Napóleonsskjölin er ný íslensk mynd sem er nú sýnd í bíóhúsum landsins. Gaman að segja frá því að í einu atriði myndarinnar má sjá fræðslumyndband frá okkur í bakgrunni. Í atriðinu heyrist vel í Einari Magnúsi leggja okkur línurnar um það hvernig við eigum að fara að til að tryggja öryggi barnanna okkar í bílnum. Hvetjum ykkur til að kíkja eftir þessu ef þið farið og sjáið myndina!
Í janúar var hófst innleiðingarferli vegna ISO 27001 (stjórnkerfi upplýsingaöryggis). Verkefnið verður unnið með Sigurjóni Árnasyni ráðgjafa, en hann mun leiða okkur í gegnum ferlið. Díana Björk og Lárus Long munu leiða verkefnið fyrir hönd stofnunarinnar og vinna náið með Sigurjóni.
Verkefnahópur hefur verið skipaður en hann samanstendur af:
Birgir Gunnarsson
Díana Björk Eyþórsdóttir
Guðbjörn Jensson
Hallgrímur Hannesson
Harpa Þuríður Böðvarsdóttir
Kolbeinn Arnarson
Kristín Helga Markúsdóttir
Lárus Long
Ólöf Friðriksdóttir
Sveinn Ólafsson
Haldin hafa verið tvö námskeið þar sem farið var yfir hvernig við greinum meginferla stofnunarinnar. Meginferlar hverrar deildar ættu að vera um tveir til þrír og lýsa helstu verkefnum eða hlutverki hverrar deildar. Á seinna námskeiðinu var farið í hvernig við áhættumetum ferla.
Næsta skref er því að skilgreina meginferli stofnunarinnar, mappa þau upp og gefa út í gæðahandbók. Áætlað er að innleiðingarverkefninu í heild ljúki í lok desember á þessu ári.
Nú í vikunni fengum við fræðsluerindi frá Janfréttisstofu; KÁvitann. Erindið var vel sótt af starfsfólki og góðar umræður sem fylgdu. Erindið er gott og þarft og mikilvægur liður í því að byggja upp góða vinnustaðamenningu.
Samgöngustofu á stefnu og áætlun gegn einelti, kynferðislegri áreitni, kynbundinni áreitni, ofbeldi og annarri ótilhlýðilegri háttsemi. Stefnuna má finna í CCQ (STE-0015).
Minnum einnig á Bendil, ábendingarkerfi Samgöngustofu, það er hnappur hér á innri vefnum. Þar er hægt að koma ýmis komar ábendingum á framfæri, hægt er að senda ábendingu inn undir nafni eða nafnlaust.
Þá er ávallt velkomið að leita til mannauðsdeildar, t.d. ef fólk vill ráð eða álit á einhverju sem það hefur orðið vitni að innan stofnunarinnar t.a.m. óviðeigandi myndbirtingar á veggjum (táknræn birtingarmynd).
Stefnuna má opna með að smella >HÉR<
Hér má skoða glærur KÁvitans frá Jafnréttisstofu.
Frekari upplýsingar og orðskýringar má finna t.a.m. á heimasíðu Jafnréttisstofu.
Í morgunkaffinu fór Katrín yfir helstu störf flugrekstrar- og skírteinadeildar sem eru mörg og áhugaverð. Deildin sér um leyfisveitingar til fyrirtækja, svo sem flugrekenda, flugskóla og fluglæknasetra og eftirlit með þeim. Útgáfa flugstarfaskírteina fer fram hjá deildinni en það eru ýmis skírteini flugmanna, skírteini flugumferðarstjóra og skírteini flugvirkja sem dæmi.
Deildin heldur bókleg próf sjö sinnum á ári en þá mæta flugnemar hingað í hús og þreyta einka- eða atvinnuflugmannspróf. Fram kom í kynningunni að ásókn í flugpróf hefur minnkað mikið á undanförnum árum og eru nokkrar ástæður fyrir því. Ber þar fyrst að nefna covid, en aðgengi að námslánum og framboð á flugnámi spilar þar líklega stórt hlutverk.
Heilbrigðisskor deildarinnar sér um heilbrigðismál flugmanna og gefur út leyfi til fluglækna og hefur eftirlit með þeim. Á síðustu árum hafa verið gerðar auknar kröfur um mat á geðheilbrigði flugmanna, en allir flugmenn skulu núna undirgangast geðheilbrigðismat í heilbrigðisskoðunum.
