Category: Uncategorized

Öryggis- og fræðsludeild hefur lokið skráningu umferðarslysa í fyrra og út er komin skýrsla um umferðarslys á Íslandi 2022. Slysakortið okkar hefur líka verið uppfært og hér má finna nokkur gröf með slysatölfræði ársins í fyrra.

Árið í fyrra má segja að hafi verið sérstakt. Heildartölurnar voru mjög nálægt því sem þær voru árið áður (þó ívið skárri) en það ár var það versta í langan tíma. Hins vegar eru margir þættir að batna en á móti kemur að rafhlaupahjólin vega á móti öllum árangri sem næst annars staðar. Látnir og alvarlega slasaðir voru 204 í fyrra (samanborið við 208 árið á undan). Af þeim voru 96 gangandi eða hjólandi, þ.e. næstum helmingur, og af þessum 96 voru 49 á rafhlaupahjóli eða rúmlega helmingur. Því var tæpur fjórðungur allra látinna eða alvarlega slasaðra í umferðinni á rafhlaupahjóli. Það þýðir að í staðinn fyrir rúmlega 200 látna og alvarlega slasaðra væru þeir rúmlega 150. Munurinn þarna á milli er einmitt munurinn á því að ná markmiðum okkar og vera gríðarlega langt frá því (eins og við erum nú).

Fjögur gröf, smellið áfram til þess að sjá þau öll:

Í fyrra létust 9 manns í umferðinni eins og árið áður. Af þeim létust fimm innanbæjar en fjórir utan þéttbýlis. Er þetta í fyrsta sinn síðan 1992 sem fleiri látast innan þéttbýlis en utan þess. Af þessum níu manns sem létust voru fjórir fótgangandi, einn á rafhlaupahjóli og fjórir í bifreið. Er þetta í fyrsta sinn síðan 1973 sem meirihluti látinna er í hópi gangandi og hjólandi.

Auk þessara frétta má nefna að ungir ökumenn standa sig mun betur en árið áður og eru aftur komnir á sama ról og þeir voru árið 2020 og áður. Slys vegna ölvunar og fíkniefna eru á pari við markmiðin sem má teljast gott því markmiðin eru nokkuð metnaðarfull.

Erlendu ferðamennirnir voru mjög öryggir í fyrra og þrátt fyrir að fjöldi þeirra hafi verið tæplega 1,7 milljónir þá slösuðust aðeins 75 þeirra. Er þetta langbesti árangurinn sem við höfum séð hvað varðar slasaða ferðamenn m.v. fjölda þeirra á landinu. Hvað varðar alvarlega slasaða ferðamenn þá voru þeir 20 og höfum við aðeins einu sinni séð færri alvarlega slasaða m.v. fjölda ferðamanna á landinu og það var árið 2020 þegar Covid geisaði og þarf að taka með ákveðnum fyrirvara. Þess má einnig geta að Kínverjar slösuðust mjög lítið í fyrra. Það hefur auðvitað dregið úr komum þeirra til landsins en þó svo að við deilum fjölda þeirra sem slösuðust með fjölda þeirra sem hingað kom þá eru Kínverjar á pari við flestar aðrar þjóðir.

Skýrsla um umferðarslys á Íslandi 2022

Slysakort Samgöngustofu

Nokkur gröf um slysatölfræðina í fyrra

Samgöngustofa hefur ákveðið að setja á laggirnar umbótahóp fyrir stofnunina. Markmið hópsins er að virkja ábendingakerfið Bendil.

Hópurinn mun stýra einni til tveimur innri herferðum á ári þar sem kallað er eftir umbótatillögum út frá fyrirfram ákveðnu þema. Að auki mun hópurinn vinna úr tillögunum sem berast og afhenda framkvæmdastjórn til frekari úrvinnslu.

Við óskum eftir áhugasömum fulltrúum frá hverju sviði í úmbótahópinn. Heyrst hefur að það verði kex í boði á þriðja hverjum fundi hjá umbótahópnum.

