Sérfræðingar Samgöngustofu í siglingavernd héldu í vikunni fund með fulltrúum bandarísku strandgæslunnar (USCG). Í framhaldinu var litið inn til nokkurra hafna og eins og sjá má er meðfylgjandi mynd tekin á Akureyri. Heimsókn USCG er liður í mikilvægu samstarfi og samráði þjóðanna í þágu farsællar framkvæmdar siglingaverndar. Þessar heimsóknir eru gagnkvæmar og nánast árvissar.
Samkvæmt frétt á vef innviðaráðuneytisins hefur framkvæmdastjórn Evrópusambandsins hafið opið samráð um endurskoðun á þremur tilskipunum um veghæfi bifreiða og eftirlit með því. Frestur til að koma að athugasemdum og sjónarmiðum er til og með 28. september 2022.
Helsta markmið endurskoðunarinnar er að tryggja öryggis- og aðstoðarkerfi bifreiða séu áreiðanleg allan þann tíma sem þeim er ætlað að endast. Þess utan á að tryggja að prófanir á losun gróðurhúsalofttegunda frá ökutækjum sem gerðar eru við skoðun séu áreiðanlegar. Loks er ætlunin að bæta vistun og miðlun á upplýsingum um veghæfi á milli ríkja innan Evrópu.
Tilskipanirnar sem um ræðir eru:
Ísland er í fjórða sæti í árlegri könnun meðal Evrópuríkja á stafrænni, opinberri þjónustu (eGovernment Benchmark) og hækkar um þrjú sæti milli ára. Þetta kemur fram í frétt á vef fjármála- og efnahagsráðuneytisins.
Í efstu þremur sætunum eru Malta, Eistland og Lúxemborg, en næst á eftir Íslandi koma Holland, Finnland og Danmörk. Könnunin er ítarleg og byggist m.a. á upplifun notenda, en Evrópusambandið hefur sett það markmið að bæta notendaupplifun og stafræna þjónustu.
Í niðurstöðum könnunarinnar er Ísland nefnt sem leiðandi þjóð þegar kemur að rafrænni auðkenningu. Ísland er enn fremur í fyrsta sæti í notkun rafrænna skilríkja en í upphafi þessa árs voru 96% landsmanna 18 ára og eldri með rafræn skilríki. Þá er nú hægt að nýta stafrænar umsóknir eða stafræn samskipti í um 80% tilvika þegar sækja þarf opinbera þjónustu, en þar er Ísland sömuleiðis leiðandi meðal Evrópuþjóða.
Ísland er í 11. sæti þegar kemur að stafrænni þjónustu á netinu en 91 prósent opinberrar þjónustu er þegar hægt að leysa á netinu. Þá er Ísland í áttunda sæti þegar kemur að snjallsímavænni þjónustu með 98 prósentustig og fær Ísland.is appið sérstaka umfjöllun í skýrslunni.
Niðurstaðan sýnir að Ísland er vel yfir meðaltalinu í þremur af fjórum flokkum könnunarinnar, en unnið er markvisst að því að styrkja stöðu Íslands enn frekar næstu árin.
„Það er alltaf ánægjulegt þegar við setjum okkur háleit markmið og náum þeim. Þessi niðurstaða er mikil viðurkenning fyrir öfluga vinnu síðustu missera, en við ætlum okkur auðvitað að gera enn betur á komandi árum.“
Í stafrænni stefnu hins opinbera sem gefin var út í fyrra er sett fram sú sýn að verða meðal allra fremstu þjóða heims í stafrænni þjónustu. Ísland nálgast það markmið hratt og hefur hækkað um sjö sæti frá árinu 2019. Lykiláherslur stefnunnar eru að auka samkeppnishæfni þjóðarinnar, bæta opinbera þjónustu, tryggja öruggari innviði og nútímalegra starfsumhverfi.
