Doktorinn kemur með farandskoðunarstöðina sína, pumpu, olíur og nokkra skiptilykla. Starfsmönnum er boðið að skrá hjólið sitt á þennan tengil og mæta svo með það til hans: Dr. Bæk hjá Samgöngustofu.
Doktorinn er sérdeilis ráðagóður og allir hvattir til að leita ráða hjá honum um hjólatengd mál. Fyrir bremsupúðaskipti er gott að vera með 1.500 kr. í vasanum.
ps. Rafmagnsreiðhjól fá takmarkaða þjónustu, einkum vegna þyngdar og kerfisbúnaðar.
Friday með Rebekku Black er á efa mesta og besta föstudagslag síðari ára. Lagið skapar einstaka stemningu í föstudags-ísbíltúrnum, sérstaklega á blæjubíl, en annars með alla glugga opna! Á fyrri vinnustað sem var líka virðuleg ríkisstofnun spilaði deildin mín þetta lag á hverjum föstudegi eftir hádegismat í opnu 30 manna rými.
Ég hendi boltanum til Halldórs Zoega, samt bannað að velja Dire straits eða ZZ top eða álíka
Hefur þú prufað Smástund? Í Smástund (skalanlegt fyrir öll tæki t.d. snjallsíma) er með þægilegum hætti hægt að stimpla sig inn og út. Þar er einnig hægt að skoða stöðu orlofs og úttekta í mötuneytinu. Skráið ykkur inn með sama notandanafni og lykilorði og í Vinnustund: smastund.orri.is
Í maí mun Samgöngustofa í samstarfi við Slysavarnafélagið Landsbjörg framkvæma könnun við valda stíga á höfuðborgarsvæðinu. Undanfarin ár hefur umferð meðal ökumanna á akbrautum verið könnuð en með þessari könnun er ætlunin að fá sem besta mynd af stöðunni utan akbrauta á göngu- og hjólastígum á höfuðborgarsvæðinu. Farartæki sem fara um stíginn eru skráð og hvort að ökumaður sé með hjálm, aldur og kyn skráð, hvort að ökumaður horfir eða heldur á síma, hvort að það sé farþegi auk ökumanns á farartæki og þá hvort að farþeginn sé með hjálm. Ætlunin er að framkvæma könnunina með sama hætti næstu árin til að geta fengið sem besta mynd af þróun hegðunar á göngu- og hjólastígum.
Sigurður Ingi ásamt unglingadeild Slysavarnarfélagsins Landsbjörg
Það eru unglingadeildir Landsbjargar á höfuðborgarsvæðinu sem sjá um að kanna en undanfarin ár hafa Samgöngustofa og Slysavarnafélagið Landsbjörg tekið höndum saman og lagt áherslu á ungt fólk (15-20 ára) í umferðinni. Ráðstefnur, vinnustofur og málþing hafa verið haldin og sóttu fulltrúar Samgöngustofu og Landsbjargar, ásamt fjórum ungmennum, alþjóðlega ráðstefnu um umferðaröryggi sem haldin var í Svíþjóð árið 2020. Í aðdraganda ráðstefnunnar var vinnustofa fyrir ungmenni undir merkjum YOURS (Youth for Road Safety). Þar var áherslan á að virkja unga fólkið til aðgerða með aukinni þátttöku og stefnumótun með það að leiðarljósi að fræða jafnaldra um umferðaröryggi. Könnunin fer fram á sama tíma og verkefnið Hjólað í vinnuna stendur yfir þannig að það má búast við talsverðri umferð um stígana.
Íþrótta- og Ólympíusamband Íslands stendur fyrir heilsu- og hvatningarverkefninu „Hjólað í vinnuna“. Vinnustaðir eru hvattir til að setja upp lið og liðsstjóra og skrá sig til leiks hér og vekja athygli á virkum ferðamáta sem heilsusamlegum, umhverfisvænum og hagkvæmum samgöngumáta til og frá vinnu t.d. með því að hjóla, ganga, hlaupa eða nýta almenningssamgöngur. Ýmsan fróðleik má finna hér og mun Samgöngustofa vekja sérstaka athygli á umferðaröryggi hjólreiðamanna.
