Framkvæmdastjórn Evrópusambandsins hefur hafið opið samráð um tillögu að nýrri reglugerð um það hvernig standa eigi skil á og birta upplýsingar um losun gróðurhúsalofttegunda frá samgöngum. Frestur til að koma að athugasemdum og sjónarmiðum er til og með 17. október 2022.
Markmiðið með tillögunni er að draga úr losun gróðurhúsalofttegunda í ferðum og flutningum. Það á að gera með því að skapa samræmda aðferð til að reikna út losun auk þess sem skapa á hvata til að draga úr losuninni og hafa áhrif á hegðun fólks. Eftirtalin atriði eru talin mikilvægust til að ná markmiðinu:
Samræmd framsetning og birting á losun gróðurhúsalofttegunda frá fyrirtækjum sem flytja farþega og vörur.
Áreiðanlegar upplýsingar um losun frá tilteknum tegundum af þjónustu.
Stuðlað að því að tekin verði upp reikningsskil í fyrirtækjum sem ná yfir losun gróðurhúsalofttegunda frá samgöngum.
Ferðakostnaðarnefnd hefur ákveðið dagpeninga til greiðslu gisti- og fæðiskostnaðar ríkisstarfsmanna á ferðalögum innanlands á vegum ríkisins sem hér segir:
Það er hann Snorri Snorrason sem velur föstudagslagið að þessu sinni. Um valið segir Snorri:
Hér er lag vikunnar frá mér sem kemur öllum í gott stuð fyrir helgina. Ég lærði fyrst að meta svona Rokk eftir að ég hafði hlustað á Uriah Heep sem ungur maður.
Eins og fram hefur komið þá var Umferðarþing haldið föstudaginn 23. september síðastliðinn. Hér að neðan má sjá stutt yfirlitsmyndband af umferðarþingi en hægt er að horfa á öll erindin í réttri röð á spilunarlista hér: Umferðarþing á YouTube.
Undir myndbandinu má sjá dagskrá þingsins, upptökur erinda og þær glærur / slæður sem fyrirlesarar höfðu uppi á skjá.
Síðasta föstudag fór fram aðalfundur Farsýslunnar. Þar var tekin ákvörðun um að stefna á árshátíð erlendis haustið 2023 og að hún verði skipulögð sem fræðsluferð. Jafnframt var ákveðið að skipa hóp til að kanna hvar hagstætt væri að fara og mögulegt að skipuleggja sem fræðsluferð. Þau sem hafa áhuga á að taka þátt í slíkri skipulagningu mega endilega hafa samband við stjórnarmeðlimi fyrir 14. október nk.
Jafnframt var tekin ákvörðun um að hækka félagsgjald í Farsýsluna í 1500 kr. úr 1250 kr.
Ný stjórn var kjörin og skipa stjórn Farsýslunnar næstu ár eftirfarandi:
Innviðaráðuneytið, í samvinnu við landshlutasamtök sveitarfélaga, býður íbúum í öllum landshlutum til opins samráðs á fjarfundum í október undir yfirskriftinni Vörðum leiðina saman. Á meðal umfjöllunarefna er stefnumótun í samgöngum.
Tilgangur samráðsfundanna er að gefa íbúum landsins og sveitarstjórnarfólki um land allt tækifæri til að hafa áhrif á stefnumótun í málaflokkum ráðuneytisins. Á fjarfundunum verður kastljósinu beint að framtíðaráskorunum í málaflokkunum. Meginviðfangsefni fundanna verða umræður um stefnumótun í samgöngum, sveitarstjórnarmálum og húsnæðis- og skipulagsmálum. Einnig verður fjallað um nýsamþykkta byggðaáætlun.
Öllum er velkomið að taka þátt í fjarfundunum milli kl. 15:00–17:00 á auglýstum fundardögum. Fundirnir verða haldnir í gegnum fjarfundarbúnaðinn Teams. Hægt er að skrá sig á vef fundaraðarinnar. Þátttakendur fá síðan boð í tölvupósti til að tengja sig á fundina. Skráningu lýkur daginn fyrir hvern fund.
Framkvæmdastjórn Evrópusambandsins hefur hafið opið samráð um tillögu að nýrri reglugerð sem á að vernda réttindi farþega í samgöngum. Frestur til að koma að athugasemdum og sjónarmiðum er til og með 7. desember 2022.
