Ferðakostnaðarnefnd hefur ákveðið dagpeninga til greiðslu gisti- og fæðiskostnaðar ríkisstarfsmanna á ferðalögum innanlands á vegum ríkisins. Ferðakostnaður innanlands er reiknaður út frá verðkönnun þar sem kannað er vænt verð á algengum gististöðum, á höfuðborgarsvæðinu og utan þess. Almennt er ferðakostnaði innanlands breytt tvisvar sinnum á ári, að vori og að hausti, til þess að endurspegla árstíðarsveiflu í kostnaði gistingar.
Gisting og fæði í einn sólarhring kr. 54.400
Gisting í einn sólarhring kr. 38.100
Fæði hvern heilan dag, minnst 10 tíma ferðalag kr. 16.300
Fæði í hálfan dag, minnst 6 tíma ferðalag kr. 8.150
Dagpeningar þessir gilda frá og með 1. júní 2024. Jafnframt fellur úr gildi auglýsing nr. 2/2023.
Athygli er vakin á að meginreglan er að greiða skal kostnað vegna ferðalaga innanlands, s.s. fargjöld, fæði og gistingu, eftir reikningi. Fæðiskostnaður er uppreiknaður miðað við breytingar á viðeigandi vísitölu sem útgefin er af Hagstofu Íslands
Uppfært skjal má finna inní CCQ og heitir skjalið ”Ferðareikningur innanlands”.
Þessi er ekkert eðlilega peppuð í kosningarnar á morgun – líkt og annað starfsfólk Samgöngustofu.
Þá liggja niðurstöður forsetaskuggakosningar Samgöngustofu árið 2024 fyrir. Niðurstöðurnar voru teknar kl 13:43 í dag föstudag og 60 tóku þátt í henni. Niðurstöðurnar eru eftirfarandi:
Rétt eins og í nýjustu könnunum mælast Katrín Jakobsdóttir og Halla Tómasdóttir hnífjafnar. Í síðustu könnun raunheima mælast þær með 24,1% fylgi hvor en í skuggakosningu Samgöngustofu mælast þær báðar með 28,33% fylgi (17 atkvæði hvor). Á eftir Katrínu og Höllu T kemur Jón Gnarr með 7 atkvæði en það skilar honum 11,67% fylgi. Baldur fær 6 atkvæði og 10% fylgi en Halla Hrund 5 atkvæði og 8,33% fylgi. Ásdís Rán, Ísdrottningin, fær 4 atkvæði og 6,67% fylgi og Arnar Þór Jónsson fær 3 atkvæði og 5% fylgi. Viktor Traustason rekur svo lestina með 1 atkvæði sem skilar honum 1,67% fylgi.
Áður en ég hleypi ykkur í helgina og kosningar morgundagsins vil ég bjóða ykkur að lesa tilgerðalegan og innihaldslausan texta um íslensk gildi í boði ChatGPT:
Íslendingar eru stoltir arftakar eldfornra sagna og náttúrufegurðar og standa vörð um gildin sín með djúpstæðu tilfinningalegu samhengi og þjóðlegri einingu. Þeir bera gildi eins og heiðarleika, hreinskilni og samfélagslega samstöðu á lofti með mikilli virðingu fyrir arfleifð sinni. Í landinu þar sem eldgos og jöklar móta landið, finna Íslendingar fyrir sérstökum tengslum við náttúruna sem endurspeglast í menningu þeirra og daglegu lífi. Með sterkri tilfinningu fyrir réttlæti og jafnræði, leggja þeir áherslu á jafnvægi í öllu sem þeir taka sér fyrir hendur. Þessi gildi, sem eru rótgróin í hjarta þjóðarinnar, endurspegla sanna kjarna íslenskrar sjálfsmyndar og menningar.
Góða helgi og ekki gleyma að nýta kosningaréttinn!
Hérna má sjá ChatGPT túlka dæmigerðan forseta Íslands. Dæmigerður íslenskur forseti einkennist af virðingu, visku og aðgengileika.