Allir eru hvattir til þess að taka þátt í Hjólað í vinnuna og hvetja aðra til þess að taka þátt með þeim. Undanfarin ár höfum við hjá Samgöngustofu verið með nokkur lið og hefur myndast samkeppni þeirra á milli. Skráum sem flest lið til leiks og tökum virkan þátt í þessu flotta framtaki!
Frá fundi með verkefnisstjórn EGNOS-áætlunarinnar: Hlín okkar fyrir miðju. Frá vinstri eru: Sandrine de Backer þróunarstjóri EGNOS, Friðfinnur Skaftason, innviðaráðuneyti, Þorsteinn Jóhannesson, Isavia ANS, Hlín Hólm, Samgöngustofa, Sigurbergur Björnsson, utanríkisráðuneyti, Fatima Jalibert, verkfræðingur hjá EGNOS. Anne-Laure Vogel verkefnastjóri hjá EGNOS og Jean-Marc Pieplu, forstöðumaður EGNOS-verkefnisins.
Ísland gerðist aðili að EGNOS-áætlun Evrópusambandsins frá 1. janúar 2021 að telja. EGNOS-kerfið samevrópskt leiðsögukerfi og eykur notkunarmöguleika GPS gervihnattaleiðsögukerfisins. Markmið með þátttöku Íslands er að þjónusta EGNOS kerfisins verði aðgengileg um allt yfirráðasvæði Íslands en landið liggur nú vestast á jaðri þjónustusvæðis EGNOS.
Kerfið fylgist með GPS merkjum, vinnur úr þeim upplýsingar um m.a. áreiðanleika, nákvæmni og aðgengi, og sendir þær niðurstöður um gervihnetti við miðbaug til notenda. Með EGNOS má t.d. nýta GPS merki til leiðsagnar flugvéla sem koma inn til lendingar á flugvelli. Samkvæmt reglugerð sem innleidd hefur verið á grundvelli EES-samstarfsins er mælt fyrir um að EGNOS-tæknin verði ráðandi leiðsögutækni á flugvöllum í síðasta lagi árið 2030. Ákvörðun um þátttöku í áætluninni var m.a. tekin með það að leiðarljósi að EGNOS-tækni yrði í boði um alla efnahagslögsögu Íslands.
Í dag er EGNOS eingöngu í boði yfir austanverðu landinu en nokkuð vantar upp á að hún uppfylli þjónustukröfur á vestanverðu landinu. Í dag eru tvær vöktunarstöðvar, sk. RIM stöðvar, starfræktar á Íslandi, á Egilsstöðum og í Reykjavík. Í lok mars áttu fulltrúar innviðaráðuneytisins viðræður við verkefnastjórn EGNOS um uppbyggingu þjónustunnar fyrir Ísland. Fyrir liggur að setja þarf upp eina til tvær nýjar RIM stöðvar, að öllum líkindum á Grænlandi, til þess að þjónustan verði viðunandi um allt land.
Fulltrúar innviðaráðuneytisins kynntu verkefnisstjórninni tillögu að tímasettri áætlun um uppbyggingu þjónustunnar fyrir Ísland. Verkefnastjórn EGNOS tók vel í tillöguna og taldi hana falla vel að heildaráætlun um útvíkkun þjónustusvæðis EGNOS. Rætt var um hvernig mætti hrinda áætluninni í framkvæmd og næstu skref í þeirri vegferð. Íslensku fulltrúarnir tóku að sér að safna ýmsum upplýsingum sem nauðsynlegar eru til þess að leggja mat á mögulegar staðsetningar RIM stöðva. Í framhaldi af því mun verkefnastofa EGNOS ráðast í tæknilegar greiningar og hermun í líkani um bestu mögulegu niðurstöðu á staðsetningu stöðvanna. Miðað er við að komin verði góð mynd á það fyrir árslok.