Þau sem geta hugsað sér að tilheyra umbótahópnum, taka þátt í kraftmiklu umbótastarfi og maula kex af og til er bent á að senda Díönu Björk tölvupóst á diana.b.eythorsdottir@samgongustofa.is.

Úlfur Linnet, fyndnasti maður Íslands, hélt skemmtilegan fyrirlestur í morgun í tengslum við Hjólað í vinnuna sem hefst 3. maí næstkomandi. Hann hefur sjálfur hjólað í vinnuna í 10 ár og á fimm hjól. Það var mikið hlegið enda nálgaðist hann umfjöllunarefnið á skemmtilegan hátt en fræddi okkur jafnramt um ýmislegt tengt hjólreiðum. Við ættum t.d. öll núna að þekkja muninn á latex göllum og spandex 🙂

Skráning í Hjólað í vinnuna hefst 19. apríl og hvetjum við starfsfólk til þess að stofna lið undir Samgöngustofu og taka þátt í átakinu. Verkefnið stendur svo yfir frá 3.- til 23. maí og má kynna sér allt um Hjólað í vinnuna á vef átaksins. Í fyrra tókku nokkur lið þátt frá Samgöngustofu og myndaðist skemmtileg stemning á milli liðanna og árangurinn var mjög góður.

Föstudagslagið er að þessu sinni í boði Kolbeins Arnarsonar og um val sitt segir hann:

Það er gífurlega mikil áskorun að velja eitt föstudagslag hafandi víðan tónlistarsmekk. Ég fór fram og til baka með þetta, valið stóð á milli kórtónlistar, djass, hip hops, rapps, rokks, popps eða klassískrar tónlistar. Á endanum ákvað ég þó að velja Water get no Enemy með Fela Kuti. Þetta lag hefur mikla föstudagstengingu fyrir mig en þegar ég vann á vínbarnum Port 9 spilaði ég þetta iðulega og oft á föstudögum. Lagið einkennst af stemmningu (helst oft í hendur við föstudaga) og verandi stemmningsmaður stóðst ég ekki mátið um að velja þetta lag.

Þið sem hafið ekki hlustað á þetta lag – gefið því séns! Það er vissulega tæpar tíu mínútur en ég hugsa að fæst okkar séu á Tik Tok og ættu því að vera með þokkalega góða athyglisgáfu 😉

Ég skora á Jakob Andra Þórarinsson, elskulega laganemann okkar allra, að velja næsta föstudagslag.

Þetta líka lekkera COS sjal fannst á bílastæðinu í morgun. Eiguleg flík og mikilvægt að hún rati aftur til eiganda síns. Látið orðið berast! Hangir til þerris hjá vefstjóra á 2. hæð.

P.S. Þetta er tilraun til að mæla mátt innri vefsins, þ.e. hvort hann geti keppt við hinn fræga Alla R…

Samkvæmt frétt á vef innviðaráðuneytisins hafa áform um vegvísi að vistvænum samgöngum til ársins 2030 verið kynnt í samráðsgátt stjórnvalda. Hægt er að senda inn umsagnir eða ábendingar til og með 11. apríl næstkomandi.

Í fréttinni segir:

Ríkisstjórnin hefur sett loftslagsmál í forgang og eru markmið stjórnvalda metnaðarfull. Draga á úr losun gróðurhúsalofttegunda um 55% eða meira til ársins 2030 miðað við losun árið 2005. Þá skulu efldar aðgerðir í kolefnisbindingu og landnotkun sem miða að því að ná markmiði um kolefnishlutleysi árið 2040. Árið 2040 skal fullum orkuskiptum náð og þannig skal Ísland verða óháð jarðefnaeldsneyti fyrst ríkja. 

Skilgreindar tímasettar aðgerðir

Vegvísir að vistvænum samgöngum á Íslandi til ársins 2030 mun innihalda skilgreindar tímasettar aðgerðir sem miða að því að markmiðum um 55% samdrátt í losun gróðurhúsalofttegunda verði náð miðað við árið 2005. 

