Það er komið að því að fagna – Ísland er komið áfram í Eurovision og það er loksins komið gott veður 🎉
Við ætlum að gera okkur glaðan dag í hádeginu á föstudaginn með grillveislu í portinu á bak við hús.
Við hvetjum öll til að mæta í Íslands litunum – blátt, rautt og hvítt – hvort sem það er treyja, hattur, slaufa eða eitthvað skemmtilegt Eurovisionlegt.
Látum sólina og Eurovision andann taka völdin, hlökkum til að sjá ykkur öll með bros á vör og stemninguna í botni!
Í næstu viku er svo frábær vika því þá hefst tiltektarvika 🙂
Strandveiðitímabilið er hafið og öryggi sjómanna í forgrunni. Margvíslegur undirbúningur hefur farið fram svo tryggja megi sem best slysavarnir á sjó.
Sérstök áhersla á björgunarbáta
Samgöngustofa og skoðunarstöðva leggja í sameiningu áherslu á að öryggisbúnaður sé í samræmi við reglur. Í aðdraganda vertíðarinnar gerði Samgöngustofa skyndiskoðanir á yfir 150 smábátum, sérstaklega gúmmíbjörgunarbátum þeirra. Staðsetning og frágangur björgunarbáta skiptir miklu, svo auðvelt sé að grípa til þeirra og tryggt að þeir losni og komist á flot í neyð.
Öryggisefni smábáta á einum stað
Opnuð hefur verið samræmd öryggissíða fyrir sjómenn. Þar má finna leiðbeiningar, gátlista og fræðslumyndbönd sem hjálpa við undirbúning og auka vitund um öryggismál á sjó.
Aggan eykur öryggi
Öryggisappið Aggan, sem tekið var í notkun í fyrra, með stuðningi Fagráðs um siglingar, hefur vakið athygli meðal sjómanna. Um 300 bátar hafa þegar tekið það í notkun. Aggan inniheldur m.a. gátlista Samgöngustofu sem styður við gerð hættumats um borð.
Fræðsla með Þresti Leó
Í sumar mun Samgöngustofa, í samstarfi við Slysavarnafélagið Landsbjörg og Landsamband smábátaeigenda, taka þátt í fræðsluherferð með áherslu á öryggisbúnað og viðbrögð. Leikarinn og sjómaðurinn Þröstur Leó Gunnarsson fer yfir notkun á björgunarvestum, fjarskiptum, neyðarstigum, staðsetningu neyðarbúnaðar, björgunarhringjum og björgunarbátum.
Nýtt fræðslurit um fjarskipti á sjó
Gefið hefur verið út nýtt fræðslurit um VHF fjarskipti. Markmið þess er að auðvelda sjómönnum að rifja upp hvernig best sé að láta vita af sér og kalla eftir aðstoð ef þörf krefur.
Upp kom sú hugmynd í deild leyfisveitinga og ökunáms að ganga Leggjabrjót frá Þingvöllum yfir í Hvalfjörð í sumar, nánar tiltekið 28. júní. Öll væru velkomin með, makar þar á meðal
Endilega kommentið við færslu á Teams ef þið viljiðo slást í hópinn (undir SGS-Allir/Almennt)
Skipulag varðandi ferðir fram og til baka ræðst af fjölda.
Leiðin er rúmir 16 km, nokkuð grýtt en þó þægileg og gaman að ganga í góðum félagsskap!
Nú er hægt að auðkenna viðskiptavini með rafrænum skilríkjum beint í gegnum Zendesk þjónustukerfið — bæði í netspjalli og tölvupósti.
Þessi lausn mun nýtast vel þegar þörf er á að sannreyna auðkenni viðskiptavina og einfaldar þannig þjónustuferlið, bætir öryggi og tryggir hraðari afgreiðslu. Sannkölluð gleðitíðindi!
Allar deildir geta nýtt sér Zendesk þjónustukerfið við afgreiðslu erinda. Deild skráningar og þjónustu hefur góða reynslu af notkun kerfisins og gefur sín meðmæli.
