Nú hefur Samgöngustofa tekið stórt skref í netheimum. Nú rétt í þessu var stofnaður Instagram aðgangur fyrir stofnunina. Megintilgangur með instagram síðunni er að ná betur til unga fólksins. Þar munum við setja inn fræðsluefni í forvarnarskyni ásamt því að kynna stofnunina. Hvetjum við allt starfsfólk til að skella í follow á Instagram @samgongustofa_icetra til að hjálpa okkur að vekja athygli á þessari nýju síðu okkar. Endilega deilið henni einnig með fólki í kringum ykkur sem gæti haft áhuga á að fylgjast með.
Samgöngustofa tók í dag þátt í forvarnardegi ungra ökumanna sem haldinn var í 88 húsinu í Reykjanesbæ. Gaman er að segja frá því að þetta var 19 árið í röð sem þessi forvarnardagur er haldinn í Reykjanesbæ, frábær viðburður sem önnur sveitafélög hafa tekið til fyrirmyndar.
Auk Samgöngustofu var Lögreglan með erindi og einnig fulltrúi frá TM og svo var veltibíllinn líka á staðnum. Í lok dagsins var sviðsett slys eins og sjá má á myndunum sem fylgja fréttinni. Þar mátti sjá viðbragðsaðila bregðast við slysi, lögreglan fjarlægði manneskju úr bíl sem var ofurölvi og slökkviliðið klippti hurð af bíl til þess að ná í einstaklinga sem voru þar fastir inni. Góð stemming var á deginum og ungmennin áhugasöm um þetta mikilvæga málefni.
Ár hvert veitir Samgöngustofa styrk/styrki til ýmissa rannsóknarverkefna sem tengjast öryggi skipa, atvinnusjómanna, farþega og búnaðar um borð í skipum sem og verkefna sem snúa að heilsusamlegu umhverfi sjófarenda.
Gert er ráð fyrir að veita styrki til einstaklinga og/eða félaga sem koma með tillögur að lausnum í þessa átt. Heildarstyrkupphæðin hljóðar upp á 2.500.000 krónur að hámarki hvert ár og er öllum frjálst að sækja um.
Umsókn skal senda á netfangið styrkur@samgongustofa.is og skal umsókninni fylgja útfyllt eyðublað sem finna má hér á Word formi og hér á pdf formi. Einnig skal fylgja greinargóð lýsing á verkefninu í heild sem og greinargerð fyrir því hvaða hluta verkefnisins styrkurinn mun nýtast í. Nánar má finna um styrkinn hér að neðan.
Frá Vegagerðinni: Vegagerðin vinnur í stöðugum endurbótum á vefnum www.sjolag.is sem hefur verið í loftinu í um 2 ár. Fyrst um sinn fékk Vegagerðin margar ábendingar sem voru mjög góðar og þarfar.
Nú stendur til að gera úrbætur á vefnum og mun norður heimskautið verða aftur birt á honum líkt og þekktist á eldri vef Siglingastofnunar.
Mikilvægt er að vefurinn hannaður fyrir ykkur sem notendum og því eru ykkar ábendingar mjög mikilvægar til þess að þróa vefinn eins vel og kostur er.
Hugmyndir sem við höfum fengið eru t.d.
Birting nýrra tilkynninga til sjófarenda.
Betri sýn yfir gögn á hliðarstikunni.
Lite útgáfa
Okkur þætti vænt um það hvort þið getið talað við ykkar fólk sem nota vefinn og beðið þau að skoða þetta og koma með ábendingar til okkar fyrir 15. mars 2023.
Mikilvægt er að fá endurgjöf frá útgerðunum og sjómönnum sem nota vefinn og bið ég ykkur einnig um að koma því áfram á þær útgerðir sem eru með aðstöðu hjá ykkur.
Magnús Jóhannesson, formaður svæðisráða, og Sigurður Ingi Jóhannsson, innviðaráðherra, staðfesta Strandsvæðisskipulag Austfjarða og Strandsvæðisskipulag Vestfjarða
Sigurður Ingi Jóhannsson, innviðaráðherra, staðfesti í gær tillögur svæðisráða að Strandsvæðisskipulagi Austfjarða og Strandsvæðisskipulagi Vestfjarða. Þetta eru tímamót í skipulagssögu landsins þar um er að ræða fyrsta skipulag sem tekur til fjarða og flóa við strendur landsins. Skipulagið öðlast gildi þegar það hefur verið birt í B-deild Stjórnartíðinda. Þetta kemur frétt á vef innviðaráðuneytisins í gær.
