Category: Uncategorized

Mikið er að gerast í ráðningum þessa dagana hjá Samgöngustofu. Hér fyrir neðan má sjá ráðningar sem búið er að ganga frá. Hlökkum til að taka á móti öllu þessu fólki.

Sérfræðingur í kerfis- og notendaþjónustu

Björn Friðriksson mun hefja störf 1. maí nk. Björn hefur unnið við kerfisrekstur frá árinu 2001. Var hjá Securitas í um 19 ár. Í dag starfar hann hjá Já hf. Hann lauk námi í vélstjórn á sínum tíma og hefur lokið MCSA námi frá Rafiðnaðarskólanum. Einnig hefur hann setið námskeið tengt kerfisstjórnun í gegnum árin.

Eftirlitsmaður flugvalla

Andri Hermannsson mun hefja störf 1. maí nk. Andri starfaði hjá Air Atlanta í um 17 ár, sem hleðslustjóri, vaktstjóri í flugumsjón, manager security og síðast sem flugverndarstjóri. Frá árinu 2020 hefur hann unnið sem ráðgjafi hjá Flight Nordic Flight Department og sem hópstjóri og deildarstjóri hjá Klettabæ. Hann lauk námi í flugrekstrarfræði frá Háskóla Íslands / Keili árið 2013.

Hákon Varmar Önnuson mun hefja störf 1. júlí nk. Hákon hefur starfað frá árinu 2017 hjá Air Atlanta við flugumsjón. Þar á undan starfaði hann sem fleet manager hjá Keili. Hann er með bakgrunn úr flugi en hann kláraði einkaflugmannsréttindi árið 2015 og hefur lokið bóklega hluta atvinnuflugmanns hjá Keili.

Forritarar

Eggert Bjarni Sævarsson hefur störf 1. apríl nk. Hann er með BS í tölvunarfræði frá Háskólanum á Akureyri. Hann hefur unnið við forritun í yfir 20 ár, mestan tíma hjá Umferðarstofu (Samgöngustofu) á árunum 2008-2018. Frá þeim tíma hefur hann unnið hjá Þjóðskrá, Ráðgjafamiðstöð landbúnaðarins og nú með eigin rekstur EBS ráðgjöf ehf.

Daði Magnússon er með BS í tölvunarfræði frá Háskólanum í Reykjavík. Hann hefur unnið hjá Umferðarstofu, Smartmedia, Arctic Andventures og Hey Digital / Sahara sem forritari. Daði var með tímabundna ráðningu hjá stofnuninni áður.

Magnús Elíasson er með BS í tölvunarfræði frá Háskólanum í Reykjavík. Hann vann á árunum 2004-2023 sem Senior Software Developer hjá Betware, einnig þekkt sem Novomatic Lottery Solutions og nú sem Next Generation Lotteris. Magnús var með tímabundna ráðningu hjá stofnuninni áður.

Í þeim tilgangi að sigrast á vöðvabólgu sem herjað hefur á starfsfólk á gangi 3A var efnt til sameiginlegrar teygjustundar í morgun. Áformað er að taka nokkurrra mínútna teygjustundir tvisvar í viku. Það eru teygjumeistararnir Una og Sigurjóna sem leiða teygjurnar.

Orkusjóður hefur lokið við að meta umsóknir frá bílaleigum um styrk til kaupa á 100% rafbílum. Um sérátak Orkusjóðs er að ræða. Í matsnefnd sat Jón Hjalti Ásmundsson, deildarstjóri tæknimála ökutækja og innviða, fyrir hönd okkar í Samgöngustofu.

Gerð er krafa um að fyrsta skráning bílanna verði fyrir tilteknar dagsetningar til að fá styrk og því má hugsanlega búast við einhverri pressu á afgreiðslu bílanna þegar kemur að þeim dagsetningum.

Yfirlit yfir þau fyrirtæki sem fengu styrk (betri upplausn og ítarlegri upplýsingar hér):

Sjá nánari upplýsingar á vef Orkusjóðs

Við höfum fengið ábendingu tvisvar sinnum í gegnum Facebook um lagningu bíla í bílastæði við Samgöngustofu Ármúla megin. Ábendingin er svohljóðandi:

Hæ væri hægt að breyta því hvernig lagt er við Samgöngustofu Ármúla megin? Bílar og kúlur skaga langt inn á gangstéttina eins og þetta er núna

Biðjum starfsfólk um að hafa þetta í huga þegar lagt er í þessi stæði, þ.e. að passa upp á það að leggja ekki þannig að þrengi að gangandi og hjólandi vegfarendum á gangstéttinni.