Deildin hefur undirbúið sig fyrir innleiðingu á reglum sem varða starfrækslu dróna sem hafa verið í gildi í aðildarríkjum ESB í nokkurn tíma. Nú hefur verið opnað fyrir valkvæða skráningu og próf umráðamanna dróna á vefsvæðinu flydrone.is. Þessi skráning og próf munu svo verða skylda þegar reglurnar hafa tekið gildi á Íslandi. Í millitíðinni eru séríslenskar reglur í gildi.
Hlaðskoðanir á flugrekendum eru framkvæmdar af deildinni og áfengis- og fíkniefnamælingar fyrir áhafnir íslenskra og erlendra loftfara hefjast í þessum mánuði.
Kynningu Katrínar frá í morgun má finna hér.
Það er hún Ásta Björk sem velur föstudagslagið að þessu sinni. Um val sitt segir Ásta:
Ég vel lagið Red red wine með UB40. Við vinkonurnar tókum okkur stundum “langt“ (skróp) matarhlé í skólanum til að fara heim að lesa Ísfólkið. Þá var hlustað á UB40 á kassettu og þetta lag var í miklu uppáhaldi.
Ég skora á Soffíu J Gestsdóttur að koma með næsta föstudagslag 🙂
Í hádeginu var bryddað upp á þeirri nýbreytni að fá gestakokk í matseldina en það var hann Vivek Sharma eftirlitsmaður hafnarríkiseftirlits sem eldaði með þeim Bjössa og Erni að þessu sinni. Boðið var upp á Butter kjúkling, hrísgrjón, sósu go naan brauð.
Undirritaður var mjög spenntur enda mikill aðdáandi indversks matar. Það er óhætt að segja að rétturinn hafi staðið undir væntingum og fær hann 10 af 10 mögulegum í einkunargjöf vefstjórans.
Takk kærlega Vivek, Bjössi og Örn! (væri hægt að endurtaka leikinn sem fyrst? :))
Gengið hefur verið frá ráðningu fagstjóra í fjármáladeild. Ráðin var Erna Guðmundsdóttir.
Erna hefur BS gráðu í viðskiptafræði, með áherslu á verkefnastjórn, frá háskólanum á Bifröst. Síðastliðin rúmlega tuttugu ár hefur Erna starfað hjá LSR og gegnt ýmsum störfum þar, síðast sem verkefnastjóri.
Erna hefur störf 14. febrúar næstkomandi, verður staðsett á annarri hæðinni.
Í vetartíð er mikilvægt að aðkoman sé örugg og góð. Snorri mætir alltaf snemma og tryggir að stéttin sé mokuð fyrir viðskiptavini og okkur hin. Í morgun kölluðu önnur verkefni en þá greip Atle Vivås skófluna og dreif í að hreinsa gönguleiðina. Þessi snjór mokar sig víst ekki sjálfur, takk fyrir þjónustuna!
Í gær var haldinn fundur um rafmagnsbruna í skipum í Flugröst. Fundurinn var haldinn til að opna vettvang til að meta hvað þarf að gera í regluverki, þjálfun og viðbragði ef eldar koma upp í vélbúnaði rafknúinna skipa eða ef eldar koma upp í rafmagnsbílum um borð.
Ólafur Ragnarsson fagstjóri hafnarríkiseftirlits sagði frá fundi sem hann sótti í Noregi á haustdögum. Þar var farið yfir bruna í farþegabátnum Brim sem tók slökkvilið 7 daga að slökkva. En eldurinn braust út í rafgeymum skipsins.
Í kjölfarið stjórnaði Halldór Zoega deildarstjóri siglinga- og hafnareftirlits umræðum en þátttakendur voru frá slökkviliði, Húsnæðis-og manvirkjastofnun, tryggingarfélögum, Landhelgisgæslunni, flokkunarfélögum, Vegagerðinni og Samgöngustofu.
Niðurstaða fundarins var að stofna hóp til að halda vinnufund eða ráðstefnu til að fara betur yfir þessi mál. Á fundinn á að fá fyrirlesara frá Noregi og aðilum hér innanlands sem skoðað hafa þessi mál. Samgöngustofa mun leiða þetta starf.
Fjármála- og efnahagsráðuneytið og innviðaráðuneytið hafa sett á fót verkefnastofu sem falið verður að vinna með ráðuneytunum að mótun tillagna um nýtt fyrirkomulag tekna af vegasamgöngum til framtíðar samkvæmt frétt á vef innviðaráðuneytisins.