Svæðisráðin sem hafa unnið að tillögunum eru skipuð fulltrúum sveitarfélaga á svæðunum, fulltrúa Samband íslenskra sveitarfélaga ásamt fulltrúum þriggja ráðuneyta. Strandsvæðisskipulag tekur til afmarkaðra svæða á fjörðum og flóum utan staðamarka sveitarfélaga. Þar er sett fram stefna og ákvarðanir stjórnvalda um hvernig framtíðarnýtingu og vernd svæðisins verður háttað. Skipulagið leggur þannig grunn að framkvæmdum og annarri starfsemi á skipulagssvæðunum.
Með skipulaginu verður samkvæmt innviðaráðuneytinu til mikilvægt stjórntæki líkt og raunin er með skipulag lands og byggðar. Vaxandi sókn ólíkra aðila í nýtingu fjarða og flóa hefur í för með sér samkeppni um staði og hugsanlega hagsmunaárekstra. Með strandsvæðisskipulagi fæst yfirsýn yfir þá starfsemi sem fram fer á skipulagssvæðinu. Við mótun Strandsvæðisskipulags Austfjarða og Strandsvæðisskipulags Vestfjarða var aflað yfirgripsmikilla upplýsinga um þá starfsemi sem fram fer, verndarákvæði sem gilda á svæðinu og aðliggjandi landi, veiðar og umferð skipa og báta. Slík yfirsýn hafði áður ekki verið til staðar.„Ég fagna þeim áfanga að strandsvæðisskipulag hefur verið staðfest hvort tveggja fyrir Austfirði og Vestfirði. Með þessu er lagður grunnur að nýtingu og vernd fyrir svæðin sem býr til ákveðinn fyrirsjáanleika og leiðbeiningar um nýtingu og vernd þeirra. Líkt og við skipulagsgerð á landi þarf jafnan að huga að fjölbreyttum hagsmunum íbúa, atvinnuvega, siglinga og fjarskipta og tryggja skynsamlegt jafnvægi milli nýtingar og verndunar. Við erum nú að taka fyrstu skrefin varðandi strandsvæðisskipulag en rétt er að taka fram að vinna við áhættumat siglinga stendur enn yfir á tilteknum svæðum,“ segir Sigurður Ingi Jóhannsson, innviðaráðherra.
Mikið samstarf um mótun tillagna
Samkvæmt innviðaráðuneytinu er strandsvæðisskipulagið unnið í góðri samvinnu ríkis og sveitarfélaganna sem liggja að skipulagssvæðinu. Svæðisráð er skipað fyrir hvert skipulagssvæði sem ber ábyrgð á skipulagsgerðinni. Í þeim sitja fulltrúar heimafólks, Sambands íslenskra sveitarfélag og þriggja ráðuneyta. Skipulagsstofnun veitir svæðisráðum aðstoð við mótun skipulagsins, kynningu á tillögum og eftirfylgni þeirra þegar skipulagið hefur tekið gildi.
Við mótun tillagna höfðu svæðisráðin víðtækt samráð við íbúa, sveitarstjórnir, hafnarstjórnir og hagsmunaaðila. Vatnasvæðanefndir á viðkomandi svæðum voru til ráðgjafar en einnig eru ýmsar stofnanir ráðgefandi í verkefnum sem þessum, m.a. Ferðamálastofa, Fiskistofa, Hafrannsóknastofnun, Landgræðslan, Landhelgisgæsla Íslands, Landmælingar Íslands, Matvælastofnun, Minjastofnun Íslands, Náttúrufræðistofnun Íslands, Orkustofnun, Samgöngustofa, Umhverfisstofnun, Veðurstofan og Vegagerðin.
Stefnan í strandsvæðisskipulagi byggir m.a. á annarri stefnumörkun og ákvörðunum stjórnvalda. Þar má nefna byggðaáætlun, samgönguáætlun, náttúruverndaráætlun og burðarþolsmat fjarða ásamt því að tekið er mið af innviðum á svæðunum, leyfum til nýtingar á skipulagssvæðinu og umsóknum um leyfi sem eru langt komnar í umsóknarferli.