Í tengslum við fundina heimsóttu fulltrúar innviðaráðuneytisins verkefnisstjórnina en einnig þjónustumiðstöð og rekstraraðila kerfisins, ESSP.
Innviðaráðuneytið hefur undanfarið unnið að setningu reglna um sjálfstætt eftirlit með öryggi vegamannvirkja og drög að reglugerð um breytingu á reglugerð nr. 866/2011 um öryggisstjórnun vegamannvirkja hafa nú verið birt í samráðsgátt stjórnvalda. Allir hafa tækifæri til að senda inn umsögn eða ábendingar en frestur til að skila inn umsögn er til og með 6. maí nk.
Markmiðið með breytingum er að efla enn frekar eftirlit með öryggi vegamannvirkja, m.a. með fjölbreyttar nýframkvæmdir og viðhald á vegum landsins. Breytingarnar fela annars vegar í sér skýr ákvæði um sjálfstætt eftirlit Samgöngustofu með framkvæmd öryggisstjórnunar vegamannvirkja. Hins vegar eru gerðar tillögur að breytingum vegna fyrirhugaðar innleiðingar á tilskipun Evrópuþingsins sem fjallar um öryggisstjórnun vegagrunnvirkja.
Helstu breytingar sem snúa að eftirliti Samgöngustofu með umferðaröryggisstjórnun vegamannvirkja eru:
Veghaldara verði gert að tilkynna Samgöngustofu um niðurstöður umferðaröryggisúttekta og það skýrt að gefi eftirlit Samgöngustofu með framkvæmd umferðaröryggisstjórnunar tilefni til geti stofnunin sjálf framkvæmt eða látið framkvæma umferðaröryggisúttekt á vettvangi.
Samgöngustofa gefi eða láti gefa út námskrá fyrir umferðaröryggisrýna í stað Vegagerðarinnar. Námskráin skuli þó unnin í samráði við Vegagerðina.
Bætt er við nýrri grein um eftirlit með umferðaröryggisstjórnun vegamannvirkja. Samkvæmt henni fer Samgöngustofa með eftirlit með framkvæmd umferðaröryggisstjórnunar í formi stjórnsýsluúttekta á verklagi við umferðaröryggisstjórnun. Samgöngustofa getur gefið fyrirmæli um úrbætur á verklagi ef þörf er á. Einnig er gert ráð fyrir að Samgöngustofa skuli óska eftir tímasettri úrbótaáætlun ef öryggi vegar er svo áfátt að hætta stafar af. Sé öryggi verulega ábótavant getur Samgöngustofa gefið út öryggisfyrirmæli um úrbætur.
Helstu breytingar sem lagðar eru til vegna fyrirhugaðrar innleiðingar tilskipunarinnar eru:
Gildissvið reglugerðar nr. 866/2011 er útvíkkað þannig að það tekur einnig til stofnvega utan samevrópska vegakerfisins.
Í stað þess að flokka skuli kafla vega eftir slysatíðni á þriggja ára fresti skal nú framkvæma umferðaröryggismat á vegakerfinu í heild sem reglugerðin tekur til á fimm ára fresti frá árinu 2024. Slíku mati skal fylgt eftir með annaðhvort markvissum umferðaröryggisúttektum eða beinum aðgerðum til úrbóta og að við slíkar aðgerðir skal taka tillit til þarfa óvarinna vegfarenda. Semja skal áhættumiðaða aðgerðaráætlun til að fylgjast með framkvæmd auðkenndrar aðgerðar til úrbóta.
