Í síðustu viku fóru úttektarmenn frá skipaeftirlitsdeild í markaðseftirlit með skemmtibátum hjá fyrirtækinu Fraktlausnir. Þar voru fimm slöngubátar frá Kína teknir til skoðunar, með það að markmiði að ganga úr skugga um að bátarnir uppfylltu lögbundnar kröfur um öryggi, mengunarmörk og merkingar.
Markaðseftirlit með skemmtibátum snýst um að tryggja að bátar sem framleiddir, fluttir inn eða seldir á Íslandi uppfylli viðeigandi lög og reglur, til dæmis varðandi hönnun, byggingu, mengun og merkingar. Þetta eykur öryggi neytenda, verndar umhverfið og stuðlar að sanngjörnum viðskiptum. Neytendastofa, Samgöngustofa og tollayfirvöld hafa hvert sitt hlutverk í þessari keðju og vinna saman að því að tryggja öruggar og lögmætar vörur á markaði fyrir skemmtibáta.
Það hefur verið skammt stórra högga á milli í banaslysum í umferð, eins og forsíða Morgunblaðsins sýndi í dag. Eru þau nú orðin sex talsins á árinu.
Í Kveik sl. þriðjudag var fjallað um farsímanotkun undir stýri. Í framhaldinu hafa þau á RÚV verið að velta fyrir sér snertiskjám sem eru hluti af stjórntækjum margra nýrra bíla. Skýrt er í umferðarlögum að snjalltæki má ekki nota við akstur nema handfrjálst. Í nýjum bílum þarf hins vegar að nota skjá til að stýra t.d. loftræstingu og rúðuþurrkum. Mikilvægt er þá fyrir ökumann að stilla það af sem hægt er að gera áður en haldið er af stað, s.s. tónlist og leiðsögutæki og vera meðvitaður um hættuna sem hlýst af því þegar athyglin fer af veginum. Samgöngustofa hefur tekið virkan þátt í þessari þörfu umræðu hjá RÚV og aðstoðað við umfjöllunina með t.d. samantekt margvíslegra gagna.
Frá og með 1. maí mun Samgöngustofa beina eigendaskiptum ökutækja yfir í stafrænt ferli. Markmiðið er að einfalda umsýslu og auka öryggi.
Pappírsferlið verður áfram í boði en afgreiðsla þess getur tekið allt að 7 daga þar sem aukin áhersla verður lögð á að tryggja öryggi og áreiðanleika gagna. Af þessum sökum hefur Samgöngustofa óskað eftir því að skoðunarstofur hætti að taka á móti eigendaskiptum á pappír frá og með 1. maí nk.
Harpa Þuríður hefur tekið stjórnarsæti í nýkjörinni stjórn Landsnets að beiðni fjármála- og efnahagsráðherra. Stjórnin var valin á grunni nýs verklags sem á að tryggja að tilnefndir stjórnarmenn veljist á grundvelli hæfni, menntunar eða reynslu. Þar er líka kveðið á um að stjórnarmenn skulu vera óháðir fyrirtækinu og stjórnendum þess, séu hvorki starfsmenn fyrirtækisins né kjörnir fulltrúar á Alþingi eða í sveitarstjórnum.
Landsnet er þjónustufyrirtæki í eigu þjóðarinnar. Hlutverk fyrirtækisins er að viðhalda og reka flutningskerfi raforku.
Umhverfishópurinn þakkar þeim sem tóku þátt í keppni hópsins sem fór fram fyrr í mars. Okkur bárust margar frábærar og metnaðarfullar tillögur, við kunnum að meta áhuga ykkar og framtak. Hugmyndirnar eru innblástur fyrir stofnunina og hjálpa til við að huga að jákvæðum breytingum sem gagnst bæði starfsfólki og umhverfinu.
Við óskum sigurvegaranum Ólöfu Önnu Rúdólfsdóttur innilega til hamingju og þökkum öllum sem tóku þátt!
Vinningstillaga: Það mætti fara yfir það hvernig hreinsiefni eru notuð í húsinu, þ.e.a.s. efnin sem eru notuð við að þrífa húsið og hvort þau séu svansvottuð. Það skiptir máli fyrir heilsu þess sem þrífur húsið alla daga að efnin sem notuð eru séu ekki heilsuspillandi sem þau eru mjög oft, það er líka mikilvægt fyrir umhverfið að efnin sem fara út í sjóinn frá frárennsli hússins séu ekki skaðleg náttúrunni. Öruggast er að þau séu Svansvottuð eða með Evrópublóminu.