Fyrsti vísir að skipulagsstefnu um hafsvæðin við Ísland var settur í landsskipulagsstefnu sem samþykkt var á Alþingi árið 2016. Lög um skipulag haf- og strandsvæða voru síðan sett árið 2018. Á grundvelli þeirra skal vinna strandsvæðisskipulag fyrir afmörkuð svæði á fjörðum og flóum.
Samráðshópar voru skipaðir fyrir hvort strandsvæðisskipulagsverkefni og voru hóparnir hvoru svæðisráði til ráðgjafar og samráðs við gerð strandsvæðisskipulagsins. Í samráðshópi eiga sæti fulltrúar tilnefndir af ferðamálasamtökum, umhverfisverndarsamtökum, útivistarsamtökum og Samtökum atvinnulífsins, auk fulltrúa sem svæðisráð getur tilnefnt.
Siglingasvið Samgöngustofu hélt starfsdag 2. mars síðastliðinn og kom stafsfólk saman í Flugröst í Nauthólsvík.
Haldnir voru fyrirlestrar um sjálfsiglandi skip, farið yfir ný áhafnalög, lögskráningu sjómanna o.fl. Í hádegi fékk starfsfólk sér hádegismat á Nauthól Bistró. Góður dagur í alla staði.
Í tilefni þess að í dag er síðasti séns að skrá sig í árshátíðar- og fræðsluferðina til Kaupmannahafnar er föstudagslagið að sjálfsögðu danska lagið með Bítlavinafélaginu (sjá neðar). Farið er út fimmtudaginn 28. september og komið heim sunnudaginn 1. október.
Af þessu tilefni er föstudagslagið að sjálfsögðu danska lagið með Bítlavinafélaginu, hækkið í græjunum og spilið lagið þannig að við komumst öll í danska árshátíðarfílinginn:
Þeir Rafn og Þröstur framkvæmdu áfengismælingarnar eftir öllum kúnstarinnar reglum. Myndin var tekin á Keflavíkurflugvelli í morgun. Áhöfn Jet2.Com var prófuð og reyndist allt í fína lagi. Áhöfnin var mjög samvinnugóð og fagnaði því að þessi próf væru gerð.
Eftirlitsmenn Samgöngustofu framkvæmdu fyrstu áfengismælinguna á áhöfn í dag. Flugmennirnir og ein flugfreyja í þessari vél voru fyrstu viðfangsefni áfengismælinganna.
Öll voru þau neikvæð en ótrúlega jákvæð fyrir mælingunni 🙂
Nánar um áfengisprófin
Prófin eru tekin af hlaðskoðunarmönnum (ramp inspectors) og í dag að tekið var áfengispróf af áhöfn erlendrar flugvélar sem hafði stutta viðkomu á Keflavíkurflugvelli. Áfengispróf flugáhafna eru gerð eftir fyrirfram ákveðnu áhættumati sem Flugöryggisstofnun Evrópu EASA hefur gert á flugrekendum. Þær hafa verið við lýði á meginlandi Evrópu um skeið en nýlega skapaðist lagagrundvöllur fyrir þeim hér á landi.
Allir fjórir eftirlitsmennirnir hafa farið á námskeið í verkferlum Samgöngustofu vegna áfengis- og fíkniefnaprófa, auk þess að fara á námskeið hjá Fræðslu- og starfsþróunarsetri Ríkislögreglustjóra um áfengis- og fíkniefnapróf og námskeið í notkun nýjustu áfengismæla og fíkniefnaprófana hjá innflytjenda þessara mæla en fyrirhugað er að taka einnig fíkniefnapróf af flugáhöfnum. Næsta haust fara eftirlitsmennirnir svo á fíkniefnanámskeið hjá Ríkislögreglustjóra.
Megináhersla er lögð á prófun erlendra áhafna sem hafa viðdvöl hér en einnig má búast við fyrirvaralausum prófum hjá íslenskum flugrekendum og einkaflugmönnum.
Gangur 3A tók sig til og skálaði tvöfalt í dag. Annars vegar fyrir glæstum sigri í jólaskreytingakeppninni og einnig fyrir því að ný skoðunarhandbók ökutækja tók gildi 1. mars. Það er ljóst að mannskapurinn á þessum gangi lætur bæði verkin tala og vinnur keppnir.
Frá vinstri: Sigurjón, Orri, Þröstur og Ingibjörg Þorstseinsdóttir
Í tilefni af Mottumars er tilvalið að rifja upp skemmtilegt framtak í sama mánuði fyrir 13 árum síðan, nánar tiltekið árið 2010. Þá tóku nokkrir starfsmenn Flugmálastjórnar sig til og létu raka af sér hárið í tilefni motturmars en það þótti þeim betri kostur en að safna mottu.