Norðurflug lýsir ánægju með samskipti og samstarf við Samgöngustofu í viðtali í Morgunblaðinu í dag.
Í tilefni af komu nýrrar þyrlu til landsins, sem bætist í flota Norðurflugs, er viðtal við Birgi Ómar Haraldsson framkvæmdastjóra fyrirtækisins í Mogganum í dag. Í máli hans kemur fram að samstarfið við Samgöngustofu við innflutning og skráningu vélarinnar hafi gengið einstaklega vel og verið farsælt. Um er að ræða Airbus AS350B3+ þyrlu sem þegar er komin í fjölbreytt verkefni um landið.
Þessi ummæli eru hvetjandi og staðfesting á mikilvægi þess að byggja upp jákvæð og lausnamiðuð samskipti við atvinnulífið. Samgöngustofa þakkar Norðurflugi traustið og samstarfið og óskar þeim velfarnaðar með nýjustu viðbót í flotann.
Í síðustu viku fengum við góða gesti frá EUROCONTROL, þá Raúl Medina Caballero, forstjóra stofnunarinnar og Enrique Fraile-Riesco, sviðsstjóra. Tilefni heimsóknarinnar var nýleg aðild Íslands og tilgangurinn að kynna starfsemi hér á landi og styrkja samvinnuna enn frekar.
Eftir góðan fund hér í Ármúla var haldið á fund innviðaráðherra. Þar var farið yfir hlutverk okkar í stjórnun flugumferðar, reglugerðarsetningu og eftirliti. Einnig var rætt um næstu skref í samræmingu við sameiginlega áætlun Evrópu um þróun flugumferðarstjórnunar. Eftir fundinn heimsóttu gestirnir Isavia ANS, Landhelgisgæsluna og Isaiva ohf. Móttökurnar voru alls staðar góðar og dagurinn í alla staði hinn ánægjulegasti.
Nýtt og öflugra upplýsingakerfi hefur nú verið gangsett hjá NorType. Kerfið ber vinnuheitið „Nova Status“ og kemur í stað tveggja eldri kerfa. Með þessu stígum við mikilvægt skref í átt að einfaldari, skilvirkari og öruggari vinnslu hjá NorType.
Nova Status kerfið er skrifað frá grunni af okkar eigin fólki. Hönnun og forritun fór fram í UT-deild Samgöngustofu, þar sem Bjarni og Óskar voru í fararbroddi þróunar með dyggum stuðningi frá NorType-teyminu. Verkefnið er gott dæmi um það þegar þekking og samvinna skila árangri sem nýtist bæði starfsfólki og starfsemi.
Með nýja kerfinu verður gerðarskráning einfaldari og hraðari fyrir starfsfólk NorType. Þá hefur forvinnsluhluti kerfisins verið endurbættur og endurskilgreindur, sem gerir villumeðhöndlun markvissari og eykur vinnsluhraða skráninga. Síðast en ekki síst fylgir Nova Status aukið rekstraröryggi.
Frá árinu 2024 hefur náðst verulegur árangur í að stytta málahala vegna kvartana flugfarþega. Þessi árangur er fyrst og fremst tilkominn vegna breytts verklags í lögfræði- og farþegadeild.
Meðal aðgerða í breyttu verklagi má nefna:
Nýtt málasniðmát, sem hefur stytt tíma sem fer í ritun úrskurða umtalsvert. Sniðmátið keyrir sjálfkrafa út staðlaðar upplýsingar úr kvörtuninni og sníður textann að tegund málsins áður en ritun úrskurðar hefst.
Skýrari gagnagrunnur yfir útgefna úrskurði sem auðveldar að finna fordæmi og gæta samræmis í niðurstöðum, þegar um sambærileg álitaefni er að ræða.
Skýrari upplýsingar fyrir flugfarþega á heimasíðu Samgöngustofu.
Málskotsgjaldi fyrir afgreiðslu kvartana komið á, fæst endurgreitt ef úrskurður fellur kvartanda í vil.
Símatími hefur verið tekinn upp sem gefur starfsfólki meira svigrúm til úrvinnslu mála á öðrum tímum.
