Samgöngustofa tekur þátt í morgunfundi Vegagerðarinnar á morgun, 7. maí. Umfjöllunarefni fundarins er öryggi starfsfólks við vegavinnu. Þar verður kynnt vitundarátakið; Aktu varlega! – mamma og pabbi vinna hér, flutt stutt erindi um reynslu fólks af því að starfa í nálægð við þunga umferð og Gunnar Geir mun kynna og sýna nýtt myndband um akstur gegnum vinnusvæði.
Morgunfundurinn fer fram kl. 9-10:15 í húsakynnum Vegagerðarinnar, Suðurhrauni 3 í Garðabæ.
Einnig verður fundurinn í beinu streymi.
Í dag, 2. maí, hóf störf Diljá Björt Stefánsdóttir, hún tekur við af Huldu Ösp og mun starfa sem sérfræðingur í ökunáms- og leyfisveitingum í deild ökunáms- og leyfisveitinga á umferðarsviði.
Diljá Björt verður staðsett á skrifstofu á gangi 3a. Tökum vel á móti henni 🙂
.
Hópur starfsfólks vinnur nú hörðum höndum að því að setja upp spjallmenni fyrir ytri vefinn. Það mun getað svarað algengum spurningum almennings sem þýðir að færri þurfa að hringja eða senda tölvupóst. Þannig mun spjallmennið bæta þjónustuna um leið og það dregur úr álagi. Uppsetning á spjallmenni er er hins vegar talsverð vinna sem krefst samstarfs og einbeitingar. Mun hún standa um það bil næstu þrjá mánuði, með þátttöku af öllum sviðum.
Nú í vikunni mun nýr handbókarvefur opna á Ísland.is. Vefurinn var unnin af Stafrænu Íslandi með þarfir Samgöngustofu og annarra sambærilegra stofnana að leiðarljósi.
Handbækur eru opnar öllum en fyrst og fremst hugsaðar fyrir fagaðila sem vinna samkvæmt fyrirmælum stofnunarinnar. Þær eru því skrifaðar á fagmáli, sem er ólíkt því sem almennt gengur og gerist á vef Ísland.is.
Fyrstu bækurnar sem við setjum á nýja vefinn eru skoðunarhandbók ökutækja og handbók um skráningarreglur ökutækja. Skoðunarhandbókin flyst yfir á hinn nýja handbókarvef án efnislegra breytinga. Skráningareglur var líka að finna á eldri vef Samgöngustofu en þessi nýja handbók er hönnuð frá grunni og er verulega aukin og endurbætt með þarfir þeirra sem sinna skráningarstarfsemi eða skráningum í ökutækjaskrá af einhverju tagi, svo sem skoðunarstofum ökutækja og bílaumboðum.
Samgöngustofa hefur átt í mjög góðu samstarfi við Stafrænt Ísland um þetta verkefni og vinnur nú að gerð fleiri handbóka sem gefnar verða út á næstu mánuðum.
Í síðustu viku hélt Hlín Hólm, deildarstjóri flugleiðsögu, flugvalla og flugverndar, kynningu hjá Eurocontrol um aðildarferli Íslands að stofnuninni. Um leið sagði hún frá mikilvægi flugs fyrir Ísland í ljósi landfræðilegrar stöðu þess. Kynningin var haldin fyrir fulltrúa (e. State Liaison Officers) sem aðildarríkjunum býðst að senda til starfa í nefndum og störfum innan Eurocontrol, til lengri eða skemmri tíma.
Hinn 1. janúar 2025 verður Ísland fullgilt aðildarríki að Eurocontrol, sem er Evrópustofnun um öryggi í flugleiðsögu. Aðildarviðræður hafa staðið yfir lengi, eða með hléum frá 2008, en haustið 2022 var skrifað undir aðlögunarsamning Íslands að Eurocontrol.
Árið 2022 létust átta manneskjur í umferðinni hér á landi. Það ár var Ísland með þriðju lægstu dánartíðni í umferðinni í Evrópu. Þetta kemur fram í samanburði Eurostat, hagstofu Evrópusambandsins, sem reiknar banaslysatíðnina á hverja milljón íbúa í hverju landi.