Á árunum 2005-2020 var um þriðjungur af losun gróðurhúsalofttegunda á beinni ábyrgð Íslands vegna samgangna. Framreikningar Umhverfisstofnunar á losun gróðurhúsalofttegunda sýna að frekari aðgerða er þörf til að uppfylla markmið um samdrátt í losun. Vegvísi um vistvænar samgöngur til 2030 er því ætlað að vinna að frekari aðgerðum í samdrætti í losun frá samgöngum til að vinna að því markmiði að Ísland standi við skuldbindingar sínar og uppfylli sjálfstæð markmið.

Viðfangsefni vegvísisins verður orkuskipti í samgöngum, þ.m.t. samgöngutæki, eldsneyti og uppbygging innviða sem og leiðir til að draga úr kolefnisspori vegna uppbyggingar og reksturs samgöngumannvirkja. Heimsmarkmið Sameinuðu þjóðanna um sjálfbærni verða höfð að leiðarljósi.

Stýrihópur hefur verið skipaður um verkefnið en í honum verða fulltrúar innviðaráðuneytisins, umhverfis-, orku- og loftslagsráðuneytisins, Isavia, Orkustofnun, Samgöngustofu og Vegagerðinni.

• Skoða áform um vegvísi að vistvænum samgöngum til ársins 2030 í samráðsgátt

Samkvæmt frétt á vef innviðaráðuneytisins hefur Sigurður Ingi Jóhannsson, innviðaráðherra, skipað Hermann Sæmundsson, stjórnmálafræðing og skrifstofustjóra í forsætisráðuneytinu, í embætti ráðuneytisstjóra innviðaráðuneytisins. Hermann tekur við embættinu 1. maí nk. þegar Ragnhildur Hjaltadóttir lætur af störfum.

Hermann hefur starfað í Stjórnarráði Íslands frá því í október 1996 en þá réðst hann til starfa sem sérfræðingur hjá Jöfnunarsjóði sveitarfélaga í félagsmálaráðuneytinu. Hann var skipaður í embætti skrifstofustjóra í sama ráðuneyti árið 2002. Frá 2004 til 2008 var hann fulltrúi félagsmálaráðuneytis og heilbrigðis- og tryggingamálaráðuneytis í sendiráði Íslands í Brüssel en tók við sem skrifstofustjóri í samgöngu- og sveitarstjórnarráðuneytinu að því loknu. Hermann var skipaður skrifstofustjóri skrifstofu mannréttinda og sveitarfélaga í innanríkisráðuneytinu í ársbyrjun 2011 en við uppskiptingu þess um mitt ár 2017 tók hann stöðu skrifstofustjóra skrifstofu sveitarfélaga og byggðamála í samgöngu- og sveitarstjórnarráðuneytinu. Hermann var skipaður skrifstofustjóri stefnumála í forsætisráðuneytinu í október 2021.

Hermann var settur ráðuneytisstjóri í félagsmálaráðuneyti á árunum 2002 til 2004 og gegndi um langt skeið hlutverki staðgengils ráðuneytisstjóra. Hermann hefur því starfað í Stjórnarráði Íslands í hartnær 27 ár. Hann hefur samhliða embætti gegnt margvíslegum trúnaðarstörfum í umboði ráðherra. Hermann býr því yfir mikilli og fjölþættri reynslu innan Stjórnarráðsins og íslenskrar stjórnsýslu.

Hermann er fæddur árið 1965, hann tók stúdentspróf frá Fjölbrautarskóla Norðurlands vestra 1986, lauk BA prófi í stjórnmálafræði frá Háskóla Íslands árið 1991 og meistaraprófi frá Háskólanum í Árósum árið 1996 í stjórnsýslu- og stjórnmálafræði.

Fjórar umsóknir bárust um embættið sem var auglýst í janúar sl. Ráðgefandi hæfnisnefnd var skipuð til að meta hæfni umsækjenda. Nefndin komst að þeirri niðurstöðu að Hermann væri hæfastur til að gegna embættinu. Eftir viðtöl ráðherra við umsækjendur og að teknu tilliti til álits hæfnisnefndar um hæfni umsækjenda var það ákvörðun ráðherra að veita Hermanni embættið.

