Month: February 2023

Frétt af vef innviðaráðuneytisins:

Sigurður Ingi Jóhannsson, innviðaráðherra, tók þátt í óformlegum ráðherraráðsfundi samgöngu- og orkumálaráðherra ESB um orkuskipti í samgöngum sem var haldinn í Stokkhólmi í gær og í dag. Guðlaugur Þór Þórðarson, umhverfis-, orku- og nýsköpunarráðherra sótti jafnframt fundinn. Þátttakendur ræddu ýmsar áskoranir í orkuskiptum í þremur fundarlotum. Ein þeirra var sameiginlegur fundur samgöngu- og  orkumálaráðherra þar sem fjallað var um áskoranir við að tryggja nægjanlega græna orku til orkuskipta og fyrir hagkvæma og skilvirka framleiðslu á vetni og rafeldsneyti.

Á fundi samgönguráðherra komu fram áhyggjur margra um að það hallaði á samkeppnisstöðu ESB- og EES-ríkja í grænum lausnum sérstaklega vegna örvunaraðgerða stórra ríkja utan Evrópu í formi ríkisstyrkja og skattaafslátta til að styðja við orkuskipti. Mikilvægt væri að Evrópa héldi samkeppnisforskoti í grænum tæknilausnum. Í þessu sambandi ræddi innviðaráðherra áhrif viðskiptakerfis með losunarheimildir á samkeppnistöðu tengiflugvallarins á Íslandi og íbúa fjarlægustu svæða Evrópu. Gjaldtakan setti Evrópu beinlínis í lakari stöðu á alþjóðlegum samkeppnismarkaði, sérstaklega í ljósi þess að önnur ríki væru að styrkja grænar lausnir. Það væri vont fyrirkomulag að samgönguyfirvöld bæru ekki ábyrgð eða hefðu beina aðkomu að Evrópugerðum um orkuskipti sem hefðu mikil áhrif á samgöngur líkt og ETS-viðskiptakerfið.

Innviðaráðherra ræddi einnig góðan árangur við rafvæðingu fólksbílaflotans og uppbyggingu hleðslustöðva á Íslandi. Á hinn bóginn væru orkuskipti skammt á veg komin hvað varðar þungflutningabifreiðar. Í þeim efnum ætti eftir að yfirstíga margar áskoranir til þess að ná fram hagkvæmum lausnum s.s. með samkeppnishæfri framleiðslu á grænni orku, vetni eða rafeldsneyti, uppbyggingu orkustöðva og tæknilausnum.

Á sameiginlegum fundi samgönguráðherra og orkuráðherra kom fram að miklar áskoranir væru fólgnar í því að tryggja næga græna orku og við framleiðslu á vetni og vetnis afleiddum orkugjöfum s.s. ammoníak fyrir orkuskipti í samgöngum. Auk þess væri það áskorun að Bandaríkin og Kína hefðu ákveðið að niðurgreiða framleiðslu á grænu vetni, 3 dollara á kg. Þetta setti Evrópu í lakari stöðu við framþróun flutningatækni fyrir flutninga yfir lengri vegalengdir og á alþjóðavísu. Þá kom einnig fram mikilvægi þess að einfalda regluverk um leyfisveitingar á sviði orkuvinnslu og gera það skilvirkara.

Vegagerðin stendur fyrir brúarráðstefnunni Byggjum brýr 26. apríl 2023 í Háteigi á Hótel Reykjavík Grand frá klukkan 9:00 til 16:30. Fjallað verður um brýr í víðu samhengi og litið til fortíðar, nútíðar og framtíðar. Meðal fyrirlesara eru erlendir brúarverkfræðingar, íslenskir sérfræðingar, verktakar í brúargerð og fræðimenn.