Gerð er krafa um að öryggi vegkafla sem liggja að jarðgöngum sem falla undir ákvæði reglugerðar um öryggiskröfur fyrir jarðgöng nr. 895/2021 sé tryggt með sameiginlegum umferðaröryggisúttektum með öryggisfulltrúa jarðganga á minnst sex ára fresti.
Það er hann Guðbjörn (Bubbi) sem velur föstudagslagið þessa vikuna. Um val sitt segir hann:
Þar sem Markús ákvað að vera svo harður vildi ég koma með mýkt í helgina ykkar. Lagið sem ég ákvað að velja er í raun lagið okkar Rebekku, konunnar minnar. Við vorum alltaf að spila þetta þegar við vorum að kynnast og er í miklu uppáhaldi hjá okkur. Ég valdi einnig að hafa ‘live’ útgáfu af laginu sem sýnir hvað Chris Stableton er fáránlega góður söngvari en hann er eiginlega betri live en í studio. Njótið og ég mæli með að kynna ykkur Chris Stableton betur ef þið fílið létt kántrý.
Nú er tilbúin fræðslumyndin „Ekið með eftirvagn“ þar sem farið er yfir mikilvæg öryggisatriði sem vert er að skoða áður en lagt er af stað með eftirvagn. Myndin er byggð á upplýsingum sem koma fram á vefnum okkar www.samgongustofa.is/eftirvagnar og er gefin út með íslenskum, enskum og pólskum texta.
Myndin verður aðgengileg á vefnum, á Youtube, samfélagsmiðlum og fer í birtingu með öðrum fræðslumyndum á RÚV. Samhliða útgáfunni verður vakin athygli breyttum skoðunarmánuði fyrir eftirvagna (sem nú er í maí en var áður í ágúst) og sérstök herferð og umfjallanir fyrir hvítasunnuhelgina sem er í byrjun júní og svo áfram út sumarið.
Í gær hóf störf Erla Vinsý Daðadóttir. Erla Vinsý mun starfa sem lögfræðingur í lögfræðideild á stjórnsýslu- og þróunarsviði. Hún er staðsett á 3. hæð, gangi 3b.
Fyrir páska var gengið frá nokkrum ráðningum sem er mikið gleðiefni.
Erla Vinsý Daðadóttir hóf störf 19. apríl sl. Erla Vinsý mun starfa sem lögfræðingur í lögfræðideild á stjórnsýslu- og þróunarsviði. Erla Vinsý er með BA og Mag.jur í lögfræði frá Háskóla Íslands. Nú síðast starfaði hún sem aðstoðarmaður dómara hjá Landsrétti. Hún starfaði einnig hjá WOW air sem flugliði og á lögfræðisviði fyrirtækisins árin 2016-2019.
Haraldur Kristinsson Thorlacius mun hefja störf 1. júlí nk. sem verkefnastjóri hugbúnaðarþróunar. Haraldur er með BA próf í stjórnmálafræði frá Háskóla Íslands og BS próf í Computer Science and Business Administration frá Copenhagen Business School. Hann er einnig með diploma nám í forritun og kerfisfræði frá NTV og IPMA D vottun í verkefnastjórnun. Frá árinu 2017 hefur Haraldur unnið sem verkefnastjóri hjá Þjóðskrá Íslands.
Magnús Elíasson mun hefja störf 1. júlí nk. sem forritari í upplýsingatæknideild. Magnús er með BS í tölvunarfræði frá Háskólanum í Reykjavík. Magnús starfar í dag sem Senior Software Developer hjá Betware. Magnús mun starfa í Vestmannaeyjum.
Aðrar ráðningar sem eru í gangi eru; sérfræðingur í skipatæknideild, hafnarríkiseftirlitsmaður í skipaeftirlitsdeild og eftirlitsmaður umferðarmannvirkja, afleysing fyrir Eddu Doris.
