Mikil samstaða var meðal aðildarríkja IMO um málið enda grafalvarleg staða fyrir farmenn. Ísland studdi skjöl sem lögð voru fram sem fela m.a. í sér aðgerðir til aukins öryggis og verndar farmönnum, alþjóðlegum sjóflutningum og umhverfi sjávar í Svartahafi. Ráðið fordæmdi ofbeldisaðgerðir Rússa gegn sjálfstæðu og fullvalda ríki innan Sameinuðu þjóðanna og að látið yrði af þessum árásum á Úkraínu.
Gunnar Geir mætti í Sjóvá Spjallið og ræddi um umferðaröryggi og forvarnir við Hrefnu Sigurjónsdóttur. Umferðin er samvinnuverkefni sem krefst þess að allir leggi sitt af mörkum til að hún gangi að óskum. Umferðaröryggi krefst stöðugrar athygli og endurmats og er mikið hagsmunamál fyrir samfélagið.
Undanfarið hefur verið unnið hörðum höndum að því markmiði að gera umgjörð fyrir almennt ökunám (B-réttindi) stafræna, allt frá upphafi og fram að verklegu ökuprófi, fyrst og fremst með hagsmuni ökunema fyrir augum. Stafrænt ferli ökunáms mun jafnframt efla þjónustu og létta lífið fyrir aðra sem að því koma, eins og ökukennara, ökuskóla og aðstandendur ökunema.
Þar sem verkefnið er afar umfangsmikið er því skipt í nokkra áfanga. Með hverjum áfanga færist ferlið stöðugt nær því markmiði að verða að fullu stafrænt frá upphafi til enda.
Í fyrsta áfanganum er áhersla lögð á einföldun og bætta þjónustu við ökunema við afgreiðslu umsókna og útgáfu stafræns bráðabirgðaökuskírteins. Þá munu ökunemar geta hafið ökunám með rafrænni umsókn í gegnum Ísland.is í stað umsókna á pappír. Því til viðbótar verða námslok ökunema staðfest á stafrænan hátt sem tryggir að ökunemar geta nálgast stafrænt bráðabirgðakökuskírteini um leið og þeir hafa staðist verklegt ökupróf og náð 17 ára aldri. Áætlað er að fyrsta áfanga ljúki á vormánuðum.
Annar áfangi er beint framhald af vinnu við fyrsta áfanga. Að öðrum áfanga loknum verður stafræn ökunámsbók orðin að miðpunkti ökunámsferilsins. Þar verður námsframvinda ökunema skráð og munu ökukennarar, ökuskólar, ökugerði, próftökumiðstöðvar og aðrir hagsmunaðilar geta skráð upplýsingar jafnóðum í lausnina á rafrænan hátt. Gert er ráð fyrir að þessi áfangi náist í sumarlok.
Þriðji og síðasti áfanginn felst svo í að færa bóklega próftöku yfir á rafrænt form ásamt allri umsýslu í kringum ökupróf. Áætlanir gera ráð fyrir að þessi áfangi náist fyrir áramót.
Stafræn umgjörð um ökunám er viðamikið umbótaverkefni sem felur í sér tækifæri til að stórefla opinbera þjónustu. Er það unnið í samstarfi Samgöngustofu við Stafrænt Ísland, Ríkislögreglustjóra og sýslumannsembættunum, en að auki er fyrirhugað samráð við ýmsa hagaðila.
Nýtt ábendingakerfi er partur af CCQ gæðakerfinu og kemur til með að þjóna okkur sem innra ábendingakerfi. Undir innri ábendingar flokkast t.d. almennar ábendingar sem geta varðað ýmislegt svo sem umbætur á starfsumhverfi okkar, tilkynningar um frábrigði á verklagi og ábendingar vegna jafnlaunavottunar. Jafnlaunaábendingar, ábendingar um vinnuöryggi og ámælisverða háttsemi eru aðgangsstýrðar þannig að einungis mannauðsstjóri hefur aðgang að innsendum ábendingum. Valkvætt er að gefa upp persónurekjanlegar upplýsingar. Aðrar ábendingar berast gæðastjóra sem útdeilir eftir eðli máls. Tilkynningar um frábrigði berast gæðastjóra og er hugsað til að bæta starf okkar með stöðugum umbótum.