Á fyrstu fjórum mánuðum ársins 2025 voru gefnir út 88 úrskurðir og ákvarðanir, samanborið við 19 á sama tímabili árið 2024. Í lok apríl 2025 voru aðeins 26 mál í bið eftir úrskurði, en í byrjun árs 2024 voru þau 218 talsins.
Málsmeðferðartími hjá Samgöngustofu, frá því að kvörtun berst og þar til máli er lokið er nú kominn niður í þrjá mánuði, sem er það markmið sem deildin hafði sett sér.
Í ár voru það rúmlega 200 leikskólar sem tóku þátt í Umferðarskóla Samgöngustofu og skráðu til þátttöku rúmlega 4000 börn. Umferðarskólinn er hugsaður fyrir elsta hóp leikskólabarna en þar er m.a. fjallað um öryggi barna í bílum, hvernig best sé að fara yfir götu, hvar öruggast sé að hjóla og leika sér úti.
Það kostar ekkert fyrir leikskólana að taka þátt. Þeir leikskólar sem skrá sig til þátttöku fá sendar ítarlegar leiðbeiningar, glærur, handrit, myndir, viðurkenningarskjal og litabækur fyrir hópinn. Í ár fengu leikskólarnir einnig Innipúka brúðu til að gera umferðarfræðsluna ennþá skemmtilegri.
Dagskráin hér innanhúss er hugsuð fyrir starfsmenn eingöngu en mökum og vinum / fyrrum starfsmönnum er velkomið að hitta okkur á Ölver og taka nokkur lög í karókí.
Hjólað í vinnuna hefst 7 maí n.k. og stendur til 27 maí.
Búið er að opna fyrir skráningu og hvetur umhverfishópurinn starfsfólk Samgöngustofu til þátttöku! 🚲 Markmið verkefnisins er að hvetja til daglegrar hreyfingar og vekja athygli á virkjum og sjálfbærum samgöngum. Hjólreiðar sameina útivist, líkamsrækt og ferskt loft – allt í einu!
Leiðbeiningar um skráningu er að finna hér og skráning fer fram á Hjólað í vinnuna Innan umferðasviðs er liðið mótvindur 2. hæð er með lið sem heitir 2. hæð Á fullri ferð er opið lið fyrir allt starfsfólk Samgöngustofu
Öll geta tekið þátt í Hjólað í vinnuna svo framarlega sem þeir nýta eigin orku til og frá vinnu þ.e. hjóla, ganga, hlaupa, nota línuskauta o.s.frv. Þau sem nýta almenningssamgöngur geta einnig tekið þátt en þá er skráð sú vegalengd sem gengin eða hjóluð er til og frá stoppistöð
Rafræn próftaka í bóklegum prófum fyrir bifhjólaréttindi (AM/A1/A2/A) hófst í dag, 23. apríl.
Um er að ræða tvö mismunandi próf, eitt fyrir AM flokk og eitt fyrir A flokka.
Prófin eru sett upp á sambærilegan hátt og önnur rafræn próf. Í stað 30 spurninga með 3 svarmöguleikum eru 50 fullyrðingar sem svarað er rétt/rangt. Hver fullyrðing gefur eitt stig og próftaki þarf að fá 45 stig til að standast prófið.
Ekki er lengur um A og B hluta að ræða heldur er prófið ein heild.
30 fullyrðingar tengjast umferðarmerkjum, forgangi, merkjum lögreglu o.s.frv. en 20 fullyrðingar eru almenns eðlis.
Próf fyrir A-flokka eru í boði á íslensku og ensku, próf fyrir AM flokk er í boði á íslensku.
Með þessu skrefi eru nær öll bókleg ökupróf komin á rafrænt form. Eingöngu próf fyrir dráttarvélaréttindi stendur eftir en það verður fært yfir á rafrænt form á allra næstu vikum.
Staða sérfræðings í flugöryggi var auglýst í gær með umsóknarfresti til 6. maí nk. Auglýsingin hefur verið birt á Starfatorgi, Alfreð og á samfélagsmiðlum stofnunarinnar. Auglýsinguna má finna hér.