Í morgun fengum við góða kynningu á upplýsingatæknideildinni okkar og ýmsum verkefnum sem þar eru unnin í tölvuþjónustu, kerfisrekstri og hugbúnaðarþróun og varða alla málaflokka. Eins og gefur að skilja hefur framgangur þeirra veruleg áhrif á þjónustu við atvinnulíf og samfélagið allt, en ekki síst á starfsskilyrði okkar hjá Samgöngustofu.

Stór hluti verkefnanna er fyrir okkur hinum „ósýnilegur“ dags daglega en tekið er eftir ef eitthvað fer úrskeiðis á sama hátt og rafmagnið sem enginn hugsar um fyrr en það slær út. Listinn af verkefnum í vinnslu er langur og því skiptir forgangsröðunin og skipulag deildarinnar miklu. Mikið fagnaðarefni er að sjá að stór verkefni á borð við Skútuna eru ýmist í góðum gangi eða um það bil að sigla í höfn.

Kynningin (PDF)

Um síðustu helgi fór hópur starfsfólks Samgöngustofu í æfingagöngu á Snæfellsjökul. Gangan var hluti af undirbúningi fyrir göngu á Hvannadalshnjúk í vor. Veðrið var ekki jafn bjart og vonast hafði verið eftir svo tindurinn fékk að bíða í þetta skipti. Þó fréttist að ferðin hafi verið eftirminnilegt ævintýri eins og sést í skemmtilegu myndbandi neðst í fréttinni.

Það minnir okkur á að það er varla til neitt vont veður þegar útivist er annars vegar – bara rangur klæðnaður. Hópurinn okkar var í það minnsta við öllu búinn og tókst þannig á við mjög krefjandi aðstæður með bros á vör. Hitastig var u.þ.b. -30°C með vindkælingu og hópnum tókst að ganga hálfa leið upp að toppinum og endaði í 1000 m hæð. Þá var ákveðið að snúa við sökum snjóstorms sem var í vændum. 

Það eru þeir Einar Magnús og Þorsteinn starfsmenn öryggis- og fræðsludeildar sem hafa veg og vanda að þessu Hvannadalshnjúksævintýri.


Myndbandið frá æfingaferðinni á Snæfellsjökul:

Myndir frá ferðinni:

Í gær var starfsdagur stjórnsýslusviðs og fór hann að mestu fram í Flugröst. Þar voru allar deildirnar með áhugaverða fyrirlestra. Dagurinn var svo brotinn upp með heimsókn til Landhelgisgæslunnar sem var mjög fróðleg og skemmtileg. Gaman að kynnast starfseminni þar betur og fá að sjá nýja húsnæðið þeirra sem er alveg að verða klárt. Eftir starfsdaginn var farið í spurningakeppni og svo var förinni haldið í Braggann þar sem við borðuðum saman kvöldmat. Frábær dagur í alla staði.

Það er hann Gunnar Thorarensen sem velur föstudagslagið að þessu sinni. Um val sitt segir hann:

Ég vel lagið Sweet Home Chicago með Blues brothers. Vegna þess að þetta er snildar lag sem kemur öllum í gott skap 🙂

Ég skora á Egil Þorsteinsson fyrir næstu viku

Í móttökunni eru komnar upp auglýsingar um þátttöku Samgöngustofu á samfélagsmiðlum í tilefni af því að nú erum við líka á Instagram. Þessi fína hugmynd um nýtingu á skiltinu kom frá Snorra og var framkvæmd fljótt og vel. Góðar hugmyndir vaxa á trjánum og um að gera að koma þeim á framfæri.

Samkvæmt frétt á vef innviðaráðuneytisins hafa ríkið og sex sveitarfélög sem standa að samgöngusáttmála höfuðborgarsvæðisins ákveðið að hefja undirbúning að því að uppfæra sáttmálann og gera viðauka við hann. Verkáætlun um uppfærsluna var samþykkt á fundi forsætisráðherra, fjármálaráðherra og innviðaráðherra með bæjarstjórum sveitarfélaganna, borgarstjóra og Samtökum sveitarfélaga á höfuðborgarsvæðinu fyrir helgi. Gert er ráð fyrir að hægt verði að undirrita viðauka við samgöngusáttmálann í sumar.