Þetta voru þeir Sigurjón, Orri og Þröstur sem allir starfa hjá Samgöngustofu í dag. Framtakið gekk undir nafninu Munkamars og söfnuðu þeir félagar áheitum á meðal samstarfsfólks fyrir Krabbaeinsfélagið af þessu tilefni.
Nú er spurning hvort einhverjir hér innanhúss séu til í Munkamars í stað Mottuumars þetta árið?
Myndir segja meira en þúsund orð:
Spurning hvort Orri sé með bakþanga þarna í stólnum…
Ingibjörg Þorsteinsdóttir þáverandi fjármálastjóri var fengin í verkið
Skráning er hafin í félagsvistina sem verður þann 9. mars. Einnig er óskað eftir áhugasömum ofurspilurum sem myndu treysta sér til að leiðbeina/kenna öðrum. Boðið verður upp á pizzu og bjór.
Eins og kom fram í frétt á vef innviðaráðuneytisins mælt Sigurður Ingi Jóhannsson, innviðaráðherra, fyrir frumvarpi til breytinga á hafnalögum frá árinu 2003 á Alþingi þann 20. febrúar. Tilgangurinn er að innleiða ákvæði í Evrópureglugerð, sem fjallar um hafnarþjónustu, sameiginlegar reglur fyrir hafnir um gagnsæi í fjármálum og umhverfismiðaða gjaldtöku.
Með frumvarpinu er m.a. lagt til að hafnir fái heimild til að láta gjaldskrár taka mið af umhverfissjónarmiðum með vísan til orkunýtni og kolefnisnýtni siglinga. Þessir afslættir eða álögur skulu vera gagnsæjar, hlutlægar og án mismunar og samræmast samkeppnislögum. Í frumvarpinu er gert ráð fyrir að þessi heimild nái til allra hafna sem falla undir gildissvið hafnalaga, en ekki einungis til hafna innan samevrópska flutninganetsins.
Ráðherra sagði í framsöguræðu sinni mikilvægt að heimila gjaldtöku af þessu tagi. „Með þessu verður opnað á umhverfismiðaða gjaldtöku sem hefur verið að ryðja sér til rúms í öðrum Evrópulöndum. Í dag eru einungis skemmtiferðaskip metin samkvæmt þessum alþjóðlegu vísitölum en þegar fram líða stundir gætu flutningaskip bæst við. Þannig er komið á fjárhagslegt hvatakerfi til umhverfisvænni og sjálfbærari skipareksturs. Í nágrannaríkjum er byrjað að hefja gjaldtöku af þessu tagi og ef íslenskar hafnir geta ekki gert það er hætt við að útgerðir þessara skipa sendi umhverfisvæn skip til landa þar sem afslættir eru í boði en sendi skipin, sem eru óumhverfisvæn, hingað til lands,“ sagði Sigurður Ingi Jóhannsson, innviðaráðherra á Alþingi.
Samráð um gjaldtöku
Í frumvarpinu er einnig lagt til að við lögin bætist ákvæði sem skyldar höfnum innan samevrópska flutninganetsins að eiga samráð við notendur hafna um gjaldtöku sína og veita upplýsingar um breytingar hafnargjald minnst tveimur mánuðum áður en breytingar taka gildi. Samhliða þessu er ráðherra falið gefa út reglugerð sem tilgreini hvaða hafnir tilheyri samevrópska flutningsnetinu hverju sinni og um veitingu hafnarþjónustu, gagnsæi í fjármálum og sjálfstæði hafna.
Ákvæði Evrópureglugerðarinnar ná til allra hafna innan samevrópska flutninganetsins. Fimm íslenskar hafnir eru nú hluti af flutninganetinu: Sundahöfn, Seyðisfjarðarhöfn, Fjarðarbyggðahafnir, Vestmannaeyjahöfn og Landeyjahöfn. Einstök ríki geta þó ákveðið að reglurnar nái til fleiri hafna ef ástæða þykir, eins og gert er í tilviki ákvæðisins um umhverfismiðaða gjaldtöku.
Jón Gunnar og Orri Hlöðversson frá Frumherja við undirritun samningsins.