Helsta markmiðið með tillögunni er að samræma og einfalda réttindamál farþega. Þá er ætlunin að tryggja að réttindi farþega séu einnig virk þegar áföll eins og Covid-19 faraldurinn ríða yfir. Þar af leiðandi á að samræma réttindi farþega á hinum ýmsum sviðum samgangna en taka jafnframt tillit til sérkenna hvers samgöngumáta fyrir sig.
Drög að nýrri stefnu um umferðaröryggi, umferðaröryggisáætlun 2023-2037, hefur verið birt í samráðsgátt stjórnvalda til umsagnar. Þar gefst öllum tækifæri til að senda inn umsögn eða ábendingar en frestur til þess er til og með 14. október nk. Umferðaröryggisáætlun hefur verið gefin út með reglubundnum hætti síðustu ár en í fyrsta sinn eru drög að nýrri áætlun nú kynnt í samráðsgátt.
Í umferðaröryggisáætluninni er mörkuð stefna um umferðaröryggi á Íslandi til 15 ára. Markmið og áherslur miða að því að ná árangri og auka umferðaröryggi fyrir alla vegfarendur, óháð ferðamáta.
Stefnan er byggð á þriggja þátta nálgun sem miða á að auknu umferðaröryggi og fækkun alvarlegra slysa: öruggari vegfarendur, öruggari vegir og öruggari ökutæki. Sett eru frammistöðumarkmið sem og markmið um öryggi umferðarmannvirkja og ökutækja sem um þau fara.
Sigurður Ingi Jóhannsson, innviðaráðherra, kynnti drög að umferðaröryggisáætlun á Umferðarþingi 2022. „Ég vona að ný stefna og markmið um umferðaröryggi megi verða ljós sem lýsir veginn til aukins öryggis í umferðinni fyrir alla vegfarendur, gamla sem unga, hjólandi sem gangandi eða akandi í bíl.“
Árlegur samfélagslegur kostnaður af umferðarslysum er talinn nema um 40 milljörðum króna og er því til mikils að vinna að auka umferðaröryggi með markvissum aðgerðum.
Vinna við stefnu um umferðaröryggi byggir á samstarfi innviðaráðuneytisins, Samgöngustofu, Vegagerðarinnar og lögreglu. Framkvæmd umferðaröryggisáætlunar er á forræði ráðuneytisins en ábyrgð verkefna er hjá Vegagerðinni, Samgöngustofu og ríkislögreglustjóra auk ráðuneytisins.
Félag íslenskra atvinnuflugmanna (FÍA) stendur árlega fyrir ráðstefnunni ,,Reykjavik Flight Safety Symposium” en það er öryggisnefnd FÍA sem skipuleggur ráðstefnuna. Ráðstefnan dregur til sín fjölbreyttan hóp úr flugiðnaðinum, alls staðar að úr heiminum. Ráðstefnan verður haldin 13. október 2022 og verður haldin í Gullhömrum.
Sigurður Ingi, Jón Gunnar og Kristín Helga fyrir miðju og Valdís Ásta lengst til hægri
Kosningar fóru fram í aðalráð Alþjóðaflugmálastofnunarinnar í Montréal, Kanada, á laugardaginn. Ísland var í framboði og hlaut kosningu. Sem fulltrúi Íslands mun Valdís Ásta Aðalsteindóttir, fyrst íslenskra kvenna, taka sæti í ráðinu og skipa eitt af 36 sætum aðalráðsins fram til næsta aðalþings, haustið 2025. Undanfarin þrjú ár hefur hún starfað sem varafulltrúi Finnlands í aðalráðinu.
Valdís Ásta mun jafnframt stýra starfi NORDICAO hjá Alþjóðaflugmálastofnuninni, sem er samstarf Norðurlandanna, Eistlands og Lettlands.
Varafulltrúi Íslands á tímabilinu verður Ditte Helene Bang frá Danmörku. Saman verða Valdís Ásta og Ditte Helene í fararbroddi fyrir hönd Norðurlandanna, Eistlands og Lettlands í alþjóðasamstarfi um vöxt og viðgang flugmála á vettvangi Alþjóðaflugmálastofnunarinnar.
