsíðan mun þó breytast töluvert og endurbætur unnar á leiðarkerfi vefsins. Mörg ykkar hafa tekið eftir því að notendur hafa átt í erfiðleikum með að finna lag nr. 2 í leiðarkerfinu og var því ákveðið að nýta ferðina og stórbæta það.
Þið megið endilega hjálpa okkur að fylgjast með í dag og láta okkur vita á vefur@samgongustofa.is ef þið sjáið eitthvað á vefnum sem hefur farið úr skorðum við breytingarnar.
Annars bara til hamingju með nýtt útlit Samgöngustofu 🙂
Það er hún Una Björg sem velur föstudagslagið að þessu sinni. Um val sitt segir hún:
Ég velti valinu töluvert fyrir mér. Enda mikið ábyrgðarhlutverk að velja föstudagslagið 😉 Að lokum stóð valið á milli Disarm með Smashing Pumpkins og Groove is in the heart með Deee-Lite. Ég ákvað að velja Groove is in the heart sem mitt föstudagslag því það er eitthvað við þetta lag sem fær mann til að dilla sér. Það er gulltryggt verða a.m.k. 20% glaðari eftir hlustun og/eða að maður dilli sér örlítið með, sérstaklega á föstudegi. Þessi perla ratar yfirleitt á fóninn í mínum vinahópum.
Góða helgi!
Ég skora á Erlu Vinsý Daðadóttur að koma með næsta föstudagslag.
Nú er sumarleyfistímabilið hafið og gott að minna á tölvupósturinn á líka að fara í frí. Það getur verið gott ráð að slökkva á tilkynningum í símanum ef kveikt er á slíku og mikilvægt að stilla out-of-office svörun á vinnupóstinn. Sjálfvirkt out-of-office svar tryggir að fyrirspurnir sem viðkomandi „Frímanni“ berast rati í réttan farveg.
Hér eru leiðbeiningar fyrir outlook og tillögur að texta.
Leiðbeiningar:
Out of office eða sjálfvirkt svarskeyti er samið í Outlook með því að smella á File efst í hægra horninu, smella svo á hnappinn Automatic replies (Out of Office). Þá opnast gluggi sem býður upp á nokkra valmöguleika. Athugið að haka þarf við Send automatic replies, hægt er að skrá tímabil og einnig er hægt að útbúa sér texta til samstarfsfélaga (það er flipinn inside My Organization) og svo til annarra (Outside My Organization)
Hér er skjáskot af innanhúss skilaboðum (svar sem berst @samgongustofa.is netföngum):
Hér er skjáskot af skilaboðum út á við:
Hér eru tillögur að texta fyrir sjálfvirk svarskeyti, bæði á íslensku og ensku
Almennt svar:
Takk fyrir skeytið,
ég er í orlofi eins og er og kem aftur til vinnu [dags].
Erindi tengd [ákveðnu verkefni] má senda á [netfang hóps eða starfsmanns sem verður við og getur svarað].
Þoli erindið ekki bið bendi ég á skiptiborð Samgöngustofu í síma 480-6000, erindið ratar vafalaust í réttar hendur með aðstoð þeirra.
Athugaðu að þessi póstur er ekki áframsendur sjálfvirkt.
Bestu kveðjur,
[nafn og stöðluð undirskrift]
—
Enska:
Thank you for your e-mail.
I am out of the office [date to and from]. Please note that your email will not be forwarded.
Should the matter be important, please contact (group email or name of co-worker and email) in my absence.
Best regards,
[nafn og stöðluð undirskrift]
—
Núna í vikunni er Flugöryggisstofnun Evrópusambandsins (EASA) að gera viðamikla úttekt á frammistöðu Samgöngustofu sem flugmálayfirvalds gagnvart sameiginlegum kröfum til vottunar og eftirlits með flugvöllum. Úttektin fer fram 6.-10. júní að báðum dögum meðtöldum.
Samgöngustofa ber ábyrgð á að rekstur flugvallanna sem falla undir umfang laganna uppfylli sameiginlegu kröfurnar sem gilda um skipulagsheildir rekstraraðilanna, starfrækslu flugvallanna auk tæknilegra forskrifta um búnað og innviði. Í úttektarteymi EASA eru eftirlitsmenn stofnunarinnar, sérfræðingar sem taka út öll aðildarríki ESB og EES gagnvart þessum sameiginlegu kröfum um öryggi flugvallastarfseminnar, sem eru forsenda þess að fá að starfa inni á hinum sameiginlega markaði ESB.