Í gær undirrituðu Samgöngustofa og Frumherji nýjan samning um framkvæmd ökuprófa til þriggja ára. Samningurinn er gerður í kjölfar útboðs þar sem Ríkiskaup, fyrir hönd Samgöngustofu, óskuðu eftir tilboðum í umsjón og utanumhald á framkvæmd skriflegra og verklegra ökuprófa á landinu öllu. Eina tilboðið sem barst var frá Frumherja.
Í síðustu viku lauk þriggja daga úttekt EFTA Surveillance Authority (ESA) á farmverndarmálum flugverndar. Úttektin gekk vel, bráðarbirgða niðurstöður úttektar eru ánægjulegar og voru engin alvarleg frávik voru greind.
Um flugvernd
Flugvernd er sambland af ráðstöfunum og mannlegum og náttúrulegum úrræðum til að vernda almenningsflug gegn ólöglegum aðgerðum.
Markmið flugverndar í almenningsflugi er að tryggja öryggi farþega, áhafna, starfsfólks flugvalla og almennings með því að nauðsynlegar flugverndarráðstafanir séu innleiddar og viðhafðar á flugvöllum og hjá flugrekendum sem sinna millilandaflugi með farþega, farm, póst og fleira.
Til að ná markmiði flugverndar er það ábyrgð Samgöngustofu að viðhafa nauðsynlegt eftirlit með aðilum sem sjá um framkvæmd flugverndarrástafana eins og t.d. hjá flugvöllum, flugrekendum, flugafgreiðsluaðilum, viðurkenndum umboðsaðilum, þekktum sendendum o.fl. og ganga úr skugga um að þeir hafi innleitt kröfur flugverndar á viðeigandi hátt.
Helstu verkefni flugverndar
Sjá um samræmingu og uppfærslu reglugerða um flugvernd.
Móta, koma á og viðhalda flugverndaráætlun Íslands.
Samþykkja flugverndaráætlanir aðila sem sjá um framkvæmd flugverndar.
Hafa eftirlit með aðilum sem sjá um framkvæmd flugverndar.
Móta, koma á og viðhalda gæðakerfi vegna eftirlits með flugvernd.
Sjá um erlend samskipti vegna flugverndarmála og svara fyrir úttektir erlendra stofnana, t.d. ICAO, ECAC, ESB/ ESA, TSA og Norðurlöndin í gengum NALS.
Eins og kom fram í frétt á vef innviðaráðuneytisins mælti Sigurður Ingi Jóhannsson, innviðaráðherra, fyrir frumvarpi til breytinga á umferðarlögum frá 2019 (nr. 77/2019) á Alþingi í þessum mánuði. Í frumvarpinu er m.a. tillögur um smáfarartæki og öryggi þeirra, virðisaukaívilnun vegna reiðhjóla, heimild ríkisaðila til að setja reglur um notkun og gjaldtöku á stöðureitum í sinni eigu og loks innleiðingu á Evrópureglum.
Öryggi smáfarartækja
Í frumvarpinu eru lagðar til breytingar sem byggja á tillögum starfshóps um smáfarartæki sem kynntar voru í fyrra. Markmið þeirra er að auka umferðaröryggi smáfarartækja án þess að standa í vegi fyrir frekari framþróun fjölbreyttari ferðamáta.
Vinsældir rafhlaupahjóla hafa verið miklar og notkun þeirra margfaldast á undanförnum árum. Þeim vinsældum hafa þó fylgt áskoranir og meðal þess sem greinir í niðurstöðum starfshópsins er að slys eru hlutfallslega tíð miðað við umferð. Fram kom í gögnum starfshópsins að mörg börn slasist á rafhlaupahjólum en þau voru 45% þeirra sem leituðu á bráðamóttöku vegna slíkra slysa.
Frumvarpið felur í sér allar tillögur starfshópsins sem vörðuðu breytingar á umferðarlögum. Tillögurnar sem starfshópurinn lagði til eru þessar:
Nýr ökutækjaflokkur smáfarartækja verði innleiddur í umferðarlög. Miðað yrði við að smáfarartæki væru ekki hönnuð til hraðari aksturs en 25 km á klst. og að hjól yfir þeim mörkum væru óheimil í umferð.
Hlutlægt viðmið um áfengismagn í blóði ökumanna smáfarartækja.
Ökumenn smáfarartækja skyldu að lágmarki hafa náð 13 ára aldri og að yngri en 16 ára yrði gert skylt að nota hjálm.