Embætti forseta Íslands er ekki bara táknrænt heldur líka mikilvægt fyrir þjóðina. Embættið táknar sameiningu og stöðugleika og er mikilvægur þáttur í að viðhalda lýðræðislegum gildum landsins.
Kosningarétturinn er ekki sjálfsagður réttur. Hann er mikilvægur hluti af lýðræðinu okkar og gefur hverjum og einum tækifæri til að hafa áhrif á framtíð þjóðarinnar. Því er brýnt að nýta þennan rétt og taka þátt í kosningum.
Okkar stofnun er ákveðinn þverskurður af samfélaginu og endurspeglar fjölbreytni þess. Af þeim sökum bjóðum við ykkur nú að taka þátt í skuggakosningu og hvetjum starfsfólk til að kjósa hér að neðan. Svörin eru ekki rekjanleg og þátttaka er mikilvæg til að tryggja réttmæti niðurstaðna.
Ef ég héldi því fram að skuggakosningin væri hávísindaleg myndi ég eflaust fá svartan blett á tunguna. Einn stór vankantur er á henni: það eru engin takmörk á því hve oft hver og einn getur kosið. Nú vil ég höfða til samvisku samstarfsfólks mín og biðla til ykkar að misnota þennan vankant könnunarinnar ekki. Plís!
Niðurstöður könnunarinnar verða birtar á innri vef eftir hádegi á morgun, föstudag. Nýtið kosningaréttinn og kjósið rétt!
Myndin sýnir vinnuumhverfi lögfræðinga Samgöngustofu. Töfrandi, myndu sum jafnvel segja.
,,Ný lög, hver er?” er eitthvað sem ég myndi kannski skrifa ef þetta væri vikulegt brandarahorn. Þetta er hins vegar háalvarlegur vikulegur gæðamoli þar sem við reynum að koma upplýsingum tengdum gæðamálum til skila til starfsfólks í fullri alvöru og án alls gríns.
Í gæðamola þessarar viku vil ég vekja athygli ykkar á vinnulýsingu 17 – VIN-0017. Í stuttu máli þá tilgreinir vinnulýsingin hvernig lögfræðingar Samgöngustofu vakta Stjórnartíðindi. Þar sjá lögfræðingar Samgöngustofu þegar ný lög eða reglur taka gildi og hafa eftir þörfum samband við sérfræðinga innanhúss ef þeir þurfa að vita af nýjum lögum/reglum. Einstaklega vel skrifuð vinnulýsing – við í gæðateyminu verðum stolt og klökk við að sjá samstarfsfólk okkar standa sig svona vel í gæðamálum.
Eins og ég segi þá er þetta vel skrifuð vinnulýsing og margt hægt að taka til fyrirmyndar við hana. Það er hins vegar ekki eina ástæðan fyrir því að vinnulýsingin er tekin sérstaklega fyrir. Ég vil sérstaklega vekja athygli á feitletraðri setningu úr vinnulýsingunni:
Vakin er sérstök athygli á að það er á ábyrgð deildarstjóra að koma upplýsingum um breytingar til starfsmanna sinna og sjá til þess að vinnugögn séu rétt uppfærð.
Það er sumsé ekki bara á ábyrgð lögfræðinganna að miðla upplýsingum um ný lög og reglur til starfsfólks. Deildarstjórar spila hér þátt en þeir fá pósta þegar ný lög og reglur sem þá varða eru tilkynnt í Stjórnartíðindum. Útsendingarlistinn (þau sem fá tilkynningar) er í viðhengi við gæðaskjalið en hann var síðast uppfærður í gær 19. mars.
Starfsmaður Samgöngustofu tekur við veraldlega hluta fimmta skrefsins.
Í dag fékk Samgöngustofa fimmta græna skrefið vottað. Það var heldur betur kominn tími til enda rúm 2 ár síðan við fengum skref 2-4 vottuð. Þessu ber að fagna!