Eins og þið hafið kannski tekið eftir þá er mikið af frábæru myndefni að koma úr drónum frá eldstöðvunum. Mikill fjöldi „drónaflugmanna“ hefur safnast á svæðið eins og í gosinu í fyrra og getur flug dróna valdið hættu, ef ekki er farið eftir settum reglum, þegar mönnuð loftför fljúga yfir svæðið. Því ákváðum við í síðustu viku að árétta í fjölmiðlum og samfélagsmiðlum mikilvægi þess að drónaflugmenn fari eftir settum reglum og þá helst að gæta þess að fara aldrei yfir 120 metra frá jörðu og að þeim ber ávallt að víkja frá mönnuðum loftförum. Eftirfarandi er frétt af vefnum okkar, en hluti af henni birtust í fjölmiðlum í liðinni viku. Það er ágætt fyrir okkur sem hér störfum að vera meðvituð um þessar reglur, t.d. ef við erum sjálf að fljúga dróna í okkar frítíma:
Nú þegar eldgos er hafið að nýju á Reykjanesi vill Samgöngustofa, að gefnu tilefni, árétta reglur sem gilda um drónaflug. Þær eru settar til að tryggja öryggi, t.d. aðgreiningu dróna og annarra loftfara:
Verði vart við brot sem geta stefnt öryggi í hættu gæti þurft að grípa til þess að setja verulegar takmarkanir eða bann við drónaflugi við eldstöðina.
Vegna eldgossins má búast við reglubundnu rannsóknarflugi flugvéla og þyrlna á vegum stjórnvalda við eldstöðina. Flugið er í þágu almannavarna og vísinda og mun njóta forgangs fram yfir annað flug.
Til að tryggja öryggi verður svæði skilgreint sem hættu- eða haftasvæði fyrir starfrækslu flugvéla og þyrlna. Samhliða þessu verður skilgreint bannsvæði fyrir dróna á meðan rannsóknarflugið fer fram. Hætt er við að stuttur fyrirvari verði á slíku og mun umfang og gildistími markast af aðstæðum hverju sinni.
Búið er að stofna Fantasy deild fyrir þau hér innanhúss sem hafa áhuga á enska boltanum og Fantasy leiknum. Þið stofnið aðgang að Fantasy deildinni hér.
Eftir að þið hafið stofnað lið þá getið þið svo komið í deildina með því að smella hér.
Megi besta liðið vinna!
Ný heildarlög um áhafnir skipa voru nýlega samþykkt á Alþingi en lögin taka gildi 1. janúar 2023.1 Markmið laganna er, samkvæmt frétt á vef innviðaráðuneytisins, að tryggja öryggi áhafna íslenskra skipa og farþega, efla varnir gegn mengun frá skipum og tryggja meðal annars skilvirka menntun og þjálfun áhafna, skírteinisútgáfu, lágmarksmönnun, lögskráningu og bæta vinnuskilyrði áhafna. Lögunum er einnig ætlað að stuðla að jöfnu aðgengi kynjanna að menntun, þjálfun og störfum um borð í íslenskum skipum.
Þá veita lögin nægilegar heimildir til að innleiða þær kröfur sem leiðir af skuldbindingum samkvæmt samningnum um Evrópska efnahagssvæðið og öðrum alþjóðlegum skuldbindingum Íslands á sviði sjóréttar er lúta að áhöfnum skipum. Með lögunum er lagaumhverfi um áhafnir skipa einfaldað þannig að ein heildarlög koma í stað fernra laga. Þetta eru lög um bryta og matreiðslumenn í farskipum og fiskiskipum, nr. 50/1961, lög um áhafnir íslenskra farþegaskipa og flutningaskipa, nr. 76/2001, lög um áhafnir íslenskra fiskiskipa, varðskipa, skemmtibáta og annarra skipa, nr. 30/2007, og lög um lögskráningu sjómanna, nr. 35/2010.
Víðtækt alþjóðlegt regluverk er í gildi um áhafnir skipa sem byggir á samningum Alþjóðasiglingamálastofnunarinnar og Alþjóðavinnumálastofnunarinnar, sem og ákvæðum gerða sem teknar hafa verið upp í EES-samninginn. Nýju áhafnalögin taka tillit til allra þessara alþjóðlegu skuldbindinga.
Skoða ný heildarlög á vef Alþingis
1 Breyting á 12. gr. laga nr. 30/2007 um áhafnir íslenska fiskiskipa, varðskipa, skemmtibáta og annarra skipa öðlast þegar gildi.
Ný gjaldskrá Samgöngustofu tók gildi í gær, þann 1. ágúst 2022, í samræmi við auglýsingu innviðaráðuneytisins. Almennt er um að ræða 5% hækkun á gjaldskrárliðum. Einstaka gjaldskrárliðir hækka umfram 5% eins og númeraplötur þar sem verið er að leiðrétta skattheimtur og framleiðslukostnað en einnig hefur tímagjald fyrir útselda vinnu hækkað um 14,6%.
Flokkun á gjaldskrárliðum hefur verið endurskoðuð og hafa gjaldskrárliðir verið flokkaðir í kafla sem skiptast í:
1) Almennir skilmálar
2) Flug
3) Umferð
4) Siglingar
Endurflokkunin gerir það auðveldara fyrir hagaðila að nálgast þær upplýsingar verið er að leita eftir.