Full ástæða til að fagna þeirri fækkun sem orðið hefur á fjölda látinna í umferð frá því sem áður var þegar tugir biðu bana á hverju ári á Íslandi. Þennan árangur má þakka ýmis konar framförum sem unnið hefur verið að, meðal annars með framkvæmd umferðaröryggisáætlunar.
Frétt um samanburð Eurostat á fjölda banaslysa í Evrópulöndum má lesa á mbl.is í dag.
Til að styðja enn betur við alhliða heilsu starfsfólks hefur Samgöngustofa gert þjónustusamning við fyrirtækið Auðnast, sem býður fyrirtækjum upp á fjölbreytta þjónustu til að efla heilsu, félagslegt öryggi og starfsánægju.
Auðnast var stofnað í þeim tilgangi að þjónusta atvinnulífið um allt er varðar heilsu og félagslegt öryggi starfsfólks. Auðnast var stofnað árið 2014 og sama ár var Auðnast klíník opnuð en þar er boðið upp á þverfaglega meðferð, handleiðslu og ráðgjöf til einstaklinga, fjölskyldur og hópa við úrlausn mála.
Föstudaginn 3. maí nk. verður kynning í föstudagskaffi fyrir starfsfólk á þjónustu Auðnast.
Allskonar umbótaverkefni eru í gangi hjá skráningum og þjónustu eins og við sáum í föstudagskaffinu í morgun. Deildin sinnir mikilvægu hlutverki í samskiptum við viðskiptavini og leggur metnað í að sem flestir fái úrlausn mála fljótt og vel. Innleiðing ýmis konar tæknilausna miðar meðal annars að því að auka sjálfsafgreiðslu sem er gott fyrir bæði fólk og umhverfi og minnkar um leið álag í starfseminni. Einnig gefa ný kerfi aukna yfirsýn yfir til dæmis hraða þjónustu og upplifun viðskiptavina.
Skráningar og þjónusta vilja auka samstarf innanhúss til að bæta þjónustuna við alla viðskiptavini. Eru aðrar deildir hvattar til að senda þeim ábendingar um það sem betur má fara og bjóða heimsókn á deildarfundi til að ræða áframhaldandi úrbætur sem gagnast okkur öllum.
Stefnt er að því að hefja rafræna próftöku í bóklegum ökuprófum í B-flokki (almennt bílpróf) á allra næstu vikum.
Ávinningurinn af rafrænni próftöku er mikill. Til dæmis getum við hætt að prenta út próf og skera út svarlykla, erfiðara verður að svindla og yfirferðin verður sjálfvirk.
Samhliða því sem rafræn próf verða tekin upp verður farið í breytingar á uppsetningu prófanna. Núverandi fyrirkomulag er komið til ára sinna og kominn tími á að endurskoða það. Nýtt próf verður sett saman af 50 fullyrðingum sem svara á rétt eða rangt, í stað 30 krossaspurninga.
Þannig einföldum við uppsetninguna og minnkum líkur á að hún hafi áhrif á niðurstöður.
Próftökukerfið heitir FastTest og er einfalt í notkun fyrir próftaka. Frumherji mun áfram sjá um framkvæmd prófanna og rafræna kerfið mun líka auðvelda þeim framkvæmdina þar sem ekki þarf lengur að taka saman prófhefti og niðurstöðublöð. Próftakar taka prófin áfram hjá Frumherja.
Hér má sjá kynningu leyfisveitinga og ökunámsdeildar í föstudagskaffinu 5. apríl sl.
Siglingaöryggisstofnun Evrópu, EMSA, hefur gefið út myndband sem sýnir árangur stofnunarinnar 2023. Þar má sjá í máli og myndum starf stofnunarinnar og þau fjölbreyttu verkefni sem unnin voru á síðasta ári.