Fimmta skrefið er ólíkt fyrstu fjóru skrefunum. Í fyrstu fjórum skrefunum eru alls konar skilyrði listuð upp og stofnunum gert að uppfylla í það minnsta 90% þeirra. Fimmta skrefið er ólíkt því – það er svokallað umhverfisstjórnunarkerfi. 5. skrefið er byggt á ISO 14001 staðlinum sem er umhverfis- og öryggisstaðalll og er 5. skrefið í raun bara umhverfishluti ISO 14001. 5. skrefið er í grunninn rammi sem er ætlað að halda utan um kröfur og skilyrði fyrstu 4 skrefanna og passa að þau séu uppfyllt.
Á næstunni ætlum við að fagna vottun fimmta skrefsins saman. Jafnvel fá okkur smá köku og kaffi saman, hver veit? Nánari upplýsingar um fögnuðinn koma á næstunni.
Þessi ungi herramaður heldur rafrænan tiltektardag hátíðlegan á fjögurra ára fresti.
Sæl öll! Eins og mörg okkar vita er hlaupársagur í dag og stemmning og gírun hjá stofnuninni er eðlilega samkvæmt því. Það er eitthvað alveg geggjað við það að fá auka dag í árið og mörg okkar velta fyrir sér hvernig þau eiga að ráðstafa þessum kærkomna aukadegi. Þau okkar sem velta því fyrir sér þurfa ekki að örvænta því stofnunin okkar er komin með alvöru prógram í dag. Jú jú – þið giskuðuð rétt. Í dag, fimmtu- og hlaupsársdaginn 29. febrúar, verður nefnilega rafrænn tiltektardagur.
En hvað felst í rafrænum tiltektardegi? Í ár ætlum við að einblína á málakerfið okkar með það að markmiði að loka málum sem eru ekki í notkun. Í málakerfi Samgöngustofu, One, eru samtals 208.087 mál og þar af eru 10.205 mál í vinnslu. Það þýðir að um 4.9% af öllum málum nokkurn tíman hjá Samgöngustofu eru í vinnslu en það hlýtur að teljast býsna hátt hlutfall. Kostir þess að loka málum eru margir; skjaladeildin getur andað hægar, mitt one stjórnborðið lítur betur út, það hjálpar til við gagnaskil til Þjóðskrár en fyrst og síðast er það er gott fyrir samviskuna að loka málum ásamt því að heilinn seytir dópamíni í kollinn manns.
Það er því ekki eftir neinu að bíða, starfsfólk kært. Setjið ykkur í stöður! Það verður mikið verk unnið í dag, á hlaupársdag. Skjalateymi verður starfsfólki innan handar við lokun mála og því ætti allt starfsfólk að geta tekið þátt. Skjalateymið er meira að segja svo almennilegt að það verður einnig til taks á morgun og svo eftir samkomulagi næstu vikur. Gangi ykkur vel!
Það er gefandi að rækta umhverfið. Fólk á það til að fyllast ofsakæti við umhverfisstörf.
Síðastliðinn föstudag var umhverfishópur Samgöngustofu með erindi í föstudagskaffinu. Í því erindi var farið yfir græn skref og innleiðingu fimmta skrefsins og grænt bókhald stofnunarinnar 2022.
Samgöngustofa hefur fengið fjögur af fimm grænum skrefum vottuð. Vinna við innleiðingu fimmta skrefsins er mjög langt á veg komin og má þess má vænta að fimmta skrefið verið vottað á næstunni. Fimmta skrefið er ólíkt hinum – fyrstu fjögur skrefin halda utan um skilyrði sem stofnanir þurfa að uppfylla en fimmta skrefið er svokallað umhverfisstjórnunarkerfi (byggt á ISO 14001) sem heldur utan um umhverfisstarfið og viðheldur því.