Sendinefnd Íslands á þinginu skipa m.a. Sigurður Ingi Jóhannsson innviðaráðherra og Jón Gunnar Jónsson forstjóri Samgöngustofu. Af hálfu íslensku fulltrúanna hefur áhersla verið lögð á mikilvægi alþjóðasamvinnu um flugmál, umhverfismál tengd flugi í ljósi fyrirætlana ríkja um að draga úr losun, vaxandi áherslu á netöryggi og gildi samvinnu og samhæfingar þjóða heimsins í þágu endurreisnar almannaflugs eftir heimsfaraldur.
Örugg og öflug flugstarfsemi er mikið hagsmunamál fyrir Ísland og styrk stoð hagsældar þjóðarinnar. Ísland stýrir einu af stærstu flugstjórnarsvæðum heims, um 5,4 milljón km2 og með hnattrænni staðsetningu gegnir landið mikilvægu hlutverki í flugtenginum milli heimsálfa. Ísland hefur verið aðildarríki að Alþjóðaflugmálastofnuninni ICAO frá stofnun hennar árið 1944, en alls 193 þjóðir eiga aðild að stofnuninni.
Sveinn skoraði á Gunnar Karl fyrir þessa viku og tók Gunnar að sjálfsögðu vel í áskorunina. Um val sitt segir Gunnar:
Þegar Sveinn skoraði á mig þá kom aldrei annað til greina en að velja lag með minni uppáhalds hljómsveit og bestu hljómsveit í heimi klárlega Iron Maiden. Valið var hins vegar ekki auðvelt en ég ákvað á endanum að velja eitt af þeirra allra bestu lögum Aces High enda mikið keyrslulag sem kikkstartar klárlega helginni hjá mér. Annars er sextettinn í Maiden miklir íslandsvinir og hafa spilað hérna á klakanum tvisvar á tónleikum árið 1992 í Laugardalshöll og 2005 í Egilshöll.
Þess ber þá hæst að geta söngvarans Bruce Dickinson sem var flugmaður hjá Iceland Express í nokkur ár upp úr aldamótum þegar hann var ekki að þenja raddböndin á tónleikum. Hápunktinum var síðan náð þegar þeir leigðu Boeing 747-400 jumbo þotu af Air Atlanta (Ed Force One) fyrir Book Of Souls heimsreisuna 2016 þar sem Bruce var að fljúga vélinni og áhöfnin var íslensk.
Hægt er að skoða mjög skemmtilegt innslag um reisuna á YouTube en til að gefa ykkur smá tölfræði þá tók túrinn 5 mánuði, 6 heimsálfur, 45 borgir, 123.000 km flognir og lengsta flugið var frá Perth til Cape Town, 11 tímar og 24 min:
Ég sá þá á tónleikum í tveimur af þessum borgum (Munchen og Berlin) og var að vonast til að sjá vélina á flugvellinum þegar ég var að lenda þar en án árangurs!
Þegar þeir skiluðu vélinni aftur til Íslands eftir túrinn í júní 2016 þá flaug hún eitt flug í viðbót merkt og innréttuð Iron Maiden til Marseille í Frakklandi með 350 íslendinga á vegum Air Atlanta til að sjá Ísland – Ungverjaland á EM. Þó ég hafi ekki verið það heppinn að vera í því flugi þá sá ég loksins vélina á flugvellinum í Marseille því ég var sjálfur að fara á leikinn og var það stór stund.
Þar sem Maiden er eitt besta tónleikaband í heimi enda hef ég séð þá 23 sinnum á tónleikum (nú síðast í sumar í Barcelona og Lissabon) þá varð ég klárlega að velja live útgáfu af laginu.
Fyrir valinu varð Rock In Rio 2019 þar sem þeir seldu upp alla 90þús miðana á innan við tveimur klukkutímum.
Gæsahúðin kemur strax í upphafi þegar intro-ið byrjar, hreyflarnir á Spitfire vélinni fara í gang og þrumuræða Winston Churchill fer í loftið enda fjallar lagið um sjónarhorn flugmanns í orustunni um Bretland í seinni heimstyrjöldinni
Sigurður Ingi og Jón Gunnar á þingi Alþjóðaflugmálastofnunarinnar í gær
Sigurður Ingi Jóhannsson, innviðaráðherra, ávarpaði þing Alþjóðaflugmálastofnunarinnar (ICAO) í Montréal í gær. Ráðherra gerði að umfjöllunarefni sínu mikilvægi alþjóðlegrar samvinnu á vettvangi stofnunarinnar, umhverfismál og mikilvægi alþjóðaflugs fyrir Ísland. Tilefni ávarps ráðherra er framboð Íslands til setu í aðalráði ICAO, en kosning fer fram næstkomandi laugardag. Alls 193 þjóðir eiga aðild að ICAO.