Það markaði tímamót þegar ríki og öll sveitarfélögin á svæðinu staðfestu þann 26. september 2019 sameiginlega framtíðarsýn og markmið fyrir samgöngur á höfuðborgarsvæðinu með undirritun samgöngusáttmálans. Um er að ræða mestu fjárfestingar í samgönguinnviðum í sögu svæðisins og uppbyggingin hugsuð fyrir alla samgöngumáta.

Samgöngusáttmálinn hefur þegar bætt samgöngur á svæðinu og aukið greiðleika þeirra. Mikilvægar framkvæmdir hafa klárast, s.s. á Reykjanesbraut í Hafnarfirði, Suðurlandsvegi milli Vesturlandsvegar og Hádegismóa og á Vesturlandsvegi í Mosfellsbæ. Þá hafa einnig verið lagðir rúmlega 13 km af hjólastígum. Þá er stefnt að því að framkvæmdir við Fossvogsbrú hefjist á þessu ári.

Helstu áskoranir og verkefni framundan

Í undirbúningi að uppfærslu sáttmálans þarf að taka tillit til mikilla verðhækkana, einkum í verklegum framkvæmdum, sem 
hafa áhrif á kostnaðaráætlanir. Einnig verða einstök verkefni skoðuð, þar sem kostnaðaráætlanir voru vanáætlaðar. Kostnaðaráætlun vegna Sæbrautarstokks var t.a.m. ekki að fullu tilbúin þegar sem samgöngusáttmálinn var gerður.

Ýmis tækifæri felast einnig til uppfærslu sáttmálans, til að mynda með því að endurmeta mat á tekjumöguleikjum í kringum þróunarsvæði sem myndast vegna uppbyggingar stokka.

Ráðist verður í nokkur verkefni til að undirbúa viðauka við samgöngusáttmálann í samræmi við nýja verkáætlun.

Betri samgöngum verður falið að uppfæra framkvæmdatöflu sáttmálans, þ.m.t. tíma- og kostnaðaráætlanir. Einnig að meta áhrif stofnvega- og Borgarlínuinnviða m.t.t. markmiða um greiðar samgöngur, fjölbreytta ferðamáta, kolefnishlutlaust samfélag og umferðaröryggi. Á þeim grunni verði sett mælanleg undirmarkmið og árangursvísar.

Þá hefur Betri samgöngum verið falið að móta leiðir að bæta stjórnskipulag verkefnisins og einstakra verkefna. 
Loks er stefnt að því að viðræðuhópur ríkis og sveitarfélaga klári drög að samningi um eflingu almenningssamgangna. Rekstur almenningssamgangna á höfuðborgarsvæðinu verði tryggður með aðkomu sveitarfélaga og ríkisins.

• Minnisblað um verkáætlun um uppfærslu og undirbúning viðauka (9. mars 2022)
• Vefur Betri samgangna
• Frétt um undirritun samgöngusáttmála höfuðborgarsvæðisins (26. sept. 2019)
• Frétt um stofnun opinbers hlutafélags um uppbyggingu samgönguinnviða á höfuðborgarsvæðinu (2. okt. 2020).

Drög að hvítbók um samgöngur ásamt umhverfismatsskýrslu hennar hafa verið birt í samráðsgátt stjórnvalda. Þetta kemu fram í frétt á vef innviðaráðuneytisins. Allir hafa tækifæri til að senda inn umsögn eða ábendingar um hvítbókina og umhverfismatsskýrsluna. Frestur til að skila umsögn er til og með 21. apríl 2023. 

Hvítbók um samgöngumál er hluti af stefnumótunarferli samgönguáætlunar. Samgönguáætlun er unnin á grunni laga um samgönguáætlun, nr. 33/2008. Drög að stefnumörkun hvítbókarinnar byggir m.a. á stöðumati grænbókarinnar, sem kom út í september 2021 ásamt upplýsingum af opnum samráðsfundum sem haldnir voru fyrir alla landshluta í október 2022 undir heitinu Vörðum leiðina saman. Á fundunum var kastljósinu beint að framtíðaráskorunum landshluta m.t.t. allra málaflokka ráðuneytisins í samgöngu-, sveitarstjórnar-, byggða-, húsnæðis- og skipulagsmálum og unnið út frá hugtakinu búsetufrelsi, sem samnefnara allra stefna og áætlana ráðuneytisins. Var leitað svara við því hverjar væru helstu áherslur til að ná markmiðum um búsetufrelsi og hvaða leiðir væru að því markmiði.