Gjaldskráin byggir að mestu á gjaldskrá stofnunarinnar nr. 338 frá 2015 sem síðast tók breytingum þann 1. september 2020 með 2,5% hækkun á flesta gjaldaliði. Hægt er að sjá þróun einstakra gjaldaliða á vef Samgöngustofu.
Ný heildarlög um loftferðir tóku gildi þann 13. júlí síðastliðinn en þau voru samþykkt á Alþingi 16. júní. Þau koma í stað eldri loftferðalaga sem að grunni til voru frá árinu 1998.
Samkvæmt frétt á vef innviðáðuneytisins eru markmið laganna er að stuðla að og tryggja öruggar, greiðar og skilvirkar flugsamgöngur í samræmi við stefnu stjórnvalda að teknu tilliti til neytendaverndar, umhverfissjónarmiða og þjóðréttarlegra skuldbindinga Íslands. Er það afar mikilvægt til að tryggja frekari vöxt og framgang samkeppnishæfrar flugstarfsemi hér á landi með umhverfisvænum hætti.
Skipta má helstu breytingum sem lögin fela í sér í tvo flokka:
Annars vegar eru breytingar er varða stjórn flugmála og eftirlit. Helgast þær fyrst og fremst af breytingum sem orðið hafa á síðastliðnum árum í tengslum við aðild Íslands að Flugöryggisstofnun Evrópusambandsins, EASA. Nú er með skýrari hætti kveðið á um verkaskiptingu Samgöngustofu og EASA í lögunum. Þessi verkaskipting á rót sína að rekja til nýrrar grunngerðar Evrópusambandsins á sviði flugs, reglugerðar (ESB) nr. 2018/1139 um almenningsflug og stofnun Flugöryggisstofnunar Evrópusambandsins o. fl., sem tekin verður upp í EES-samninginn á haustmánuðum. Umfang þessarar gerðar er mikið en hún tekur til nær allra þátta í flugstarfsemi, bæði einstaklinga og lögaðila í almenningsflugi, sem og verkefna og eftirlits yfirvalda.
Hins vegar breytingar á efnisákvæðum loftferðalaga til samræmis við þjóðréttarlegar skuldbindingar Íslands, bæði alþjóðlega samninga á sviði flugmála og EES-gerðir sem þegar hafa verið teknar upp í EES-samninginn eða bíða upptöku. Í lögunum eru heimildir til setningar reglugerða á þessu sviði styrktar. Tekið er tillit til samnings um sameiginlega Evrópska flugsvæðið sem Ísland gerðist aðili að 2006 og tók gildi hvað afmarkaða þætti varðar í desember 2017. Samningurinn kveður á um frjálsan markaðsaðgang, staðfesturétt, jöfn skilyrði til samkeppni og sameiginlegt regluverk. Jafnframt er tekið tillit til nýs viðauka um öryggisstjórnunarkerfi við Chicago-samninginn um alþjóðaflugmál. Loks er Montreal-samningurinn frá 1999, alþjóðasamningur um skaðabótaábyrgð flugrekenda, lögfestur.
Að auki fela lögin í sér ýmsar breytingar á öðrum lögum. Meginþorri þeirra varða leiðréttingu hugtaka og tilvísana, en einnig eru fáeinar efnisbreytingar. Veigamestu breytingar á lögum um rannsókn samgönguslysa varða skyldur nefndarinnar til að rannsaka flugslys og alvarleg flugatvik. Þá eru afmarkaðar breytingar gerðar á tekjuskattslögum og lögum um friðhelgi og forréttindi alþjóðastofnana, m.a. í því skyni að bregðast við athugasemdum Eftirlitsstofnunar EFTA.
Birt hafa verið í samráðsgátt stjórnvalda áform Sigurðar Inga Jóhannssonar, innviðaráðherra, um frumvörp sem hann hyggst leggja fram á Alþingi næsta haust. Allir geta sent inn umsögn um áformin en frestur er mismunandi eftir einstökum áformum. Þau frumvörpu sem snerta Samgöngustofu á einhvern hátt eru eftirfarandi:
Áformað er að leggja fram frumvarp til laga um heimild til að stofna opinbert hlutafélag um uppbyggingu og rekstur samgönguinnviða. Í stjórnarsáttmála ríkisstjórnarinnar er lögð áhersla á að ráðist verði í skilgreindar þjóðhagslega arðsamar flýtiframkvæmdir í samgöngum á grundvelli fölbreyttari fjármögnunar og samstarfs við einkaaðila. Einnig að mótuð verði áætlun um uppbyggingu og fjármögnun jarðganga og opinbert félag stofnað um jarðgangagerð. Margvíslegur þjóðfélagslegur ávinningur fylgir því að flýta slíkum framkvæmdum, s.s. aukið umferðaröryggi, stytting leiða með þeim jákvæðu umhverfisáhrifum sem því fylgja og betri og öruggari tengingar byggða og atvinnusvæða.