Á Íslandi eru 1.185 brýr, þar af eru 225 þeirra á Hringveginum. Á brúarráðstefnunni verður farið yfir sögu brúa á Íslandi, hver staðan er á fækkun einbreiðra brúa, skoðaðar nokkrar áhugaverðar brýr sem eru í framkvæmd eða á teikniborðinu og farið yfir áskoranir framtíðar. Þá verður hönnun brúa í tengslum við náttúruhamfarir, áhrif loftslagsbreytinga og áskoranir verktaka í brúargerð einnig til umfjöllunar.

Nákvæm dagskrá ráðstefnunnar verður kynnt þegar nær dregur.

Ráðstefnugjald er 9.000 krónur en afsláttur veittur eldri borgurum og námsfólki. Innifalið í gjaldinu er aðgangur, veitingar í kaffihléum, hádegisverður og móttaka að ráðstefnu lokinni.

Frétt á vef Vegagerðarinnar

Eins og fram kom í pósti frá Jóni Gunnari fyrir helgi er nú að hefjast verkefni um nýjar ljósmyndir fyrir Samgöngustofu, til að nota við kynningar og fræðsluna okkar. Nýja ásýndin frá miðju síðasta ári felur m.a. í sér fallegar myndir af notendum í samgöngum. Sá böggull fylgdi skammrifi að fjöldi þeirra er takmarkaður og að auki er heimild til að nota myndirnar tímabundin út þetta ár. Því höfum við gert áætlun um nýjar myndir í svipuðum dúr til að nota í sama tilgangi. Markmiðið er að eignast gott safn ljósmynda sem við getum birt með stolti. Svo verkefnið verði sem hagkvæmast er planið að vinna það sem mest sjálf á venjulegum vinnutíma. Einar Magnús Magnússon í öryggis- og fræðsludeild hefur tekið að sér að taka myndirnar, en hann er einmitt afar flinkur og vandvirkur ljósmyndari. Hugmyndin er jafnframt að leita liðsinnis úr röðum starfsfólks Samgöngustofu til að sitja fyrir á myndum í umferð, flugi og siglingum. Ekki verður greitt sérstaklega fyrir þátttökuna en ætlunin er að veita smá þakklætisvott í formi gjafabréfa fyrir viðvikið. Að sjálfsögðu verður samþykki fólki í sjálfsvald sett en vonast er til að umleitunum verði vel tekið.

Kolbeinn Arnarson hefur tekið við formennsku umhverfishóps Samgöngustofu af Helgu Finnsdóttur. Kolbeinn hefur mikinn metnað fyrir umhverfismálum og hefur t.a.m. verkefnastýrt innleiðingu grænna skrefa hjá Landgræðslunni, skrifað bachelorritgerð um sjálfbæra landnýtingu og komið fram í panel á Matvælaþingi að ræða sjálfbæra matvælaframleiðslu.

Helsta verkefni umhverfishópsins um þessar mundir er að klára innleiðingu Grænna skrefa í ríkisrekstri en Samgöngustofa á aðeins fimmta og síðasta skrefið eftir. Áætlað er að innleiðingu fimmta skrefsins ljúki um mitt ár.

Það er hún Hulda Finnsdóttir sem velur föstudagslagið í þetta skiptið. Um val sitt segir hún:

Þetta lag minnir mig á gamla tíma þegar ég fór í interrail með vinkonum mínum um Evrópu.

Við byrjuðum að fara til Spánar og enduðum í Danmörku á tónleikum með Kanye West.

Þetta var alveg ógleymanleg ferð.

Ég skora á Andra þór fyrir næsta föstudag

Í janúar fórum við aftur af stað umferðarfræðslu í framhaldsskóla eftir langa pásu í kringum Covid. Bjarklind í öryggis- og fræðsludeild sér um að fara í framhaldsskólana og nú þegar hefur hún farið í FÁ, Kvennó og MH og fleiri fyrirlestrar hafa verið bókaðir á næstu vikum.

Í fræðslunni er farið yfir bílprófið, sekti og punkta og umferðaröryggi. Sérstök áhersla er lögð á að vera ekki í símanum undir stýri, beltanotkun og að keyra ekki undir áhrifum. Vel hefur verið tekið á móti okkur og ungmennin einstaklega áhugasöm um viðfagsefnið.

