Category: Uncategorized

Samgöngustofa hefur gefið út frammistöðuáætlun Íslands 2025-2029 í flugleiðsöguþjónustu. Áætlunin byggir á alþjóðlegum kröfum og er liður í innleiðingu markmiða um örugga, hagkvæma og umhverfisvæna flugleiðsögu í sam-evrópska loftrýminu (Single European Sky).

Áhersla er lögð á öryggi, umhverfi, afköst og kostnaðarhagkvæmni með það að markmiði að stuðla að sjálfbærni, betri nýtingu loftrýmis og minni losun gróðurhúsalofttegunda.

Hér má sjá áætlunina og nánari upplýsingar sem varða hana.

Dagana 18.–21. ágúst voru fulltrúar frá U.S. Coast Guard (bandarísku strandgæslunni) í heimsókn á Íslandi til að kynna sér framkvæmd siglingaverndar hér á landi.

Með í för voru fulltrúar frá bandaríska sendiráðinu á Íslandi, sem jafnframt eru tengiliðir sendiráðsins við Samgöngustofu í siglingaverndarmálum. Heimsóknin var hluti af alþjóðlegu samstarfsverkefni U.S. Coast Guard, International Port Security Programme, sem miðar að því að efla og samræma eftirlit með siglingavernd á heimsvísu.

Stefán Alfreðsson, fagstjóri í siglingavernd hjá Samgöngustofu, skipulagði heimsóknina í samstarfi við U.S. Coast Guard og bandaríska sendiráðið og var í forsvari fyrir Samgöngustofu.

Í heimsókninni var m.a. farið til Faxaflóahafna í Reykjavík, Akureyrarhafnar og Eimskips. Þá var haldinn kynningarfundur hjá Samgöngustofu þar sem farið var yfir hlutverk stofnunarinnar í siglingaverndarmálum og almenna starfsemi hennar kynnt.

Innviðaþing á vegum innviðaráðuneytisins fer fram næstkomandi fimmtudag á Reykjavík Hótel Nordica. Yfirskrift þingsins er Sterkir innviðir – sterkt samfélag. Sjónum verður beint að uppbyggingu og öryggi innviða í samgöngum og fjarskiptum, þar á meðal fjárfestingum og samfélagslegum ávinningi.

Auk þriggja ráðherra munu fjölmargir flytja erindi á þinginu og taka þátt í pallborði. Þeirra á meðal er okkar eigin Gunnar Geir Gunnarsson, deildarstjóri öryggis- og fræðsludeildar.

Nánari upplýsingar og skráningu á innviðaþingið má finna hér á vef ráðuneytisins.

Stjórn Farsýslunnar boðar til aðalfundar föstudaginn 12. september kl 16:00 í matsalnum í Ármúla 2. Að fundi loknum verður boðið uppá mat og drykk og ætlum við síðan að fjölmenna á Snooker & pool stofuna í Lágmúla og skella okkur í pílu. Skráning fer fram hér.

Tillögur að reglubreytingum þurfa að berast stjórn Farsýslunnar í síðasta lagi fyrir 12 á hádegi föstudaginn 5. september. Reglurnar eru aðgengilegar á innri vef á meðfylgjandi hlekk:

https://samgongustofa.viska.dev/starfsmannafelagid-farsyslan/ 

Dagskrá fundarins:

1. Skýrsla félagsstjórnar um starf s.l. árs.
2. Endurskoðaðir reikningar félagsins skulu lesnir og bornir upp til samþykktar.
3. Reglubreytingar, ef fram koma.
4. Ákvörðun um félagsgjald.
5. Kosning stjórnar og endurskoðenda samkvæmt 4. gr.
6. Önnur mál

Laus sæti eru í næstu stjórn Farsýslunnar og hvetjum við öll sem hafa áhuga á því að bjóða sig fram að hafa samband við eitthvert okkar í núverandi stjórn, sem eru:

Rannveig Garðarsdóttir – formaður

Klara Kristjánsdóttir – gjaldkeri

Ludvig Árni Guðmundsson – ritari

Guðbjörn Jensson

Hákon Varmar Önnuson

Markús Benediktsson

Vivek Sharma

Í síðustu viku voru hengdar upp nýjar ljósmyndir í anddyrinu hér í Ármúla. Myndirnar sýna fólk að störfum í öllum helstu samgöngugreinum og eru afrakstur ljósmyndaverkefnis okkar. Fyrirsæturnar eru úr hópi starfsfólks og ljósmyndarinn einnig, Einar Magnús Magnússon. Með þessu styrkjum við ásýnd Samgöngustofu og gerum starfið okkar enn sýnilegra.