Ár hvert veitir Samgöngustofa styrk/styrki til ýmissa rannsóknarverkefna sem tengjast öryggi skipa, atvinnusjómanna, farþega og búnaðar um borð í skipum sem og verkefna sem snúa að heilsusamlegu umhverfi sjófarenda. Gert er ráð fyrir að veita styrki til einstaklinga og/eða félaga sem koma með tillögur að lausnum í þessa átt. Heildarstyrkupphæðin hljóðar upp á 2.500.000 krónur að hámarki hvert ár og er öllum frjálst að sækja um.
Umsókn skal senda á netfangið styrkur@samgongustofa.is og skal umsókninni fylgja útfyllt eyðublað sem finna má hér á Word formi og hér á pdf formi. Einnig skal fylgja greinargóð lýsing á verkefninu í heild sem og greinargerð fyrir því hvaða hluta verkefnisins styrkurinn mun nýtast í. Nánar má finna um styrkinn hér: www.samgongustofa.is/styrkur
Ökukennarafélag Íslands, Bifhjólasamtök lýðveldisins Sniglar og Samgöngustofa bjóða til vorfagnaðar bifhjólafólks fimmtudaginn 21. apríl 2022 (sumardaginn fyrsta) í Ökuskóla 3 frá kl. 15:00.
Brautarakstur þátttakenda, sýnikennsla á öryggisatriðum, afsláttur í skoðun, hjól til sýnis, slysaþróun, forvarnir og fræðsla. Mætum öll – helst hjólandi. Sjá Facebook-viðburð hér.
Í listanum eru nokkur atriði sem snerta starfsemi Samgöngustofu eins og:
Losun frá flugstarfsemi (bls. 4)
Sjálfbært flugeldsneyti (bls. 5)
Samgöngumál (bls. 10)
Netöryggi (bls. 11)
Rafræn þjónusta (bls. 11)
Listinn tekur til tímabilsins 2022-2023 en þetta er í fjórða skipti sem slíkur listi er útbúinn. Á listanum eru 27 mál sem skilgreind hafa verið sem forgangsmál hvað íslenska hagsmuni varðar. Listinn er byggður á tillögum frá ráðuneytunum, sem bera ábyrgð á að vakta sín málefnasvið.
Tilgangur forgangslistans er að auka skilvirkni í þátttöku Íslands í EES-samstarfinu og ákveða hvernig hagsmunagæslu af Íslands hálfu verði best háttað á tímabilinu. Listinn er í grunninn einskorðaður við mál sem eru á undirbúnings- eða forstigi hjá framkvæmdastjórn ESB eða mál sem komin eru á vinnslustig en þá hefur framkvæmdastjórnin þegar lagt fram tillögu að lagasetningu til ráðsins og Evrópuþingsins.
Í einstaka tilfellum eru mál á listanum þar sem búið er að taka ákvörðun hjá ESB en huga þarf sérstaklega að upptöku viðkomandi gerða í EES-samninginn, t.d. með því að fara fram á aðlaganir.
Drög að reglugerð um breytingu á reglugerð um leigubifreiðar nr. 397/2003 hafa verið birt í samráðsgátt stjórnvalda. Öllum gefst kostur á að senda inn umsögn eða ábendingar en frestur til að koma að athugasemdum rennur út 25. apríl nk.
Með drögunum er lagt til að atvinnuleyfum til aksturs leigubifreiða á takmörkunarsvæði I (höfuðborgarsvæðið og Suðurnes) verði fjölgað úr 580 í 680 en fram hafa komið sjónarmið um að skortur sé á þjónustu leigubifreiða á svæðinu. Þannig fjölgi útgefnum atvinnuleyfum um 100.
Fjórða veggspjaldið (fyrir apríl) í 12 hnútum er nú komið út. Þar er fjallað um þá hættu sem getur stafað af ofmati á eigin hæfni. Lögð er áhersla á að fólk leiti álits, deili hugmyndum og skoðunum með öðrum í áhöfninni og komast þannig að sameiginlegri niðurstöðu um bestu leiðina til að leysa málin.