EMSA er ein þeirra alþjóðastofnana sem Samgöngustofa á mikilvægt samstarf við fyrir Íslands hönd. EMSA veitir Evrópuþjóðum stuðning með útfærslum á reglum til siglingaöryggis og vörnum gegn mengun frá skipum.
Á föstudagskvöldið fór fram afhending íslensku auglýsingaverðlauna Ímark. Samgöngustofa og 66°Norður fengu Lúður fyrir herferðina Sjáumst í flokki veggspjalda og skilta. Við erum stolt af þessari viðurkenningu og kunnum hinni eins manns auglýsingastofu Bien miklar þakkir fyrir frábært samstarf.
Til hamingju við öll!
Birt hefur verið auglýsing þar sem starf fulltrúa í skráningum og þjónustu er auglýst til umsóknar.
Við leitum að nýjum Björgvini eins og sjá má á auglýsingu sem birtist á facebook síðu Samgöngustofu rétt í þessu.
Auglýsingin er birt á Starfatorgi, heimasíðu Samgöngustofu á island.is, á Alfreð og samfélagsmiðlum Samgöngustofu.
Opnað hefur verið fyrir almennar umsóknir um sumarstörf hjá Samgöngustofu fyrir sumarið 2024. Starfsfólki er velkomið að benda áhugasömum ungmennum á að leggja inn umsókn,
Sumar 2024 – almenn umsókn | Ísland.is (island.is)
Verklag um öryggismyndavélar hefur verið birt í CCQ
VER-0389 | Öryggismyndavélar hjá Samgöngustofu | QM (ccq.cloud)
Stafrænar öryggismyndavélar eru staðsettar innan- og utanhúss hjá Samgöngustofu. Rafræn vöktun þjónar þeim tilgangi að varna því að farið sé um húsið í leyfisleysi, eigur skemmdar eða stolið. Myndavélar utanhúss beinast að bílastæðum og dyrum hússins. Innanhúss eru myndavélar í almennum rýmum, þ.e.a.s. stigagangi, mötuneyti og göngum en ekki inn á skrifstofum og salernum. Settir hafa verið límmiðar á þeim svæðum sem myndavélar ná til (í Ármúla 2).
Myndefni er einungis skoðað ef upp koma atvik er varða eignavörslu eða öryggi einstaklinga, s.s. slys, þjófnaður, skemmdarverk eða árekstrar á bílastæði. Vöktunin er í samræmi við lög og reglur um rafræna vöktun nr. 77/2000 um persónuvernd og meðferð persónupplýsinga. Einungis tilgreindir starfsmenn hafa aðgang og heimild til þess að skoða myndefni sem vistað er mest í 30 daga og eytt að þeim tíma loknum.
Hvetjum ykkur öll til að kynna ykkur verklagið í CCQ. Einnig er hægt að lesa nánar um persónuvernd og öryggismyndavélar inn á þessari slóð Eftirlitsmyndavélar | Allar spurningar og svör | Persónuvernd. Þínar upplýsingar, þitt einkalíf. (personuvernd.is)
Auglýst hafa verið tvö stöðugildi til umsóknar hjá Samgöngustofu
Auglýsing er birt á Starfatorgi, heimasíðu Samgöngustofu á island.is, á Alfreð og samfélagsmiðlum Samgöngustofu.
Snillingarnir Bjössi og Össi bjóða upp á bollukaffi kl. 14 í dag, mánudag í matsalnum. Svona ættu náttúrulega allar vikur að byrja!
Ásdísi Eir Símonardóttur hélt í síðustu viku námskeiðið áhrifarík samtöl fyrir starfsfólk Samgöngustofu. Farið var yfir góð og gagnleg ráð tengd starfsmannasamtölum og samskiptum fólks. Einnig var haldið námskeið fyrir stjórnendur.
Mæting á námskeiðin fór fram úr björtustu vonum en fyrir þau sem ekki komust á námskeiðið er hér birt teams upptaka. Upptakan verður aðgengileg amk næstu tvo mánuði en við hvetjum fólk sem ætlar að nýta sér upptökuna að horfa sem fyrst.