Framboð Íslands er undir merkjum NORDICAO, samstarfs Norðurlandanna, Eistlands og Lettlands hjá Alþjóðaflugmálastofnuninni til áratuga. Samvinnan felur m.a. í sér að ríkin skiptast á að sinna aðal- og varafulltrúastöðum í aðalráði stofnunarinnar. Undanfarin þrjú ár hefur Ísland átt varafulltrúa í ráðinu. Hljóti Ísland kosningu á laugardaginn mun íslenski fulltrúinn taka við stöðu aðalfulltrúa af Finnlandi, til næstu þriggja ára.
Sigurður Ingi ávarpar þingið í gær
Ráðherra gerði einnig að umfjöllunarefni sínu ýmis aðkallandi málefni þingsins. Má þar nefna umhverfismál tengd flugi og fyrirætlanir ríkja um að draga úr losun, vaxandi áherslu á netöryggi og gildi samvinnu og samhæfingar þjóða heimsins í þágu endurreisnar almannaflugs eftir heimsfaraldur.
Ísland hefur verið aðildarríki að Alþjóðaflugmálastofnuninni ICAO frá stofnun hennar árið 1944. Auk ráðherra eru þátttakendur Íslands á þinginu fulltrúar frá innviðaráðuneytinu og Samgöngustofu.
Á myndinni sjást m.a. Sigurður Ingi, Jón Gunnar, Kristín Helga og Valdís
Drög að frumvarpi um breytingar á umferðarlögum hafa verið birt í samráðsgátt stjórnvalda til umsagnar. Allir hafa tækifæri til að senda inn umsögn eða ábendingar en frestur til að skila umsögn er til og með 6. október 2022. Þetta kemur fram í frétt á vef innviðaráðuneytisins.
Í frumvarpsdrögunum eru ýmis ný ákvæði sem hafa það markmið að auka öryggi vegfarenda á smáfarartækjum í umferðinni en nýta jafnframt kosti þeirra. Breytingarnar byggja á tillögum starfshóps um smáfarartæki sem skilaði skýrslu í júní sl. Helstu tillögur frumvarpsins sem varða smáfarartæki eru:
Mælt er fyrir um að heimilt sé að aka smáfarartæki á vegi þegar leyfilegur hámarkshraði er ekki meiri en 30 km á klst. en veghaldara sé þó heimilt að leggja bann við umferð þeirra á einstökum vegum eða vegarköflum.
Börnum yngri en 13 ára er bannað að aka smáfarartækjum og kveðið er á um hjálmaskyldu barna yngri en 16 ára við akstur slíkra farartækja.
Sett er hlutlægt viðmið um ölvun ökumanns smáfarartækis sem fela í sér sömu mörk og eiga við akstur vélknúinna ökutækja og jafnframt um viðurlög við slíkum brotum.
Mælt er fyrir um að óheimilt sé að eiga við rafmagnsreiðhjól, smáfarartæki eða létt bifhjól í flokki I svo að hámarkshraði þeirra verði umfram 25 km á klst. Sama á við um létt bifhjól í flokki II að undanskildu því að hámarkshraði þeirra má vera 45 km á klst.
Sigurður Ingi Jóhannsson, innviðaráðherra, sagði frá áformunum á Umferðarþingi 2022 á föstudaginn en eitt meginviðfangsefni þingsins var öryggi óvarinna vegfarenda í umferðinni: „Með því að ferðast stuttar vegalengdir gangandi, hjólandi eða með strætó drögum við úr losun gróðurhúsaloftegunda, stuðlum að betri loftgæðum í þéttbýli og vinnum að bættri lýðheilsu. Það stafa þó ýmsar hættur að óvörðum vegfarendum. Því er nauðsynlegt að gera breytingar á regluverki umferðar til að auka öryggi þeirra sem nýta þennan fararmáta, m.a. á smáfarartækjum,“ sagði ráðherra.
Tillögur starfshóps um smáfarartæki voru einnig kynntar sérstaklega á Umferðarþingi í erindi Jónasar Birgis Jónasson, sérfræðings í innviðaráðuneytinu.
