Það er góður gangur í skráningu tillagna í Bendil, vel gert starfsfólk Samgöngustofu!
Hvetjum alla til að skrá inn hugmyndir og nýta tækifærið til að hafa áhrif á að gera vinnustaðinn okkar enn betri.
Bendum á að það er hægt að senda inn nafnlausar umbótatillögur, eins verður ekki gert grein fyrir efni tillögu þess vinningshafa sem verður dreginn.
Kveðja, umbótahópurinn
Það stefnir í að verða árleg hefð að hafa lítinn hrekkjavöku skiptimarkað fyrir búninga hér í Ármúla 2. Það er frábært að geta nýtt áfram góða búninga, lengja líftíma flíkanna og hlutanna okkar og svo er þetta líka ein af aðgerðunum í Grænu skrefunum 🙂
Fatasláin er nú komin upp fyrir framan Vörina, litla fundarherbergið í miðrými á 2rri hæð.
Kíkið endilega við, takið ykkur búning eða hengið búning á slána 🙂
Farsýslan minnir á Októberfest Samgöngustofu föstudaginn 20. október. Mæting á Samgöngustofa Bistro 1. hæð Ármúla 2, kl 16.00. Boðið verður upp á sausages, pretzels, bjór, léttvín, gosbjór og góðan félagsskap. Öllum frjálst að mæta í búning😘
Stefán Pálsson mætir til okkar með stórskemmtilega bjórkynningu og annan fróðleik.
Skráning stendur yfir hér og líkur kl 16.00 á morgun 18.okt: https://docs.google.com/forms/d/e/1FAIpQLSdeTHAjMl3AWhgN2jOkHkxa-3FrHfsOd0BHtluqzM8zpmDpzA/viewform kostar 1 þús. á mann.
Leben und Freude, Prost!
Kveðja, Farsýslan
Föstudaginn 20. október er bleiki dagurinn 2023.
Á bleika deginum er fólk hvatt til að vera bleik – fyrir okkur öll, bera bleiku slaufuna, klæðast bleiku og lýsa upp skammdegið upp í bleikum ljóma svo allar konur sem greinst hafa með krabbamein finni stuðning okkar og samstöðu.
Hjá Samgöngustofu er virk jafnréttisnefnd skipuð starfsfólki. Hlutverk nefndarinnar er að endurskoða árlega jafnréttisáætlun og fara yfir stöðu jafnréttismála innan Samgöngustofu.
Nefndin skipa í dag:
Dröfn Gunnarsdóttir
Guðbjörn Jensson
Kara Ásta Magnúsdóttir
Katrín Pálsdóttir – jafnréttisfulltrúi
Kolbeinn Arnarson
Markús Benediktsson
Rannveig Garðarsdóttir
– sameiginlegt netfang jafnréttisnefndar er: jafnrettisnefnd@samgongustofa.is
Upplýsingar um jafnréttisnefnd sem og gildandi jafnréttisáætlun Samgöngustofu eru aðgengileg á síðu hér á innri vefnum
Jafnréttisnefnd og jafnréttisáætlun – Samgöngustofa (samgongustofa.is)
Þessa vikuna verður gæðamolinn ekki gæðaskjal heldur kynning á virkni kerfisins fyrir þá notendur sem hafa ritleyfi. Þau okkar sem vinna við útgáfu skjala í CCQ ættu að þekkja samþykktarferlið sem fer af stað þegar gæðaskjöl eru sett í útgáfu. Samþykktarferlið er auðvitað af því góða og rýni kollega á sameiginleg skjöl hlýtur að teljast jákvæð. Samþykktarferlið getur þó orðið ögn þreytandi þegar smávægilegar breytingar eru gerðar á lýsigögnum gæðaskjals en ekkert breytist efnislega í gæðaskjalinu sjálfu.
Í þeim tilfellum sem einungis þarf að gera smávægilegar breytingar á lýsigögnum gæðaskjals er hægt að nýta sér valmöguleikann “endurútgefa skjal” en hann má finna undir aðgerðahnappinum:
Til þess að nýta sér þennan valkost, þarf fyrst að taka frá skjalið, breyta lýsigögnum og ýta svo á endurútgefa skjal. Í framhaldinu af því fær notandi að velja útgáfudag skjalsins ásamt því að ákveða hvort gæðaskjalið haldi gamla útgáfunúmerinu eða það hækki um einn.
Þess má geta að þessar upplýsingar eru teknar úr Notendaleiðbeiningum CCQ en þær eru í viðhengi við þessa frétt. Notendaleiðibeiningarnar eru gríðarlega öflugt vinnutól og einstaklega þægilegt að nýta sér ctrl+f til þess að finna upplýsingar í þeim. Þrátt fyrir þessar glæsilegu leiðbeiningar er ykkur öllum auðvitað hjartanlega velkomið að hafa samband við okkur í gæðateyminu ef þið lendið á vegg með CCQ.