Almennt bann lagt við því að breyta hraðastillingum aflknúinna smáfarartækja, léttra bifhjóla og rafmagnsreiðhjóla.
Akstur smáfarartækja í almennri umferð verði leyfður á vegum þar sem hámarkshraði er ekki meiri en 30 km á klst. að því gefnu að tillögur um ölvunarakstur og aldursmörk nái fram að ganga enda geti veghaldari lagt bann við umferð smáfarartækja á einstökum vegum eða vegarköflum þyki ástæða til þess.
Reglur um stöðureiti og virðisaukaskattsívilnun vegna reiðhjóla
Í frumvarpinu eru lagðar til tvær breytingar sem tengjast hvorki innleiðingu evrópskra reglan né tillögum starfshóps um smáfarartæki.
Annars vegar er lagt til að ríkisaðila verði með samþykki ráðherra heimilað að setja reglur um notkun stöðureita og gjaldtöku á eigin landi. Um er að ræða viðbót við fyrri heimildir til að sjá um innheimtu fyrir notkun stöðureita sem ríkisaðili hefur umsjón með.
Hins vegar er lögð til breyting á bráðabirgðaákvæði í virðisaukaskattslögum í samvinnu við fjármála- og efnahagsráðuneytið. Með henni er lagt til að sérstök virðisaukaskattsívilnun vegna reiðhjóla verði áfram í gildi.
Breytingar vegna innleiðingar Evrópureglna
Með frumvarpinu er ætlunin að tryggja lagastoð til innleiðingar fjögurra reglugerða Evrópuþingsins og ráðsins og einnar tilskipunar. Í þeim er m.a. lagt til að HMS verði falið markaðseftirlit með vélknúnum ökutækjum, eftirvögnum og fleiru en Samgöngustofa fer með leyfi og viðurkenningar. Þá eru lagðar til tilteknar breytingar á reglum um aksturs- og hvíldartíma ökumanna í farþega- og farmflutningum.
Sigurður Ingi Jóhannsson, innviðaráðherra, tók þátt í óformlegum ráðherraráðsfundi samgöngu- og orkumálaráðherra ESB um orkuskipti í samgöngum sem var haldinn í Stokkhólmi í gær og í dag. Guðlaugur Þór Þórðarson, umhverfis-, orku- og nýsköpunarráðherra sótti jafnframt fundinn. Þátttakendur ræddu ýmsar áskoranir í orkuskiptum í þremur fundarlotum. Ein þeirra var sameiginlegur fundur samgöngu- og orkumálaráðherra þar sem fjallað var um áskoranir við að tryggja nægjanlega græna orku til orkuskipta og fyrir hagkvæma og skilvirka framleiðslu á vetni og rafeldsneyti.
Á fundi samgönguráðherra komu fram áhyggjur margra um að það hallaði á samkeppnisstöðu ESB- og EES-ríkja í grænum lausnum sérstaklega vegna örvunaraðgerða stórra ríkja utan Evrópu í formi ríkisstyrkja og skattaafslátta til að styðja við orkuskipti. Mikilvægt væri að Evrópa héldi samkeppnisforskoti í grænum tæknilausnum. Í þessu sambandi ræddi innviðaráðherra áhrif viðskiptakerfis með losunarheimildir á samkeppnistöðu tengiflugvallarins á Íslandi og íbúa fjarlægustu svæða Evrópu. Gjaldtakan setti Evrópu beinlínis í lakari stöðu á alþjóðlegum samkeppnismarkaði, sérstaklega í ljósi þess að önnur ríki væru að styrkja grænar lausnir. Það væri vont fyrirkomulag að samgönguyfirvöld bæru ekki ábyrgð eða hefðu beina aðkomu að Evrópugerðum um orkuskipti sem hefðu mikil áhrif á samgöngur líkt og ETS-viðskiptakerfið.
Innviðaráðherra ræddi einnig góðan árangur við rafvæðingu fólksbílaflotans og uppbyggingu hleðslustöðva á Íslandi. Á hinn bóginn væru orkuskipti skammt á veg komin hvað varðar þungflutningabifreiðar. Í þeim efnum ætti eftir að yfirstíga margar áskoranir til þess að ná fram hagkvæmum lausnum s.s. með samkeppnishæfri framleiðslu á grænni orku, vetni eða rafeldsneyti, uppbyggingu orkustöðva og tæknilausnum.
