Í síðustu viku skoraði Pétur Þór Brynjarsson á vinnufélag sinn Leif Gústafsson að velja föstudagslag, sem var að sjálfsögðu vel tekið.
Um val sitt segir Leifur: Lou Reed samdi og flutti mörg frábær lög eins og Perfect Day, Sweet Jane og Walk on the Wild Side. Ég vel lagið Walk on the wild side (1972). Textinn er magnaður og var brautryðjandi. Það hafði ekki verið algengt að syngja um transfólk eða fólk sem neyddist til að stunda vændi og “öðruvísi fólk” fram að þessu.
Lou Reed var kóngurinn í New York á þessum tíma, vinur Andy Warhol og frægra poppara eins og David Bowie og John Lennon. Hann var töffari út í eitt. Ég mæli líka með með að samstarfsfólk mitt kynni sér líka lag Lou Reed og the Velvet Underground, Sweet Jane sem er frábært partý-lag með flottari “riff-um” sem hafa verið samin. Væri flott “bið-lag“ í afgreiðslunni hjá okkur 🙂
Blessuð sé minning Lou Reed.
Ég skora á Hörpu Þuríði Böðvarsdóttir að koma með lag næsta föstudag.
Hér eru leiðbeiningar um skráningu í Vinnustund og skil á vottorði ef þið lendið í sóttkví eða einangrun:
Í sóttkví Fjarvistartegund í Vinnustund er „sóttkví skv. fyrirmælum yfirvalda, launuð fjarvera gr. skv. 12.2.6“. Ef hægt má vinna heima á meðan sóttkví stendur skal nota inn- og útstimplun í Vinnustund eða Smástund. Ekki er heimilt að mæta til vinnu á starfsstöð á meðan sóttkví stendur. Mælum með að skrá sóttkví í einni færslu þegar sóttkví lýkur, hafið samband ef þið viljið aðstoð við skráningu í Vinnustund.
Í einangrun Þegar einstaklingur greinist með covid eru þeir dagar skráðir sem veikindi. Ef fólk er einkennlaust og hresst er heimilt að vinna heima, ef hægt. Þess ber að geta að sama gildir um veikindi þó unnið sé heima – starfsmaður sem er sannarlega veikur á ekki að vinna heldur hugsa um heilsuna og ná bata. Mælum með að skrá einangrun/sóttkví í einni færslu þegar tímabilinu lýkur, hafið samband ef þið viljið aðstoð við skráningu í Vinnustund.
Vottorð Á Heilsuvera.is er hægt að sækja vottorð vegna sóttkvíar og einangrunar undir flipanum „Covid-19“ > „Vottorð“ ath. að sækja ekki vottorð fyrr en sóttkví/einangrun lýkur, annars gæti vantað lokadagsetningu á vottorðið.
Eitt af markmiðum grænu skrefanna er að efla umhverfisvitund starfsfólks og draga úr neikvæðum umhverfisháhrifum af starfsemi ríkisins. Í skrefi tvö, undir flokknum Samgöngur er aðgerð sem felur í sér að bjóða öllu starfsfólki kynningu á vistakstri.
Umhverfishópur, með samþykki Jóns Gunnars, hefur samið við Netökuskólann um að bjóða uppá netnámskeið í vistakstri fyrir allt starfsfólk Samgöngustofu. Við hvetjum ykkur til að nýta þetta góða boð og kynna ykkur vistakstur. Hér að neðan eru frekari upplýsingar um námskeiðið og leiðbeiningar um innskráningu.
Netnámskeið í vistakstri Netnámskeið í vistakstri tekur um klukkustund. Vistakstur er mikilvægari en nokkru sinni fyrr og því nauðsynlegt fyrir alla að kynna sér hvað vistakstur er og hvernig við keyrum vistakstur. Námskeiðið samanstendur af fyrirlestrum og verkefnum og er í fjórum hlutum. Námskeiðið er tilvalið til að uppfylla grænu skrefin þegar kemur að vistakstri.