Rökstuðningur fyrir vali á vinningstillögu: Tillagan um að fara yfir hreinsiefni og tryggja að þau séu Svansvottuð eða með Evrópublóminu var valin þar sem hún hefur bæði heilsufarslegan og umhverfislegan ávinning. Heilsa starfsfólks: Umhverfisvottuð hreinsiefni innihalda skaðleg efni, sem dregur úr hættu á öndunarfæra- og húðertingu hjá þeim sem nota efnin. Umjhverfisvernd: Mengun frá hreinsuefnum getur haft skaðleg áhrif á vistkerfi í vatni. Með vistvænum efnum er dregið úr þessum áhrifum. Innleiðing tillögu framkvæmanleg: Markaðurinn býður upp á fjölbreytt úrval umhverfisvænna hreinsiefna, oft án aukins kostnaðar.
Þá styður tillagan alemnnt við umhverfisstefnu SGS og bætir vinnuumhverfu og umhverfisáhrif stofnunarinnar.
Í kjölfar grisjunar á trjágróðri í Öskjuhlíð að undanförnu lét Isavia innanlandsflugvellir framkvæma nýtt mat á aðstæðum. Það sýnir að skilgreindir VSS-fletir eru nú án hindrana og í samræmi við mildunarráðstafanir. Samgöngustofa hefur yfirfarið gögnin og metið niðurstöðurnar.
Með hliðsjón af þessu hefur Samgöngustofa afturkallað tilskipun um takmarkanir á notkun flugbrautar 13/31 í þágu flugöryggis, sem tók gildi 8. febrúar sl.
Starf hafnarríkiseftirlitsmanna er mjög fjölbreytt og á stundum krefjandi.
Eitt af því sem þarf stundum að gera er að kyrrsetja skip ef þau uppfylla ekki þær kröfur sem gerðar eru samkvæmt alþjóða samþykktum og reglum. Sem betur fer þarf hafnarríkiseftirlitið ekki oft að grípa til svo róttækra aðgerða en í gær var skip kyrrsett í Þorlákshöfn vegna athugasemda sem gerðar voru varðandi öryggis skips og áhafnar. Skipið sem um ræðir heitir NM Copenhagen, 4255 GT. Heimahöfn skipsins er Madeira Portugal en það kom til Þorlákshafnar frá Andverpen fulllestað af stálrörum.
Þar sem skipið var ekki útbúið með ECDIS (Electronic Chart Display and Information System) hefðu nákvæm sjókort af siglingarleið skipsins þurft að vera um borð. Sjókort sýna m.a. ljósvita, staðsetningar á grynningum, skerjum, duflum, neðansjávarköplum og gefa aðrar nauðsynlegar upplýsingar til að tryggja örugga siglingu fyrir skip, áhöfn og umhverfi.
Áður en skip leggur úr höfn þarf skipstjóri að gera siglingaráætlun um fyrirhugaða ferð. Hún tryggir að skipið fari ekki inn á hættusvæði eða svæði þar sem skipaumferð er hreinlega bönnuð. Eitt af því sem beðið er um í skoðunum er að fá að sjá siglingaáætlun skipsins til landsins.
Þegar beðið var um þessar upplýsingar í gær var fátt um svör. Við eftirgrennslan kom í ljós að skipið var einungis með eitt sjókort af Íslandi og var það sambærilegt við það sem má sjá á mynd hér fyrir neðan. Var skipið samstundis kyrrsett og skipstjóra tilkynnt að skipið færi ekki af stað fyrr en sjókort af því svæði sem skipið áætlaði að sigla á væru komin um borð og staðfesting þar að lútandi hefði borist Samgöngustofu.
Samgöngustofa er með áskrift að Viðskiptablaðinu (með Fiskifréttum) og Heimildinni. Við erum með eina prentútgáfu af hvoru riti og er markmiðið að tryggja að sem flestir geti notið góðs af þeim.
Blöðin eru lögð fram í kaffirýmum:
Fiskifréttir eru í kaffirými á 3. hæð
Viðskiptablaðið og Heimildin eru í kaffirými á 2. hæð
Vikublöð sem þessi ná oft að fjalla um mál af meiri dýpt en almennir vefmiðlar gera. Við hvetjum þau sem vilja að kíkja í blöðin á staðnum og láta þau liggja áfram í kaffirýmunum, svo þau séu aðgengileg öllum. Takk fyrir að virða þetta fyrirkomulag.