Þá er í hvítbókinni einnig byggt á nýjum greiningum, svo sem á stöðu fatlaðs fólks í samgöngum, heildstæðu mati á mikilvægi lendingarstaða á Íslandi út frá öryggishlutverki þeirra, um smáfarartæki, um stöðu reiðvegamála, lokun Reykjanesbrautar. Þá er byggt á drögum að öryggisáætlunum í samgöngum.

Hvítbók er umræðuskjal sem lagt er fram í opnu samráði á netinu. Tilgangurinn er að hvetja til umræðu um stefnuna og möguleg áhrif hennar á íslenskt samfélag til skemmri eða lengri tíma. 

Fyrsta hvítbók um samgöngumál

Um er að ræða fyrstu hvítbókina sem tekin hefur verið saman um samgöngumál í samræmi við stefnumótunarferli Stjórnarráðsins og samhæfingu áætlana á sviði byggða-, húsnæðis-, skipulags- og sveitarstjórnarmála. Samhliða drögum að hvítbók er birt til kynningar umhverfismatsskýrsla. Skýrslan tekur til stærri framkvæmda sem verða í undirbúningi og skoðun á tímabilinu. Gerður er fyrirvari um að það ræðst af fjármagni og framvindu undirbúnings í hvaða framkvæmdir hægt verður að ráðast á tímabilinu.

Hvítbók birtist í opnu samráðsferli og að því loknu er farið yfir helstu sjónarmið sem fram koma áður en hin endanleg stefna er útfærð. Í kjölfarið verður svo lögð fram á Alþingi tillaga að þingsályktun um samgönguáætlun.

Fréttin á vef innviðaráðuneytisins

Skoða drög að hvítbók um samgöngur í samráðsgátt stjórnvalda

Drög að reglugerð um leigubifreiðaakstur hafa verið birt í samráðsgátt stjórnvalda til umsagnar. 

Ný lög um leigubifreiðaakstur (nr. 120/2022), sem Alþingi samþykkti í desember, taka gildi 1. apríl nk. Í lögunum er ráðherra falið að mæla nánar fyrir um ýmis atriði sem tengjast starfsemi leigubifreiða. Í drögum að reglugerð er meðal annars að finna ákvæði er varða:

• Auðkenni leigubifreiðar, sýnileika verðskrár og innihald hennar.
• Umsókn og útgáfu leyfis, námskeið og heimilar undanþágur frá gerðum kröfum.
• Umsókn og útgáfu leyfis, námskeið og heimilar undanþágur frá gerðum kröfum.

Sérstakar skyldur leigubifreiðastöðvar og rafræn kerfi.

Allir hafa tækifæri til að senda inn umsögn eða ábendingar en frestur til að skila umsögn er til og með 22. mars 2023.

Fréttin á vef innviðaráðuneytisins

Skoða drög að reglugerð um leigubifreiðaakstur í samráðsgátt stjórnvalda 

Á föstudaginn lauk vikulangri heimsókn TSA (Transportation Security Adiministration BNA) þar sem TSA skoðaði framkvæmd flugverndar á  Keflavíkurflugvelli. Megin niðurstaða TSA var að mjög vel sé hugað að framkvæmd flugverndar hjá bæði Samgöngustofu,  Isavia ohf., flugrekendum og flugafgreiðsluaðilum sem heimsóttir voru. Það var einnig niðurstaða úttektarinnar að verndarmenningin á flugvellinum sé sterk og til fyrirmyndar.

Við getum verið mjög ánægð með okkar fólk í verndinni, orð eins og „great results“ og „excellent results“, „practice exeeding the EU requirements“ voru notuð af TSA á lokafundinum. Auk þess vakti gott og náið samstarf milli Samgöngustofu og leyfishafa athygli samkvæmt TSA enda mikilvægt til að tryggja árangur í þessum viðamikla málaflokki.

Von er á lokaniðurstöðum innan tveggja mánaða. 

Fyrr á árinu tók skjalateymið í notkun nýjan teikningaskanna, þar sem sá eldri hafði gefist upp eftir langan starfsaldur. Þegar flett var upp hvenær sá gamli hefði verið keyptur, kom í ljós að hann hafði verið á markaði árið 1999. Hann hafði þess vegna þjónað vel og dyggilega eftir glaum aldamótaáranna.