Sjómenn hafa náð ótrúlegum árangri í fækkun slysa á undanförnum árum og áratugum. Það er vegna árvekni þeirra, menntunar og hæfni til að starfa við oft hættulegar og erfiðar aðstæður. Aðstæður þar sem minnstu mannlegu mistök eða yfirsjón geta valdið slysi. Með rafrænu veggspjöldunum 12 hnútar sem Samgöngustofa gefur út er fjallað um fyrirbyggjandi aðgerðir til að mannleg mistök, viðhorf, venjur og fleira verði ekki til þess að auka líkur á slysum.
Gunnar Geir, deildarstjóri öryggis- og fræðsludeildar, var í viðtali á Hringbraut í gær. Viðtalið byrjar á mínútu 17:40. Umfjöllunarefnið var slysaskýrsla umferðarslysa sem öryggis- og fræðsludeild hefur tekið saman fyrir árið 2021. Í viðtalinu er m.a. fjallað um aukningu slysa af völdum rafhlaupahjóla, slys ungra ökumanna og eldri ökumanna svo eitthvað sé nefnt.
Skýrsluna má finna hér á vef Samgöngustofu. Árið 2021 var mjög sérstakt ár, bæði hvað varðar umferðaröryggi en einnig þjóðfélagið í heild. Var þetta annað árið í röð þar sem heimsfaraldurs gætti en árin 2020 og 2021 eru þó gerólík hvað varðar umferðaröryggið. Um töluverða aukningu slysa og slasaðra er að ræða. Fjöldi slasaðra og látinna í fyrra voru 1162 einstaklingar en árið á undan voru það 1015. Árið í fyrra er reyndar undir 10 ára meðaltali frá 2012 til 2021 sem er 1219 og má því segja að til lengri tíma litið sé þróunin í rétta átt.
Fjöldi látinna og alvarlega slasaðra eykst fer úr 157 árið 2020 í 208 árið 2021 sem er um 32,5% hækkun. Meira er nú um að ungir ökumenn séu að lenda í slysum en árin á undan. Talsverð aukning er í fjölda slasaðra óvarinna vegfarenda og þá sérstaklega á rafhlaupahjólum. Minna er um aði börn á aldrinum 0 – 14 ára slasist. Sérstaklega fækkar slösuðum börnum í bifreiðum en hinsvegar fjölgar aðeins slösuðum börnum sem eru gangandi og hjólandi í þessum aldurshópi. Slysum sem rekja má til vanrækslu á notkun öryggisbelta fækkar og alvarlegum slysum og banaslysum vegna ölvunar og fíkniefnaaksturs fækkar.
Drög að skýrslu starfshóps um smáfarartæki hafa verið birt í samráðsgátt stjórnvalda. Öllum gefst kostur á að senda inn umsögn eða ábendingar en frestur til að koma að athugasemdum rennur út 25. apríl nk.
Samgöngu- og sveitarstjórnarráðherra skipaði á dögunum starfshóp sem hefur það hlutverk að kortleggja stöðu smáfarartækja hér á landi og vinna tillögur til ráðherra að úrbótum. Skýrsludrögin sem nú eru birt til umsagnar hafa að geyma drög að sex tillögum til úrbóta er miða að því að auka öryggi notenda smáfarartækja og annarra vegfarenda auk þess að styðja við notkun fjölbreyttra umhverfisvænna fararskjóta með öruggum hætti. Í skýrsludrögunum er aðaláhersla lögð á rafhlaupahjól en það eru algengustu smáfarartækin í umferð.
Starfshópurinn sem skipaður er fulltrúum innviðaráðuneytis, Samgöngustofu, Vegagerðarinnar, lögreglunnar á höfuðborgarsvæðinu, Sambands íslenskra sveitarfélaga og Reykjavíkurborgar muni skila innviðaráðherra tillögum sínum til úrbóta í júní 2022.