Samhliða innleiðingu vantar okkur hins vegar gott nafn fyrir ábendingakerfið og hefur því verið ákveðið að setja af stað nafnasamkeppni. Markmið keppninnar er að finna gott nafn fyrir ábendingakerfið og hvetja starfsmenn til að kynnast kerfinu með því að senda inn tillögu að nafni í gegnum ábendingakerfið.
Nafnasamkeppnin hefst samhliða opnun á nýjum innri vef og lýkur 21. mars. Dómnefnd mun velja fimm álitlegustu tillögurnar sem starfsmönnum mun síðan gefast kostur á að kjósa um á innri vef. Veitt verða verðlaun fyrir það nafn sem hlýtur fyrsta sæti og hlýtur vinningshafi gjafabréf að fjárhæð 20.000 kr. á Kol. Komi til þess að fleiri en einn eigi sömu tillögu sem hlýtur fyrsta sæta mun dómnefnd draga þann aðila sem hlýtur gjafabréfið en færa hinum sem áttu sömu tillögu annan glaðning.
Í dómnefnd sitja fulltrúar allra sviða: Jón Gunnar Jónsson Sigrún Henríetta Kristjánsdóttir Leifur Gústafsson Rakel Björk Benediktsdóttir Rannveig Garðarsdóttir
Tillaga að nafni er sett í dálkinn “efni”. Athugið að ekki er þörf á að setja inn frekari upplýsingar í dálkinn þar fyrir neðan, ekki nema tillaga ykkar kalli á frekari skýringar.
Vikuna 14. til 25. mars stendur Flugöryggisstofnun Evrópusambandsins, EASA, fyrir öryggisátaki í almannaflugi undir yfirskriftinni „Verum tilbúin“ (Be Ready – Fly Safe Campaign). Þetta er gert í samstarfi við yfirvöld og hagaðila um alla Evrópu.
Með hækkandi sól og betra veðri nálgumst við óðum flugsumarið og er herferðinni ætlað að vekja athygli á mikilvægi viðhalds, undirbúnings, þjálfunar og fræðslu og draga þannig úr óhöppum og slysum í almannaflugi.
Sýnd verður röð erinda í beinu streymi á Youtube dagana 14.-25. mars nk.
Viðfangsefnin eru á margan hátt í takt við „The Dirty Dozen“ veggspjöldin/dagatalið þar sem farið er yfir tólf algengustu mannlegu þættina sem leitt geta til slysa eða atvika í flugtengdri starfsemi og annað leiðbeiningarefni í almannaflugi sem er á vef Samgöngustofu og fjallar um öryggi í almannaflugi, flugmennsku – sjálfsmat, sjónflugssamning, fyrirflugsskoðanir og fleira.
Dagskráin er á vef EASA þar sem hægt er að skrá þátttöku, fá upplýsingar, áminningu fyrir erindi og taka þátt með beinum hætti.
Nú er komið út spjald nr. 3 í 12 hnútum en yfirskrift þess er „Skortur á fræðslu og þjálfun” Það er mikilvægt að skipverjar kunna að takast á við hættur og óvæntar uppákomur því skortur á því getur leitt til rangra viðbragða sem leitt geta til alvarlegra slysa. Við þurfum öll að vera ætíð undirbúin fyrir það óvænta og í því sambandi skiptir fræðsla mestu máli.
12 hnútar eru unnið með helstu sérfræðingum í öryggismálum sjómanna, sem eru skólastjóri, kennarar og leiðbeinendur Slysavarnaskóla sjómanna.
Eins og kom fram í kynningunni í morgunkaffinu þá fer nýr innri vefur í loftið á mánudaginn. Fram að því getið þið skoðað nýja vefinn á eftirfarandi slóð:
Við viljum fá sem flestar ábendingar um hvað betur má fara á vefnum og hugmyndir um nýtt efni sem ykkur finnst vanta á vefinn eru vel þegnar. Slíkt má gjarnan senda á vefur@samgongustofa.is. Einnig megið þið gjarnan senda okkur upplýsingar um það sem er að gerast í ykkar deildum og á erindi í Hvað er planið, slíkt má senda á samskipti@samgongustofa.is eða nota eyðublaðið sem þið getið nálgast á ábendinarhnappnum á nýja vefnum.