Áhrifarík samtöl – fyrri hluti:
Áhrifarík samtöl – námskeið-20240201_130407-Upptaka fundar.mp4 (sharepoint.com)
Áhrifarík samtöl – seinni hluti
Áhrifarík samtöl – námskeið-20240201_141318-Upptaka fundar 1.mp4 (sharepoint.com)
.
Starfsmannasamtöl Samgöngustofu verða nú í kerfinu Samtal, rafræn lausn hjá Advania. Eingöngu stjórnandi og starfsfólk hafa aðgang að samtölum sín á milli. Mannauðsdeild sér tölfræði fyrir stofnunina, þ.e.a.s hver hafa sett samtöl af stað og lokið þeim.
Hlekkur á Samtal er hér: Samtal (advania.is)
innskráning er með rafrænum skilríkjum.
Haldin verða örnámskeið í matsalnum til að sýna hvernig Samtal virkar og svara spurningum.
fyrir starfsfólk – föstudag kl. 10:30 – 11:00 (fundarboð mun berast)
fyrir stjórnendur – þriðjudag (fundarboð hefur þegar verið sent).
Minnum á að góður undirbúningur er dýrmætur, sérstaklega í hvirfilbyl hversdagsleikans. Stundum virka hlustun, fögnum endurgjöf og munum að það má alltaf setja á pásu og taka þráðinn upp aftur eftir smá umhugsun.
Svo má líka nýta sér ráð Ásdísar um gagnrýni og endurgjöf og gefa fólki í kringum sig tígla og hjörtu og spaða þegar við á.
Umferðarsvið hefur haft forgöngu um birtingu tölfræði á sérstökum skýrsluvef, sem er aðgengilegur innan Samgöngustofu. Þar má finna margvíslegar upplýsingar sviða og deilda sem fróðlegt er að kynna sér. Nú hefur í fyrsta skipti verið gerð árssamantekt fyrir umferðarsvið, vegna ársins 2023. Skiptist hún í annars vegar samantektina sjálfa og hins vegar töluleg gögn ársins. Þarna má uppgötva ýmislegt sem við vissum ekki áður. Til dæmis fóru 63.352 símtöl í gegnum skiptiborðið í fyrra og við fengum 37.225 heimsóknir í móttöku. Stafrænum eigendaskiptum ársins fjölgaði um 15% en nýskráningar ökutækja drógust saman um 2%. Bara svo nokkuð sé nefnt. Áhugafólk um tölfræði mun ekki bíða boðanna með að skoða þessa flottu samantekt ársins 2023.
Tíminn flýgur og ekki seinna vænna að huga að því að skipuleggja orlofstöku sumarsins. Það getur verið bæði snjallt og hagnýtt að skipuleggja frí tímanlega því samkvæmt 3. mgr. 11. greinar starfsmannalaganna er starfsfólki skylt að taka orlof.
Réttindi
Starfsfólk safnar 30 daga orlofi (240 klst) og á rétt á að taka alla þá frídaga, þar af 15 daga samfellda, á orlofstímanum.
Tímabil sumarorlofs er frá 1. maí til og með 15. september.
Skrá skal orlofsbeiðnir í Vinnustund (eða Smástund).
Skipulag orlofstöku
Yfirmaður ákveður, í samráði við starfsfólk, hvenær orlof er veitt (orðalag í kjarasamningum). Yfirmanni er skylt að verða við óskum starfsfólks um orlofstöku verði því komið við vegna starfsemi stofnunar. Við skipulagningu orlofs skulu upplýsingar um stöðu þegar áunnins og ótekins orlofs vera starfsfólki aðgengilegar. Þessar upplýsingar eru alltaf aðgengilegar í Vinnustund (einnig gott að skoða í Smástund).
Í flestum kjarasamningum kemur fram að ákvörðun um sumarorlof skuli liggja fyrir eigi síðar en 31. mars og tilkynna skuli starfsmanni með sannanlegum hætti, svo sem í tímaskráningarkerfi stofnunar (Vinnustund).