Í samvinnu innviðaráðuneytisins, fjármála- og efnahagsráðuneytisins og Vegagerðarinnar hefur verið unnið að mótun traustrar og hagfelldrar umgjarðar slíkra innviðaverkefna til framtíðar. Lykilþáttur í starfsemi félagsins er að halda utan um fjármögnun verkanna, þ.m.t. innheimtu notkunargjalda. Greiningar benda til þess að fýsilegast sé að halda utan um slík verkefni í opinberu hlutafélagi sem verði að fullu í eigu ríkisins. Þannig fæst skýr umgjörð og utanumhald um þessi verkefni. Eftir á þó að taka afstöðu til þess hvort rétt sé að það verði í einu slíku félagi eða fleirum.
Frestur til að skila umsögn í samráðsgátt er til og með 2. ágúst 2022.
Áformað er að leggja fram frumvarp til laga um uppbyggingu og rekstur flugvalla og veitingu flugleiðsöguþjónustu. Er því ætlað að koma í stað þrennra laga sem nú gilda á þessu sviði um stofnun og starfsemi Isavia ohf. og þau verkefni sem félagið annast fyrir ríkið.
Ákvæði núgildandi laga um rekstur flugvalla og flugleiðsögu eru dreifð, takmörkuð og að einhverju leyti úrelt. Þá vantar skýr ákvæði um hlutverk flugvalla í heildarsamgöngukerfi landsins og hvernig stefnumörkun samgönguyfirvalda skuli framfylgt. Almennar kröfur til starfrækslu flugvalla, rekstrarstjórnunar flugumferðar og veitingu flugleiðsöguþjónustu falla hins vegar undir lög um loftferðir og varða áformin ekki þá löggjöf.
Ætlunin er að útfæra sérstaka heimild til töku varaflugvallagjalds í frumvarpinu í því skyni að efla þjónustu og uppbyggingu varaflugvalla fyrir millilandaflugið hér á landi. Við vinnslu frumvarpsins verður skoðað með hvaða hætti er best að útfæra slíka gjaldtökuheimild.
Frestur til að skila umsögn í samráðsgátt er til og með 29. júlí 2022.
Áformað er að leggja fram frumvarp til laga um stefnumarkandi áætlanir á sviði húsnæðis- og skipulagsmála, samgangna og byggðamála. Sú stefnumörkun sem fellur undir frumvarpið eru: Byggðaáætlun, landsskipulagsstefna, samgönguáætlun, stefnumótun á sviði húsnæðismála og stefnumótandi áætlun ríkisins um málefni sveitarfélaga.
Með því að samhæfa stefnur og áætlanir á verkefnasviði ráðuneytisins gefst kostur á að hámarka árangur og jákvæð áhrif stefnumótunarinnar enda verði tekið mið af tengdum málefnum og horft lengra en til sérstakra verkefna einstakra málaflokka. Byggt verður á skýrum áherslum með sameiginlegri framtíðarsýn, meginmarkmiðum og sameiginlegum verkefnum fyrir alla málaflokka sem ganga þurfa með samræmdum hætti í gegnum allar áætlanirnar. Takmarkið er að ná meiri árangri fyrir samfélagið með aukinni samvinnu málaflokka, meira gagnsæi og hagkvæmari nýtingu fjármuna.
Frestur til að skila umsögn í samráðsgátt er til og með 2. ágúst 2022.
Áformað er að leggja fram frumvarp til laga um breytingu á umferðarlögum nr. 77/2019 . Frumvarpinu er ætlað að veita EES-gerðum, sem til stendur að taka upp í EES-samninginn, nauðsynlega lagastoð, samhliða því að fella brott ósamrýmanleg ákvæði í gildandi löggjöf og tryggja að hún falli að þjóðréttarlegum skuldbindingum.
Einnig kemur til skoðunar að gera aðrar smærri breytingar, s.s. til að fylgja eftir tillögum starfshóps um smáfarartæki.