Ætlunin er að halda ljósmyndaverkefninu áfram og stækka smátt og smátt safn okkar af vönduðum kynningarmyndum. Nú í haust munu til dæmis bætast við glæsilegar ljósmyndir sem Einar Magnús tók nýlega um borð í togara, af störfum sjómanna.

Í morgun var rætt við Þórhildi samskiptastjóra í útvarpsþættinum Brennslan á FM957 um leigubílamálin sem hafa verið talsvert í umræðunni síðasta sólarhringinn. Þar komu meðal annars fram upplýsingar um leyfismálin og að fólk þarf að uppfylla skilyrði til að fá og viðhalda leyfi. Viðtalið var jákvætt tækifæri til að upplýsa um okkar hlutverk og segja frá þeirri vinnu sem við tökum þátt í um að bæta gildandi regluverk.

Hægt er að hlusta á viðtalið hérna og hefst þegar ca 1 klst og 15 mínútur eru liðnar af þættinum

♻️ Markaðstorg Samgöngustofu – gefum hlutunum nýtt líf 🌱

Umhverfishópurinn hefur sett á laggirnar markaðstorg á Teams – stað þar sem við getum látið hluti ganga áfram, í stað þess að láta þá safna ryki eða fara í ruslið.
Markmiðið er að draga úr sóun, efla endurnýtingu og styðja við sjálfbærni.

Það er jafn velkomið að gefa hluti og að selja – aðalmálið er að þeir fái nýtt líf hjá einhverjum öðrum.

Hvað má auglýsa?

Allt sem er í lagi en þú notar ekki lengur – hvort sem það kemur úr skrifstofunni, geymslunni eða heimilinu.
Hugmyndir að flokkum:

• Skrifstofuvörur – möppur, skápar, skjástandar
• Tæki og búnaður – prentarar, smá raftæki
• Heimilis- og frístundagripir – barnahjól, sleðar, rammar, bækur, skrautmunir, íþróttadót

Við sköpum saman umhverfisvænna umhverfi og sýnum að sjálfbærni byrjar oft í litlu hlutunum.

Þú finnur markaðstorgið hér: Markaðstorg | SGS-Allir | Microsoft Teams

Samprjón fyrir vökudeild Landspítalans – „Búbblur og prjón“ leitar fleiri þátttakenda!

Hópurinn „Búbblur og prjón“ stendur nú fyrir fallegu verkefni þar sem markmiðið er að prjóna húfur fyrir litlu hetjurnar á vökudeild Landspítalans. Þetta er kærleiksverkefni sem sameinar handavinnu, samveru og umhyggju.

Við ætlum að taka mið af því að prjóna fram að miðjum desember, og síðan afhenda glaðninginn fyrir jól. Allir sem hafa áhuga – hvort sem þú ert vanur prjónari eða nýbyrjaður – eru hjartanlega velkomnir í hópinn.

Ætlunin er einnig að hittast reglulega og prjóna saman, fyrir þá sem vilja njóta samverunnar í persónu.

Upplýsingasíðan um fyrirbura mælir með því að nota þessar uppskriftir:

• Riffluð fyrirburahúfa: Uppskrift hér
• Alpakka-kasmír fyrirburahúfa: Uppskrift hér

Þau ykkar sem hafið áhuga á að vera með endilega óskið eftir aðgangi í facebook hópinn „Búbblur og prjón“ og takið þátt í samræðum þar.

Samgöngustofa styður mannréttindi, fjölbreytileika og jafnrétti. Við erum hluti af samfélagi þar sem öll eiga að geta verið þau sjálf, óháð kynhneigð og kynvitund. Hinsegin dagar standa fram á sunnudag og því höfum við með stolti flaggað regnbogafánum með merki stofnunarinnar.