Skráning umbóta í Bendil hafa farið vel af stað, og vel gert til ykkar sem hafa þegar sent inn tillögur! Við hvetjum alla starfsmenn til þátttöku í átakinu núna í október með skráningu tillagna að bættu verklagi eða öðrum umbótum sem mögulega einfalda og bæta vinnudaginn okkar! Við drögum svo vinningshafa úr skráðum tillögum að loknu átaki.
Sendið endilega fyrirspurnir eða vangaveltur á umbotahopur@samgongustofa.is
Á þriðjudaginn var boðið uppá kennslu á hjartastuðtækið sem staðsett er við innganginn Ármúlamegin. Við höfum nú sett upp síðu hér á innri vefnum með leiðbeiningum fyrir tækið góða. Leiðbeiningarsíðan góða er að finna undir Verkfærakistan – Hjartastuðtæki-leiðbeiningar.
Þar er m.a. að finna erlend kennslumyndbönd sem gott er að horfa á til þess að kynna sér hvernig tækið virkar. Á forsíðu innri vefsins er einnig komin flýtileið á leiðbeiningarsíðuna:
Þá er komið að því sem öll hafa beðið eftir í ofvæni, viðburðadagatal Farsýslunnar fyrir starfsárið 2023-2024 hefur litið dagsins ljós.
Athugið að dagatalið er birt með fyrirvara um ófyrirséðar breytingar.
Rýmingaráætlun ásamt brunateikningum er nú bæði uppfærð og aðgengileg í CCQ
VER-0081 | Rýmingaráætluna Ármúli 2 | QM (ccq.cloud)
Hvetjum öll til að lesa og kynna sér áætlunina enda mikilvægt öryggisatriði.
Ráðstefnan EU Safety 2023 fór fram fyrir helgi. Slysavarnafélagið Landsbjörg í samvinnu við Eurosafe og Heilbrigðisráðuneytið, stóðu fyrir ráðstefnunni sem haldin var á Hilton Reykjavík Nordica, dagana 5.-6. október. Nokkrir starfsmenn Samgöngustofu mættu og fræddust um fjölbreytt öryggis- og forvarnarmál. Gunnar Geir hélt erindi á ráðstefnunni um forvarnir í umferðinni sem miðast að ferðamönnum. Þar talaði hann meðal annars um verkefni Samgöngustofu, Nap and Go, sem hefur gengið vel og vakið mikla jákvæða athygli.
Í dag munum við senda velvöldum aðilum furðulegan eggjabakka. Sem alls ekki er hugsaður til átu!
Þó gjörningurinn sé hress og skemmtilegur er málefnið alvarlegt. Um er að ræða lið í herferð okkar gegn gáleysislegri notkun á rafskútum. Þó fararmátinn sé algjörlega frábær þá þarf því miður að minna fólk á mikilvægi þess að fara eftir lögum og reglum, í von um að hægt sé að koma í veg fyrir fleiri slys
Við vonum því að samfélagsmiðlarnir okkar fyllist af eggjum um helgina. Fólk er hvatt til þess að deila mynd/myndböndum af eggjunum á skemmtilegan og skapandi hátt. Allt er leyfilegt (nema að borða eggin. Mælum ekki með því!)
Föstudagslagið er að þessu sinni í boði Bjarklindar í öryggis- og fræðsludeild:
Takk fyrir síðast Samgöngustofa! Rosalega gátum við skemmt okkur vel saman í Köben. Nú er ekki annað hægt en að velja sigurlag Samgönguvision 2023 sem föstudagslagið þennan ágæta föstudag. Að þessu sinni verðum við þó að sætta okkur við flutning HLH flokksins en yljum okkur við minningar um flutning stjórnsýslusviðs.
Að lokum skora ég á nýjasta starfsmann Stjórnsýslusviðs, hana Guðrúnu Ástu Ólafsdóttir, að koma með næsta föstudagslag!