Í erindinu var einnig farið yfir niðurstöður græns bókhalds 2022. Á árinu 2022 losaði Samgöngustofa 162.590 tonn CO2 ígilda. CO2 ígildi er mælieining sem staðlar hnatthlýnunarmátt (e. global warming potential) gróðurhúsalofttegunda. Eitt tonn af CO2 ígildum jafngildir því þeirri losun sem fylgir einu tonni af CO2. Til þess setja losunartölur okkar í samhengi má nefna nokkur önnur dæmi:
Framleiðsla rafmagns í aflstöð Landsvirkjunar á Fljótsdal er 1,2 g CO2 ígildi fyrir hverja framleidda kílóvattstund (kWst)
Kolefnisspor 1 kg af slægðum íslenskum eldislaxi er 2,7 kg CO2 ígildi reiknað með aðferðafræði vistferilsgreiningar
Losun meðal fólksbíls er um 2 tonn CO2 ígildi á ári. Í þeirri tölu er ekki gert ráð fyrir losun yfir vistferilinn það er framleiðsla bílsins eða förgun hans
Kolefnisspor flugferðar frá Keflavík til Berlínar og til baka, það er vegna bruna þotueldsneytis, eru um 670 tonn CO2 ígildi
Ef við setjum losnunartölu Samgöngustofu í samhengi við meðal losun fólksbíls mætti segja að það sé eins og Samgöngustofa reki tæplega 83.000 bíla sem séu í meðalnotkun. Árið 2022, sama ár og græna bókhaldið sem við erum að skoða, voru 285.623 bílar á Íslandi sem gengu fyrir eldsneyti. Losun Samgöngustofu árið 2022 var því jafn mikil og 29% af losun bílaflota Íslands sama ár.
Eitt umhugsunarvert kom úr grænu bókhaldi en árið 2022 notaði hver starfsmaður að meðaltali 4,56kg af pappír. Það er auðvitað ekki gott og mikil tilefni til þess að reyna að takmarka pappírsnotkun. Á móti kemur að við erum leyfisveitingastofnun og notum þ.a.l. meira af pappír en aðrar stofnanir – þetta batnar vonandi með aukinni notkun á rafrænum eyðublöðum.
Séu einhver innanhús áhugasöm um stöðu umhverfismála hjá stofnuninni er sjálfsagt að hafa samband við mig, Kolbein, og spyrja!
Í lokin langar mig að óska eftir umsóknum í umhverfishópinn. Ekki bara er umhverfisstarf gefandi og áhugavert heldur líka skemmtilegt. Áhugasöm geta sent póst á kolbeinn.arnarson@samgongustofa.is.
Föstudaginn 2. febrúar nk. er rauði dagurinn 2024. Þann dag eru öll hvött til þess að klæðast einhverju rauðu til að vekja athygli á hjartasjúkdómum og meðfæddum hjartagöllum.
Það hlakkar í þessu starfsfólki enda eru þau í þann mund við að gefa út gæðaskjal.
Gleðilegan mánudag kæra samstarfsfólk! Í þessum gæðamola langar mig að kynna fyrir ykkur stórmerkilegt gæðaskjal: Ritun gæðaskjala (VER-0181). Þetta gæðaskjal er hugsað fyrir það starfsfólk sem hefur ritleyfi í CCQ (getur búið til og breytt skjölum) til þess að samhæfa útlit og lýsigögn gæðaskjala. Ef þessum leiðbeiningum er fylgt eftir við ritun gæðaskjala ætti enginn að þurfa að lenda í gæðaskjala(jóla)kettinum!
Í VER-0181 Ritun Gæðaskjala er farið yfir ýmis mikilvæg atriði eins og t.d. hvaða leturgerð við notum. Þar er Calibri 14 pkt letur málið en því miður eru mörg gæðaskjöl í öðrum leturgerðum sem er auðvitað bagalegt. Gæðaskjalið hefur að geyma ýmsar aðrar gagnlegar upplýsingar um uppsetningu gæðaskjala, m.a. hvernig á að tengja gæðaskjöl við önnur gæðaskjöl eða lög og reglugerðir.
Við nálgumst fullkomna heiminn þar sem öll gæðaskjöl eru með staðlað útlit óðfluga. Það hlakkar í okkur í gæðateyminu að komast á þann stað en til þess þurfum við allt starfsfólk með okkur í lið. Við erum öll saman í þessu!