Fréttin á vef innviðaráðuneytisins

Við óskum ykkur gleðilegra páska og vonum að þið hafið það gott í fríinu. Það er vor í loftinu, falleg birta og sumarið á næsta leyti.

Það er ekkert föstudagslag þessa vikuna en í tilefni þess að lóan er mætt til landsins er tilvalið að hlusta á lag um hana þennan síðasta vinnudag fyrir páska. Njótið frísins!

Lóan er komin að kveða burt snjóinn,
að kveða burt leiðindin, það getur hún.
Hún hefur sagt mér, að senn komi spóinn,
sólskin í dali og blómstur í tún.

Hún hefir sagt mér til syndanna minna,
ég sofi of mikið og vinni ekki hót.
Hún hefir sagt mér að vakna og vinna
og vonglaður taka nú sumrinu mót.

Á fuglavefnum er hægt að nálgast miklar upplýsingar um lóuna, m.a. hægt að hlusta á söng hennar. Óhætt að mæla með fuglavefnum fyrir þau ykkar sem ekki hafið uppgötvað hann enn.

Samgöngustofa, Endurmenntun Háskóla Íslands (EHÍ) og Menntavísindasvið Háskóla Íslands hafa endurnýjað samstarfssamning sín á milli um ökukennaranám til ársins 2028.

Samkvæmt reglugerð um ökuskírteini nr. 830/2011 skal Samgöngustofa gera samning við skóla á háskólastigi til fimm ára í senn um að þar fari fram ökukennaranám. Í samningnum er kveðið á um tilhögun og tíðni námsins og að námið fari fram samkvæmt námskrá sem Samgöngustofa setur og ráðherra staðfestir.

Samningurinn sem var undirritaður á dögunum gildir í fimm ár eða til 1. apríl 2028 og leysir af hólmi fyrri samstarfssamning sem sömu aðilar gerðu árið 2018.

Upplýsingar um ökukennaranám til almennra réttinda má finna á vef EHÍ 

Þann 8. maí næstkomandi verður haldinn kynningarfundur um ökukennaranám til almennra réttinda, skráning og nánari upplýsingar hér.

Ný lög um leigubifreiðaakstur nr. 120/2022 tóku gildi á laugardaginn (1. apríl). Markmiðið með lögunum er að tryggja gott aðgengi að hagkvæmri, skilvirkri og öruggri leigubifreiðaþjónustu fyrir neytendur á Íslandi. Þá er lögunum ætlað að tryggja að íslenska ríkið uppfylli skuldbindingar sínar samkvæmt samningnum um Evrópska efnahagssvæðið (EES-samningnum).

Helstu breytingar með lögunum

• Fjöldatakmarkanir verða afnumdar en skýr skilyrði sett um leyfisveitingar. Fjöldatakmarkanir voru áður í gildi á Akureyri, Árborg, höfuðborgarsvæðinu og Suðurnesjum, á öðrum stöðum á landinu voru engar fjöldatakmarkanir.
• Rekstrarleyfi veitir rétt til reksturs eins eða fleiri leigubíla. Áður veitti leyfið aðeins rétt til reksturs á einum bíl.
• Veita má bæði einstaklingum og lögaðilum rekstrarleyfi. Áður mátti aðeins veita einstaklingum slíkt leyfi.
• Rekstarleyfishafar skulu hafa afgreiðslu á leigubílastöð sem hefur fengið starfsleyfi hjá Samgöngustofu. Þó getur rekstarleyfishafi með einn leigubíl í sinni eigu eða umráðum rekið stöð án starfsleyfis frá Samgöngustofu.
• Leigubílar skulu búnir gjaldmæli en þó er heimilt að aka án gjaldmælis þegar ferð er seld fyrir fyrirfram umsamið áætlað eða endanlegt heildargjald. Eftir sem áður skal verðskrá og þær forsendur sem umsamið gjald byggist á vera aðgengilegar viðskiptavini.