Auðnast framkvæmdi áhættumat fyrir Samgöngustofu sl. vetur. Niðurstöður voru kynntar starfsfólki í júní sl. Eitt af verkefnunum sem kom fram var að uppfæra þurfti stefnu og viðbragðsáætlun Samgöngustofu varðandi EKKO (einelti, kynferðisleg áreitni, kynbundin áreitni og ofbeldi). Jafnframt var bent á að þörf væri á að endurskoða og tryggja að starfsfólk hafi greiðan aðgang að upplýsingum um EKKO á innri vef stofnunarinnar.

Stefna og viðbragðsáætlun vegna eineltis, kynferðislegrar áreitni, kynbundinnar áreitni og ofbeldi (EKKO) hefur nú verið uppfært í CCQ og er starfsfólk hvatt til að lesa stefnuna. Stefnuna er að finna hér.

Í vinnslu er að uppfæra innri vef stofnunarinnar og gera hann aðgengilegri fyrir starfsfólk.

Opnað hefur verið fyrir skráningu á golfmót sumarsins á vegum Golfsýslunnar þann 29. ágúst í Leirdal (GKG).

Skráningarfrestur er til og með 18. ágúst hér: https://forms.office.com/e/WkWz4PAALi

Ef þið hafið einhverjar spurningar eða vantar frekari upplýsingar þá aðstoðar Rut ykkur.

Samgöngustofa var með ,,halda á lofti” keppni í matsalnum frá fyrsta leik Íslands til dagsins í dag. Uppi stóðu 2 sigurvegarar, Erla Vinsý og Tómas Bent.
Fengu þau í verðlaun ,,Fyrir Ísland” fótbolta. Óskum þeim innilega til hamingju með árangurinn 🎉

Tökurnar sem farið var í á Keflavíkurflugvelli eru hluti af ljósmyndarverkefni Samgöngustofu. Markmið verkefnisins er að byggja upp ljósmyndabanka með myndum sem tengjast starfsemi stofnunarinnar. Starfsfólk Samgöngustofu getur nýtt þessar myndir í kynningarstarfi, á samfélagsmiðlum og annars staðar þar sem þörf er á faglegum ljósmyndum af starfseminni. Við þökkum starfsfólki sem tók þátt í þessu verkefni enn og aftur fyrir þátttökuna, virkilega skemmtileg stemming myndaðist í kringum það. Myndbönd voru tekin af stemmingunni á bakvið tjöldin í tökunum og fyrsta myndbandið er komið inn á samfélagsmiðlana okkar.

Hér má sjá fyrsta myndband af nokkrum sem sýnir frá tökudegi á Keflavíkurflugvelli.

Nýjustu tölur sýna að uppfletting í ökutækjaskrá Samgöngustofu var næstvinsælasta þjónusta Ísland.is í júní, með 45.173 heimsóknir. Aðeins þjónusta Tryggingastofnunar fékk fleiri heimsóknir, eða tæplega 56 þúsund.

Í maí fór metfjöldi umsókna í gegnum umsóknakerfi Ísland.is. Þá voru tilkynningar um eigendaskipti ökutækja alls 7.865. Var fjöldi þeirra í öðru sæti á eftir umsóknum um evrópska sjúkratryggingakortið.

Á vef Stafræns Íslands má sjá reiknivél sem notuð er í tilraun til að meta ávinning stafrænna ferla. Hann er margvíslegur, bæði fjárhagslegur og samfélagslegur. Hægt er að setja upp tilbúin dæmi og fá áætlun um hversu mikið stafræna vegferðin sparar í tíma, peningum og umhverfisáhrifum.

Nýlega skilaði starfshópur tillögum að fyrstu heildarstefnu stjórnvalda um virka ferðamáta og smáfarartæki, ásamt ítarlegri aðgerðaáætlun. Þar er meðal annars horft til gangandi, hjólandi og notenda smáfarartækja, með það að markmiði að bæta öryggi, aðgengi og stuðla að meiri skilningi milli vegfarenda. Starfshópinn skipaði fjölbreyttur hópur sérfræðinga, þar á meðal Gunnar Geir Gunnarsson hjá Samgöngustofu.