Fyrir páska var gengið frá ráðningu lögfræðinga í lögfræðideild stjórnsýslusviðs;
Berglind Gísladóttir hefur lokið Mag.Jur gráðu í lögfræði frá Háskóla Íslands. Hún hefur starfað sem lögfræðingur hjá Samgöngustofu frá árinu 2023. Áður starfaði hún sem lögfræðingur hjá Sýslumanninum á höfuðborgarsvæðinu og Þjóðskrá Íslands.
Ludvig Árni Guðmundsson hefur lokið Mag.Jur gráðu í lögfræði frá Háskóla Íslands. Hann hefur starfað sem lögfræðingur hjá Samgöngustofu frá árinu 2024. Áður starfaði hann sem laganemi hjá Sýslumanninum á höfuðborgarsvæðinu og LOGOS lögmannsþjónusta.
Yngvi Hommersand hefur lokið Mag.Jur gráðu í lögfræði frá Háskóla Íslands. Auk þess hefur hann lokið MSc gráðu í Economics and Business Administration frá Hanken School of Economics. Hann starfar í dag sem lögfræðingur hjá Kærunefnd útlendingamála. Áður starfaði hann hjá KRST lögmenn, NEFCO og sendiráði Íslands í Finnlandi sem lögfræðingur. Yngvi mun hefja störf 1. júní nk.
Samgöngustofa þátt í forvarnadegi fyrir unga ökumenn sem haldinn var í Menntaskólanum að Laugavatni rétt fyrir páska. Dagurinn byrjaði á umferðarfræðslu frá Samgöngustofu, lögreglu og 112 og lauk þannig að slys var sviðsett þar sem nemendur fengu að fylgjast með viðbragðsaðilum bregðast við slysi.
Það er fagnaðarefni þegar framhaldsskólar leggja mikinn metnað í umferðarfræðslu fyrir unga fólkið. Það er svo mikilvægt að ná til þeirra á þeim aldri þar sem mörg þeirra eru að taka bílprófið. Með degi sem þessum vonumst við til að auka skilning unga fólksins á mikilvægi þess að taka skynsamar ákvarðanir í umferðinni.
Svona flottir dagar verða ekki til án virkilega góðrar samvinnu margra ólíkra aðila. Við þökkum skólanum og viðbragðsaðilum fyrir frábært samstarf.
Þriðjudagskvöldið 15. apríl verða flugöryggismál til umfjöllunar í Kveik. Um er að ræða framhald nýlegrar umfjöllunar um flugslysið í Þingvallavatni. Fókusinn er á möguleg brot á reglum sem gilda um sölu á flugi í ábataskyni.
Kveikur hafði samband við undirbúning þáttarins til að afla svara við ýmsum tengdum spurningum. Einnig var tekið viðtal við Jón Gunnar um þessi mál og verður það að einhverju eða öllu leyti sýnt á þriðjudagskvöldið.
Í gær heimsóttu nokkrir starfsmenn siglingasviðs og stjórnsýslusviðs, ásamt forstjóra, björgunarskipið Jóhannes Briem. Siglt var góðan hring um höfnina þar sem áhöfnin sýndi getu skipsins og kynnti tæknibúnaðinn sem er mikil breyting frá eldra skipi.
Jóhannes Briem er nýlegt skip sem kom til heimahafnar í Reykjavík haustið 2023. Það er í eigu Slysavarnarfélagsins Landsbjargar sem rekur alls þrettán björgunarskip víðsvegar um landið. Fjögur þeirra hafa nú þegar verið endurnýjuð með fullkomnum tækjabúnaði og stefnt er það því að endurnýja þau öll. Von er á næsta skipi til heimahafnar í Höfn í Hornafirði nú í sumar.
Skiptæknideild og siglinga- og hafnaeftirlitsdeild gegna með vinnu sinni lykilhlutverki við að koma þessum nýju björgunarskipum, sem og öðrum nýjum skipakosti, í notkun við Íslandsstrendur.