Innviðaráðuneytið og stofnanir þess óska eftir tillögum um hvernig megi einfalda regluverk og bæta þjónustu á vegum ráðuneytisins og stofnana þess. Sjá frétt af vef ráðuneytisins:
Innviðaráðuneytið og stofnanir þess óska eftir tillögum um hvernig megi einfalda regluverk og bæta þjónustu á vegum ráðuneytisins og stofnana þess. Allir eiga kost á því að taka þátt í netkönnuninni til og með 6. maí nk. í samráðsgátt stjórnvalda.
Markmiðið er bæta þjónustu hins opinbera með því að greina hvort og hvar lagðar eru óþarfar, flóknar eða óljósar byrðar á einstaklinga, fyrirtæki, sveitarfélög eða félagasamtök sem þurfa þjónustu eða leita erinda hjá ráðuneytinu eða stofnunum þess.
Könnunin snýr að innviðaráðuneytinu og sjö fagstofnunum þess en þær eru: Byggðastofnun, Húsnæðis- og mannvirkjastofnun, Rannsóknarnefnd samgönguslysa, Samgöngustofa, Skipulagsstofnun, Vegagerðin og Þjóðskrá Íslands.
Ábendingar geta verið af ýmsum toga og geta snúið að íþyngjandi reglum, skorti á leiðbeiningum eða upplýsingum, hvar þjónustuferlar gætu verið betri eða stafrænni eða hvort þjónustu vanti eða þurfi að breyta vegna breytinga í samfélaginu.
Verkefnið er ein af áherslum innviðaráðherra í takt við stefnu ríkisstjórnarinnar um að einfalda regluverk í þágu atvinnulífs og almennings.
„Við fórum í sambærilegt átak fyrir tveimur árum og fengum fjölmargar gagnlegar ábendingar. Við gátum til að mynda nýtt nokkrar af ábendingunum í undirbúning að því að gera umgjörð almenns ökunáms stafræna frá upphafi til enda. Með aðstoð almennings, fyrirtækja og stofnana viljum við bæta þjónustu stjórnsýslunnar eins og kostur er og hvetjum fólk til að taka þátt í netkönnun ráðuneytisins,“ segir Sigurður Ingi Jóhannsson, innviðaráðherra.
Fyrir tveimur árum réðist ráðuneytið (þá samgöngu- og sveitarstjórnarráðuneytið) í fyrstu könnun af þessu tagi og bárust þá rúmlega 50 ábendingar sem unnið var úr bæði í stofnunum og ráðuneytinu í samræmi við aðgerðaáætlun þar að lútandi. Frá því að síðasta könnun var gerð hafa málaflokkar húsnæðis- og mannvirkjamála annars vegar og skipulagsmála hins vegar færst til ráðuneytisins.
Í dag var nafn nýs ábendingarkerfis kynnt í föstudagskaffinu, nafnið Bendill varð hlustskarpast í nafnasamkeppninni, en svo skemmtilega vill til að það voru fimm einstaklingar sem að komu með þessa sömu tillögu, því voru fleiri sem að fengu vinning í morgun en upphafleg stóð til. Í þeim hóp voru þau Edda Björk, Hallgrímur, Kristín Helga, Sigfús og Rafn. Dregið var um fyrstu verðlaun og fékk Edda Björk vinninginn. Yfir 70 tillögur að nafni bárust í gegnum Bendil og því frábær þátttaka í þessari skemmtilegu keppni.
Jón Gunnar fór svo yfir nokkur atriði; m.a. rekstur stofnunarinnar í upphafi árs, niðurstöðurnar úr HR Monitor viðhorfskönnuninni, skráningu fyrstu rafmagnflugvélarinnar á Íslandi, nýsmíðaverkefni skipa, slysaskýrslu í umferð og ýmislegt fleira. Fyrir þau sem komust ekki í morgun er hægt að nálgast glærurnar hér.
