Author: Þórhildur Elín Elínardóttir

Þann 1. janúar 2024 tók gildi ný gjaldskrá Samgöngustofu. Þjónustur sem einstaklingar nýta sér hækkuðu um 3,5% en aðrar þjónustur almennt um 7%. Samanborið við verðbólgu og almennar hækkanir á verðlagi undanfarna mánuði og ár teljast breytingarnar afar hóflegar.

Nýja gjaldskráin var auglýst opinberlega hér á vef Stjórnartíðanda.

Í föstudagskaffinu í morgun nutum við ljúfra jólatóna með söng og gítarundirspili Raven, en það er listamannsnafn söngkonunnar og lagahöfundarins Hrafnhildar Magneu Ingólfsdóttur.

Áhugasöm geta hlustað á tónlist hennar á Spotify, einnig er hægt að finna hana á Facebook, Instragram (@itsmusicbyraven) og Tiktok. Raven er með krúttlegt jóladagatal þar sem hún syngur eitt jólalag á dag, hægt að hlusta og horfa á Tiktok og í highligts á Instagramminu.

Í vikunni fór fram fundur vinnuhóps innan Evrópu um flutning á hættulegum varningi í flugi. Þar var farið yfir alþjóðlegar kröfur sem gilda um málaflokkinn, innleiðingu þeirra og eftirfylgni reglugerða um umbúðir, merkingar og meðhöndlun hættulegra efna. Vinnuhópurinn hittist tvisvar á ári og miðlar upplýsingum og ræðir leiðir til að auka öryggisráðstafanir og bæta neyðarviðbrögð komi til slyss.

Eins og fram kom í síðustu viku, tók Ísland þátt í árlegri samningaráðstefnu ICAO. Tilgangurinn er gerð tvíhliða samninga ríkja um flugsamgöngur og þar með aukinn markaðsaðgangur fyrir íslensk fyrirtæki í flugrekstri. Loftferðasamningar eru forsenda fyrir starfsemi þessara fyrirtækja erlendis. Misjafnt er hversu víðtæk réttindi er kveðið á um í samningum Íslands. Meira um það má lesa hér.

Á ráðstefnunni voru gerðir nýir samningar við nokkur ríki á borð við Antigva og Barbúda, Kosta Ríka og Úganda. Einnig voru undirritaðir samningar við nokkur ríki sem áður hafði náðst samkomulag við og samningaviðræður hafnar við önnur ríki.

Ísland hefur nú gert loftferðasamninga við vel yfir hundrað ríki. Samningaviðræður fara fram í samráði við íslenska flugrekendur.

Farsýslan langar að þakka fyrir samveruna á laugardaginn í dásamlegu veðri í Guðmundarlundi. Gleðin skein úr hverju andliti og ungir sem eldri nutu sín í Jólaskógi með Skjóðu, Langlegg og jólasveinunum. Hér fyrir neðan eru nokkrar myndir frá skemmtuninni.

Jólakveðja,

Farsýslan

Æsispennandi jólskreytingakeppni er nú lokið og liggja úrslitin fyrir. Dómnefndin veitti viðurkenningar í allskonar skemmtilegum flokkum, til dæmis fyrir jólalegasta starfsmanninn og bestu múturnar. Sigurvegari keppninnar er að þessu sinni jólamarkaðurinn á gangi 3b. Til hamingju!

Fyrir rúmlega ári skrifuðu Jón Gunnar og þáverandi forstjóri Eurocontrol undir aðlögunarsamning Íslands að stofnuninni. Þar með fengum við sæti áheyrnarfulltrúa og þátttökurétt í verkefnum og starfsemi Eurocontrol að sama marki og aðildarríki. Nú í vikunni skrifaði Sigurður Ingi innviðaráðherra svo undir stofnsáttmála stofnunarinnar. Eftir samþykktarferli íslenskra stjórnvalda mun Ísland því fá fulla aðild að Eurocontrol frá 1. janúar 2025 og verður þá 42. aðildarríkið.

Eurocontrol er evrópsk milliríkjastofnun sem hefur frá stofnun árið 1960 haft markmið um stuðning við flug og flugleiðsögu í Evrópu. Samgöngustofa tekur þátt í starfinu fyrir Íslands hönd. Með aðild fáum við aðgang kerfum, gagnabönkum, greiningarvinnu, tæknilausnum, þjálfun og stuðningi við ýmsa þætti flugmála sem snúa að rekstrarstjórnun flugumferðar, rekstri flugvalla, skilvirkni, öryggi og netvernd svo nokkuð sé nefnt.

Hinn 7. desember ár hvert er alþjóðaflugmáladagurinn hafður í heiðri í öllum aðildarríkjum Sameinuðu þjóðanna. Tilgangur hans er að vekja athygli á mikilvægi almannaflugs fyrir félagslega og efnahagslega þróun ríkja og um leið hlutverk ICAO (Alþjóðaflugmálastofnunarinnar) um samvinnu þjóða í flugi. Í tilefni dagsins flöggum við fána ICAO hér í Ármúlanum.

Þessa dagana stendur yfir í Saudi-Arabíu ráðstefnan ICAO Air Services Negotiation (ICAN2023).  

Tilgangur ráðstefnunnar er að vinna í samstarfi við íslenska flugrekendur, að loftferðasamningum við önnur ríki þar sem þeir eru ekki til staðar og uppfæra eldri samninga. Ávinningurinn eru auknar heimildir til flugs sem geta komið Íslandi og íslenskum fyrirtækjum til góða. Þriggja manna sendinefnd sækir fundinn af hálfu íslenskra stjórnvalda.