Samgöngustofa hefur sent skoðunarstofum ökutækja öryggistilkynningu vegna sprengingar í metangeymi bifreiðar 13. febrúar sl.

Í tilkynningunni kemur fram mikilvægi þess að herða eftirlit með eldsneytisþrýstigeymum fyrir metangas. Í skoðunarhandbók er krafa um að skoðaðar séu viðurkenningamerkingar og gildistímamerkingar á þrýstigeymum af þessu tagi. Í nýrri skoðunarhandbók ökutækja sem tekur gildi 1. mars nk., eru skoðunaratriði og dæmingar vegna þrýstigeymanna ítarlegri en verið hefur.

Öryggistilkynningin beinir því til skoðunarstofa að við reglubundna skoðun verði þrýstigeymar fyrir metan skoðaðir sérstaklega vel, m.a. gildistími og mögulegur styrkleikamissir.

Öryggistilkynningar má finna hér á ytri vefnum okkar.

Hvað eru mörg K í því?

Í tilefni þess að ferðanefnd og Farsýslan kynnti í vikunni staðsetningu árshátíðar og fræðsluferðar 2023 – KAUPMANNAHÖFN – var boðið uppá dejlig danska súkkulaðiköku með morgunkaffinu í morgun.

Skráning er í gangi (til 3. mars) hjá Thelmu – sendið póst á thelma.d.haraldsdottir@samgongustofa.is

Það er hún Soffía Gestsdóttir sem velur föstudagslagið að þessu sinni. Um val sitt segir hún:
Við sátum systurnar, spenntar með segulbandstækið á milli okkar. Sony tæki sem var besta græjan af öllum tækjum. Við höfðum fengið það í fermingargjöf (sameiginleg gjöf eins og hárblásarinn og margt fleira) nokkrar kasettur fylgdu með.

Lög unga fólksins voru að byrja í útvarpinu og þá var tekið upp. Það var vandasamt verk og ekkert mátti fara úrskeiðis. Þátturinn var á dagskrá 1958-1987. Þetta lag sem ég valdi þótti með því flottara og allir þekktu það og kunnu textann.

Kallað oft sorglega lagið af okkur vinkonunum. Við urðum fyrir miklum vonbrigðum þegar við sáum mynd af söngvaranum mörgum árum seinna.

En alltaf hægt að hlusta þarf ekkert að horfa.

Mæli með Huldu Finns í næstu viku

Í dag fóru í loftið tvennar starfsauglýsingar.

Auglýst er eftir rafmagns sérfræðing í skipatækni og forritara.

Samstarfið við Stafrænt Ísland heldur áfram að gefa og nú eru ýmsar upplýsingar um ökutæki landsmanna komnar inn á island.is og í island.is appinu. Það sem ökutækjaeigendur geta gert/séð núna á island.is er:

• Skoðað yfirlit og upplýsingar um ökutæki í sinni eigu/umráðum
• Sótt eignastöðuvottorð og ferilskýrslu
• Skoðað ökutækjaferilinn
• Skráð nafnleynd á/af og flett upp í ökutækjaskrá (5 á dag).

Ýmis verkefni eru svo í farveginum með Stafrænu Íslandi sem hefur verið sagt frá áður eins og flutningur vefsins yfir á island.is og tenging við pósthólf island.is. Við munum flytja nánari fréttir af þeim verkefnum á næstu misserum.

Við hvetjum ykkur til þess að prufa að skrá ykkur inn á island.is og skoða upplýsingarnar um ykkar ökutæki og eins að hala niður islands.is appinu og skoða sömu upplýsinga þar.

Dæmi um upplýsingar um ökutæki í island.is appinu:

Öryggis- og fræðsludeild hefur lokið við að skrá umferðarslys fyrstu tíu mánuði síðasta árs. Stefnt er að því að ljúka skráningu ársins snemma í apríl. Í gröfunum hér að neðan gefur að líta tölur fyrir heil ár síðustu ára ásamt spágildi fyrir árið 2022, byggt m.a. á fyrstu tíu mánuðum ársins.