Samhliða lögunum tekur gildi reglugerð um leigubifreiðaakstur nr. 324/2023 þar sem nánar er kveðið á um útfærslu laganna. Nánari upplýsingar fyrir leyfishafa og umsækjendur má nálgast á vef Samgöngustofu www.samgongustofa.is/leigubilar

Lög um leigubifreiðaakstur nr. 120/2022
Reglugerð um leigubifreiðaakstur nr. 324/2023
Upplýsingasíða fyrir leyfishafa og umsækjendur

Með morgunkaffinu var boðið upp á dýrindis vöfflur sem spilltu ekki ánægjunni á þessum góða föstudegi! Einnig fengum við kynningu á helstu verkefnum deildar stjórnunarkerfa og alþjóðamála sem varða starfsemina í heild og styðja við verkefni allra sviða. Í örstuttu máli miða þau að gæðum og stöðugum umbótum innan Samgöngustofu, tengslum við alþjóðastofnanir og varðveislu gagna. Við erum öll þátttakendur í þeirri vegferð að styðja við markmiðin með því að fylgja verklagsreglum, vinna að úrbótum og benda á hvað betur megi fara. Varðandi það síðasta, þá er Bendill góður og skilvirkur vettvangur fyrir ábendingar sem tilvalið er að nota sem mest. Í kynningunni var einnig fjallað um umhverfismálin hjá okkur og stöðuna varðandi innleiðingu á Grænum skrefum. Þar hefur margt áunnist, en við eigum enn mörg tækifæri til að gera betur.

Hér má sjá kynningu um stjórnkerfi, alþjóðamál og umhverfismál.

Það er hún Bjarklind í öryggis- og fræðsludeild sem velur föstudagslagið að þessu sinni. Um val sitt segir hún:
Föstudagslagið að þessu sinni er eitt gamalt og gott frá því að ég var töffari í unglingadeild. Söngkonan Rihanna varð fyrir valinu en mér datt hún sérstaklega í hug því hún átti svo sturlað Halftime show í Superbowl fyrir stuttu. Hún á svo mörg frábær lög svo það var erfitt að velja úr.

Lagið We found love varð að lokum fyrir valinu því mér fannst mikilvægt að velja alvöru pepp lag sem ætti að koma þér í stuð á þessum annars frábæra föstudegi.

Að lokum skora ég á Kolbein Arnarson að koma með næsta föstudagslag!

Undanfarið hafa Díana Björk og Kolbeinn unnið með framkvæmdar- og deildarstjórum Samgöngustofu að skilgreiningu meginferla stofnunarinnar. Þetta er hluti af innleiðingu ISO-27001 staðalsins sem Samgöngustofa hefur ákveðið að innleiða. ISO-27001 er upplýsingaröryggisstaðall en innleiðing hans rímar vel við gæðastefnu Samgöngustofu.

En hvað eru meginferlar? Hugsa má um þá sem helstu verkefni stofnunarinnar. Undir meginferlanna geta svo komið undirferlar sem lýsa verkefnum á nákvæmari máta. Eitt meginferli hjá Samgöngustofu gæti t.d. verið leyfisveitingar og undirferli þess myndi þá útlista nánar og nákvæmar mismunandi leyfisveitingar Samgöngustofu.

Meginferlafundirnir hafa einkennst af gleði, áhuga, hamingju og eftirvæntingu eftir innleiðingu staðalsins. Samgöngustofa er komin langleiðina með að skilgreina alla meginferla stofnunarinnar en þá getur gæðateymið farið af fullum þunga í innleiðingu ISO-27001.

Smástund er app fyrir inn og útstimplanir
og það er hægt að sækja í Play store eða App store.

Númer Samgöngustofu til að skrá sig inn í fyrsta skipti er 1020

Í Smástund er hægt að:

• Stimpla sig inn og út í símanum
• Skoða orlof, vinnutíma og skrá fjarvistir.
• Fá yfirlit yfir samstarfsfólk.
  

Þegar inn er komið byrjið þið á að skrá kóða Samgöngustofu í forritið sem er eins og áður segir 1020:

Eftir það er hægt að nota appið til að skrá sig inn og út og skoða orlofsstöðuna og margt fleira.