Innri vefurinn er samvinnuverkefni okkar allra og það er undir okkur komið hvort hann verði gagnlegur og líflegur vettvangur innra starfs.
Hún Nína Dís í Nortype tók áskoruninni um að velja föstudagslagið þessa vikuna og um val sitt segir hún:
Ég verð að viðurkenna að skemmtun sé ekki ofarlega í huga akkúrat núna þar sem mest umtalaða veira síðustu ára náði í skottið á mér í vikunni og ligg ég því upp í sófa í mikilli sjálfsvorkunn. Búin að horfa á allt sem allar efnisveitur heimilisins bjóða upp á og þá var bara eins gott að skrifa nokkrar línur.
Föstudagar eru mjög heilagir hjá fjölskyldunni minni af því það eru pizzudagar. Þá eldar maðurinn minn dýrindis pizzu fyrir fjölskylduna og við fögnum því að nú sé komið helgarfrí og tölum saman um líðandi viku. Pizzan var einmitt ástæðan fyrir því að ég og maðurinn minn kynntumst. Þegar við vorum unglingar unnum við saman á pizza 67 á Ísafirði og ástin kviknaði í eldhúsinu. Þann 22 febrúar sl. ákváðum við að hoppa í „drop in brúðkaup“ í Grafarvogkirkju og núna erum við hjón eftir 20 ára samband.
Þá er vel við hæfi að velja lagið okkar sem við dönsuðum eins og kjánar við í „gamla daga“. No limit með 2 unlimited.
Ég skora á Sigríði Guðrúnu með næsta lag en maðurinn hennar Addi tók einmitt þessa mynd að ofan 🙂
Árlegur samráðsfundur SGS, Isavia og LHG um stjórnun og sveigjanlega notkun loftrýmis var haldinn í dag, 9. mars 2022. Á dagskrá var að ræða og meta reynslu Isavia ANS, Landhelgisgæslu Íslands og Samgöngustofu af gildandi fyrirkomulagi um stjórnun og sveigjanlega notkun loftrýmis. Í orðunum „sveigjanleg notkun loftrýmis“ felst að stjórna skal loftrýminu þannig að komið sé til móts við þarfir bæði almenningsflugs (borgaralegs flugs) sem og herflugs en Landhelgisgæslan sinnir því verkefni að vera tengiliður við erlenda heri sem koma til Íslands til að stunda ýmist loftrýmisgæslu fyrir hönd NATO eða heræfingar.
Á fundinum var einnig lagt mat á hvort endurskoða þurfi gildandi starfsaðferðir eða skipulag loftrýmisins yfir Íslandi í því skyni að viðhalda skilvirkri og sveigjanlegri notkun loftrýmis. Á fundinum kom m.a. fram að með breytingum á flugvélaflota flugrekenda (borgaralegs flugs), með auknum fjölda langdregnari loftfara sem einnig fljúga hærra en eldri tegundir skapast möguleikar á að þjónusta betur herflug án þess að það komi niður á borgaralegu flugi.
Á fundinum kom einnig fram að flugumferð er óðum að komast í það horf sem hún var í árið 2019, fyrir tíma COVID.
Sigurður Ingi Jóhannsson, innviðaráðherra, mælti á Alþingi í dag fyrir frumvarpi til nýrra heildarlaga um leigubifreiðaakstur. Markmiðið er að færa lög og reglur um leigubifreiðar til nútímalegra horfs og tryggja gott aðgengi að hagkvæmri, skilvirkri og öruggri leigubifreiðaþjónustu. Þá er nýjum lögum ætlað að tryggja að íslenska ríkið standi við skuldbindingar sínar samkvæmt samningnum um evrópska efnahagssvæðið.
Frumvarpið, sem nú er lagt fram í þriðja sinn, byggir á sama grunni og áður og með minniháttar breytingum á einstökum ákvæðum.