Af því að þið hafið verið svo dugleg í vikunni bjóðum við í fyrsta skiptið uppá aukaföstudagslag og það er hann Steingrímur Hauksson sem á orðið:
Í tilefni af því að ný stúdíóplata með Rolling Stones er væntanleg 20. október n.k. þá er það viðeigandi að birta lag sem verður á plötunni og búið að gera opinbert. Lagið sem er sungið af Mick Jagger söngvara Stones og Lady Gaga heitir Sweet Sounds Of Heaven. Platan mun bera nafnið Hackney Diamonds. Fleiri listamenn eins og Elton John, Paul McCartney, Stevie Wonder og Bill Wyman sem var í Stones frá upphafi 1962 til 1993 munu annast hljóðfæraleik í einhverjum lögum sem verða á plötunni. Þessi plata er búin að vera lengi í bígerð. Charlie Watts trommuleikari sveitarinnar sem lést 2021, trommaði t.d. í tveim lögum sem verða á plötunni. Seinasta stúdíóplata með frumsömdum lögum með Stones var gefin út fyrir 18 árum. Alls hafa verið gefnar úr frá 1962, 23 stúdíóplötur með hljómsveitinni, auk ýmissa safnplatna.
Nú er það svo að frá 1995 að ég hef sótt 11 tónleika með Stones. Ýmsir starfsmenn SGS eins og Jón heitinn Bernódusson, Helgi Jóhannesson, Kristinn Ingólfsson og Guðmundur K Thoroddsen hafa slegist í för með mér á ýmsa Stones tónleika. Auk þess hafa tveir fyrrum starfsmenn Siglingastofnunar þeir Sigurður Áss Grétarsson og Birgir T Arnar slegist með í för. Einnig má geta þess að Halldóra Ingibergsdóttir fór á tónleika með Stones í Hyde Park í London í fyrra. Eftir því sem aldurinn færist yfir, finnst mér Rolling Stones alltaf vera betri og betri. Ég er handviss um að þessir krumpukallar sem eru á níræðisaldri eða að nálgast þann aldur, slái algjörlega í gegn með nýju lögunum á Hackney Diamonds. Kenningin um að aldur sé afstæður á hér greinilega við.
Í gæðamola vikunnar vil ég benda á eitt stórglæsilegt plagg: Samgöngustefnu (STE-0011)!
Það er heldur betur viðeigandi í ljósi þess að stutt er síðan bíllausi dagurinn var. Þá fórum við sem erum með samgöngusamning svoleiðis skellihlægjandi í vinnuna og gáfum ökumönnum langt nef á leiðinni. Raunar er það svo að mörg okkar sem njótum samgöngusamningsins eigum oft erfitt með að festa svefn kvöldin fyrir vinnu vitandi að við fáum aukalega borgað fyrir það eitt að rölta í vinnuna.
Umræðan um virka ferðamáta hefur orðið fyrirferðameiri síðustu ár en ástæða þess er ágæti virku ferðamátanna. Ekki bara sparast olía og viðhaldskostnaður bifreiðarinnar heldur bætir það andlega og líkamlega heilsu að labba til vinnu. Ýmsar rannsóknir hafa sýnt að 10 mínútna göngutúr gerir heilmikið jákvætt fyrir virkni heilans (hægt að gúggla sig til um þetta, annars er heimildin: trust me bro) og því er mikið tilefni til þess að reyna að temja sér reglulega göngutúra. Göngutúrinn hefur sömuleiðis þær jákvæðu afleiðingar að maður mætir eldhress í vinnuna og því getur hann dregið úr kaffiþörf (sem ýmsum gæti þótt eftirsóknarvert).
Samgöngusamningurinn nær þó ekki bara til þeirra sem ganga í vinnuna en hann nær utan um alla virka ferðamáta. Þar má nefna tvo jafnfljóta, hjól (hvort sem þau eru knúin af rafmagni eða ekki), hlaupahjól, strætó o.s.frv. Í raunar allt sem er ekki einkabíll (fjölskyldubíll, afsakið Vigdís Hauksdóttir). Samgöngusamningurinn getur því verið góður kostur fyrir þau okkar sem hafa tök á því og vilja til þess að leggja bílnum og þiggja eylitla launahækkun (hversu góður díll?).
Ætlunin með þessum póst er fyrst og fremst að mæra kosti samgöngusamningins. Það er auðvitað þannig að mörg okkar hafa skyldum að gegna, þurfa t.d. að skutla litlum krílum í ýmsa skóla á morgnana, og hafa því ekki tök á því að nýta sér þetta stórglæsilega úrræði. Það er gott og blessað og engin ástæða til þess að fá samviskubit yfir bílanotkun. Þið hin hins vegar…. 😉
Í lokin langar mig að koma með tillögu að nýjum hugsanahætti. Það er auðvitað gríðarlegur fórnarkostnaður sem felst í því að keyra til og frá vinnu. Sá fórnarkostnaðurinn er fólginn í því að ná ekki að nýta sér virka ferðamáta á morgnana en kostir þess hafa verið raknir hér að ofan.