Innviðaráðuneytið hefur sett drög að tveimur reglugerðum í samráðsgátt, annars vegar nýja reglugerð um skoðanir á skipum og búnaði þeirra, sem kemur í stað reglugerðar sama heitis nr. 1017/2003, og reglugerð um breytingu á reglugerð nr. 122/2004 um öryggi fiskiskipa sem eru 15 metrar eða lengri að mestu lengd. 

Með reglugerðunum eru gerðar breytingar á fyrirkomulagi við skoðanir skipa. Fyrirkomulag er til samræmis við Höfðaborgarsamþykktina um öryggi fiskiskipa sem íslenska ríkið hefur undirritað. Jafnframt er kerfið til samræmis við það sem gengur og gerist á Norðurlöndum og víðar.

Reglugerð nr. 1017/2003 um skoðanir á skipum og búnaði þeirra, með síðari breytingum, gerir almennt ráð fyrir að skoðanir skipa eigi sér stað með reglulegu millibili á fjögurra ára tímabili. Nefnist eitt slíkt tímabil skoðunarhringur. Skip sem falla alfarið undir alþjóðasamninga og farþegaskip, sem falla undir reglugerð nr. 666/2001, eru í fimm ára skoðunarhring.

Með nýrri reglugerð um skoðanir á skipum og búnaði þeirra er lagt til að öll skip verði færð í fimm ára skoðunarhring. Fer þá stærsta skoðun skips fram á fimm ára fresti í stað fjögurra sem áður var. Með breytingu á reglugerð nr. 122/2004 eru sambærilegar breytingar gerðar.

Samkvæmt reglunum verður ákvörðuð svokölluð afmælisdagsetning sem skoðanir hvers skips skal miðast við. Ákvarðast afmælisdagsetning af gildistíma öxulskoðunar. Almennt má ýmist framkvæma skoðun 3 mánuðum fyrir eða 3 mánuðum eftir þá dagsetningu ár hvert. Þá er afmarkað hvaða skoðanir skulu fara fram á tilteknu tímabili.

• Nánar má lesa um drög reglugerðarinnar og reglugerðarnar sjálfar í Samráðsgátt

Föstudaginn 14. apríl ætlar Úlfar Linnet, fyndnasti maður Íslands, að halda fyrirlestur í tengslum við Hjólað í vinnuna. Fyrirlesturinn verður í morgunkaffinu kl. 8:30 og er markmiðið að hlæja saman, fræðast um hjólreiðar og hvetja alla til þátttöku í átaknu.

Úlfar hefur sjálfur notast við hjólið undanfarin 10 ár og hefur væntanlega frá mörgu skemmtilegu að segja 🙂

Í morgun fengum við fína kynningu á verkefnum fjármáladeildar. Fyrir utan föst verkefni deildarinnar sem snúast um að fjármálin og það sem þeim tilheyrir sé á réttu róli, eru einnig umbótaverkefni í gangi sem skipta miklu máli. Má þar til dæmis nefna verkbókhaldið sem er grunnur að innheimtu fyrir útselda vinnu og svo sjálf forsendan fyrir fjárhagslegri heilsu Samgöngustofu sem er gjaldskráin. Sérstakt samþykki ráðherra þarf fyrir öllum breytingum á henni og því þurfa nauðsynlegar uppfærslur að vera vel undirbúnar. Um langtímaverkefni er að ræða, en nú þegar hefur framsetning gjaldskrárinnar verið stórlega endurbætt.

Kynninguna má finna hér.

Það er hann Egill Þorsteinsson sem velur föstudagslagið að þessu sinni. Um val sitt segir hann:

Ég vel lagið All summer long með Kid Rock. Þetta lag kemur mér í helgarstuðið.

Ég er hrifinn af öllu dóti og báturinn er flottur í þessu myndbandi. Fyrir þau ykkar sem eruð „bátaperrar“ þá er þetta bátur sem er smíðaður af Grand Craft verksmiðjunum í Michigan að ég held. Þessir bátar eru venjulega gerðir úr Mahogany og verðið er eftir því 🙂 (aka – ég er ekki að fara kaupa svona). Þessir bátar eru oft með flottri vél, kannski 5 lítra vél og hljóðið eftir því.

Smellið á myndina til að fá upp skráningarvalmynd.