Starfsfólk Samgöngustofu sinnir eftirliti víða um land og reyndar lönd ef út í það er farið. Fyrr í mánuðinum fóru þeir Tómas Björn Ólafsson og Sigurjón Hreinsson í eftirlit á Vestfjarðarkjálkanum og tóku út lendingarstaði á Reykhólum og Hólmavík. Myndin er tekin á flugvellinum á Hólmavík af þeim félögum en þeir starfa í deild Flugleiðsögu, flugvöllum og flugvernd.
Arnór Magnússon fráfarandi umdæmisstjóri Isavia innanlandsflugvalla ehf. fyrir umdæmi 2 sem nær yfir áætlunarflugvelli og lendingarstaði á Vestfjörðum. Eftirlitsmenn Samgöngustofu hafa átt mjög farsælt samstarf við hann í gegnum árin. Á myndinni heldur hann á undirstöðu, sem notuð er til að halda föstum netabelgjum, sem eru gjarnan notaðir sem „markar“ til að sýna útlínur flugbraut lendingarstaða.Tómas Sigurgeirsson, bóndi að Reykhólum, ásamt vindpoka flugbrautarinnar og aðstöðuskúr. Tómas hefur umsjón með lendingarstaðnum Reykhólum. Hann fylgist t.d. með því hvort girðing umhverfis flugbrautina sé ósködduð og hlið hennar lokuð, svo að engin óviðkomandi umferð komist inn á flugvallarsvæðið. Einnig sinnir hann grasslætti öryggisvæða brautarinnar.
Fram til þessa hafa sérstakar siglingaleiðir ekki verið ákvarðaðar við Ísland, að undanteknum aðskildum siglingaleiðum við Reykjanes. Með aukinni starfsemi við strendur landsins hefur þörf á skilgreindum siglingaleiðum farið vaxandi en þær geta haft áhrif á skipulag og notkun strandsvæða.
Samgöngustofa hefur nú tilkynnt að á grundvelli 4. gr. laga nr. 119/2012 mun Samgöngustofa ákveða, eins og þörf er á, siglingaleiðir á innsævi við Ísland. Verður í þeirri vinnu leitað álits ýmissa sérfræðinga og hagaðila.
Fimmtudaginn 25. ágúst kl. 10-12 verður haldinn opinn kynningarfundur um málefni faggildingar á Íslandi. Faggilding er viðurkenning stjórnvalds á því að tiltekinn aðili sé hæfur til að vinna tiltekin verkefni. Málefnið varðar starfsemi Samgöngustofu á nokkrum sviðum, t.a.m. þurfa skoðunarstofur bifreiðaskoðana og skipaskoðana að vera faggiltar.
Sérfræðingar Samgöngustofu í siglingavernd héldu í vikunni fund með fulltrúum bandarísku strandgæslunnar (USCG). Í framhaldinu var litið inn til nokkurra hafna og eins og sjá má er meðfylgjandi mynd tekin á Akureyri. Heimsókn USCG er liður í mikilvægu samstarfi og samráði þjóðanna í þágu farsællar framkvæmdar siglingaverndar. Þessar heimsóknir eru gagnkvæmar og nánast árvissar.
Samkvæmt frétt á vef innviðaráðuneytisins hefur framkvæmdastjórn Evrópusambandsins hafið opið samráð um endurskoðun á þremur tilskipunum um veghæfi bifreiða og eftirlit með því. Frestur til að koma að athugasemdum og sjónarmiðum er til og með 28. september 2022.
Helsta markmið endurskoðunarinnar er að tryggja öryggis- og aðstoðarkerfi bifreiða séu áreiðanleg allan þann tíma sem þeim er ætlað að endast. Þess utan á að tryggja að prófanir á losun gróðurhúsalofttegunda frá ökutækjum sem gerðar eru við skoðun séu áreiðanlegar. Loks er ætlunin að bæta vistun og miðlun á upplýsingum um veghæfi á milli ríkja innan Evrópu.