Í heimsókninni hittu okkar menn, Þröstur, Lorik og Guðbjörn, meðal annars COM KFOR, sem er æðsti herforingi NATO/KFOR í Kósovó. Hann hrósaði verkefni Samgöngustofu sem mikilvægu til að tryggja öryggi í loftrýminu. Einnig var fundað með ráðherra samgöngumála hjá Kósovó ásamt fulltrúum NATO/KFOR, þar semrædd var frekari þróun og samvinna í tengslum við verkefnið.
Verkefnið telst til borgaralegs framlags Íslands til stuðnings öryggis og stöðugleika innan NATO. Markmið Samgöngustofu er staðla loftrýmið (e. Normalization of the airspace), tryggja hlítni við evrópskt og alþjóðlegt regluverk og stuðla að auknu öryggi og skilvirkni í loftrýminu.
Fyrr í þessum mánuði fóru starfsmenn siglingasviðs Samgöngustofu í árlega úttekt hjá gúmmíbátaþjónustu Hampiðjunnar í Neskaupstað. Endurnýja þurfti starfsleyfi stöðvarinnar eftir að nýr starfsmaður lauk þjálfun í eftirliti gúmmíbáta. Við skoðunina var farið yfir að starfsemi gúmmíbátaþjónustunnar væri samkvæmt ákvæðum reglugerða.
Á þjónustustöð eru fjölmörg skoðunaratriði tekin út. Til að mynda leyfi frá framleiðendum til skoðunar á þeim búnaði sem á að þjónusta, hvort skoðunarskýrslur séu rétt útfylltar og rétt geymdar, hvort öll leyfi séu í gildi, varahlutir í þann búnað sem skoðaður er sé til staðar, hvort verkfæri og búnaður sem notast þarf við skoðanir sé til staðar, kvarðanir/löggildingar þar sem við á og hvort starfsaðstaðan sé samkvæmt gildandi reglum.
Í dag eru fimm starfsstöðvar sem sinna gúmmíbátaþjónustu. Eru þær staðsettar víðsvegar um land: Í Stykkishólmi, á Ísafirði, Neskaupstað, Vestmannaeyjum og Hafnarfirði.
Sem kunnugt er hefur notkun á annarri af tveimur flugbrautum á Reykjavíkurflugvelli verið takmörkuð um skeið, svo flugöryggi sé ekki stefnt í tvísýnu. Nauðsynlega þarf að fjarlægja þau tré sem eru hindrun í veginum. Skógarhöggið hefur gengið fljótt og verkefnið unnist betur en fyrst var talið mögulegt.
Nokkrir starfsmenn sem hafa komið að verkefninu um flugöryggi á Reykjavíkurflugvelli fóru í vettvangsferð í Öskjuhlíð í gær. Hlín Hólm, deildarstjóri FFF sem hefur leitt verkefnið fyrir hönd Samgöngustofu, var að sjálfsögðu í broddi fylkingar. Afar áhugavert var að sjá skógarhöggsmenn að störfum með skilvirkum tækjabúnaði. Í ljós er að koma fallegt landslag sem snýr í sólarátt. Það mun væntanlega gefa ný tækifæri til plöntunar á lágvaxnari gróðri og útivistar fyrir höfuðborgarbúa.
Það sem af er ári hefur verið gengið frá nokkrum ráðningum hjá Samgöngustofu;
Hugrún Ósk Guðmundsdóttir var ráðin sem fulltrúi í skráningu umferðarslysa í deild öryggi og fræðslu. Hugrún Ósk starfar í dag sem fulltrúi í NorType hjá Samgöngustofu. Hún mun hefja störf með vorinu.
Svani Hauksson var ráðinn sem fulltrúi í notendaþjónustu upplýsingatæknideildar. Hann starfaði hjá Mannviti sem kerfisstjóri. Svani hefur nú þegar hafið störf.
Heiður Magný Herbertsdóttir var ráðin sem sérfræðingur í flugrekstrar- og skírteinadeild. Heiður starfar hjá Landhelgisgæslunni í dag sem öryggis- og gæðafulltrúi. Heiður Magný mun hefja störf 1. júní nk.