Í morgun hélt jafnréttisnefnd kynningu á verkefnum sínum í föstudagskaffinu. Kynningin gekk vel og í framhaldinu spruttu upp líflegar umræður um málefni kynjanna – m.a. var rætt um hvað kynjasamþættingþýðir og hvers vegna karlar hafi meiri ábata af reistum hjólastígum.
Í jafnréttisnefnd sitja 7 einstaklingar sem vinna hjá Samgöngustofu. Þetta eru þau Katrín Pálsdóttir (jafnréttisfulltrúi), Dröfn Gunnarsdóttir, Guðbjörn Jensson, Kara Ásta Magnúsdóttir, Kolbeinn Arnarson, Markús Benediktsson og Rannveig Garðarsdóttir.
Jafnréttisnefndin er stórhuga og er að ná vopnum sínum aftur eftir ákveðna lægð í covid. Helstu verkefni nefndarinnar eru að fylgja eftir aðgerðaráætlun jafnréttisáætlunar Samgöngustofu, að endurskoða jafnréttisáætlun og að fara árlega yfir stöðu jafnréttismála innan Samgöngustofu. Auk þessara verkefna leggur nefndin áherslu á að finna fræðslu handa starfsfólki á sviði jafnréttismála en nú er verið að velja á milli erindis Samtakanna 78 og Jafnréttisstofu. Nefndin ætlar á næstunni að móta og gefa út verklag til þess að skýra betur hlutverk og stefnu nefndarinnar.
Á innri vefnum er hægt að finna ítarlegri upplýsingar um jafnréttisnefndina. Ef smellt er á Samgöngustofa á borðanum til vinstri er svo í framhaldinu hægt að velja “Jafnréttisnefnd og jafnréttisáætlun”. Það getur verið gagnlegt og forvitnilegt fyrir starfsfólk að kynna sér jafnréttisáætlunina.
Að neðan má svo sjá pdf af kynningu nefndarinnar í nýliðnu föstudagskaffi.
11. janúar nk verður handavinnu og búbblu seinnipartur.
Við verðum í matsalnum í Ármúla 2, ”þáttökugjald” er 1 freyðivínsflaska á mann eða Töst/gos/hvaðsemer sem fer í púkk. Byrjum kl.16:00, verðrum ekki lengur en til kl.19:00
Ef þið hafið spurningar heyrið þá í Helgu og Thelmu.
Gömlu góðu bækurnar bjóða ekki upp á staðfestingu lesturs, bara lestur.
Heil og sæl kæru vinir og samstarfsfólk. Þessa vikuna langar mig að segja ykkur frá póstlistum, notendahópum og staðfestingu lesturs í CCQ.
Notendahópar eru skilgreindir af gæðateymi eftir þörfum og óskum. Þeir eru heppilegir til þess að skilgreina hópa eftir sviðum, deildum og öðru. Þegar fyllt er inn í lýsigögn óútgefins gæðaskjals er hægt að setja einstaklinga eða notendahópa á póstlista. Þegar skjalið er svo gefið út fá allir einstaklingar sem eru á póstlistanum meldingu í tölvupósti um að skjalið hafi verið gefið út. Þau sem eru að einhverju leyti ábyrg fyrir eða þurfa að þekkja ákveðið gæðaskjal eiga almennt að vera á póstlista gæðaskjalsins. Þessi virkni hentar vel til þess að sá til þess að deildir eða svið séu með á nótunum varðandi útgáfu nýrra gæðaskjala.
Staðfesting lesturs er annar svipaður fítus sem hægt er að skilgreina í lýsigögnum gæðaskjals. Hann virkar svipað eins og póstlistarnir, þar er hægt að skilgreina einstaklinga eða notendahópa og viðkomandi einstaklingar fá meldingu í tölvupósti um að gæðaskjal sé útgefið nema hér er farið fram á að notendurnir ýti á hnapp og staðfesti þar með lestur gæðaskjalsins. Stjórnendur geta fylgst með staðfestingu lesturs á þeim gæðaskjölum sem þau gefa út og passað að starfsfólk sé “up to date” í gæðamálum að hverju sinni.