Tilskipanirnar sem um ræðir eru:
Directive 2014/45/EC on the periodic roadworthiness tests for motor vehicles
Directive 2014/47/EC on the technical roadside inspections of commercial vehicles
Directive 1999/37/EC (as amended by Directive 2014/46/EC) on the registration documents for vehicles
Í efstu þremur sætunum eru Malta, Eistland og Lúxemborg, en næst á eftir Íslandi koma Holland, Finnland og Danmörk. Könnunin er ítarleg og byggist m.a. á upplifun notenda, en Evrópusambandið hefur sett það markmið að bæta notendaupplifun og stafræna þjónustu.
Í niðurstöðum könnunarinnar er Ísland nefnt sem leiðandi þjóð þegar kemur að rafrænni auðkenningu. Ísland er enn fremur í fyrsta sæti í notkun rafrænna skilríkja en í upphafi þessa árs voru 96% landsmanna 18 ára og eldri með rafræn skilríki. Þá er nú hægt að nýta stafrænar umsóknir eða stafræn samskipti í um 80% tilvika þegar sækja þarf opinbera þjónustu, en þar er Ísland sömuleiðis leiðandi meðal Evrópuþjóða.
Ísland er í 11. sæti þegar kemur að stafrænni þjónustu á netinu en 91 prósent opinberrar þjónustu er þegar hægt að leysa á netinu. Þá er Ísland í áttunda sæti þegar kemur að snjallsímavænni þjónustu með 98 prósentustig og fær Ísland.is appið sérstaka umfjöllun í skýrslunni.
Niðurstaðan sýnir að Ísland er vel yfir meðaltalinu í þremur af fjórum flokkum könnunarinnar, en unnið er markvisst að því að styrkja stöðu Íslands enn frekar næstu árin.
Bjarni Benediktsson, fjármála- og efnahagsráðherra:
„Það er alltaf ánægjulegt þegar við setjum okkur háleit markmið og náum þeim. Þessi niðurstaða er mikil viðurkenning fyrir öfluga vinnu síðustu missera, en við ætlum okkur auðvitað að gera enn betur á komandi árum.“
Í stafrænni stefnu hins opinbera sem gefin var út í fyrra er sett fram sú sýn að verða meðal allra fremstu þjóða heims í stafrænni þjónustu. Ísland nálgast það markmið hratt og hefur hækkað um sjö sæti frá árinu 2019. Lykiláherslur stefnunnar eru að auka samkeppnishæfni þjóðarinnar, bæta opinbera þjónustu, tryggja öruggari innviði og nútímalegra starfsumhverfi.
Eins og þið hafið kannski tekið eftir þá er mikið af frábæru myndefni að koma úr drónum frá eldstöðvunum. Mikill fjöldi „drónaflugmanna“ hefur safnast á svæðið eins og í gosinu í fyrra og getur flug dróna valdið hættu, ef ekki er farið eftir settum reglum, þegar mönnuð loftför fljúga yfir svæðið. Því ákváðum við í síðustu viku að árétta í fjölmiðlum og samfélagsmiðlum mikilvægi þess að drónaflugmenn fari eftir settum reglum og þá helst að gæta þess að fara aldrei yfir 120 metra frá jörðu og að þeim ber ávallt að víkja frá mönnuðum loftförum. Eftirfarandi er frétt af vefnum okkar, en hluti af henni birtust í fjölmiðlum í liðinni viku. Það er ágætt fyrir okkur sem hér störfum að vera meðvituð um þessar reglur, t.d. ef við erum sjálf að fljúga dróna í okkar frítíma:
Nú þegar eldgos er hafið að nýju á Reykjanesi vill Samgöngustofa, að gefnu tilefni, árétta reglur sem gilda um drónaflug. Þær eru settar til að tryggja öryggi, t.d. aðgreiningu dróna og annarra loftfara:
Drónar skulu EKKI fljúga hærra en 120 m yfir jörðu
Drónar skulu víkja fyrir mönnuðum loftförum
Dróna má ekki fljúga utan sjónsviðs stjórnanda hans
Umráðandi dróna ber ábyrgð á því tjóni sem kann að hljótast af notkun hans
Verði vart við brot sem geta stefnt öryggi í hættu gæti þurft að grípa til þess að setja verulegar takmarkanir eða bann við drónaflugi við eldstöðina.