Staða orlofs – hvernig á að lesa Vinnustund
Hægt er að skoða stöðu orlofs í Vinnustund undir Sjálfsþjónusta > Leyfi, í dálknum “staða til úttektar” sést hvað maður á til úttektar í dag. Talan í “úttekið” eru allir tímar sem skráðir hafa verið sem orlof nú þegar.
Hafi maður þegar skipulagt frí fram í tímann og það verið samþykkt er gerð grein fyrir því undir “úttekt skráð eftir dags.”
Hér að ofan eru tvö skjáskot þar sem orlofsstaðar er nokkuð ólík, efri myndin er aðili sem hefur þegar gengið á 16,19 klst af næsta orlofsári. Neðra skjáskotið er aðili sem á til úttektar 104,63 klst. Neðri aðilinn verður eflaust ánægður að heyra að Samgöngustofa hefur ákveðið að heimila flutning á mest 5 orlofsdögum (40 klst.) á milli orlofsára.
Að skrá orlofsbeiðni
Í Vinnustund er orlofsbeiðni skrá með því að fara í sjálfsafgreiðslu > Fjarvistaróskir, og smella þar á litla plúsinn ofarlega í hægra horninu. Þar eru svo settar inn dagsetningar og ath.semd ef fólk vill. Athugið að kerfið hnippir ekki sjálfkrafa í næsta yfirmann og því gott að láta vita.
Einnig er hægt að skrá fjarvistarósk í Smástund, það er hnappur merktur “Fjarvistaróskir” fyrir miðju á forsíðu (þarf að draga aðeins til). Þar er litli plúsinn neðarlega hægra megin, svo eru valdar dagsetningar, skráð skýring ef vill og svo smellt á litla disklinginn í hægra horninu til að vista óskina.
Alltaf velkomið að heyra í mannauðsdeild ef ykkur vantar aðstoð, minnum á netfangið laun@samgongustofa.is – erum einnig allar duglegar að svara á teams 🙂
Samtal er kerfi sem Samgöngustofa hefur tekið í notkun í þeim tilgangi að halda utan um formlega samtöl milli starfsfólks og stjórnenda.
Samtal er aðgengilegt í vefviðmóti þar sem fólk skráir sig inn með rafrænum skilríkjum. Starfsfólk kemur til með að hafa aðgang að sínum samtölum, geta undirbúið sig fyrir komandi samtal þegar yfirmaður hefur boðað til þess og munu geta skoðað eldri samtöl. Aðrir sjá ekki samtölin, sýn mannausdeildar í kerfinu er eingöngu tölfræðilegar upplýsingar, þ.e.a.s. hvort stofnað hafi verið til samtals eða ekki.
Haustið ’23 var stofnaður vinnuhópur innanhúss þar sem unnið hefur verið að því að kynna Samtal og breyta fyrirkomulagi starfsmannasamtala hjá Samgöngustofu. Niðurstaðan er breyttur spurningalisti og eitt samtal á ári í stað fjögurra (hefð hafði myndast hjá mörgum að taka tvö og tvö saman). Framvegis er stefnt að því að hafa eitt starfsmannasamtal og eitt frammistöðusamtal hvert ár. Samtal kerfið mun framvegis halda utan um fastráðningarsamtöl, starfsmannasamtöl, frammistöðusamtöl og mögulega fleira.
Samhliða þessum breytingum verður boðið uppá námskeið í áhrifaríkum samtölum dagana 1. og 2. febrúar nk. og hefur Ólöf mannauðsstjóri þegar sent tölvupóst þess efnis og óskað eftir því að fólk skrái sig á dagsetningar.
Slóð á Samtal er: samtal.advania.is, starfsfólk og yfirmenn ættu nú þegar að hafa réttan aðgang í kerfinu.
Hægt er að fræðast aðeins meira um kerfið á heimasíðu advania,
Samtal – Advania, þar er t.d. gott stutt vídjó um notkun kerfisins.