Til þess að halda utan um staðfestingu lesturs á þeim gæðaskjölum sem starfsfólk þarf að hafa lesið mæli ég með því að stilla lesborðið þannig að það sýni hvaða skjöl á eftir að staðfesta lestur á. Hægt er að sjá leiðbeiningar til þess að stilla lesborð í síðasta gæðamola vikunnar. Fyrir nýtt starfsfólk eða aðra sem eiga eftir að staðfesta lestur á mörgum skjölum mælum við í gæðateyminu með því að lesa þau jafnt og þétt. Ef þú ætlar að borða fíl, þá er eins gott að taka marga litla bita. Eitt skjal á dag kemur skapinu í lag!
Eftir hverju eru þið að bíða? Lesið og staðfestið!
Þessi starfsmaður Samgöngustofu leggur mikið upp úr skipulagi og notar post-it miða miða sér til aðstoðar.
Að þessu sinni fjallar gæðamoli vikunnar um skipulag lesborðs CCQ. Við notum lesborðið mis mikið en það er hægt að skipuleggja það þannig það sé gagnlegt. Þarfir starfsfólks og notkun þess á CCQ er mismunandi og því er um að gera að skipuleggja lesborðið sitt eftir sínum þörfum.
Efst í hægra horni lesborðsins eru þrír mismunandi valmöguleikar í boð til þess að breyta skipulagi þess, sjá mynd:
Best er að byrja á því að skoða “Velja töflur”-valmöguleikann. Þar, eins og nafnið gefur til kynna, getur starfsfólk valið þær töflur sem það vill að birtast á lesborðinu. Fyrir þau ykkar sem nota CCQ fyrst og fremst til þess að lesa gæðaskjöl mælum við í gæðateyminu með eftirfarandi stillingum:
Þetta val gefur notendum fína yfirsýn yfir þau gæðaskjöl sem tengjast þeim ásamt því að gefa gott yfirlit yfir ábendingar. Athugið að þetta er einungis tillaga, öllum er frjálst að stilla sitt lesborð eftir eigin þörfum, enda er þetta ykkar lesborð <3
Til þess að breyta uppsetningu lesborðsins veljum við “Breyta dálkum” efst upp í hægra horni lesborðins. Þá fáum við eftirfarandi valmynd upp:
Hér er hægt að velja sex mismunandi leiðir til þess að setja upp lesborðið. Mér finnst sú sem er neðst til vinstri vera góð en þetta er auðvitað bara spurning um kjörstillingu (e. preference) hvers og eins.
Að lokum er hægt að skoða “Raða töflum” efst upp í hægra horni lesborðsins. Þar er hægt að raða töflunum eftir þörfum. Mér finnst gott að nýta dálkana eftir tegund taflna þ.e.a.s. “Mín skjöl” í einn dálk, “Mínar ábendingar” og “Ábendingar með minni aðild” í annan o.s.frv. Sjá mynd:
Ég mæli heilshugar með því að starfólk gefi sér tíma til þess að skipuleggja lesborðið sitt enda mikill ávinningur fólginn í því. Ykkur er velkomið að hafa samband við mig, Kolbein, ef þetta vefst fyrir ykkur. Muniði svo, þetta er ykkar lesborð. Lesborð hvers og eins er þeirra konungsdæmi þar sem viðkomandi ræður ríkjum. Rétt eins og með kosningaréttinn þá er vitleysa að kasta frá sér þeim sjálfsögðu réttindum sínum að skipuleggja lesborðið eftir eigin þörfum. Skipuleggjum lesborðin okkar!
Einelti og önnur áreitni er ólíðandi og við hjá Samgöngustofu leggjum okkur fram við að öllu starfsfólki líði vel í vinnunni. Dæmið á myndinni er því vonandi bara theorískt en ef ske kynni að slíkt atvik kæmi upp er gott að hafa fyrirframskilgreinda verkferla fyrir slík atvik.