Slysum vegna smáfarartækja fjölgað mikið Í kynningu um frumvarpið í samráðsgátt segir að umferð smáfarartækja, sérstaklega rafhlaupahjóla, hafi aukist og slysum hafi fjölgað mikið á síðustu árum. Breytingar á umferðarvenjum hafa leitt til þess að 17% þeirra sem slösuðust alvarlega í umferðinni á síðastliðnu ári voru á rafhlaupahjólum, en umferð þeirra er þó innan við 1% af allri umferð. 42% alvarlega slasaðra í umferðinni á síðasta ári voru gangandi, hjólandi eða á rafhlaupahjóli og stór hluti fyrrgreindra slysa átti sér stað seint á föstudögum eða laugardögum.
Í hópi óvarinna vegfarenda sem slösuðust alvarlega í umferðinni á síðastliðnu ári voru ungmenni áberandi og komu mörg ung börn, allt niður í átta ára gömul á neyðarmóttöku Landsspítalans vegna slysa á rafhlaupahjólum. Framleiðendur mæla almennt fyrir um 14 til 16 ára aldurstakmark til notkunar rafhlaupahjóla sinna en ung börn má sjá á rafhlaupahjólum ætluðum eldri notendum. Þá er með einfaldri breytingu hægt að aka aflmiklum rafhlaupahjólum á mun meiri hraða en þeim er ætlað að ná, svo að þau eiga til dæmis enga samleið með umferð gangandi vegfarenda.
Töluvert er af veikindum þessa dagana og minnum við fólk á að halda sig heima þegar það er lasið.
Heilsugæslan hefur nýlega hleypt af stokkunum auglýsingaherferðinni „Heima er pest“, tilgangur herferðarinnar er að vekja athygli á þekkingarvefnum Heilsuveru og auka heilsulæsi landsmanna sem og draga úr álagi á heilsugæslustöðvar.
Á Heilsuveru er hægt að endurnýja lyf, eiga samskipti við heilbrigðisstarfsfólk auk þess sem þar er hægt að afla sér upplýsinga um helstu umgangspestir og upplýsingar um hvort og hvenær rétt er að leita til heilsugæslu eða bráðamóttöku.
Þær Rut Hreinsdóttir fjármálastjóri og Edda Björk fóru á vinnustofu EASA í Köln dagana 10.-12 september. Á henni voru þátttakendur víðsvegar úr Evrópu og starfsmenn EASA (um 60 manns) og var m.a. fjallað um verkferla og fyrirkomulag samstarfsins.
Samgöngustofa gerði í byrjun árs samkomulag við EASA um vinnu við eftirlit á viðhaldsfyrirtækjum loftfara víðs vegar um heiminn. Verkefnið er unnið af lofthæfideild Samgöngustofu sem Ómar Þór Edvardsson stýrir. EASA leitaði til Samgöngustofu með aðkomu íslenskra sérfræðinga í byrjun árs en við það að Bretland fór úr Evrópusambandinu jókst umsýsla EASA til muna þar sem u.þ.b 500 ný fyrirtæki bættust við í umfang EASA.
Samið var um að Samgöngustofu myndi taka að sér að vinna 240 klukkustundir á árinu 2022 og hafa nú þegar verið farnar fjórar ferðir á vegum EASA hjá sérfræðingum lofthæfideildar. Verkefnið hefur farið vel af stað og er þetta mjög gott tækifæri fyrir starfsfólk Samgöngustofu að kynnast nýjum aðstæðum og sérfræðingum á erlendri grundu.
Á dögunum var haldinn fundur hjá EASA í Köln þar sem voru samankomnir starfsmenn eftirlitsstofnana víðs vegar að, að ræða fjármálahluta verkefnisins. Á fundinn mættu Rut og Edda frá Samgöngustofu og kynntu þær fyrir þátttakendum hvernig það er að vera nýliði á þessum vettvangi. Við getum verið stolt af aðkomu okkar að þessu alþjóðlega verkefni sem gerir störf okkar fjölbreyttari og skemmtilegri.
Það er hann Sveinn Ólafsson sem velur föstudagslagið að þessu sinni. Um val sitt skrifar Sveinn:
Ég hlusta á alls kyns tónlist en er langt frá því að vera alæta. Undanfarið hefur Radio 6 hjá BBC verið í sérstöku uppáhaldi, enda með kynna á borð við Iggy Pop, Huey Morgan og Lauren Laverne. Ég hlusta á það í BBC Sounds appinu (hér í app store). Þar er hægt að stilla á Radio 3 til að hlusta á klassíkina eða Radio 1 Relax til að róa sig. Allar stöðvarnar eru bara með tónlist, örfá fréttainnslög og engar auglýsingar.