Sá nýi er nokkuð hraðvirkari og þægilegri í notkun, eins og búast mátti við og það er mikill munur að geta unnið með teikningar í nútíma stýrikerfi. Það eru helst skipateikningar sem fara í skannann. Í morgun þurfti þó að skoða húsateikningar fyrir Ármúla 2. Við það tækifæri var smellt þessari mynd af Ísrael að renna teikningu í gegnum skannann.

Skanninn er stilltur þannig að tiff afrit fara beint inn á drif. Notendur geta síðan skoðað myndir sem tiff eða breytt þeim í pdf skjöl. Það er ekki hægt að prenta út úr þessum skanna. Starfsmenn verða að að láta sér nægja þá prentara sem eru hér og ráða við A3 og A4 stærðir eða fara á prentstofu ef þau þurfa stærri útprentanir.

Skanninn er með vinnslubreidd upp á tæpan metra, sem þýðir að hann getur tekið teikningar upp að A0 að stærð, á styttri hlið teikningar. Hann er af gerðinni Colortrac SmartLF Sci og við vonum að hann muni þjóna dyggilega eins og fyrirrennarinn eitthvað fram eftir öldinni.

Í morgunkaffinu fór Jón Gunnar yfir helstu niðurstöður okkar úr síðustu könnun um stofnun ársins, sem gerð er árlega fyrir opinbera aðila. Heilt yfir getum við verið ánægð með útkomuna því heildareinkunn okkar hækkar á milli ára úr 3,89 í 4,0.

Ágætar framfarir mælast í flestum þáttum og er það fagnaðarefni fyrir okkar góða vinnustað. Sem dæmi, þá fær starfsandi, sveigjanleiki og sjálfstæði í starfi háa einkunn og einnig hefur ánægja og stolt okkar af Samgöngustofu vaxið mjög milli ára.

Niðurstöðurnar eru afrakstur af samvinnu, nýsköpun og jákvæðu umbótastarfi sem við getum öll verið sátt við. Þær eru hvatning til áframhaldandi vaxtar þar sem vel gengur og um leið þess að vinna að lausnum fyrir einstaka þætti svo þeir megi dafna betur.

Aðaltöflur fyrir ríkisstofnanir má finna hér

Það er hann Andri Þór Sigþórsson sem velur föstudagslagið að þessu sinni. Það fylgir ekki pistill með valinu en hann velur lagið „Everyday should be a holiday“með Dandy Warhols.

Andri þór skorar á Gunnar Thorarensen fyrir næsta föstudag

Farsýslan þakkar fyrir skemmtilega samveru í félagsvistinni í gærkvöldi. Spilaðar voru tvær umferðir, snarlað á pizzu og kverkarnar vættar með bjór og gosi.

Sigurvegarar kvöldsins komu af lögfræðisviðinu, þau Sædís Birta og Jakob. Sérstök (heiðurs) verðlaun voru veitt þeim sem skoruðu lægst á skorkortinu og hlutu þær Erla Vinsý og Dröfn þau verðlaun.

Við hlökkum til næsta spilakvölds.

Samkvæmt frétt á vef innviðaráðueneytisins hefur Sigurður Ingi Jóhannsson, innviðaráðherra, skipað starfshóp um bættar og umhverfisvænar almenningssamgöngur milli Keflavíkurflugvallar og höfuðborgarsvæðisins. Verkefni hópsins verður að greina leiðir til að bæta almenningssamgöngur á þessari leið með umhverfisvænum hætti og leggja fram tillögur til úrbóta. Horft verður m.a. til leiðakerfis, þjónustustigs, verðskrár, staðsetningar og umgjörðar biðstöðva og kolefnisfótspors.

Í hópnum eiga sæti fulltrúar ráðuneytisins, Vegagerðarinnar, Isavia, Strætó bs., Samtaka sveitarfélaga á Suðurnesjum og Kadeco, þróunarfélag Keflavíkurflugvallar.

Hópnum er ætlað setja fram tillögu að aðgerðaáætlun um úrbætur á næstu þremur árum en jafnframt verður horft til þess að ná umbótum á þjónustunni næsta sumar. Niðurstöður og tillögur að úrbótum fyrir næsta sumar eiga að liggja fyrir í apríl 2023. Tillögur til lengri tíma munu liggja fyrir í september 2023.

