Month: November 2023

Jólahlaðborðið okkar er handan hornsins. Mæting kl. 19 í Gullhamra og borðhald hefst í kjölfarið.

Í dag hefja leynivinir störf um allt hús. Óhætt er að segja að ekki sé allt sem sýnist því leynivinir í ár hafa ráðið sér aðstoðarfólk og hætta engu við að koma upp um sig. Leynivinaleikurinn verður í fullum gangi í næstu þrjá daga og lýkur á föstudaginn með lítilli athöfn þar sem hulunni verður svipt af leynimakkinu.

Skráning er hafin á jólaskemmtun barnanna í Guðmundarlundi þann 9. desember kl 12.00 🎄

Skráning fer fram hér: https://forms.gle/PZWtKdMgDgryQ9PQ6

Hlökkum til að sjá sem flesta í hátíðarskapi og njótum samverunnar úti í náttúrunni.

Kær kveðja,

Farsýslan

Í dag fer í loftið fyrsta myndbandið af fjórum í jóladagatali Samgöngustofu þetta árið. Nýtt myndband verður svo birt í hverri viku fram að jólum á samfélagsmiðlunum okkar.

Þetta árið setjum við fókusinn á ungt fólk með sérstaka áherslu á fólk á bílprófsaldri. Í myndböndunum fáum við fjölbreyttan hóp af sérfræðingum til að fjalla um mikilvæg öryggismál í umferðinni. Okkur þykir mikilvægt að leita fleiri leiða til að miðla upplýsingum til unga fólksins. Þess vegna ætlum við að láta reyna á þessa aðferð í ár, að hafa stutt og hnitmiðuð skilaboð beint frá sérfræðingum til þeirra þar sem þau eru, á samfélagsmiðlum.

Í fyrsta myndbandinu eru gefin góð ráð fyrir ökunámið og þar er það hún Sigurlína okkar sem fer með aðalhlutverk og rúllar því upp. Einnig kíktum við í Ökuskóla 3 og sýnum aðeins frá því flotta starfi sem fer þar fram. Í næstu myndböndum verður svo áhersla lögð á þreytu undir stýri, rafhlaupahjól og það að sleppa símanum undir stýri.

Við verðum með gjafaleik á Instagram í tengslum við myndböndin og hvetjum við starfsfólk að sjálfsögðu til að taka þátt og deila leiknum með unga fólkinu í kringum sig.

Fylgstu vel með á Instagram í desember!

Í gær hófst 33. aðalfundur Alþjóðasiglingamálastofnunarinnar (IMO), stofnun SÞ sem setur alþjóðlegar reglur um siglingaöryggi og umhverfisvernd á sviði alþjóðasiglinga. Ísland er aðili að IMO og tekur Samgöngustofa því virkan þátt í starfinu árið um kring. Okkar fólk lætur heldur ekki sitt eftir liggja á aðalfundinum, sem haldinn er annað hvert ár. Hér má fylgjast með fundinum sem stendur til 6. desember.

Í dag, mánudag, býðst okkur bólusetning gegn árlegri inflúensu. Hjúkrunarfræðingur frá Heilsuvernd verður í Stéli 1 á þriðju hæð, kl. 13:45-14:45. Ekki þarf að skrá sig heldur er nóg að mæta.

Þau sem ekki geta notfært sér þessa tímasetningu geta komið til Heilsuverndar, Urðarhvarfi 14, 2. hæð. Opnir tímar eru alla virka daga til 15. desember. Aðrir tímar eftir samkomulagi.

Í nýrri skýrslu um aksturshegðun Íslendinga koma fram ýmsar áhugaverðar niðurstöður. Meðal annars minnkar notkun rafhlaupahjóla hjá fólki undir áhrifum milli ára, um heil 23%. Mikil umræða í samfélaginu, sem er ekki hvað síst að þakka hinni frábæru herferð Ekki skúta upp á bak, hefur því haft mælanlega jákvæð áhrif. Meira en helmingur svarenda vill auka takmarkanir á rafhlaupahjól. Til dæmis aldurstakmarkanir, lokun leiga á kvöldin eða jafnvel banna hjólin alfarið.

Fleiri merkilegar niðurstöður má sjá í skýrslunni. Farsímanotkun undir stýri eykst milli ára, nema notkun samfélagsmiðla sem minnkar eilítið. Farsímanotkun undir stýri er í engu samræmi við það sem við teljum hættulegt. 99% Íslendinga telja hættulegt að skoða samfélagsmiðla en 23% gera það samt stundum.

Hér má sjá samantekt á helstu niðurstöðum skýrslunnar.

Síminn býður starfsfólki Samgöngustofu upp á gæða sjónvarpsþjónustu, net og farsíma á enn betri kjörum. Fulltrúar Símans munu koma í heimsókn til okkar 4. desember og kynna tilboðin en einnig er hægt að panta símtal frá þeim og fara yfir málin.

Hér má sjá tilboðin til starfsfólks Samgöngustofu.

Á sunnudaginn var haldinn alþjóðlegur minningardagur um fórnarlömb umferðarslysa. Þema dagsins var viðbrögð á slysstað og höfum við af því tilefni látið gera fræðslumynd þar um. Meginreglan þegar komið er að slysi er að muna fjóra punkta; Tryggja vettvang, meta aðstæður, hringja í 1-1-2 og hlúa að slösuðum. Er myndin þegar komin í birtingu á RÚV og verður birt á samfélagsmiðlum nú á næstu dögum.

Hér má sjá nýju fræðslumyndina um viðbrögð á slysstað.