Föstudagar eru öðruvísi. Þá er maður farinn að hlakka til helgarinnar og er líklega kominn hálfa leið eða lengra í huganum. Þá er tími til að hlusta á eitthvað einfalt, gamaldags, hallærislegt sem sendir mann hinn helminginn af leiðinni í helgarfrí. Föstudagslagið er af þeirri gerðinni. Það kom fyrst fram fyrir 70 árum, hét Pretend og var sungið af Nat King Cole. Tíu árum seinna var það farið að heyrast í mun hraðari rokkútsetningum, til dæmis með Gerry and The Pacemakers. Það er líklega fyrirmyndin að íslensku útgáfunni. Silkimjúk rödd Nat King Cole hafði vikið fyrir vaggi og veltu.
Margir í húsinu kannast við höfund íslenska textans, sem er Ómar Ragnarsson. Í hans útgáfu fær lagið heitið Því ekki að taka lífið létt. Það er enginn að látast neitt í þeim texta heldur að njóta þess sem lífið býður upp á. Lúdó og Stefán eru eldhressir, slá ekkert af rokkinu og skila þessu ákalli á rúmum 2 mínútum.
Ég skora á Gunnar Karl að velja næsta föstudagslag.
Hópeflið hefst kl. 15:00 í dag og ætlum við að hittast öll í afgreiðslunni til að byrja með. Starfsfólki hefur verið skipt upp í tvo hópa, annar hópurinn verður áfram í afgreiðslunni en hópur 2 fer upp á aðra hæð. Skiptingin er miðuð við svörun við fundarboðinu sem sent var út. Ef þið eruð ekki á listanum þá megið þið endilega senda á Ólöfu og hún bætur ykkur við listann.
Eins og áður kemur fram verður Umferðarþing haldið á morgun og er einmitt áherslan að þessu sinni á gangandi og hjólandi, bæði á reiðhjólum og hinum ýmsu smátækjum (þar á meðal rafhlaupahjólum) og samspil þeirra við aðra umferð.
Í dag, 22. september, er bíllausi dagurinn og af því tilefni er frítt í strætó á höfuðborgarsvæðinu. Rafskútleigur eru einnig með tilboð á bíllausa deginum hjá HOPP fellur startgjaldið niður og ZOLO eru fyrstu 20 mínúturnar ókeypis. Bíllausi dagurinn er hluti af af árlegri evrópskri samgönguviku. Dagurinn er kjörinn til að endurskoða ferðavenjur til og frá vinnu og skóla. Þau sem hvíla bílinn eru líklegri til að hreyfa sig meira og almenn hreyfing minnkar líkur á hjartasjúkdómum og sykursýki, styrkir ónæmiskerfið og fækkar veikindadögum.
Tveir starfsmenn Samgöngustofu tóku sig til og hjóluðu í vinnuna af þessu tilefni. Á myndbandinu hér að neðan sést annar þeirra kátur og glaður. Hver er maðurinn? Sá sem sendir fyrstur/fyrst póst á vefur@samgongustofa.is fær lítinn glaðning að launum:
Gunnar Geir var í viðtali í Morgunútvarpi Rásar tvö í morgun (mínúta 0:49:39) og var tilefnið þáttur Kveiks frá því gær þar sem fjallað var um sorglegt umferðarslys sem varð á brúnni við Núpsvötn árið 2018.
Í gær var svo viðtal við Einar Magnús í Morgunblaðinu um nýjasta forvarnarspjald sem gefið er út undir merkjum 12 hnúta og ætlað sjófarendum. Þar kemur m.a. fram að það má rekja um 43 skipsströnd við landið á tímabilinu 2000 til 2020 til þess að stjórnandi sofnaði.
Fyrir helgi var svo umfjöllun um undirskrift um aðlögunarsamning Íslands og Eurocontrol í Morgunblaðinu en samningurinn var undirritaður af Jóni Gunnari og Eamonn Brennan, forstjóra Eurocontrol. Samkvæmt skilmálum samningsins á Ísland sæti áheyrnarfulltrúa og getur tekið þátt í verkefnum og starfsemi Eurocontrol að sama marki og aðildarríki.