Á sameiginlegum fundi samgönguráðherra og orkuráðherra kom fram að miklar áskoranir væru fólgnar í því að tryggja næga græna orku og við framleiðslu á vetni og vetnis afleiddum orkugjöfum s.s. ammoníak fyrir orkuskipti í samgöngum. Auk þess væri það áskorun að Bandaríkin og Kína hefðu ákveðið að niðurgreiða framleiðslu á grænu vetni, 3 dollara á kg. Þetta setti Evrópu í lakari stöðu við framþróun flutningatækni fyrir flutninga yfir lengri vegalengdir og á alþjóðavísu. Þá kom einnig fram mikilvægi þess að einfalda regluverk um leyfisveitingar á sviði orkuvinnslu og gera það skilvirkara.
Vegagerðin stendur fyrir brúarráðstefnunni Byggjum brýr26. apríl 2023í Háteigi á Hótel Reykjavík Grand frá klukkan 9:00 til 16:30. Fjallað verður um brýr í víðu samhengi og litið til fortíðar, nútíðar og framtíðar. Meðal fyrirlesara eru erlendir brúarverkfræðingar, íslenskir sérfræðingar, verktakar í brúargerð og fræðimenn.
Á Íslandi eru 1.185 brýr, þar af eru 225 þeirra á Hringveginum. Á brúarráðstefnunni verður farið yfir sögu brúa á Íslandi, hver staðan er á fækkun einbreiðra brúa, skoðaðar nokkrar áhugaverðar brýr sem eru í framkvæmd eða á teikniborðinu og farið yfir áskoranir framtíðar. Þá verður hönnun brúa í tengslum við náttúruhamfarir, áhrif loftslagsbreytinga og áskoranir verktaka í brúargerð einnig til umfjöllunar.
Nákvæm dagskrá ráðstefnunnar verður kynnt þegar nær dregur.
Ráðstefnugjald er 9.000 krónur en afsláttur veittur eldri borgurum og námsfólki. Innifalið í gjaldinu er aðgangur, veitingar í kaffihléum, hádegisverður og móttaka að ráðstefnu lokinni.
Eins og fram kom í pósti frá Jóni Gunnari fyrir helgi er nú að hefjast verkefni um nýjar ljósmyndir fyrir Samgöngustofu, til að nota við kynningar og fræðsluna okkar. Nýja ásýndin frá miðju síðasta ári felur m.a. í sér fallegar myndir af notendum í samgöngum. Sá böggull fylgdi skammrifi að fjöldi þeirra er takmarkaður og að auki er heimild til að nota myndirnar tímabundin út þetta ár. Því höfum við gert áætlun um nýjar myndir í svipuðum dúr til að nota í sama tilgangi. Markmiðið er að eignast gott safn ljósmynda sem við getum birt með stolti. Svo verkefnið verði sem hagkvæmast er planið að vinna það sem mest sjálf á venjulegum vinnutíma. Einar Magnús Magnússon í öryggis- og fræðsludeild hefur tekið að sér að taka myndirnar, en hann er einmitt afar flinkur og vandvirkur ljósmyndari. Hugmyndin er jafnframt að leita liðsinnis úr röðum starfsfólks Samgöngustofu til að sitja fyrir á myndum í umferð, flugi og siglingum. Ekki verður greitt sérstaklega fyrir þátttökuna en ætlunin er að veita smá þakklætisvott í formi gjafabréfa fyrir viðvikið. Að sjálfsögðu verður samþykki fólki í sjálfsvald sett en vonast er til að umleitunum verði vel tekið.
Kolbeinn hefur nú þegar hafið störf og í morgun nappaði hann vefstjóra SGS við það að setja plastið í ranga tunnu…
Kolbeinn Arnarson hefur tekið við formennsku umhverfishóps Samgöngustofu af Helgu Finnsdóttur. Kolbeinn hefur mikinn metnað fyrir umhverfismálum og hefur t.a.m. verkefnastýrt innleiðingu grænna skrefa hjá Landgræðslunni, skrifað bachelorritgerð um sjálfbæra landnýtingu og komið fram í panel á Matvælaþingi að ræða sjálfbæra matvælaframleiðslu.
Helsta verkefni umhverfishópsins um þessar mundir er að klára innleiðingu Grænna skrefa í ríkisrekstri en Samgöngustofa á aðeins fimmta og síðasta skrefið eftir. Áætlað er að innleiðingu fimmta skrefsins ljúki um mitt ár.