Í frétt á stjórnarráðsvefnum kemur fram að breytingar eru fyrirhugaðar í fjármögnun vegasamgangna og taka eigi upp nýtt kerfi þar sem greitt er almennt kílómetragjald í stað sértækra gjalda á bensín og olíu sem nú eru í gildi. Í fréttinni segir m.a.:
„Árangur í orkuskiptum kallar á að fjármögnun vegasamgangna verði óháð jarðefnaeldsneyti. Stefnt er að innleiðingu nýs, einfaldara og sanngjarnara kerfis á næstu árum, þar sem greitt er almennt kílómetragjald í stað sértækra gjalda á bensín og olíu sem nú eru í gildi. Þannig verður kerfið sjálfbærara og styður við áframhaldandi uppbyggingu og viðhald vegakerfisins samhliða orkuskiptum til framtíðar.
Aðlögun fjármögnunar vegasamgangna að orkuskiptum fer fram í tveimur áföngum:
Með innleiðingu á nýju kerfi í tveimur skrefum nær það einungis til hluta bílaflotans á fyrra ári. Þannig verður hægt að draga lærdóma af innleiðingunni og styrkja fyrirkomulagið enn frekar til framtíðar.
Um þetta er fjallað í áformum um lagasetningu sem birt hafa verið í samráðsgátt.“
Sjá nánar í frétt á vef stjórnarráðsins
Á heimasíðu Virk er mikið af góðum fróðleik og ráðum. Vel-virk er verkefni þar sem markmiðið er að stuðla að jafnvægi í lífi og starfi. Virkni dagatal er verkfæri sem gott er að styðjast við í þessari vegferð. Virkni dagatal gefur jákvæðar hugmyndir fyrir hvern dag mánaðarins. Tillögurnar eru í anda þess sem rannsóknir hafa sýnt að geti hjálpað fólki að lifa hamingjuríkara lífi, svo sem að gefa af sér, tengjast öðrum, finna tilgang, leika sér og njóta augnabliksins. Tillögurnar eru bæði skemmtilegar og auðveldar í framkvæmd.
Virknidagatalið er aðgengilegt á fleiri tungumálum og einnig er hægt að skoða eldri dagatöl.
Hér að neðan er virkni dagatal fyrir október mánuð.
Eins og frægt er orðið fórum við í fræðslu- og árshátíðarferð til Kaupmannahafnar um helgina. Þó að orðatiltækið “what happens in Copenhagen stays in Copenhagen” sé í hávegum haft er ástæða til þess að deila með öllum póstkortunum sem birt voru með hverju atriðið í Samgönguvision.
Árshátíðin var frábær og virkilega vel að öllu staðið hjá Farsýslunni, ferðanefndinni, mannauðsdeildinni og öllum þeim sem komu að undirbúningnum. 100 rokkstig fyrir þau! Svo voru veislustjórarnir þau Bjarklind og Lalli til mikillar fyrirmyndar og gerðu þetta uppá 10.
Svona til þess að gefa smá innsýn í stemninguna þá er hér ein mynd af fögrum og skemmtilegum hópi á árshátíðarkvöldinu sjálfu:
Mikil vinna var lögð í atriðin og ber að hrósa þeim sem tóku þátt í þeim og undirbjuggu. Það var Stjórnsýslusviðið sem bar sigur úr býtum með þeim Kolbeini og Erlu í farararbroddi. Hér að neðan má nálgast póstkortin sem sýnd voru fyrir hvert atriði, margir komu að gerð þeirra t.d. sá Kolbeinn um að klippa til póstkort Stjórnsýslusviðs og Einar Magnús vann að lokafrágangi og hljóðsetningu. Gísli Marteinn var að sjálfsögðu kynnir keppninnar:
Áskorunarkeðjan er hvíld að þessu sinni og þess í stað setjum við tvö lög á fóninn tengd Danmörku. Hvað er danskara en Kim Larsen? Ekkert. Því skellum við laginu De smukke Unge Mennesker undir nálina, live 1988.
Svo er það ógleymanlegt lag úr kvikmyndinni Með allt á hreinu, Við erum búnir að meika það, þar sem drengirnir ætluðu að spila í Tívolí í Köben en enduðu í Osló. Nú er spurning hvort árshátíð Samgöngustofu endi í Osló í stað Köben…
Bjarklind veislustjóri velur svo lagið fyrir næstu viku og ákorunarkeðjan heldur áfram.
Í júlí sögðum við frá gerð kynningarmyndar AWS Institute um stafrænt ökunám á Íslandi. Okkar frábæru Sigurjóna og Lárus voru þar meðal viðmælenda og leystu viðtölin með miklum sóma. Nú er myndin komin á vefinn svo allur heimurinn getur séð. Vel gert Sigurjóna og Lárus!