Alþjóðlegur minningardagur um fórnarlömb umferðarslysa var í gær og voru af því tilefni haldnar minningarathafnir víða um land. Áhrifamikil minningarathöfn fór fram við þyrlupallinn við Landspítalann í Fossvogi þar sem flutt voru ávörp og viðhöfð var mínútuþögn. Í ár var sérstök áhersla lögð á fyrstu viðbrögð á slysstað og neyðarhjálp.

Í dag hófst ráðstefna Alþjóðaflugmálastofnunarinnar ICAO um mögulega valkosti um eldsneyti í flugi. Er þetta þriðja ráðstefnan af þessum toga á vegum stofnunarinnar og fer nú fram í Dubai. Til umræðu verða framfarir í þróun vistvænni orkugjafa og skilgreining sameiginlegrar stefnu þjóða í þessum efnum. Fulltrúar frá 94 þjóðríkjum, þar á meðal Íslandi, taka þátt í ráðstefnunni sem stendur til föstudags.

Starfsdagur hjá deild leyfisveitinga og ökunáms var haldinn þann 16. nóvember. Að þessu sinni var starfsdagurinn haldinn á á Suðurlandi en lagt var af stað á Selfoss með nesti og nýja skó kl. 8 um morguninn. Dagurinn hófst með kaffi og bakkelsi á lögreglustöðinni á Selfossi en þaðan var farið, ásamt fulltrúum vegaeftirlits á Suður- og Vesturlandi, á nýja vigtarstæðið á Suðurlandsvegi (á milli Hveragerðis og Selfoss) og skoðaðir vörubílar með farm með tilliti til þyngdar og leyfa. Í framhaldi var ekið á Geysi þar sem fylgst var með leyfsskyldum akstri. Dagurinn var virkilega fróðlegur og skemmtilegur.

Sunnudaginn 19. nóvember er alþjóðlegur minningardagur um þau sem látist hafa í umferðinni. Í ár verður minningarathöfn við þyrlupallinn við Landspítalann í Fossvogi klukkan 14:00. Auk þess verða viðburðir víða um land á vegum Slysavarnafélagsins Landsbjörg. Hægt er að sjá nánari upplýsingar á www.minningardagur.is. Öll eru velkomin.

Dagskrá minningarathafnar í Reykjavík

14:00 Minningarathöfnin sett – Bergþóra Þorkelsdóttir forstjóri Vegagerðarinnar
14:05 Forseti Íslands Guðni Th. Jóhannesson flytur erindi
14:10 Einnar mínútu þögn
14:11 Willum Þór Þórsson heilbrigðisráðherra flytur erindi
14:16 Inda Hrönn Björnsdóttir fjallar um sína reynslu
14:25 Formlegri athöfn slitið
14:25 Boðið upp á kaffi, kakó og með því

Í morgun hélt stjórn Farsýslunnar stutta kynningu á starfinu framundan og stjórnarmeðlimir kynntu sig. Framundar er margt spennandi, til dæmis leynivinaleikur, jólaskreytingakeppni, jólahlaðborð og jólaskemmtun barnanna í Guðmundarlundi. Auglýst var eftir liðsauka í stjórnina og eru áhugasöm beðin að senda póst á farsyslan@samgongustofa.is eða einhvern úr stjórninni.

Þá var minnt á facebook síðu Farsýslunnar og fólk minnt á að nota hana, til dæmis til að láta vita um skemmtilega viðburði sem starfsfólk ætlar að taka þátt í, setja inn myndir og fleira.

Skráning á jólahlaðborð Farsýslunnar

Dagur íslenskrar tungu er haldinn hátíðlegur á fæðingardegi Jónasar Hallgrímssonar, hins ástsæla þjóðskálds og náttúrufræðings. Að því tilefni barst góð ábending um að flagga íslenska fánanum hér fyrir utan hús, eins og við viljum gera á fánadögum sem bera upp á virkan dag.

Í dag er tilvalið að nota okkar gróskumiklu íslensku sem mest því þannig dafnar hún best. Um leið er gaman að rifja upp að Jónas var mikill nýyrðasmiður. Hann bjó til dæmis til orð eins og láréttur, fjaðurmagnaður, mörgæs, líkindareikningur og ljóshraði. Fleiri nýyrði Jónasar má finna hér.

Nú hefur enn eitt framfaraskrefið í stafrænni þróun Samgöngustofu verið stigið: Umsókn ökumannskorta á Ísland.is. Atvinnubílstjórar geta nú sótt um ökumannskort með rafrænni auðkenningu þar sem upplýsingar um ökuréttindi, ljósmynd og undirskrift eru sótt í gagnagrunn sýslumanns. Áður þurfti að fylla út og undirrita umsókn á pappír og skila til okkar ásamt afriti af ökuskírteini og passamynd.

Stafrænt umsóknarferli hefði ekki verið mögulegt nema með tilkomu nýs pöntunarkerfis sem tekið var í notkun í lok ágúst eftir langa bið. Nýja pöntunarkerfið, sem ber nafnið Fajitas, leysti af hólmi tvö eldri kerfi og einfaldaði þar til muna alla umsýslu hér innanhúss.

Eins og er er einungis hægt að sækja um ökumannskort með stafrænum hætti en stefnt er að því að síðar verði einnig mögulegt að sækja um fyrirtækjakort.

Nú er Eggert farinn að taka strætó eins og sjá má á meðfylgjandi mynd. Hann skútar þá vonandi ekki uppá bak á næstunni!

Ef þið rekist á Eggert í strætó væri gaman ef þið mynduð setja mynd af því á ykkar samfélagsmiðla og tagga/merkja Samgöngustofu 🙂