Í fréttinni segir:
Undanfarin ár hefur tæknileg og samfélagsleg þróun orðið til þess að tekjur ríkisins af umferð og ökutækjum hafa dregist mikið og hratt saman. Fram hafa komið nýir orkugjafar og sparneytnari ökutæki sem losa minni koltvísýring. Stjórnvöld hafa sett fram stefnumörkun um að hraða orkuskiptum og auka notkun hreinna orkugjafa í samgöngum, þar á meðal með ívilnunum, sem hefur sömuleiðis í för með sér að tekjur ríkisins fara þverrandi. Samhliða ríkulegum hvötum til orkuskipta hefur mikill árangur náðst í orkuskiptum bílaflotans. Fyrir vikið greiðir stækkandi hópur afar lítið fyrir notkun vegakerfisins.
Það er stefna stjórnvalda sem birtist í fjármálaáætlun fyrir árin 2022-2026 að tekjur af þessu tagi nái sínu fyrra sögulega meðaltali, enda hafa þær verið mikilvægur þáttur í tekjuöflunarkerfi ríkisins. Hefur einna helst verið til skoðunar að taka upp almenna innheimtu á gjöldum af notkun ökutækja, s.s. kílómetragjald.
Á sama tíma hafa stjórnvöld metnaðarfull áform um áframhaldandi uppbyggingu og viðhald samgönguinnviða, meðal annars verkefni sem fjármögnuð verði með umferðar- eða veggjöldum. Annars vegar er um að ræða uppbyggingu samgangna á höfuðborgarsvæðinu, sem sérstöku opinberu hlutafélagi, Betri samgöngum, hefur verið falið að annast um á grundvelli svonefnds samgöngusáttmála. Hins vegar eru nokkur stærri þjóðhagslega mikilvæg innviðaverkefni sem til stendur að fjármagna með notkunargjöldum. Þessi áform fela í sér að unnt verði að hækka fjárfestingastigið á komandi árum með hraðari uppbyggingu stærri og arðbærra samgönguinnviða en hefðbundin framlög í fjárlögum til samgönguáætlunar gera kleift.
Þessi áform kalla á að mótuð verði heildstæð framtíðarsýn um breytt fyrirkomulag gjaldtöku af ökutækjum, eldsneyti og afnotum vegakerfisins sem geti orðið sjálfbært til langrar framtíðar. Þannig verði dregið úr sértækum gjöldum á borð við eldsneytisgjöld, vörugjöld o.fl. og tekið upp gagnsærra og sanngjarnara kerfi sem miðast í auknum mæli við notkun.
Samráð fjármála- og efnahagsráðuneytisins og innviðaráðuneytisins hefur byggst á þeim sjónarmiðum að eftirsóknarvert sé að nýtt fyrirkomulag feli í sér heildstætt, hagkvæmt og samræmt gjaldtökukerfi á landsvísu, að forðast margs konar gjaldtöku á hendi fjölda aðila og að gagnsæi og einfaldleiki kerfisins verði sem mestur gagnvart greiðendum.
Verkefnastofunni er ætlað að vinna að úrlausnarefnum á þessu sviði í samstarfi við ráðuneytin. Stýrinefnd með fulltrúum ráðuneytanna tveggja ásamt fulltrúa forsætisráðuneytis mun hafa yfirumsjón með framgangi í vinnu verkefnastofunnar og verða vettvangur samráðs um stefnumarkandi tillögur og ákvarðanir um fyrirkomulag tekjuöflunarkerfisins.
Í Fréttablaðinu í dag birtist stutt frétt um stafræn ökupróf og var Þórhildur til viðtals um þau. Fréttin í heild sinni:
Samgöngustofa vinnur nú að því að gera bóklega ökuprófið stafrænt. Samhliða verður fræðilega prófið og fyrirkomulagið endurskoðað og uppfært. Ökunámsbókin hefur nú þegar verið færð á stafrænt form en unnið er að því að gera allt ökunámsferlið starfrænt.
Í nýlegri greiningu breska bílaráðgjafafyrirtækisins Confused er Ísland talið meðal þeirra landa sem auðveldast er að ná ökuprófi. Aðeins Eistland, Bandaríkin og Tyrkland eru talin hafa léttari próf. Á 45 mínútum svari nemendur tvisvar sinnum 15 spurningum, og megi aðeins hafa 2 villur í fyrri hluta og 5 í seinni. Það er 77 prósent.