Í fyrra létust eða slösuðust alvarlega 200 manns. Ungu ökumennirnir eru að standa sig mun betur en árið áður og sömuleiðis virðast erlendir ríkisborgarar sem hér eru búsettir lenda í minni vandræðum í umferðinni en árið 2021.

Á hinn bóginn virðist ölvunarslysum fjölga aðeins og eins og við var að búast fjölgar hjólaslysum, einkum og sér í lagi slysum á rafhlaupahjólum.

Slösuðu erlendu ferðafólki fjölgar aðeins á milli ára en m.v. hver fjölgun þeirra var á landinu milli ára þá var hver og einn ferðamaður mun öruggari í fyrra en árið 2021 og talsvert öruggari en hann var fyrir Covid.

Hér má sjá hver þróunin hefur verið á slysum á rafhlaupahjólum ásamt slysum á öðrum gerðum hjóla.

Nýtt frumvarp um breytingar á umferðarlögum snýr að auknu öryggi smáfarartækja. Byggir það á tillögum starfshóps sem m.a. Samgöngustofa tók þátt í:

• Nýr ökutækjaflokkur smáfarartækja verði innleiddur í umferðarlög. Miðað yrði við að smáfarartæki væru ekki hönnuð til hraðari aksturs en 25 km á klst. og að hjól yfir þeim mörkum væru óheimil í umferð.
• Hlutlægt viðmið um áfengismagn í blóði ökumanna smáfarartækja.
• Ökumenn smáfarartækja skyldu að lágmarki hafa náð 13 ára aldri og að yngri en 16 ára yrði gert skylt að nota hjálm.
• Almennt bann lagt við því að breyta hraðastillingum aflknúinna smáfarartækja, léttra bifhjóla og rafmagnsreiðhjóla.
• Akstur smáfarartækja í almennri umferð verði leyfður á vegum þar sem hámarkshraði er ekki meiri en 30 km á klst. að því gefnu að tillögur um ölvunarakstur og aldursmörk nái fram að ganga enda geti veghaldari lagt bann við umferð smáfarartækja á einstökum vegum eða vegarköflum þyki ástæða til þess.

Nánar má lesa um frumvarpið á vef Stjórnarráðsins.

Þessi mynd var tekin 19. mars 2021 þegar hlaðskoðunarmennirnir (RAMP inspectors) Rafn, Björn Vilberg og Þröstur skoðuðu vél frá rússneska flugfélaginu Volga Dnepr sem hafði lent í Keflavík. Þessi skoðun var ein þeirra sem gerð er eftir ákveðinni forskrift frá EASA – Flugöryggisstofnun Evrópu.

Í fyrra fóru þeir í 34 skoðanir en í ár er líklegt að þær verði nálægt 50. Fjöldi skoðana fer eftir flugumferð á Íslandi. Flestar skoðanir eru framkvæmdar á Keflavíkurflugvelli, síðan Reykjavíkurflugvelli og nokkrar á Akureyri.

Hvað er hlaðskoðun?
Hlaðskoðun er skyndiskoðun sem ekki er tilkynnt um fyrirfram. Skoðanir eru að hluta til ákveðnar af Flugöryggisstofnun Evrópu en nokkrar flugvélar velur Samgöngustofa til skoðunar eftir ákveðnum reglum. Yfirleitt beinast augun að erlendum flugvélum sem lenda á Íslandi en nokkrar vélar sem skráðar eru hér eru einnig skoðaðar. Skoðanirnar beinast aðallega að ástandi flugvélarinnar, leiðsögu- og öryggisbúnaði, flugmönnum, handbókum, skjölum og tölvubúnaði.

Nýlega fengu hlaðskoðunarmenn einnig víðtækar heimildir til að láta flugmenn og alla aðra sem koma að fluginu, s.s. flugfreyjur/þjóna, flugvirkja, flugumsjónarmenn o.s.frv. gangast annars vegar undir áfengismælingu og hins vegar fíkniefnapróf. Þessar mælingar verða gerðar á nokkrum erlendum og íslenskum flugáhöfnum og öðrum sem koma að flugi á þessu ári.