Frestur til að skila umsögn í samráðsgátt er til og með 29. júlí 2022.
Áformað er að leggja fram frumvarp til laga um breytingu á lögum um farþegaflutninga og farmflutninga á landi nr. 28/2017. Frumvarpinu er ætlað að tryggja lagastoð til innleiðingar á samevrópskum reglugerðum er snúa að farmflutningum milli ríkja á ökutækjum yfir 2,5 tonn að heildarþyngd. Einnig er til skoðunar að gera breytingar til einföldunar á leyfafyrirkomulagi skv. lögunum.
Frestur til að skila umsögn í samráðsgátt er til og með 27. júlí 2022.
Drög að reglugerð um umferðarmerki og notkun þeirra hafa verið birt í samráðsgátt stjórnvalda til umsagnar samkvæmt frétt á vef innviðaráðuneytisins. Allir hafa tækifæri til að senda inn umsögn eða ábendingar en frestur til að skila umsögn er til og með 11. ágúst 2022.
Reglugerðardrögin innihalda lýsingar á umferðarmerkjum, umferðarljósum, hljóðmerkjum og öðrum merkjum á eða við veg til stjórnunar á eða leiðbeiningar fyrir umferð. Gerðar eru talsverðar breytingar á flokkunarkerfi umferðarmerkja, m.a. til einföldunar og í því skyni að samræma við alþjóðlega staðla.
Í drögunum er lagt til að tekin verði upp á fimmta tug nýrra umferðarmerkja, á annan tug nýrra yfirborðsmerkinga og tvenn ný umferðarljós. Þá er lagt til að gera breytingar á útliti á fimmta tug merkja og að fella á brott á sjöunda tug merkja. Markmiðið er að merking umferðarmerkja verði gerð skýrari, orðalag samræmt og tilmæli til veghaldara færð í viðauka. Í viðaukum er fjallað um hvernig veghaldari skuli nota umferðarmerki, þar á meðal um kröfur til tæknilegrar útfærslu og uppsetningar.
Innviðaráðherra skipaði starfshóp til að vinna reglugerðardrögin. Hópurinn var skipaður fulltrúa Vegagerðarinnar sem leiddi hópinn og fulltrúum ráðuneytisins, Samgöngustofu, lögreglunnar á höfuðborgarsvæðinu, Reykjavíkurborgar og Sambands íslenskra sveitarfélaga. Við vinnuna hafði starfshópurinn m.a. hliðsjón af ákvæðum sáttmála Sameinuðu þjóðanna um umferðarmerki og umferðarljós frá 1968 auk þess sem litið var til regluverks á öðrum Norðurlöndum.
Viðvörunarmerki (100)
Forgangsmerki (200)
Bannmerki (300)
Boðmerki (400)
Sérreglumerki (500)
Upplýsingamerki (600)
Vegvísar og þjónustumerki (700).
Undirmerki (800)
Önnur merki (900)
Yfirborðsmerkingar (1000)
Umferðarljós og hljóðmerki (1100)
Drög að frumvarpi til nýrra laga um leigubifreiðaakstur hafa verið birt í samráðsgátt stjórnvalda til umsagnar. Allir hafa tækifæri til að senda inn umsögn eða ábendingar en frestur til að skila umsögn er til og með 27. júlí 2022.
Að meginstefnu til er um sama frumvarp að ræða og lagt hefur verið fram áður á Alþingi, en ekki náð fram að ganga. Til stendur að leggja það fram að nýju á 153. löggjafarþingi í haust með þeim breytingum sem lagðar voru til í nefndaráliti meirihluta umhverfis- og samgöngunefndar Alþingis á 152. löggjafarþingi, auk annarra minniháttar breytinga.
Markmið með frumvarpinu er að tryggja gott aðgengi að hagkvæmri, skilvirkri og öruggri leigubifreiðaþjónustu, neytendum og þjónustuveitendum til hagsbóta. Þá er frumvarpinu ætlað að tryggja að íslenska ríkið uppfylli þær þjóðréttarlegu skuldbindingar sem það hefur undirgengist samkvæmt samningnum um evrópska efnahagssvæðið, auk þess að færa lög og reglur um leigubifreiðar til nútímalegra horfs með öruggar og tryggar samgöngur að leiðarljósi.
Helstu breytingar sem gerðar hafa verið á frumvarpinu frá síðustu framlagningu eru eftirfarandi:
Gengið hefur verið frá ráðningu deildarstjóri tæknimála ökutækja og innviða.