Rannsóknarflug í forgangi
Vegna eldgossins má búast við reglubundnu rannsóknarflugi flugvéla og þyrlna á vegum stjórnvalda við eldstöðina. Flugið er í þágu almannavarna og vísinda og mun njóta forgangs fram yfir annað flug.
Til að tryggja öryggi verður svæði skilgreint sem hættu- eða haftasvæði fyrir starfrækslu flugvéla og þyrlna. Samhliða þessu verður skilgreint bannsvæði fyrir dróna á meðan rannsóknarflugið fer fram. Hætt er við að stuttur fyrirvari verði á slíku og mun umfang og gildistími markast af aðstæðum hverju sinni.
Stjórnendur dróna skulu fylgjast með nýjustu tilkynningum um slíkt bannsvæði á vef Almannavarna . Upplýsingar verða reglulega uppfærðar þar.
Ný heildarlög um áhafnir skipa voru nýlega samþykkt á Alþingi en lögin taka gildi 1. janúar 2023.1 Markmið laganna er, samkvæmt frétt á vef innviðaráðuneytisins, að tryggja öryggi áhafna íslenskra skipa og farþega, efla varnir gegn mengun frá skipum og tryggja meðal annars skilvirka menntun og þjálfun áhafna, skírteinisútgáfu, lágmarksmönnun, lögskráningu og bæta vinnuskilyrði áhafna. Lögunum er einnig ætlað að stuðla að jöfnu aðgengi kynjanna að menntun, þjálfun og störfum um borð í íslenskum skipum.
Þá veita lögin nægilegar heimildir til að innleiða þær kröfur sem leiðir af skuldbindingum samkvæmt samningnum um Evrópska efnahagssvæðið og öðrum alþjóðlegum skuldbindingum Íslands á sviði sjóréttar er lúta að áhöfnum skipum. Með lögunum er lagaumhverfi um áhafnir skipa einfaldað þannig að ein heildarlög koma í stað fernra laga. Þetta eru lög um bryta og matreiðslumenn í farskipum og fiskiskipum, nr. 50/1961, lög um áhafnir íslenskra farþegaskipa og flutningaskipa, nr. 76/2001, lög um áhafnir íslenskra fiskiskipa, varðskipa, skemmtibáta og annarra skipa, nr. 30/2007, og lög um lögskráningu sjómanna, nr. 35/2010.
Helstu breytingar með lögunum
Erlend skip. Auk allra íslenskra skipa ná lögin nú einnig til erlendra skipa sem notuð eru í atvinnuskyni á íslensku innsævi í 30 daga samfleytt, eða samtals 90 daga á ársgrundvelli. Eðlilegt er talið að öryggiskröfur um íslensk skip eigi við um þessi skip. Það gildir t.a.m. um skírteinakröfur, lágmarksmönnun, vaktstöðu, vinnu- og hvíldartíma og vinnuskilyrði. Þetta gæti t.d. átt við um áhafnir erlendra þjónustuskipa laxeldis, dýpkunarskipa, dráttarskipa, farþegabáta og farþegaskipa í útsýnis- og skoðunarferðum.
Verkefni nefnda til Samgöngustofu. Undanþágunefnd og mönnunarnefnd skipa lagðar niður og verkefni þeirra færð til Samgöngustofu, en Samgöngustofa hefur undanfarin ár annast skrifstofuhald fyrir nefndirnar.