Þórhildur Elínardóttir, samskiptastjóri Samgöngustofu, segir greininguna ekki gefa rétta mynd. Próftaki þurfi að hafa 92 prósent rétt svör en ekki 77.
Aðspurð um hversu stórt hlutfall stendur ökuprófið segir hún það vera um 50 prósent. Í fyrra hafi þó aðeins 47 prósent náð því. Segir hún íslenska ökuprófið frekar hafa verið gagnrýnt fyrir að vera of strangt en of létt en það sé í samræmi við próf á hinum Norðurlöndunum og í Hollandi til dæmis. „Miðað við það má því ætla að íslenska prófið sé af svipuðu erfiðleikastigi og í þeim löndum sem við viljum bera okkur saman við,” segir hún.
Við hverja spurningu geta 1, 2 eða 3 valmöguleikar átt við. Prófið er 90 stig og 1 dregið frá fyrir hverja villu. Próftakar þurfi að hafa 43 stig í fyrri hluta og 83 í öllu prófinu. „Það þýðir að próftaki þarf að hafa 92% rétt svör,“ segir hún.
Þann 2. febrúar síðastliðinn var haldin ráðstefna á vegum Landssamtaka lífeyrissjóða og innviðaráðuneytisins á Grandhóteli í Reykjavík um möguleika á samvinnuverkefnum hins opinbera og lífeyrissjóða við uppbyggingu innviða. Sérstök áhersla var á samgöngumannvirki og snérust flestir fyrirlestrarnir um þau. Mörg áhugaverð erindi voru flutt á ráðstefnunni og má nálgast upptöku af ráðstefnunni hér.
Frummælendur komu úr mörgum áttum hérlendis og erlendis. Innviðaráðherra Sigurður Ingi Jóhannsson ávarpaði fundarmenn í upphafi og sat síðan ráðstefnuna til enda. Fleiri ráðuneytismenn voru á mælendaskrá, fulltrúar lífeyrissjóða, verktaka, sveitarfélaga og íslenskra og erlendra ráðgjafar- og fjármögnunarfyrirtækja. Meðal frummælenda var líka fyrrverandi stjórnarformaður Spalar, reynslunni ríkari af sjálfu umfjöllunarefni dagsins í framkvæmd.
Dagskrá ráðstefnunnar
Frétt um ráðstefnuna
Sl. föstudag fékk Isavia ohf. afhent starfsleyfi sem veitandi flugumferðarþjónustu og mun veita flugturnsþjónustu í flugstjórnarsviði Keflavíkurflugvallar. Í flugumferðarþjónustu felst m.a. flugstjórnarþjónusta, viðbúnaðarþjónusta og flugupplýsingaþjónusta. Flugstjórnarsviðið nær 18 km. umhverfis Keflavíkurflugvöll og nær frá jörðu upp í 3.000 fet.
Hingað til hefur Isavia ohf. haft samning við dótturfyrirtæki sitt Isavia ANS um að veita þjónustuna en fyrirtækið hefur nú sótt um og fengið starfsleyfi sjálft. Isavia ohf. mun þó áfram verða í miklu samstarfi með og nota þjónustu dótturfyrirtækisins vegna nokkurra þátta eins og þjálfunar flugumferðarstjóra. Vottunarferlið hefur verið í undirbúningi allt síðastliðið ár.
Eins og fram hefur komið í fréttum að undanförnu verður leiðtogafundur Evrópuráðsins haldinn í Reykjavík 16. og 17. maí næstkomandi. Þetta er einn umfangsmesti fundur sem íslensk stjórnvöld hafa skipulagt og þarf að huga að mörgu þegar kemur að framkvæmdinni.
Utanríkisráðuneytið leiðir nú starf vinnuhóps til undirbúnings fundarins en talið er að allt að 46 þjóðarleiðtogar muni sækja fundinn. Að undirbúningnum koma auk ráðuneytisins, Ríkislögreglustjóri, Landhelgisgæslan, Faxflóahafnir, Isavia ohf, Isavia ANS, Samgöngustofa o.fl.