Hvað er vistakstur? – Fyrir hvern er vistakstur. Þetta eru ekki einfaldar spurningar en það er þó hægt að svara þeim. Hér verður farið yfir þessar spurningar og ýmislegt fleira sem tengist vistakstri. Má þar nefna hvernig við keyrum vistakstur, mengun af umferð og hver er ávinningurinn. Mikilvægi vistaksturs á tímum hnattrænnar hlýnunar er flestum ljós. Það eru samt ekki allir til í að breyta aksturslagi sínu fyrr en þeir gera sér ljóst hver ávinningurinn er, bæði fyrir veskið og umhverfið. Að ekki sé talað um umferðaröryggið. Vistakstur er fyrir alla og skiptir alla máli.
Markmið með námskeiðinu er að þátttakendur: o Þekki helstu leiðir til að spara eldsneyti o Átti sig á áhrifum sem umferðin hefur á umhverfið o Geti sparað fjármuni og minnkað mengun o Fækkað slysum og óhöppum
Áherslur o Hvað er vistakstur o Hvernig bíl eigum við að velja o Aksturslag o Hvað hefur áhrif á eyðslu o Loftmótstaða o Losun mengandi efna o Sparnaður o Hvað skiptir máli í raun og veru
Námskeiðið eru fjórir stuttir fyrirlestrar, samtals um 45 mínútur. Á eftir hverjum fyrirlestri eru spurningar sem nemandi þarf að svara til að komast í næsta fyrirlestur. Hægt er að skrá sig og taka námskeiðið hvenær sem er sólarhringsins, jafnt á virkum degi sem frídegi. Þegar nemandi hefur klárað námskeið er honum sent rafrænt viðurkenningarskjal um að hann hafi tekið þátt í námskeiðinu.
Leiðbeiningar fyrir innskráningu: Farið á síðuna https://www.netokuskolinn.is/onnur-namskeid/skraning-vorur.aspx. Þar fyllir hver og einn út upplýsingar um sjálfan sig og velur sér lykilorð. Fyrir miðri skráningarsíðunni er hægt að slá inn fyrirtækjakóða, okkar kóði er SGS þá kemur fram á greiðslusíðunni að fyrirtækjakóði var notaður og nemandi þarf ekki að hugsa frekar um greiðslu og getur klárað skráninguna.
Eftir nýskráningu er hægt að fara á www.netokuskolinn.is og skrá sig inn vinstra megin á forsíðunni (kennitala er notendanafn, lykilorð var valið í nýskráningu) og fara þaðan inn á námskeiðið.
Bandaríski tónlistarmaðurinn Meatloaf lést í gær 74 ára að aldri. Tónlistarferill Meat Loaf, sem hét Michael Lee Aday réttu nafni, spannaði um sex áratugi, en hann seldi rúmlega 100 milljónir platna og birtist í rúmlega sextíu kvikmyndum. Platan Bat Out of Hell frá árinu 1977 er þannig ein af mest seldu plötum sögunnar. Sjá nánar frétt á visir.is.
Þættinum barst ábending um að við hæfi væri að skella í eins og eitt auka föstudagslag af þessu tilefni og er þá ekki við hæfi að velja lagið Paradise by the dashboard?
Við höfum nú hafið átak gegn slysum á sjó í samstarfi við Slysavarnarfélagið Landsbjörg og nefnist átakið 12 hnútar. 12 hnútar er listi yfir tólf algenga þætti sem geta leitt til slysa eða atvika til sjós. Síða átaksins er www.samgongustofa.is/12 hnutar.
Fjölmargir hagaðilar taka þátt í verkefninu og gefin verða út tólf veggspjöld á árinu 2022 sem miða að því að auka vitund og umræðu um öryggismál sjófarenda.
Fyrirmyndin er sambærilegt verkefni „The Dirty Dozen“ sem er listi yfir tólf algengustu mannlegu þættina sem leitt geta til slysa eða atvika í flugtengdri starfsemi.
Veggspjöldin tólf verða birt á síðunni jafnóðum og send á hagaðila sem tengjast siglingum. Hægt er að vista veggspjöldin, senda áfram, prenta út eða miðla á þann hátt sem hentar best þannig að öflug og góð dreifing náist.
Samgöngustofa, í samstarfi við Slysavarnafélagið Landsbjörg og fjölda aðila í sjávarútvegi, vinnur að útgáfu tólf rafrænna veggspjalda sem hlotið hafa nafnið „12 hnútar“. Fyrsta spjaldið var gefið út í gær og síðan eitt í hverjum mánuði þar eftir fram að lokum árs.
„Tilgangur þessa verkefnis er að fjalla um og undirstrika ýmsa þá mannlegu þætti sem oft leiða til slysa á sjó. Stórlega hefur dregið úr alvarlegum slysum á sjó og þykir nú orðið tíðindum sæta ef banaslys verður. Hins vegar eiga sér enn stað atvik sem leitt geta til alvarlegra slysa. Oft eru þetta afleiðingar tiltekinna viðhorfa, afstöðu, úreltra venja og ýmiss annars í mannlegri hegðun sem aukið geta líkurnar á slysum,“ segir í tölvupósti Einars Magnúsar Magnússonar, sérfræðings á öryggis- og fræðsludeild Samgöngustofu, til blaðamanns.
„Með 12 hnútum viljum við uppræta þessi atriði en á spjöldunum er getið um fyrirbyggjandi aðgerðir sem við vonum að sjómenn tileinki sér,“ skrifar hann.
Einar Magnús segir verkefnið unnið í samstarfi við fjölda aðila og að enn sé að bætast við þann hóp. Handrit og gerð spjaldanna var unnið í samvinnu við Slysavarnaskóla sjómanna.
Vilja fleiri með sér í lið Þeir sem þegar hafa lagt nafn sitt við verkefnið eru: Brim hf., Félag skipstjórnarmanna, FISK Seafood, Hafnasamband Íslands, Landhelgisgæslan, Slysavarnafélagið Landsbjörg, Samtök aðila í ferðaþjónustu, Samtök fyrirtækja í sjávarútvegi, Sjómannasamband Íslands, VM – félag vélstjóra og málmtæknimanna, Vinnslustöðin hf., Visir hf. og Þorbjörn hf.
Að lokum hvetur Einar Magnús fyrirtæki, stofnanir og félög sem tengjast sjávarútvegi og hafa áhuga á að leggja nafn fyrirtækis síns eða samtaka við útgáfuna að hafa samband við Samgöngustofu.
Árið 2021 var metár hjá NorType, bæði hvað varðar fjölda skráðra gerðarviðurkenninga (2.197) og fjölda skráðra gerða (899.288). Þrátt fyrir þetta og áskorana vegna Covid þá gekk starfsemin mjög vel og öll verkefni voru unnin innan þess tímaramma sem NorType er settur.
Meðfylgjandi er tvö línurit sem sýna samanburð á milli ára frá árinu 2014.
Á starfsmannafundinum í morgun fór forstjóri yfir nokkur atriði eins og rekstrarniðurstöður síðasta árs, upprifjun á ýmsum áföngum sem náðust á síðasta ári, niðurstöður úr viðhorfskönnun á meðal starfsfólks, öryggismál, húsnæðismál, stefnumótun og áskoranirnar framundan.
Fyrir þau sem misstuð af fundinum eða viljið skoða kynninguna nánar þá er hún hér aðgengileg. Þess ber þó að geta að kynningin er trúnaðarmál og eingöngu ætluð starfsfólki Samgöngustofu og ekki til dreifingar út fyrir stofnunina.
Hertar samkomutakmarkanir taka gildi frá miðnætti og fara fjöldatakmarkanir úr 20 í 10 til 2. febrúar nk. Við munum skipta húsinu okkar upp í eftirfarandi sóttvarnarhólf;
1. hæð þjónustudeild – notar starfsmannainngang í portinu á bak við húsið.
1. hæð skjaladeild- og kerfisrekstur – notar aðalinngang
1. hæð mötuneyti – notar mötuneytisinngang
2. hæð – notar starfsmannainngang Ármúlamegin
3. hæð – notar starfsmannainngang Ármúlamegin
Því miður þá getum við ekki skipt upp 2. og 3. hæð frekar vegna framkvæmda í stigagangi við Háaleitisbraut.
Við vorum búin að áætla um 20 manns á hverja hæð og þurfum við nú að fækka í húsi skv. nýjum reglum. Allir sem geta unnið heima, vinna heima. Bið ykkur að lagfæra skjalið fyrir kl. 15:00 í dag. Hér er slóð á áætlunarskjalið.
Nokkur praktísk atriði í lokin;
Ekki er heimilt að fá fólk á fundi í Ármúla 2, fundir skulu fara fram í gegnum fjarfundarbúnað.
Mötuneytið – matur sendur upp á 2. og 3. hæð. 1. hæðin notar mötuneytið.
Óheimilt er að fara á milli hæða. Snorri, Bjössi, Hrafnhildur og TD mega fara á milli hólfa ef þess þarf en bera þá andlitsgrímu.
Ef starfsmaður eða heimilisfólk er með einkenni og á leið í pcr próf þá skal halda sig heima þar til niðurstöður berast.
Virðum 2m regluna, notum andlitsgrímu þegar þess þarf og verum dugleg að spritta okkur.
Ef það eru einhverjar spurningar þá ekki hika við að senda póst á Ólöfu starfsmannastjóra eða á laun@samgongustofa.is.
Sigurður Ingi Jóhannsson, innviðaráðherra, hefur ákveðið að skipa starfshóp til að kortleggja stöðu smáfarartækja í umferðinni og vinna tillögur að úrbótum, m.a. til að tryggja umferðaröryggi og bæta innviði fyrir nýjan ferðamáta. Starfshópurinn skal skila af sér tillögum fyrir 1. júní nk.
Smáfarartæki hafa á skömmum tíma orðið áberandi og mikilvægur ferðamáti og skapað tækifæri til jákvæðra breytinga á ferðavenjum fólks. Í grænbók um samgöngur sem birt var í september sl. er aukin hlutdeild smáfarartækja skilgreind sem eitt af lykilviðfangsefnum málaflokksins.
Markmið með vinnu starfshópsins eru að styðja við fjölbreyttari og umhverfisvænni ferðamáta og stuðla jafnframt að auknu umferðaröryggi í tengslum við notkun smáfarartækja í umferðinni með þarfir notenda þeirra að leiðarljósi. Því er stefnt að því að sumarið 2022 liggi fyrir tillögur að breytingum á regluverki smáfarartækja, ásamt áherslum og aðgerðum um örugga notkun, búnað og umhverfi smáfarartækja hér a landi sem samræmist þessum markmiðum.
Samráð við almenning og hagaðila
Starfshópurinn munu eiga samráð við opinbera aðila og einkaaðila sem málið varðar sérstaklega, s.s. fulltrúa notenda smáfarartækja og þeirra fyrirtækja sem leigja út slík tæki. Litið skal til reynslu nágrannaríkja af smáfarartækjum og kannað hvort árangri hafi verið náð þar með breytingum á regluverki. Almenningi verður jafnframt gefið færi á að koma sjónarmiðum sínum á framfæri.
Í starfshópnum verða fulltrúar samgöngu- og sveitarstjórnarráðuneytis, Samgöngustofu, Vegagerðarinnar, Lögreglunnar á höfuðborgarsvæðinu, Sambands íslenskra sveitarfélaga og Reykjavíkurborgar. Verkefnisstjóri ráðuneytisins er Björn Ágúst Björnsson.
Á mánudaginn hóf störf Hjördís Sigríður Ólafsdóttir, hún mun starfa sem sérfræðingur á flugrekstrar og skírteinadeild og sinna verkefnum tengdum námi og skírteinum flugliða ásamt Katrínu, Ingu Birnu, Ellý og Andra Þór.
Hjördís deilir skrifstofu með þeim á þriðju hæð, gangi 3b.
Fyrir jól skoraði Trausti Ægir Ólafsson á Guðna Jónsson að koma með næsta föstudagslag. Guðni á því fyrsta lag ársins og um val sitt segir Guðni:
UNSPECIFIED – CIRCA 1970: Photo of ACDC Photo by Michael Ochs Archives/Getty Images
Hérna er föstudagslagið frá mér. Lagið heitir ‘’Riff Raff” með hjómsveitinni AC/DC sem ég er búinn að hlusta á frá fermingaraldri, hérna er enginn flókinn textagerð í gangi heldur bara hrátt rokk sem kemur blóðinu á hreyfingu.
Ég skora á Kristinn Jóhannesson að koma með næsta föstudagslag.
Samgöngustofa auglýsir stöðu sérfræðings á skipatæknideild. Auglýsingin er komin í loftið á starfatorgi, heimasíðu okkar og á Alfreð, einnig verður birt auglýsing í Fréttablaðinu nú um helgina.
Samgöngu- og sveitarstjórnarráðuneytið birti í gær fréttaannál fyrir árið 2021. Þar kennir ýmissa grasa og margt tekið fram sem snertir okkar málefnasvið svo sem stafrænt ökunám, netöryggi, lög um loftferðir, frumvarp um alþjóðlega skipaskrá, sáttmáli milli hestafólks og annarra vegfarenda, ný heildarlög um áhafnir skipa, ný heildarlög um skip, skýrsla um stöðu barna og ungmenna í samgöngum, grænbók um samgöngur birt, loftferðasamningur Íslands og Bretlands tók gildi, skýrsla starfshóps um ræktun orkujurta, Ísland gerist aðili að EGNOS, sjálfvirkt meðalhraðaeftirlit tekið í notkun, minningarathafnir um fórnarlömb umferðarslysa o.fl.. Það er áhugavert að horfa yfir liðið ár með þessum hætti og óhætt að mæla með að kíkja á annálinn góða.
Fréttaannáll samgöngu- og sveitarstjórnarráðuneytisins 2021
Nýliðið ár var viðburðaríkt í málaflokkum samgöngu- og sveitarstjórnarráðuneytisins. Í fréttaannál ráðuneytisins er fjallað um helstu áfanga í störfum ráðuneytisins. Verkefni ráðuneytisins mörkuðust einnig áfram af heimsfaraldri kórónuveiru.
Stórauknu fjármagni var áfram veitt á árinu í uppbyggingu innviða og samgöngumannvirkja í samræmi við samgönguáætlun 2020-2034 og fjárfestingaátak stjórnvalda vegna heimsfaraldursins, s.s. nýjar vegaframkvæmdir, viðhald vega, hafnir og flugvelli.
Í júlí var undirrituð yfirlýsing um lagningu Sundabrautar en stefnt er að því að framkvæmdir hefjist árið 2026 og að brautin verði tekin í notkun árið 2031. Mikil arðsemi er af lagningu Sundabrautar samkvæmt drögum að niðurstöðu óháðrar félagshagfræðilegrar greiningar sem Vegagerðin kynnti í september.
Þá var frumvarp um nýja heildarlöggjöf um skip var samþykkt á Alþingi vorið 2021 sem einfaldar og samræmir lagaumhverfi á þessu sviði.
Landsátakinu Ísland ljóstengt lauk vorið 2021 þegar síðustu styrktarsamningar fjarskiptasjóðs við sveitarfélög voru gerðir. Frá árinu 2016 hafa 57 sveitarfélög hlotið styrki til að tengja um 6.200 styrkhæfa staði með ljósleiðara en þúsundir annarra bygginga og sumarhúsa hafa notið óbeint góðs af uppbyggingunni. Þá var fjármögnun á nýjum fjarskiptasæstreng milli Íslands og Írlands hefur verið tryggð með aðkomu ríkisins. Einnig urðu tímamót þegar Alþingi samþykkti ný lög um íslensk landshöfuðlén í maí á síðasta ári.
Í byggðamálum var unnið að ýmsum verkefnum í samræmi við byggðaáætlun. Áhersla var lögð á að fjölga atvinnutækifærum með verkefninu Störf án staðsetningar. Framlög voru veitt til fjarvinnslustöðvar en þar geta stofnanir geta sótt um styrk til að koma opinberum gögnum á stafrænt form. Þá var tillögu til þingsályktunar dreift á Alþingi um stefnumótandi byggðaáætlun til fimmtán ára en mælt verður fyrir henni á nýju ári.
Vegvísir.is, nýr gagnvirkur upplýsingavefur samgöngu- og sveitarstjórnarráðuneytis, var opnaður á árinu og markar tímamót í miðlun upplýsinga um samgöngur, fjarskipti og byggðamál. Vefnum er ætlað að vera leiðarvísir almennings að lykilupplýsingum í þessum málaflokkum. Hægt er að fylgjast með fjármögnun, framvindu og árangri í yfir 500 verkefnum og stöðu 60 árangursmælikvarða.
Ný ríkisstjórn tók við í lok nóvember. Sigurður Ingi Jóhannsson varð innviðaráðherra í ráðuneyti sem fer með samgöngur, sveitarstjórnarmál, byggðamál, húsnæðis- og mannvirkjamál og skipulagsmál.
Skýrsla starfshóps um öryggi lendingarstaða hefur verið birt á vef Stjórnarráðsins. Verkefnið var skilgreint í flugstefnu í núgildandi samgönguáætlun 2020-2034 sem Alþingi samþykkti sumarið 2020. Niðurstöður og tillögur skýrslunnar munu nýtast vel við endurskoðun samgönguáætlunar og tillögugerð á næstu árum.
Sigurður Ingi Jóhannsson, innviðaráðherra, skipaði starfshópinn (þá sem samgöngu- og sveitarstjórnarráðherra) í júní sl. til að leggja mat á lendingarstaði út frá öryggi þeirra. Verkefnið var að leggja heildstætt mat á mikilvægi lendingarstaða á Íslandi út frá öryggishlutverki þeirra í víðum skilningi.
Verkefnið var afmarkað við skráða lendingarstaði án áætlunarflugs og loftför sem nýtt eru til almannavarna, svo sem þyrlur og flugvél Landhelgisgæslunnar. Einnig var það m.a. afmarkað við að sinna þurfi hefðbundnu sjúkraflugi, bregðast þurfi við fjölmennu slysi á landi eða sjó, flytja þurfi hóp fólks í sætum með fljótvirkum hætti eða rof verði á mikilvægri samgönguleið vegna hamfara.
Niðurstöður vinnuhópsins voru að sjúkra- og öryggisflugvöllur sem nýtast á flugvél Landhelgisgæslunnar og sjúkraflugvélum við erfiðar aðstæður þurfi að uppfylla eftirfarandi kröfur: Flugbraut hans þarf að lágmarki að vera klædd, 1.000 m löng og 30 m breið, flugbrautarljós þurfa að vera (þröskulds, enda- og hliðarljós), aðflugshallaljós, RNP-aðflug (gervihnattaleiðsaga) og upplýsingaþjónusta (veður og ástand flugvallar). Þá þarf að halda flugbraut hreinni og hálkuverja eftir þörfum.
Gerð er tillaga um hvaða lendingarstaðir ættu að vera til reiðu fyrir sjúkraflug og flug tengt þjóðaröryggi og náttúruvá.
Starfshópurinn telur m.a. að gera þurfi tilteknar ráðstafanir vegna núverandi sjúkraflugvalla á Blönduósi, Sauðárkróki, í Reykjahlíð og Norðfirði til að uppfylla kröfurnar. Starfshópurinn telur að byggja þurfi upp sjúkraflugvöll í Skaftafelli eða Fagurhólsmýri. Þá þurfi að skilgreina Rif og Bakka sem sjúkraflugvelli og byggja upp og viðhalda sem slíkum. Starfshópurinn kemst að þeirri niðurstöðu að þétta þurfi net sjúkraflugvalla. Skoða þurfi sérstaklega möguleika á að byggja upp nærri fjölförnustu ferðamannastöðunum þar sem langt er í bjargir, s.s. á Kirkjubæjarklaustri, Vík og Hólmavík.
Í vinnuhópum sátu: Friðfinnur Skaftason, formaður, og Valgerður B. Eggertsson fyrir samgöngu- og sveitarstjórnarráðuneytið, Ágúst Gunnar Gylfason, Guðjón Atlason, Helga Harðardóttir, Jónas Guðmundsson, Leifur Hallgrímsson, Matthías Sveinbjörnsson, Ólöf Birna Ólafsdóttir og Sigrún Björk Jakobsdóttir.
Skýrslan var unnin í samstarfi við Flugmálafélag Íslands, heilbrigðisráðuneytið, Isavia innanlandsflugvelli, Landhelgisgæslu Íslands, Mýflug, Ríkislögreglustjóra, Samgöngustofu og Slysavarnafélagið Landsbjörg.