Bryndís Blöndal var ráðin sem sérfræðingur í skírteinamálum flugs í flugrekstrar- og skírteinadeild. Hún starfaði síðast hjá Icelandic Water Holdings. Bryndís mun hefja störf 25. mars nk.
Síðastliðið haust fóru skipaskoðunarmenn Samgöngustofu til Gijon á Spáni til að framkvæma upphafsskoðun á Huldu Björnsdóttur GK-11, nýjum og fullkomnum ísfisktogara fyrir útgerðina Þorbjörn hf í Grindavík. Upphafsskoðun er forsenda þess að skip séu skráð á íslenska skipaskrá og fái útgefin viðeigandi skírteini. Við upphafsskoðun er meðal annars farið yfir samþykkt öryggisplan skipsins og staðfest að öryggis- og björgunarbúnaður sé á réttum stöðum og uppfylli kröfur. Raunverulegt fyrirkomulag brunakerfa, siglingarljósa og vinnsluþilfars er borið saman við teikningar, fylgst með smíðaeftirliti flokkunarfélagsins og síðast en ekki síst gerðar prófanir á björgunar- og öryggisbúnaði.
Skipið er hannað af Sævari Birgissyni skipatæknifræðingi hjá verkfræðistofunni Skipasýn ehf. í samvinnu við starfsfólk Þorbjarnar hf. Hönnunin miðar að sparneytni og umhverfisvernd. Aðalvél skipsins (um 2400 kW) knýr fimm metra skrúfu sem snýst á lægri snúningshraða en áður hefur þekkst í svipuðum fiskiskipum. Þetta eykur orkusparnað og dregur úr umhverfisáhrifum. Skipið verður útbúið til að draga tvo botnvörpur samtímis, og togvindurnar verða rafknúnar.
Miðvikudaginn 12. mars sl. var haldinn „Íslandsdagur“ hjá Nýsköpunarmiðstöð EUROCONTROL sem er til húsa í Bretigny í Frakklandi. Tilgangur Íslandsdagsins var að leiða saman lykilaðila fluginnviða á Íslandi og lykilstarfsmenn EUROCONTROL til að ræða áskoranir, nýsköpun og um leið hvaða stuðning íslenskir aðilar geta fengið frá Nýsköpunarmiðstöðinni. Ísland varð sem kunnugt er aðildarríki EUROCONTROL þann 1. janúar 2025.
Fulltrúar Samgöngustofu voru Jón Gunnar og Hlín. Ásamt þeim sóttu fulltrúar Isavia ohf, Isavia innanlandsflugvalla, Isavia ANS, Icelandair og Tern fundinn, auk tengiliðar Íslands hjá EUROCONTROL.
Á starfsmannafundi í morgun kynnti Jón Gunnar teikningar af Ármúla 2. Forhönnun hússins liggur nú fyrir. Á teikningunum má sjá hvar svið verða staðsett í húsinu.
Fundarherbergjum fjölgar til muna en í dag erum við með í heildina 11 herbergi. Skv. teikningunum þá verðum við með í heildina 39 mismunandi herbergi fyrir fundi, næði og verkefnavinnu.
Umhverfishópur Samgöngustofu efnir til keppni um frumlegustu og/eða bestu hugmyndina að aðgerðum, breytingum eða lausnum í umhverfismálum innan stofnunarinnar. Heyrst hefur að verðlaun verði veitt fyrir frumlegustu og/eða bestu hugmyndina.
Við hvetjum þig til að senda inn hugmyndir í gegnum Bendil-Umbótatillaga og velja flokkinn Umhverfismál.
Frestur til þátttöku er til hádegis á morgun, föstudaginn 14. mars
Í vikunni fór fram hjá Samgöngustofu samnorrænn fundur fluglækna. Um árlegan fund er að ræða. Í ár hittust fluglæknar og starfsfólk skírteinadeilda flugmálastjórna Noregs, Svíþjóðar og Finnlands ásamt okkar fólki til að fara yfir málin.
Umræðuefnið er víðfeðmt enda af nógu að taka. Farið var yfir tölfræði þjóðanna, eftirlitsþátturinn ræddur, breytingar á reglugerðum og fluttir fjölbreyttir fyrirlestrar um þetta sérhæfða fag sem heilbrigðisvottun flugverja er. Fundurinn er mikilvægur vettvangur fulltrúa til að bera saman bækur sínar, læra hver af öðrum og fá stuðning við úrlausn flókinna mála.