Við flöggum íslenska fánanum í Ármúla á fullveldisdaginn í dag.

Fullveldisdagurinn er svo nefndur til minningar um að þann 1. desember 1918, tóku gildi milli Íslands og Danmerkur Sambandslögin, sem voru lög um það hvernig Ísland stóð í sambandi sínu við Danmörku. Þann dag var íslenski fáninn dreginn að húni í fyrsta sinn. Veturinn 1918 var með eindæmum harður og oftast kallaður frostaveturinn mikli. Af öðrum harðindum þess tíma má nefna Kötlugos og spænsku veikina. Við vonum það besta fyrir komandi mánuði, enda eru vísbendingar um mildan vetur.

Skráning er hafin á jólaskemmtun barnanna í Guðmundarlundi þann 9. desember kl 12.00 🎄

Skráning fer fram hér: https://forms.gle/PZWtKdMgDgryQ9PQ6

Hlökkum til að sjá sem flesta í hátíðarskapi og njótum samverunnar úti í náttúrunni.

Kær kveðja,

Farsýslan

Í gær hófst 33. aðalfundur Alþjóðasiglingamálastofnunarinnar (IMO), stofnun SÞ sem setur alþjóðlegar reglur um siglingaöryggi og umhverfisvernd á sviði alþjóðasiglinga. Ísland er aðili að IMO og tekur Samgöngustofa því virkan þátt í starfinu árið um kring. Okkar fólk lætur heldur ekki sitt eftir liggja á aðalfundinum, sem haldinn er annað hvert ár. Hér má fylgjast með fundinum sem stendur til 6. desember.

Í dag, mánudag, býðst okkur bólusetning gegn árlegri inflúensu. Hjúkrunarfræðingur frá Heilsuvernd verður í Stéli 1 á þriðju hæð, kl. 13:45-14:45. Ekki þarf að skrá sig heldur er nóg að mæta.

Þau sem ekki geta notfært sér þessa tímasetningu geta komið til Heilsuverndar, Urðarhvarfi 14, 2. hæð. Opnir tímar eru alla virka daga til 15. desember. Aðrir tímar eftir samkomulagi.

Í nýrri skýrslu um aksturshegðun Íslendinga koma fram ýmsar áhugaverðar niðurstöður. Meðal annars minnkar notkun rafhlaupahjóla hjá fólki undir áhrifum milli ára, um heil 23%. Mikil umræða í samfélaginu, sem er ekki hvað síst að þakka hinni frábæru herferð Ekki skúta upp á bak, hefur því haft mælanlega jákvæð áhrif. Meira en helmingur svarenda vill auka takmarkanir á rafhlaupahjól. Til dæmis aldurstakmarkanir, lokun leiga á kvöldin eða jafnvel banna hjólin alfarið.

Fleiri merkilegar niðurstöður má sjá í skýrslunni. Farsímanotkun undir stýri eykst milli ára, nema notkun samfélagsmiðla sem minnkar eilítið. Farsímanotkun undir stýri er í engu samræmi við það sem við teljum hættulegt. 99% Íslendinga telja hættulegt að skoða samfélagsmiðla en 23% gera það samt stundum.

Hér má sjá samantekt á helstu niðurstöðum skýrslunnar.

Síminn býður starfsfólki Samgöngustofu upp á gæða sjónvarpsþjónustu, net og farsíma á enn betri kjörum. Fulltrúar Símans munu koma í heimsókn til okkar 4. desember og kynna tilboðin en einnig er hægt að panta símtal frá þeim og fara yfir málin.

Hér má sjá tilboðin til starfsfólks Samgöngustofu.

Á sunnudaginn var haldinn alþjóðlegur minningardagur um fórnarlömb umferðarslysa. Þema dagsins var viðbrögð á slysstað og höfum við af því tilefni látið gera fræðslumynd þar um. Meginreglan þegar komið er að slysi er að muna fjóra punkta; Tryggja vettvang, meta aðstæður, hringja í 1-1-2 og hlúa að slösuðum. Er myndin þegar komin í birtingu á RÚV og verður birt á samfélagsmiðlum nú á næstu dögum.

Hér má sjá nýju fræðslumyndina um viðbrögð á slysstað.

Í dag hófst ráðstefna Alþjóðaflugmálastofnunarinnar ICAO um mögulega valkosti um eldsneyti í flugi. Er þetta þriðja ráðstefnan af þessum toga á vegum stofnunarinnar og fer nú fram í Dubai. Til umræðu verða framfarir í þróun vistvænni orkugjafa og skilgreining sameiginlegrar stefnu þjóða í þessum efnum. Fulltrúar frá 94 þjóðríkjum, þar á meðal Íslandi, taka þátt í ráðstefnunni sem stendur til föstudags.

Dagur íslenskrar tungu er haldinn hátíðlegur á fæðingardegi Jónasar Hallgrímssonar, hins ástsæla þjóðskálds og náttúrufræðings. Að því tilefni barst góð ábending um að flagga íslenska fánanum hér fyrir utan hús, eins og við viljum gera á fánadögum sem bera upp á virkan dag.

Í dag er tilvalið að nota okkar gróskumiklu íslensku sem mest því þannig dafnar hún best. Um leið er gaman að rifja upp að Jónas var mikill nýyrðasmiður. Hann bjó til dæmis til orð eins og láréttur, fjaðurmagnaður, mörgæs, líkindareikningur og ljóshraði. Fleiri nýyrði Jónasar má finna hér.