Eyjólfur Ármannsson innviðaráðherra tók við skýrslunni og sagði tillögurnar verða hryggjarstykkið í nýrri stefnu sem kynnt verður formlega í haust samhliða samgönguáætlun til næstu fimmtán ára.

Í skýrslu starfshópsins er sett fram sú framtíðarsýn að Ísland sé samfélag sem styður fjölbreytta ferðamáta. Öruggir innviðir fyrir gangandi, hjólandi og smáfarartæki stuðla að raunhæfu vali á milli fjölbreyttra samgöngukosta. Umhverfi virkra ferðamáta er aðlaðandi og aðgengilegt, allt árið um kring.

Meginmarkmið sem varða leiðina að þessari framtíðarsýn verði öryggi, aðgengi og skilningur.

Fimmtán aðgerðir eru lagðar til sem miða m.a. að því að bæta innviði, efla vetrarþjónustu, samræma skipulag og styðja við fræðslu og upplýsingagjöf. Lögð er áhersla á samstarf ríkis og sveitarfélaga og skýra ábyrgðarskiptingu.

Sjá nánar í frétt á vef innviðaráðuneytisins.

Nú hefur verið gefin út uppfærð gæðastefna Samgöngustofu sem nær til alls starfsfólks. Hún endurspeglar framtíðarsýn okkar um að tryggja faglega starfsemi, skýra ábyrgð og traust samskipti.

Stefnan leggur áherslu á að skapa vinnuumhverfi þar sem gæði eru sjálfsagður hluti af daglegu starfi, starfsfólk ber sameiginlega ábyrgð og veitir samfélaginu góða og skilvirka þjónustu. Hún byggir áfram á viðurkenndum stöðlum og lagalegum kröfum. Með henni er lagður grunnur að skipulegri eftirfylgni, rýni og umbótum til að bæta árangur og auka ánægju.

Sjá í stuttu máli á vefnum okkar.

Sjá gæðastefnuna í heilu lagi í CCQ.

Auðnast heldur úti hlaðvarpi þar sem er farið um víðan völl í málefnum sem tengjast félagslegri, andlegri og líkamlegri heilsu.

Um hlaðvarpið:
Félagsleg, andleg og líkamleg heilsa, velsæld og vinnustaðir, heilbrigðisvísindi, meðferð og ráðgjöf – ekkert er Auðnast óviðkomandi í þessum málaflokkum. Í hverjum þætti fara Ragnhildur og Hrefna yfir viðfangsefni sem tengist þeirra daglegu störfum í Auðnast. Þær miðla út frá reynslu sinni og þekkingu en einnig fara þær yfir hvað vísindin hafa til málanna að leggja.
Í hlaðvarpsþáttunum taka þær Hrefna og Ragnhildur einnig á móti góðum gestum. Fagfólk sem sest í stólinn hjá þeim mun ræða um fjölbreytt málefni líðandi stundar, út frá fræðum og reynslu.  

Hlaðvarpið má finna á helstu hlaðvarpsveitum t.d. Spotify og Apple Podcast

Gleðilega hlustun! 🎧🌞

Það hefur verið mikið líf og fjör í ráðningum undanfarnar vikur.

Fyrr í mánuðinum gengum við frá ráðningu á sérfræðing í flugöryggi. Elísabet Eggertsdóttir var ráðin í stöðuna.
Elísabet hefur starfað undanfarin ár sem kennari við Menntaskólann við Sund. Þar áður starfaði hún sem flugmaður hjá Icelandair. Hún hóf störf fyrr í vikunni og bjóðum við hana velkomna til okkar.

Í síðustu viku var gengið frá ráðningu fulltrúa í NorType og var Lína María Ingólfsdóttir ráðin.
Lína María hefur starfað sem fulltrúi í þjónustudeild síðan s.l. haust. Hún mun hefja störf hjá NorType með haustinu.

Nú er hins vegar tækifæri til að sækja um starf sérfræðings í skipatæknideild en umsóknarfrestur er til 7. júlí n.k. Hægt er að kynna sér starfið hér: https://island.is/starfatorg/x-42648

Þá erum við í ráðningarferli á starfi sérfræðings í gagnavinnslu og greiningu og starfi sérfræðings í deild tæknimála og innviða.