Lágmarksmönnun. Í frumvarpi til laganna, sem ráðherra mælti fyrir í vetur, var lagt til að kveðið væri skýrar á um lágmarksmönnun réttindamanna á smáskipum að teknu tilliti til útivistar þeirra, þ.e. skipa sem eru 15 metrar og styttri að skráningarlengd. Markmiðið væri að fylgt verði svokallaðri 14 klst. reglu á grundvelli 64. gr. sjómannalaga (nr. 35/1985). Það þýðir að þegar útivist þeirra færi yfir 14 klst. skuli ávallt vera tveir skipstjórnarmenn um borð með tilskilin réttindi. Ekki var um nýmæli að ræða en mikilvægt talið að kveðið væri skýrt á um þetta í lögum.
Bráðabirgðaákvæði. Í meðförum þingsins var ákvæði til bráðabirgða samþykkt sem heimilar hásetum, sem hafa að baki siglingatíma í tólf mánuði á síðastliðnum þremur árum, að gegna stöðu stýrimanns sé útivist skips styttri en 19 klst. Gildir ákvæði þetta til 1. júlí 2024.
Eigandi smáskips. Nýtt ákvæði kveður á um að þegar eigandi smáskips (skv. skipaskrá) er lögskráður sem skipstjóri og smáskipavélavörður og er einn um borð, þurfi ekki stýrimann eða annan smáskipavélavörð þótt útvist fari fram yfir 14 klst.
Matsveinar eða brytar. Kröfum um að borð séu matsveinar eða brytar er breytt þannig að miðað verður við útivist skips en ekki stærð þess eins og gildandi lög kveða á um.
Jafnrétti. Við smíði lagafrumvarpsins var horft til áhrifa þess á jafnrétti kynja til að draga úr mun á þátttöku kynja í siglingum og sjósókn. Með stjórnvaldssektum er m.a. tryggt betur að skip sem mönnuð eru miðað við 14 tíma reglu haldi sig innan þess tímaramma. Talið að það auki líkur á að konur sinni störfum um borð í slíkum skipum. Þá var sérstaklega lögð áhersla á að draga úr karllægni í orðfæri laganna. Þannig er orðið „fiskari“ notað í stað „fiskimanns“ og „útgerð“ í stað „útgerðarmanns“.
Stjórnvaldssektir. Með lögunum fá Landhelgisgæsla Íslands og Samgöngustofa heimild til að leggja á stjórnvaldssektir fyrir brot á tilteknum ákvæðum laganna og reglum samkvæmt þeim.
Víðtækt alþjóðlegt regluverk er í gildi um áhafnir skipa sem byggir á samningum Alþjóðasiglingamálastofnunarinnar og Alþjóðavinnumálastofnunarinnar, sem og ákvæðum gerða sem teknar hafa verið upp í EES-samninginn. Nýju áhafnalögin taka tillit til allra þessara alþjóðlegu skuldbindinga.
Ný gjaldskrá Samgöngustofu tók gildi í gær, þann 1. ágúst 2022, í samræmi við auglýsingu innviðaráðuneytisins. Almennt er um að ræða 5% hækkun á gjaldskrárliðum. Einstaka gjaldskrárliðir hækka umfram 5% eins og númeraplötur þar sem verið er að leiðrétta skattheimtur og framleiðslukostnað en einnig hefur tímagjald fyrir útselda vinnu hækkað um 14,6%.
Flokkun á gjaldskrárliðum hefur verið endurskoðuð og hafa gjaldskrárliðir verið flokkaðir í kafla sem skiptast í:
Endurflokkunin gerir það auðveldara fyrir hagaðila að nálgast þær upplýsingar verið er að leita eftir.
Gjaldskráin byggir að mestu á gjaldskrá stofnunarinnar nr. 338 frá 2015 sem síðast tók breytingum þann 1. september 2020 með 2,5% hækkun á flesta gjaldaliði. Hægt er að sjá þróun einstakra gjaldaliða á vef Samgöngustofu.