Ráðinn var Jón Hjalti Ásmundsson.
Jón Hjalti er menntaður vélaverkfræðingur og hefur leyfisbréf framhaldsskólakennara.
Síðastliðin ár hefur Jón Hjalti starfað sem skólastjóri skipstjórnar- og véltækniskólans. Þar áður starfaði hann í rúm 20 ár hjá Frumherja (og Bifreiðaskoðun Íslands) í fjölbreyttum verkefnu, lengst af í bifreiðaskoðunardeildinni og sem yfirmaður ökutækjasviðs Frumherja.
Jón Hjalti hefur störf 15. ágúst nk.
Þau tímamót urðu í flugsögu Íslands að við hjá Samgöngustofu skráðum fyrstu rafmagnsflugvélina þann 25. mars á þessu ári og hún fékk svo lofthæfivottorð þann 3. júní síðastliðinn. Morgunblaðið fjallaði um þessi tímamót í frétt á mánudaginn. Það verður áhugavert að fylgjast með þessari þróun og sjá hvernig þróunin verður í orkuskiptum í flugi í framtíðinni.
Frétt Morgunblaðsins:
Fyrsta rafmagnsflugvél Íslands
Fyrsta rafmagnsflugvél Íslands hefur nú fengið flughæfisskírteini og mun senn hefja flugið, að því er fram kemur í sameiginlegri tilkynningu frá Icelandair, Isavia, Landsvirkjun, Hótel Rangá, Landsbankanum, Flugskólanum Geirfugli, Flugskóla Reykjavíkur og Flugakademíu Íslands sem standa að fyrstu rafmagnsflugvélinni á Íslandi.
Segir í tilkynningunni að um sé að ræða „mikilvæg tímamót í íslenskri flugsögu“
„Félagið Rafmagnsflug ehf. flutti vélina til landsins með það að markmiði að taka frumkvæði í orkuskiptum í flugi, þjálfa starfsfólk í þessari nýju tækni og kynna hana fyrir landsmönnum,“ segir í tilkynningunni.
Flugvélin ber heitið TF-KWH. Hún er tveggja sæta af gerðinni Pipistrel og er framleidd í Slóveníu. Vélin er á stærð við þær vélar sem notaðar eru í flugkennslu hér á landi.
„Með innflutningi hennar er stigið mikilvægt fyrsta skref í orkuskiptum í flugi. Fyrst um sinn er raunhæft að horfa til orkuskipta minni flugvéla og því næst í farþegaflugi innanlands. Til þess að gera orkuskipti möguleg er samstarf lykilaðila mikilvægt, svo sem flugfélaga, flugvalla og orkufyrirtækja,“ segir í tilkynningunni.
„Rafmagnsflug ehf. var upphaflega stofnað af Matthíasi Sveinbjörnssyni og Friðriki Pálssyni í árslok 2021 en þeir hafa unnið að því síðastliðin þrjú ár að fá rafmagnsflugvélina til landsins. Fjölmargir aðilar koma að verkefninu en hluthafar og bakhjarlar félagsins eru Icelandair, Isavia, Landsvirkjun, Hótel Rangá, Landsbankinn, Flugskólinn Geirfugl, Flugskóli Reykjavíkur, Flugakademía Íslands, ásamt Matthíasi, Friðriki og Herjólfi Guðbjartssyni. Þá er rétt að geta þess að Eimskip lagði félaginu lið með því að flytja vélina til landsins því að kostnaðarlausu og tryggingafélag flugvélarinnar Consello felldi niður iðgjöld. Sá velvilji, sem mætt hefur félaginu í öllum undirbúningi og innflutningi vélarinnar er ómetanlegur.“
Í tilkynningunni segir að Ísland sé í einstakri stöðu til þess að vera í fararbroddi í heiminum hvað orkuskipti í flugi varðar.
„Vegna stuttra flugleiða innanlands, góðs aðgengis að umhverfisvænni raforku, auk þess sem lega landsins milli Evrópu og Norður-Ameríku getur til framtíðar skapað margvísleg tækifæri þegar kemur að orkuskiptum í millilandaflugi.
Þjálfun flugmanna mun hefjast á næstunni og í kjölfarið verður boðað til viðburðar þar sem fyrsta formlega flugið fer fram.“
Kvikmynd um Elvis er nú í sýningum í Sambíónum og er vel látið af henni. Á sama tíma erum við að sýna myndband um Elfis á samfélagsmiðlum og smærri brot úr myndinni er beint til erlendra ferðamanna hérlendis sem og þeirra erlendu aðila sem eru að stefna á ferð til Íslands.