Ný skoðunarhandbók ökutækja tekur gildi þann 1. mars næstkomandi. Handbókin leysir af hólmi núverandi skoðunarhandbók sem tók gildi 1. maí 2017. Nýja handbókin er að langstærstu leyti sambærileg þeirri eldri hvað varðar skoðunaratriði, skoðunaraðferðir, tækjabúnað og dæmingar. Þó má finna áherslubreytingar, ný skoðunaratriði og nýja uppsetningu. Skoðunarhandbókin er byggð á reglugerð um skoðun ökutækja nr. 414/2021 og á tilskipun Evrópusambandsins nr. 2014/45, með síðari breytingum.

Meðal þeirra atriða sem breytast með nýrri skoðunarhandbók þann 1. mars eru:

• Viðmið um virkni stöðuhemla á öllum ökutækjum eru hert þannig að það sem áður var lagfæring verður nú endurskoðun.
• Óvirkir stöðuhemlar á stærri ökutækjum (bílum og vögnum) valda því nú að notkun þeirra verður bönnuð en var áður endurskoðun.
• Eitthvað er um strangari dæmingar á ljósabúnað, fá þá endurskoðun í stað lagfæringar áður. Á þetta við um flest ljósker (háljós, stöðuljós, hliðarljós, breiddarljós og þokuljós). Tiltölulega auðvelt er fyrir umráðamenn ökutækja að ganga úr skugga um að ljós virki áður en farið er í skoðun. Við þessa breytingu á handbókinni er því ástæða til að hvetja umráðamenn til að gera það.
• Algjörlega óvirk hemlaljósker (engin hemlaljós virka) verður nú akstursbann (var endurskoðun áður).
• Eitthvað er um hertar dæmingar á hjólbarða, alvarlegar skemmdir eða sprungur valda nú notkunarbanni en var endurskoðun áður, og mikið slit á hjólbörðum stærri ökutækja er alltaf endurskoðun (en gat verið lagfæring í einhverjum tilvikum áður).
• Í nýrri handbók verða betri upplýsingar fyrir skoðunarmenn af ýmsu tagi sem auka munu möguleika þeirra til að standa faglega að skoðun einstakra hluta ökutækisins.
• Verklagi skoðunarstofanna við meðhöndlun breytinga á ökutækjum hefur verið breytt. Breyting þarf nú að vera bæði leyfileg og helst fullfrágengin til að hljóta samþykki skoðunarstofu.
• Áréttaðar eru skyldur skoðunarmanna um að kynna niðurstöðu skoðunar vel fyrir eiganda (umráðamanni), sérstaklega þegar athugasemdir hafa verið gerðar við ástand ökutækisins.

Nánari upplýsingar um helstu breytingarnar má nálgast á vef Samgöngustofu.

Um daginn fóru nokkrir starfsmenn siglingasviðs siglingarsviðs Samgöngustofu á kynningu hjá Viking Björgunarbúnaði ehf. Kynningin fór fram í Hafnarfirði í húsnæði Vikings.

Kynntur var nýr losunar- og sjósetningarbúnaður frá fyrirtækinu Hammar (CM Hammar AB)
Einnig var kynnt ný útgáfa af hylkjum fyrir gúmmíbjörgunarbáta þar sem hægt er að fylgjast með ástandi báta með einfaldri raka- og kolsýrumælingu hylkisins. Þannig þarf ekki að opna hylkin eins oft til að skoða ástand á bátum og fylgihlutum. Þessar nýjungar er ekki viðurkenndar á Íslandi í dag en hluti af framþróuninni.

Það er mikilvægt að fylgjast vel með þróuninni á búnaði í siglingum og heimsóknir eins og þessar eru mjög gagnlegar fyrir starfsfólk sviðsins.

Fleiri myndir frá heimsókninni: