Category: Uncategorized

Frétt af vef innviðaráðuneytisins:

Drög að frumvarpi að nýjum heildstæðum lögum um rekstur og uppbyggingu flugvalla og flugleiðsöguþjónustu hafa verið birt í samráðsgátt stjórnvalda. Frumvarpið felur í sér innleiðingu varaflugvallargjalds. Hægt er að senda inn umsögn eða ábendingar til og með 5. desember nk.

Með frumvarpinu er lagt til að ný heildstæð lög komi í stað óskýrra og dreifðra lagaákvæða sem nú eru í gildi. Skort hefur í lögum skýr ákvæði um verkefni samgönguyfirvalda á þessu sviði og þau markmið sem stýra eiga för við framkvæmd þeirra. Meginmarkmiðið er að flugvellir landsins og þjónusta við flugumferð þjóni þörfum samfélagsins með skilvirkni, hagkvæmni og öryggi í fyrirrúmi í samræmi við stefnu stjórnvalda í samgöngumálum, eins og hún birtist m.a. í flugstefnu og samgönguáætlun.

Frumvarpið kynnir jafnframt til sögunnar varaflugvallargjald. Er því ætlað að bregðast við og tryggja fjármagn til uppbyggingar innviða á innanlandsflugvöllum. Markmiðið er að flugvellirnir geti sinnt hlutverki sínu sem mikilvægar gáttir inn í landið og varaflugvellir fyrir Keflavíkurflugvöll með fullnægjandi hætti. Til að svo megi vera er nauðsynlegt að ráðast í framkvæmdir á völlunum.

Í frumvarpinu er jafnframt kveðið á um brottfall úreltra laga og lagaákvæða á þessu sviði. Það mun því fela í sér töluverða einföldun regluverks og jafnframt draga fram verkefni stjórnvalda á þessu sviði með mun skýrari hætti en í gildandi lögum.

Það skal tekið fram að um almennar kröfur til starfrækslu flugvalla, rekstrarstjórnunar flugumferðar og veitingu flugleiðsöguþjónustu fer samkvæmt lögum um loftferðir, nr. 60/1998, og reglugerðum settum á grundvelli þeirra.

• Skoða drög að frumvarpi til laga um uppbyggingu og rekstur flugvalla og þjónustu við flugumferð

Í gær bauð Farsýslan upp á skemmtilega og notalega jólaskemmtun í Guðmundarlundi í Kópavogi. Skjóða mætti á staðinn og leiddi okkur í gegnum skóginn í lund þar sem hún og bróðir hennar buðu upp á skemmtilega jólasögu. Þegar jólasagan var búin læddust tveir dularfullir rauðklæddir menn í gegnum skóginn og slógust í för með Skjóðu og bróður hennar og fóru með gamanmál. Dansað var í kringum jólatré og helstu jólalögin tekin.

Að því loknu fórum við í halarófu að grillhúsi sem er innar í Guðmundarlundi þar sem boðið var upp á flatkökur með hengikjöti, kleinur og kakó. Kakóið var eitt það besta sem undirritaður hefur smakkað enda meistarakokkurinn Bjössi sem hafði lagað það fyrir okkur.

Það er ástæða til þess að þakka stjórn Farsýslunnar kærlega fyrir þessa virkilega vel heppnuðu jólastund. Góð gæðastund með samstarfsfólkinu, börnum og barnabörnum þeirra. Hér að neðan eru nokkrar myndir frá því í gær:

Skjóða leiddi okkur í gegnum skóginn inn í lund þar sem hún sagði okkur jólasögu við undirspil bróður síns

Námskeið í trefjaplastsmíði verður haldið af Fjölbrautaskóla Norðurlands Vestra á vorönn 2023 í samstarfi við Samtök skipaiðnaðarins, Iðuna og Samgöngustofu. Í reglugerð nr. 592/1994 um smíði og búnað báta með mestu lengd allt að 15 metrum er kveðið á um að smíði og viðgerðir á skipum úr trefjaefni skuli unnin af vönum starfsmönnum undir stjórn verkstjóra sem hefur samþykki Samgöngustofu til að annast smíði og viðgerðir á bátum úr trefjaplasti.

Fjölbrautarskóli Norðurlands Vestra (FNV) mun á vorönn 2023 halda námskeið í trefjaplastsmíði, sem Samgöngustofa metur fullnægjandi til öðlast samþykki. Síðast var slíkt námskeið haldið árið 2012 af FNV sem liður í samstarfsverkefni sem styrkt var af Leonardo hluta menntaáætlunar Evrópusambandsins.

Samgöngustofa hvetur þau sem áhuga hafa á að starfa við plastbátasmíðar, að kynna sér námsskeiðið frekar.

Vakin er athygli á að umsóknarfrestur er til 15. desember 2022.

Nánari upplýsingar er að finna á vef Fjölbrautaskóla Norðurlands Vestra.

Undanfarin ár hafa Þórhildur og Sigfús föndrað rafræn jólakort sem hvert og eitt getur sent sínum tengiliðum hjá Samgöngustofu. Að þessu sinni ætlum við að efna til skemmtilegrar samkeppni um ljósmynd til að nota á kortið. Nú er tækifærið! Hvetjum við ykkur öll eindregið til að smella af þegar tilefni gefst eða draga upp jólalega ljósmynd úr albúminu ykkar sem þið eruð tilbúin til að leyfa okkur að nota í ár.

Sendið tillögur að jólakortamynd 2022 á samskipti@samgongustofa.is, í síðasta lagi föstudaginn 9. desember.

Vegleg súkkulaðiverðlaun verða veitt fyrir ljósmyndina sem notuð verður í jólakort Samgöngustofu J

Hér fyrir neðan má sjá dæmi um nokkur kort frá fyrri árum:

Það er hún Jóhanna Guðný Guðjónsdóttir sem velur föstudagslagið að þessu sinni. Um val sitt segir hún:

Mig langaði að heiðra minningu pabba sem lést á árinu, og velja þjóðhátíðarlagið 1997 „Þú veist hvað ég meina mær“ með Skítamóral.

Pabbi samdi textann ásamt 8 öðrum þjóðhátíðarlögum og er þetta mitt uppáhaldslag. Textann má nálgast hér.

Ég skora á Sædísi Jónasdóttur fyrir næstu viku.

Óhætt að mæla með áhugaverðri frétt á mbl.is um starfslok Sigríðar Einarsdóttur sem var fyrsta íslenska konan sem var ráðin atvinnuflugmaður hjá Icelandair.

„Sig­ríður varð árið 1984 fyrst kvenna flugmaður hjá fé­lag­inu og árið 1996 varð hún flug­stjóri. Í dag starfa tæp­lega 80 kon­ur sem flug­menn og flug­stjór­ar hjá Icelanda­ir en voru fáar lengi fram­an af ferli Sig­ríðar. Kon­ur sem í dag sinna þess­um störf­um hjá Icelanda­ir stóðu heiðursvörð á Kefla­vík­ur­flug­velli þegar Sig­ríður kom inn í Leifs­stöð ásamt sinni áhöfn, sem ein­göngu var skipuð kon­um í Kaup­manna­hafn­ar­flug­inu.“

Heilsustyrkur / styrkur til líkamsræktar

Stefna Samgöngustofu er að styðja og styrkja starfsfólk sem vill efla heilsu sína og vellíðan með ástundun líkamsþjálfunar. Starfsfólk getur árlega fengið styrk til iðkunar líkamsþjálfunar.

Hámarksfjárhæð er 55.000 kr. árið 2022.

Hámarksfjárhæð er ákvörðuð árlega og eru styrkir einungis greiddir út gegn afhendingu frumrits reiknings (ath. rafræna reikninga má senda beint á laun@samgongustofa.is). Á reikningi skal koma fram nafn og kennitala starfsmanns og gildistími kortsins/námskeiðsins. Styrkurinn er greiddur innan almanaksársins, reikningur og gildistími korts/námskeiðs skal eiga við það ár sem sótt er um styrk fyrir. Ekki er hægt að greiða styrki aftur í tímann.

Reikningum fyrir árið 2022 skal í síðasta lagi skila 15. desember.

Mannauðsdeild sér um afgreiðslu á styrknum.

Starfsfólkið á gangi 2A hefur orðið vart við mikinn álfagang undanfarna daga. „Það er ástand við erum öll í sjokki“ segir talsmaður 2A sem ekki vill koma fram undir nafni að svo stöddu.

„Eftir að við byrjuðum að skreyta fyrir jólin bar jólaálf að garði. Við sjáum honum bregða fyrir öðru hvoru. Hann hefur verið að taka snúrur úr sambandi og klárar allt nammið á ganginum. Til dæmis pakkaði hann inn allskonar dóti á skrifborðum starfsfólks á ganginum og tafði vinnu um nokkur skeið.“

Í gær lék álfurinn sér í ísskápnum og margir ráku upp stór augu þegar þeir opnuðu hann (sjá mynd neðar í þessari frétt). Nú er álfurinn búinn að koma sér vel fyrir við inngang 2A og um að gera að kíkja og heilsa upp á kauða. Það er aldrei að vita hverju hann tekur upp á næst. Verið því á varðbergi!

Að lokum: Ef þið sjáið honum bregða fyrir vinsamlegast ekki stíga ofan á hann. Hann gæti fjölgað sér mjög hratt!

Jóladagatal Samgöngustofu 2022 hefst 1. desember og það má finna á vefnum joladagatal.umferd.is. Um er að ræða 24 leikna þætti þar sem Hurðaskellir og Skjóða (og Grýla) ferðast um í fjársjóðsleit og lenda að sjálfsögðu í ýmsum ævintýrum þar sem þau neyðast til að læra á umferðina – og kenna áhorfendum sínum á hana í leiðinni. Hægt er að sjá kynningu á jóladagatalinu hér:

Í ár verður hægt að horfa á þættina á slóðinni www.samgongustofa.is/joladagatal en þar verður einnig hægt að taka þátt í getraun á hverjum degi frá 1. til 24. desember. Í lok hvers þáttar spyrja Hurðaskellir og Skjóða spurningar úr þættinum (endilega horfið til enda svo þið missið ekki af þeim spyrja spurningarinnar) en einnig er hægt að sjá spurninguna og svarmöguleikana undir þættinum.

Verða tveir heppnir þátttakendur dregnir út á hverjum degi og hljóta þeir veglegan endurskinsbakpoka í vinning. Þátttakendur geta merkt svör sín skóla og bekk og kemst bekkurinn þá í sérstakan pott. Í byrjun janúar verður svo einn bekkur dreginn út og hlýtur sá bekkur pizzuveislu og nokkur borðspil í verðlaun. Einnig fær umsjónarkennari þess bekkjar óvæntan jólaglaðning.

Við hvetjum foreldra til að sýna börnum sínum jóladagatalið og jafnvel ræða við þau um viðfangsefni þáttar dagsins. Endilega hjálpið okkur við að láta sem flesta vita svo að sem flest börn fái að njóta þessara skemmtilegu og gagnlegu þátta.

Eins og væntanlega flest ykkar hafa tekið eftir þá er unnið að malbikun plansins Ármúlamegin. Í dag á að klára að gera klárt fyrir malbikun sem á samkvæmt áætlun að fara fram á morgun fimmtudag. Hugsanlega verður hægt að leggja aftur í stæðin á föstudag en ef ekki þá eftir helgi.

Þekkið þið mennina tvo sem eru við appelsínugula valtarann? Eitthvað sætt undir tönn í verðlaun fyrir þann sem sendir rétt svar fyrst(ur) á vefur@samgongustofa.is.

Þær eru yfirleitt frekar alvarlegar fréttirnar af okkur hjá Samgöngustofu enda snúast okkar daglegu störf ekki um eitthvað grín og glens. Í dag komumst við hinsvegar í liðinn Lífið hjá Fréttablaðinu og við gefum okkur að sjálfsögðu nokkur rokkstig fyrir þann árangur. Það sem skilar okkur svona ofarlega á Spotify eru náttúrulega vinirnir í Kátugötu sem við gefum út en bækurnar eru allar aðgengilegar á veitunni og greinilega mikið spilaðar fyrir börnin 🙂

Fréttin hljóðar svo:

„Samgöngustofa hitar upp fyrir Sufjan Stevens

Notendur tónlistarstreymisveitunnar Spotify bíða í ofvæni eftir Spotify Wrapped-listanum, árlegu tónlistaruppgjöri sem gefur notendum innsýn í sinn eigin tónlistarsmekk og hlustunarmynstur.

Nú á meðan beðið er hafa notendur þó fengið aðgang að eins konar forsmekk, en vefsíða sem kallast instafest.app gerir notendum kleift að sjá hvernig tónlistarhátíð, byggð á þeirra eigin hlustunarmynstri, myndi líta út. Niðurstaðan er plakat fyrir þriggja kvölda tónlistarhátíð í anda Airwaves eða Hróarskeldu.

Íslenskir foreldrar ungra barna hafa margir hverjir hlegið sig máttlausa yfir niðurstöðunum en algrímið tekur ekki tillit til þess að Samgöngustofa og Leikhópurinn Karíus eigi hugsanlega ekki heima, eða stingi í það minnsta í stúf, á dagskrá við hliðina á popprisunum Dua Lipa, Beck og The Weeknd. Í hjálögðu dæmi lokar Kristjana Skúladóttir lokakvöldinu með sögum fyrir yngstu börnin á borð við Geiturnar þrjár, að loknu teknókvöldi með Berlínarbandinu Moderat og Íslandsvinunum í Metronomy.

Þeir Spotify-notendur sem vilja prófa að vera með og sjá hvernig þeirra tónleikahátíð liti út, geta farið á vefsíðuna Instafest.app og skráð sig inn með Spotify-aðgangi.

Í framhaldinu birtast möguleikar, að unnið sé úr hlustunargögnum síðasta hálfa árs, síðasta heila árs eða frá stofnun aðgangsins. Leikurinn er ókeypis.“

Tónlistarhátíð Fúsans

Undirritaður prufaði síðuna góðu (instafest.app) og fékk eftirfarandi auglýsingaplaggat fyrir tónlitarhátíð sniðna að Spotifyspiluninni:

Þess ber að geta að aðgangur undirritaðs er notaður fyrir spilun allrar fjölskyldunar og skal ekki dæma tónlistarsmekkinn alfarið útfrá þessu. En þetta er þó nokkuð nærri lagi 🙂

Prufið endilega að gera ykkar plaggat.

Samkvæmt frétt á vef innviðaráðunteysins hefur Framkvæmdastjórn Evrópusambandsins hafið opið samráð um tillögu að reglugerð um Euro 7, um strangari losunarviðmið fyrir bifreiðar. Tillagan er hluti af umhverfisáætlun Evrópusambandsins; e. European Green Deal. Hún fjallar um strangari losunarviðmið fyrir allar bifreiðar sem brenna bensíni og dísil, allt frá fólksbílum til sendiferðabifreiða, flutningabifreiða og hópbifreiða.

Frestur til að koma að athugasemdum og sjónarmiðum er til og með 16. janúar 2023.

• Nánar um samráðið
• Frétt á vef innviðaráðuneytisins

Það er hún Auður Lísa í NorType sem velur föstudagslagið að þessu sinni. Um val sitt segir hún:

Ég fékk áskorun frá Kristínu Björk um næsta föstudagslag og ákvað að velja lagið „Bohemian Rhapsody“ með Freddie Mercury. Þetta er lag sem þarf að hækka í botn og gleðjast að það er kominn föstudagur.
Ég skora á Jóhönnu Guðný Guðjónsdóttir í forskráningunum að velja næsta föstudagslag.

Næstu föstudaga fram að jólum hvetjum við fólk til að klæðast jólalegum fatnaði og byrjum við núna föstudaginn 25. nóvember. Þetta geta verið jólapeysa, jólakjóll, jólabindi eða annað jólalegt sem ykkur dettur í hug. Sem sagt mikið jóleríjól framundan 🙂

Að venju verður bryddað upp á ýmsu skemmtilegu á aðventunni og hér að ofan má sjá dagskránna framundan. Nú þegar myrkrið læðist yfir og vetur konungur farinn að minna á sig er gott að hafa það kósí saman. Borða t.d. ristaðar möndulur og sötra heitt kakó 🙂

Jóladagatal Samgöngustofu verður á sínum stað á joladagatal.umferd.is. Að þessu sinni verður dagleg getraun 1.-24. desember og munu einn strákur og ein stelpa fá endurskinsbakpoka í vinning á hverjum degi.

Í byrjun næsta árs verður svo einn heppinn bekkur dreginn út og hlýtur hann pizzuveislu og borðspil í vinning. Endilega bendið börnum og barnabörnum ykkar á dagatalið og hvetjið þau til að taka þátt.

Við höfum nú opnað skráningarsíðuna www.flydrone.is þar sem umráðendur dróna hafa þann kost að skrá sig, kynna sér námsefni og taka próf í undirflokki A1/A3 fyrir opna flokkinn. Eftir að hafa lokið prófi með viðunandi árangri mun viðkomandi fá útgefið hæfnisvottorð sem gildir í öllum aðildarríkjum Evrópusambandsins.

Skráningargjaldið er byggt á útseldri tímavinnu Samgöngustofu og er kr. 5.500 fyrir hverja skráningu.

Eftir skráningu er hægt að taka A1/A3 prófið án endurgjalds.

Minningardagur um fórnarlömb umferðarslysa var í gær og haldin var athöfn við Landspítalann Fossvogi. Þar komu saman fjöldi viðbragðsaðilum ásamt gestum. Í erindum dagsins kom fram þakklæti til viðbragðsaðila fyrir þeirra störf á vettvangi slysa og við björgun fólks. Jafnframt eru haldnir fjöldi viðburða víða um land í tilefni dagsins.

Forseti Íslands Guðni Th. Jóhannesson lagði áherslu á ábyrgð okkar allra í umferðinni og boðaði síðan mínútu þögn til að heiðra minningu þeirra sem látist hafa í umferðinni. Willum Þór Þórsson heilbrigðisráðherra talaði m.a. um mikilvægi þess að þeir sem verða valdir að umferðarslysum gleymist ekki við andlega aðhlynningu og hjálp í kjölfar slysa.

Að loknum erindum þeirra sagði Jónína Snorradóttur frá reynslu sinni en hún varð völd að banaslysi fyrir 30 árum síðan. Örstutta stund fór athygli hennar af veginum og varð þess valdandi að hún ók á lítinn dreng og móður hans en drengurinn lést í slysinu. Jónína sagði frá hvernig þessi hörmulega reynsla hefur markað líf hennar alla tíð síðan.

Athöfninni stýrði Bergþóra Þorkelsdóttir forstjóri Vegagerðarinnar.#minningardagur

Í síðust viku var sendinefnd frá ESA og EMSA á landinu til að taka út búlk stöðvar, þar sem lausum farmi er landað. Teknar voru út tvær stöðvar á Grundartanga, eina í Straumsvík og eina í Reyðarfirði.

Sendinefndin skoðaði hlítni Íslands við tilskipun Evrópuþingsins og ráðsins 2001/96/EB frá 4. desember 2001 um samræmdar kröfur og aðferðir að því er varðar örugga lestun og losun búlkaskipa, sem innleidd er á Íslandi með reglugerð 204/2004 um samræmdar kröfur og aðferðir að því er varðar örugga lestun og losun búlkaskipa.

Það var deild siglinga- og hafnaeftirlits sem hafði umsjón með úttektinni fyrir hönd Samgöngustofu.