Í þessu mynefni eru erlendir ökumenn upplýstir um sérstöðu íslenskrar umferðar og íslenskra aðstæðna. Einnig verður þeim birt auglýsing þar sem þeir eru hvattir til að nota bílbeltin.
Myndböndin tvö má nálgast hér að neðan:
Eins og þið hafið kannski tekið eftir hefur fræðslumynd um rafhlaupahjól verið í birtingu á samfélagsmiðlum og víðar á vefnum að undanförnu. Einnig hefur sú mynd verið klippt niður í smærri brot (15-30 sek) þar sem hvert atriði er tekið fyrir sérstaklega og verða þau brot einnig birt með sama hætti.
Myndbandið má sjá hér að neðan en þið megi endilega vera dugleg að deila því áfram á Facebook og hjálpa okkur þannig að koma þessum mikilvægu skilaboðum á framfæri.
Á vefnum okkar er svo sérstök vefsíða, www.samgongustofa.is/rafhlaupahjol, þar sem allar helstu upplýsingar eru að finna, t.d. spurt og svarað.
Föstudagslagið er að þessu í boði Egils Vignis. Þetta síðasta föstudagslagið fyrir sumarfrí en við tökum aftur upp þráðinn í áskorunarfyrirkomulaginu seinnipartinn í ágúst. Um val sitt segir Egill:
Lagið sem ég valdi er This is where i came in með Bee Gees. Þetta er titillagið á tuttugustu og annari og jafnframt síðustu plötu þeirra bræðra. Stíll lagsins minnir á rokkþemað sem oftast var að finna í lögum þeirra frá sjöunda og áttunda áratugnum. Þá má líka finna í laginu áhrif frá sjálfum Bítlunum. Ég skora á Gunnar Geir að koma með föstudagslagið þegar við höldum áfram í haust.
Nýtt skip Vinnslustöðvarinnar (VSV) kom til hafnar í Vestmannaeyjum í gærmorgun og mun fá nafnið Gullberg VE 292. Það er keypt frá Noregi og hét áður Garðar. Skipið er 70 metra langt, þrettán metra breitt og lestarplássið er 2.100 rúmmetrar. Garðar á sér sögu á Íslandi, annars vegar sem Margrét EA í eigu Samherja og hins vegar sem Beitir NK í eigu Síldarvinnslunnar.
Starfsmaður skipaeftirlitsdeildar er í Vestmannaeyjum í dag þar sem hann er að upphafsskoða skipið fyrir skráningu á skipaskrá.
CCQ er nýtt innra gæðakerfi Samgöngustofu. Innleiðing gæðahandbókar okkar í CCQ hefur staðið yfir undanfarna mánuði með skipulagðri þjálfun fyrir ritnotendur. Þjálfunin hefur hingað til miðað að ábyrgðaraðilum skjala og því starfsfólki sem kemur að uppfærslu gæðaskjala. Einstaka deildir hafa fengið þjálfun sem lesnotendur en til stendur að bjóða öllu starfsfólki slíka þjálfun að sumri loknu. Yfirfærsla gæðaskjala er hafin hjá nokkrum deildum og mun standa yfir næstu mánuði. Markmiðið er að öll gæðaskjöl, verklagsreglur og stefnuskjöl verði komin úr Gæsku og yfir í CCQ í haust.
Ábendingakerfið Bendill er hluti af CCQ en þar hafa borist margar ábendingar um ýmis málefni frá því við innleiddum kerfið. Sumar hverja snúa að brotnu verklagi en aðrar að öðrum málefnum sem snerta okkar daglega vinnuumhverfi og hvernig við getum bætt það.
Í dag eru liðin 20 ár síðan Siglingaöryggisstofnun Evrópu (EMSA) var sett á stofn með Evróputilskipun Nr. 1406/2002 þann 27. júní 2002. Af þessu tilefni hefur EMSA opnað sérstaka vefsíðu þar sem tímamótanna er minnst, sagan rifjuð upp og fjallað er um hlutverk stofnunarinnar. Nýjasta tölublað fréttabréfs EMSA er einnig tileinkað þessum tímamótum.
Ísland er aukaaðili að Siglingaöryggisstofnun Evrópu – EMSA í gegnum EES-samninginn. EMSA (Euroopean Maritime Safety Agancy) stuðlar að því að komið verði á betra samstarfi milli aðildarríkja ESB, Noregs og Íslands og þróar og miðlar bestu starfsvenjum. Það stuðlar aftur að því að efla í heild sinni siglingaöryggiskerfi auk þess að draga úr hættunni á sjóslysum, sjávarmengun og mannskaða á sjó.