Frétt á vef innviðaráðuneytisins

Ísland hefur bætt stöðu sína í umferðaröryggi samkvæmt nýjum bráðabirgðatölum Evrópusambandsins yfir fjölda látinna í umferðinni miðað við höfðatölu í ríkjum Evrópu.

Þar er Ísland í þriðja sæti á eftir Norðmönnum og Svíum með fæst banaslys árið 2022. Samkvæmt meðaltali áranna 2018-2022 er Ísland í fjórða sæti yfir þær þjóðir þar sem fæstir látast í umferðinni miðað við höfðatölu. Aðeins Norðmenn, Svíar og Bretar standa sig betur á fimm ára tímabilinu.

Þar sem fjöldi slysa á Íslandi er breytilegur milli ára hefur þótt rétt að tengja markmið við fimm ára meðaltal í samanburði við aðrar Evrópuþjóðir. Ef næsta fimm ára tímabil á undan er skoðað var Ísland í 9. sæti.

„Eitt af yfirmarkmiðum gildandi samgönguáætlunar og umferðaröryggisáætlunar er að Ísland sé í hópi þeirra fimm Evrópuþjóða þar sem fæstir látast í umferðinni. Þetta markmið hefur nú náðst og það verður áskorun næstu ára að halda okkur á þessum stað í alþjóðlegum samanburði. Hvert banaslys er þó alltaf einu of mikið og við þurfum áfram að vinna að því hörðum höndum að uppræta þá vá sem banaslys í umferðinni eru,“ segir Sigurður Ingi Jóhannsson, innviðaráðherra.

Fjölmargir áhrifavaldar

Fjölmargir þættir stuðla að þessari jákvæðu þróun; ökutæki eru orðin öruggari, vegir betri og ökumenn standa sig betur. Fræðsla og forvarnir, ekki hvað síst til erlendra ökumanna, hafa skilað sér vel sem og sömuleiðis hvatning um að við bætum hegðun okkar í umferðinni.

„Samkvæmt þessum tölum er umferðaröryggi á Íslandi með því besta sem gerist í Evrópu. Árangurinn er ekki sjálfsagður og er afrakstur áralangs samstarfs fjölmargra aðila sem koma að málaflokki umferðaröryggis. Fjölmargir geta tekið þennan árangur til sín og vonandi verður hann okkur öllum hvatning til að gera enn betur,“ segir Jón Gunnar Jónsson, forstjóri Samgöngustofu.

Margir aðilar vinna að því að efla umferðaröryggi, þ.á m. innviðaráðuneytið, Samgöngustofa, Vegagerðin, lögreglan, Slysavarnafélagið Landsbjörg, sveitarfélög, fjölmiðlar, tryggingafélög, ökuskólar og ökukennarar. Auk þess sinnir fjöldi félagasamtaka og einstaklinga ómetanlegu starfi í þágu umferðaröryggis.

Endanlegar tölur Evrópusambandsins um fjölda látinna í umferðinni fyrir árið 2022 verða birtar seinni hluta ársins.

• Tilkynning frá Evrópusambandinu um fjölda látinna í umferðinni

Frétt af ytri vef

Samgöngustofa mun halda námskeið fyrir prófdómara flugskírteina fimmtudaginn 8. júní 2023 í húsnæði Samgöngustofu, Ármúla 2, frá kl. 10:00 til 16:00.

Skilyrði fyrir endurnýjun/framlengingu og frumútgáfu prófdómararéttinda er að umsækjandi hafi setið slíkt námskeið á síðastliðnum 12 mánuðum.

Skráning send með tölvupósti á netfangið fcl@icetra.is eigi síðar en 29. maí næstkomandi. Tilgreina þarf nafn þátttakanda, skírteinisnúmer, tölvupóstfang og nafn flugrekanda við skráningu.
Þátttakendur eru beðnir um að hafa með sér spjald- eða fartölvu á námskeiðið, ef mögulegt.

Námskeiðsgjaldið er samkvæmt gildandi gjaldskrá Samgöngustofu og er 37.540 kr. Innifaldar eru veitingar meðan á námskeiði stendur.

Athygli er vakin á því að hámark fjölda þátttakenda verður 20 manns og útskriftarskjöl verða send með tölvupósti á viðkomandi aðila.