Við hjá Samgöngustofu höfum hlutverki að gegna í undirbúningnum og tekur starfsfólk flugleiðsögu-, flugvalla- og flugverndardeildar þátt í undirbúningnum fyrir hönd okkar. Verkefnin sem snúa að okkur eru m.a.:
Samkvæmt spænska tímaritinu Autopista er Ísland í öðru sæti yfir þau lönd þar sem öruggast er að aka (á eftir Noregi). Af því tilefni bað Mexíkóska sjónvarpsstöðin TV4 Guanajuato (í héraðinu Guanajuato í Mexíkó) um viðtal við Gunnar Geir til að spyrja hverju við þökkum þennan árangur og hvort aðrar þjóðir getir lært eitthvað af okkur.
Talað er yfir viðtalið á spænsku og því ekki víst að margir Íslendingar skilji hvað fer fram en það er gaman að þjóðir heimsins skuli taka eftir árangri okkar þegar kemur að öryggi í umferðinni. Gunnar Geir er “döbbaður” í viðtalinu og ef einhver hér innanhúss er sleip(ur) í spænskunni væri gaman að fá þýðingu 🙂
Viðtalið byrjar á mínútu 2:10:40 (smellið á myndina) :
Í morgun kynnti deild lögfræði og réttinda farþega deildina og helstu verkefni. Þar kom m.a. fram að lögfræðihluti deildarinnar aðstoðar sérfræðinga Samgöngustofu við meðferð mála og töku stjórnvaldsákvarðana og kemur þannig við öll svið stofnunarinnar. Þá er lögfræðihlutinn í miklum samskiptum við innviðaráðuneyti sem óskar eftir umsögnum Samgöngustofu við drög að lögum/reglugerðum og erindum sem berast.
Það kom einnig fram að lögfræðihlutinn hefur að markmiði að tryggja að starfsemi Samgöngustofu rúmist innan gildandi laga og reglna. Deildin heldur regluleg námskeið fyrir starfsmenn stofnunar, m.a. námskeið um stjórnsýslulög, upplýsingalög og Evrópureglur.
Farþegahluti deildarinnar sér um móttöku og afgreiðslu kvartana farþega sem ferðast með loftförum, skipum eða hópferðabifreiðum. Nánast eingöngu er um að ræða kvartanir vegna fluga sem aflýst er eða seinkað. Yfir 700 kvartanir bárust Samgöngutofu á árinu 2022.
Kynninguna má nálgast í heild sinni hér
Það er hann Björgvin Páll sem velur föstudagslagið að þessu sinni. Um val sitt segir hann:
Ég vel lagið Closing Time sem föstudagslag vikunnar og læt skemmtilegt atriði fylgja með úr bestu þáttum sem gerðir hafa verið.
Ég legg til að þessi hefð verði tekin upp hér í húsinu, Jón gæti komið syngjandi inn á deildirnar um þrjú leytið 🙂
Ég skora á Ástu Björk Long að koma með föstudagslagið í næstu viku
Atriðið úr The Office US:
Lagið:
Á morgun, 3. febrúar er alþjóðlegur klæðumst rauðu dagur haldinn til að vekja athygli á meðfæddum hjartagöllum.
Hvetjum öll til að finna rauðu flíkurnar í fataskápnum og sýna lit 🙂
Klæðumst rauðu 3.febrúar – Neistinn.is | Styrktarfélag hjartveikra barna
Hjartagallar – Neistinn.is | Styrktarfélag hjartveikra barna
Búið er að opna innri tölfræðivef Samgöngustofu en hann er eingöngu aðgengilegur fyrir starfsfólk Samgöngustofu. Á vefnum er hægt að sjá ýmsa tölfræði síðustu ára úr ökutækjaskrá, eins og til dæmis nýskráningar, afskráningar, skoðanir og eigendaskipti. Einnig er að finna tölfræði tengda skipstjórnar- og vélstjórnarskírteinum og NorType tölfræði varðandi uppfærslur á gerðum og gerðarviðurkenningum.
Vefurinn er enn í vinnslu og mun fleira bætast við í náinni framtíð.
Slóð vefsins er skyrslur.samgongustofa.is
Upplýsingar um vefinn gefur Markús Benediktsson, það má líka hafa samband varðandi hugmyndir að tölfræði sem ætti heima inni á vefnum.
Opnað hefur verið fyrir almennar umsóknir um sumarstörf hjá Samgöngustofu. Starfsfólki er velkomið að benda áhugasömum ungmennum á að leggja inn umsókn, miðað er við að hafa náð 18 ára aldri.
Hér er hlekkur: Sumarstarf – almenn umsókn