Siglingaöryggisstofnunin gegnir hlutverki tækniaðila sem sér Evrópusambandinu og aðildarríkjum stofnunarinnar fyrir nauðsynlegum úrræðum til að herða með skilvirkum hætti reglur um almennt siglingaöryggi og varnir gegn mengun frá skipum. Stofnunin aðstoðar framkvæmdastjórn ESB við það verkefni að uppfæra og þróa löggjöf Bandalagsins á sviði siglingaöryggis og varna gegn mengun frá skipum. Hún veitir einnig stuðning til að tryggja samleitna og skilvirka framkvæmd slíkrar löggjafar í aðildarríkjunum.
Til að störf, sem stofnuninni eru falin, séu vel af hendi leyst heimsækja starfsmenn hennar aðildarríkin til að fylgjast með því hvernig kerfi siglingaöryggis og varna gegn mengun frá skipum starfa í heild sinni. Þessar heimsóknir fara fram í samræmi við stefnu sem stjórn stofnunarinnar setur og skulu stjórnvöld aðildarríkjanna greiða fyrir þeim.
Stafræna umsókn um bráðabirgðaskírteini er nú að finna á Ísland.is en slík umsókn er fyrsta skrefið að því að hefja ökunám. Einstaklingar geta sótt um frá 16 ára aldri en þá geta tilvonandi ökumenn fyrst hafið ökunám til almennra ökuréttinda. Ferlið er stafrænt þar sem ökunemi skráir ökukennara og greiðir fyrir skírteinið. Allar upplýsingar úr umsókn eru skráðar beint í ökuskírteinaskrá. Ökunemi skilar inn mynd til sýslumanns í kjölfar umsóknar og læknisvottorði ef við á. Námsheimild er þá veitt í kjölfarið og ökunemi getur hafið nám með sínum ökukennara.
Árið 2021 sóttu 6.056 einstaklingar um að hefja ökunám og verður áhugavert að sjá hversu margir velja nú að fara í gegnum stafrænt ferli.
„Við höfum lagt mikla áherslu á að bæta þjónustuna og færa hana á stafrænt form. Þetta skref er eitt af mörgum sem miða að því að bæta þjónustu okkar við fólk,“ segir Sigurður Ingi Jóhannsson innviðaráðherra.
Áður var stafræn umsókn um fullnaðarökuskírteini gerð aðgengileg á Ísland.is auk þess sem ökukennarar geta staðfest niðurstöður akstursmats með stafrænum hætti, en slík staðfesting er nauðsynleg svo gefa megi út fullnaðarökuskírteini.
„Stafræna leiðin einfaldar bæði umsóknarferlið fyrir umsækjendur sem og umsýslu hjá sýslumönnum. Þetta leiðir af sér betri pappírslausa þjónustu sem hægt er að nýta sér þegar hentar óháð opnunartíma,“ segir Kristín Þórðardóttir, sýslumaður á Suðurlandi og formaður sýslumannaráðs.
Í framhaldi af þessum áfanga er unnið að því að opna stafræna ökunámsbók sem verið hefur í prófunum. Með stafrænni ökunámsbók geta ökukennarar skráð inn tíma og framvindu ökunáms. Einnig er unnið að því að ökuskólar staðfesti nám með stafrænum hætti. Lokaáfangi verkefnisins er svo rafræn próftaka fyrir bókleg ökupróf.
„Við höfum lagt mikla áherslu á þetta verkefni samhliða því að tryggja gæði námsins og þar með umferðaröryggi okkar allra. Með stafrænum ökunámsferli gerum við ökunám á Íslandi markvissara og umhverfisvænna í takt við nútímatækni og þarfir samfélagsins.“ segir Jón Gunnar Jónsson, forstjóri Samgöngustofu.
Stafræn umsókn um bráðabirgðaskírteini er liður í stóru samstarfsverkefni innviðaráðuneytisins, Samgöngustofu, sýslumanna, Ríkislögreglustjóra og Stafræns Íslands um stafrænt ökunámsferli frá A-Ö.
Sækja um bráðabirgðaökuskírteini. Stafrænt ökuskírteini | Ísland.is (island.is)
Samhliða hefur verið opnuð upplýsingasíða fyrir ökukennara á Ísland.is. Upplýsingasíða fyrir ökukennara | Ísland.is (island.is)