Nær allar stofnanir hafa svokallaða EKKO-stefnu en EKKO stendur fyrir einelti, kynferðisleg áreitni, kynbundið áreiti og ofbeldi. EKKO-stefnur eru mikilvægar til þess að tryggja góða verkferla þegar samskipti starfsfólks eru ekki nógu góð. Okkur langar auðvitað öllum að líða vel í vinnunni og þessi stefna aðstoðar okkur við að uppfylla það markmið.
Ég er viss um að allt starfsfólk hefur gagn af því að renna fljótlega yfir stefnuna – í það minnsta fyrstu 4 kaflana. Gildismat hvers tíma er auðvitað breytilegt og samskipti sem þóttu eðlileg áður fyrr þykja ekki endilega eðlileg núna. Því er um að gera að eyða öllum vafa um hvort samskipti manns séu boðleg m.v. stefnuna og lesa hana yfir. Markmiðið um góða vinnustaðamenningu og að öllum líði vel í vinnunni er auðvitað á ábyrgð okkar allra og því mikilvægt að fólk kynni sér “leikreglurnar” (stefnuna í þessu tilviki) vel og vandlega. Vöndum okkur í samskiptum og verum góð við hvort annað! 🙂
Þessi starfsmaður veltir fyrir sér möguleikunum sem fylgja því að geta endurútgefið skjal án þess að setja það í samþykktarferli.
Þessa vikuna verður gæðamolinn ekki gæðaskjal heldur kynning á virkni kerfisins fyrir þá notendur sem hafa ritleyfi. Þau okkar sem vinna við útgáfu skjala í CCQ ættu að þekkja samþykktarferlið sem fer af stað þegar gæðaskjöl eru sett í útgáfu. Samþykktarferlið er auðvitað af því góða og rýni kollega á sameiginleg skjöl hlýtur að teljast jákvæð. Samþykktarferlið getur þó orðið ögn þreytandi þegar smávægilegar breytingar eru gerðar á lýsigögnum gæðaskjals en ekkert breytist efnislega í gæðaskjalinu sjálfu.
Í þeim tilfellum sem einungis þarf að gera smávægilegar breytingar á lýsigögnum gæðaskjals er hægt að nýta sér valmöguleikann “endurútgefa skjal” en hann má finna undir aðgerðahnappinum:
Til þess að nýta sér þennan valkost, þarf fyrst að taka frá skjalið, breyta lýsigögnum og ýta svo á endurútgefa skjal. Í framhaldinu af því fær notandi að velja útgáfudag skjalsins ásamt því að ákveða hvort gæðaskjalið haldi gamla útgáfunúmerinu eða það hækki um einn.
Þess má geta að þessar upplýsingar eru teknar úr Notendaleiðbeiningum CCQ en þær eru í viðhengi við þessa frétt. Notendaleiðibeiningarnar eru gríðarlega öflugt vinnutól og einstaklega þægilegt að nýta sér ctrl+f til þess að finna upplýsingar í þeim. Þrátt fyrir þessar glæsilegu leiðbeiningar er ykkur öllum auðvitað hjartanlega velkomið að hafa samband við okkur í gæðateyminu ef þið lendið á vegg með CCQ.
Það er heldur betur viðeigandi í ljósi þess að stutt er síðan bíllausi dagurinn var. Þá fórum við sem erum með samgöngusamning svoleiðis skellihlægjandi í vinnuna og gáfum ökumönnum langt nef á leiðinni. Raunar er það svo að mörg okkar sem njótum samgöngusamningsins eigum oft erfitt með að festa svefn kvöldin fyrir vinnu vitandi að við fáum aukalega borgað fyrir það eitt að rölta í vinnuna.
Umræðan um virka ferðamáta hefur orðið fyrirferðameiri síðustu ár en ástæða þess er ágæti virku ferðamátanna. Ekki bara sparast olía og viðhaldskostnaður bifreiðarinnar heldur bætir það andlega og líkamlega heilsu að labba til vinnu. Ýmsar rannsóknir hafa sýnt að 10 mínútna göngutúr gerir heilmikið jákvætt fyrir virkni heilans (hægt að gúggla sig til um þetta, annars er heimildin: trust me bro) og því er mikið tilefni til þess að reyna að temja sér reglulega göngutúra. Göngutúrinn hefur sömuleiðis þær jákvæðu afleiðingar að maður mætir eldhress í vinnuna og því getur hann dregið úr kaffiþörf (sem ýmsum gæti þótt eftirsóknarvert).
Samgöngusamningurinn nær þó ekki bara til þeirra sem ganga í vinnuna en hann nær utan um alla virka ferðamáta. Þar má nefna tvo jafnfljóta, hjól (hvort sem þau eru knúin af rafmagni eða ekki), hlaupahjól, strætó o.s.frv. Í raunar allt sem er ekki einkabíll (fjölskyldubíll, afsakið Vigdís Hauksdóttir). Samgöngusamningurinn getur því verið góður kostur fyrir þau okkar sem hafa tök á því og vilja til þess að leggja bílnum og þiggja eylitla launahækkun (hversu góður díll?).
Ætlunin með þessum póst er fyrst og fremst að mæra kosti samgöngusamningins. Það er auðvitað þannig að mörg okkar hafa skyldum að gegna, þurfa t.d. að skutla litlum krílum í ýmsa skóla á morgnana, og hafa því ekki tök á því að nýta sér þetta stórglæsilega úrræði. Það er gott og blessað og engin ástæða til þess að fá samviskubit yfir bílanotkun. Þið hin hins vegar…. 😉
Í lokin langar mig að koma með tillögu að nýjum hugsanahætti. Það er auðvitað gríðarlegur fórnarkostnaður sem felst í því að keyra til og frá vinnu. Sá fórnarkostnaðurinn er fólginn í því að ná ekki að nýta sér virka ferðamáta á morgnana en kostir þess hafa verið raknir hér að ofan.
Þessi starfsmaður heldur svo mikið upp á gæðaskjöl stofnunarinnar að hann prentar þau út áður en hann hefur lestur.
Við í gæðateymi Samgöngustofu höfum ákveðið að byrja með vikulega frétt þar sem við kynnum eitt gæðaskjal stofnunarinnar. Það eru mörg gæðaskjöl sem eru þess eðlis að allt starfsfólk Samgöngustofu ætti að hafa kynnt sér og því mikið tilefni til vikulegra gæðamola. Gæðakerfið okkar í CCQ er alltaf að taka á sig betri mynd eftir flutning úr Gæsku og því er núna kjörið tækifæri fyrir starfsfólk til þess kynna sér eða rifja upp gæðaskjöl sem eiga við um allt starfsfólk.
Fysta gæðaskjalið sem við í gæðateyminu viljum ólm kynna fyrir starfsfólki er ekki af verri gerðinni: STE-0001 Hlutverk og gildi Samgöngustofu (já, þið lásuð rétt, stefnuskjal númer EITT!). Hérna erum við auðvitað með gæðaskjalið sem þetta snýst allt um. Til hvers erum við? Stefnuskjalið vísar ílög um Samgöngustofu, stjórnsýslustofnun samgöngumála (nr. 119/2012) en þau eru valkvæð lesning (fyrir lengra komna). Stefnuskjalið er í sjálfu sér ekki langt plagg og því lítið tilefni til þess að kveinka sér yfir þeim grimmu örlögum að vera tilneydd/ur til lesturs. Segja mætti að STE-0001 sé viðeigandi upphitun fyrir lestur bitastæðari gæðaskjala sem þið megið gera ráð fyrir að kynna ykkur á næstunni.
Þá er lítið annað eftir en að sækja kaffibolla, tilla sér inn á skrifstofu, setja fætur upp á borð og hefja lestur (hér áður fyrr hefði þótt viðeigandi að kveikja sér í sígó með lestrinum en við skulum láta það eiga sig). Njótiði vel – það er aldrei að vita nema það verða skyndipróf fyrir heilu deildir Samgöngustofu úr gildum stofnunarinnar og þá er eins gott að vera undirbúin/n.