„Verði frumvarpið að lögum munu þau auka atvinnutækifæri fjölbreyttra hópa. Afnám reglna um lágmarksnýtingu leyfis er til þess fallið að veita kynjum jafnara aðgengi í stéttina. Karlar eru mun fjölmennari en konur í stéttinni í dag en almennt eru konur taldar líklegri til að starfa í hlutastörfum en karlar,“ sagði Sigurður Ingi Jóhannsson, innviðaráðherra á Alþingi í dag.
Það er ekki sérstaklega fjallað um farveitur í frumvarpinu, en vikið að þeim í greinargerð. Frumvarpið gerir engan greinarmun á farveitum og hefðbundnum leigubifreiðastöðvum. Því myndu farveitur þurfa að uppfylla sömu skilyrði og hefðbundnar leigubifreiðastöðvar til að fá útgefið leyfi. Þannig er gætt að sjónarmiðum um jöfn samkeppnisskilyrði og gert er ráð fyrir því að kjósi bílstjórar að starfa fyrir farveitur, sem nýta snjalltækni við milligöngu um þjónustu, þurfi þeir að uppfylla öll sömu skilyrði og þeir sem hyggjast starfa sem leigubifreiðastjórar í hefðbundnari skilningi.
„Frumvarpið veitir einstaklingum tækifæri að fá leyfi til aka eða reka leigubifreið og fyrirtækjum tækifæri til að reka leigubifreiðastöð að uppfylltum ströngum skilyrðum sem bílstjórum og leigubifreiðastöðvum er gert að fullnægja,“ segir ráðherra.
Helstu breytingar
Helstu breytingar með heildarendurskoðun laga um leigubifreiðaþjónustu eru: Fjöldatakmarkanir verða afnumdar en skýr skilyrði sett um leyfisveitingar. Fjöldatakmarkanir eru í dag á Akureyri, Árborg, höfuðborgarsvæðinu og Suðurnesjum, á öðrum stöðum á landinu eru engar fjöldatakmarkanir. Leigubifreiðastjórum verður heimilt að hafa afgreiðslu á leigubifreiðastöð. Þannig getur einn eða fleiri verið á hverri leigubifreiðastöð.
Skýrari skilyrði eru sett fyrir rekstraraðila leigubifreiða og að starfa sem bílstjóri, og í sumum tilvikum strangari en í gildandi lögum. Samgöngustofa fær auknar heimildir til afturköllunar leyfa ef aðilar uppfylla ekki lengur skilyrði fyrir útgáfu.
Gerðar eru breytingar á reglum um gjaldmæla og verðskrár. Lagt til að afnema skilyrði um lágmarksnýtingu atvinnuleyfis, sem í reynd hefur falið í sér skyldu til að hafa akstur að aðalatvinnu.
Nánar um skilyrði sem uppfylla þarf
Frumvarpið hefur að geyma ítarleg skilyrði sem þarf að uppfylla til að fá útgefið rekstrarleyfi leigubifreiðar , s.s. um lögheimili, starfshæfni, aldursmörk, gott orðspor, aukin ökuréttindi, skráningu og tryggingar og loks að hafa lokið námskeiðum um leigubifreiðaakstur, rekstur, bókhald og þess háttar. Áfram verða því í gildi ströng skilyrði og í sumum tilvikum eru gerðar strangari kröfur en samkvæmt gildandi lögum.
Til að öðlast starfsleyfi leigubifreiðastöðvar þarf að hafa starfsstöð á Íslandi. Öll grunnviðskiptaskjöl skal geyma í starfsstöð hér á landi og þaðan skal starfseminni stjórnað. Leigubifreiðastöð þarf einnig að uppfylla skilyrði reglugerðar um fullnægjandi fjárhagsstöðu.
Nánar um stöðvarskyldu
Í dag eru í gildi takmarkanir á fjölda útgefinna leyfa til aksturs leigubifreiða á þremur stöðum á landinu. Áfram verður heimilt að hafa afgreiðslu á leigubifreiðastöð, ekki skylt. Frumvarpið gerir þannig ráð fyrir því að afnema stöðvarskyldu sem er í gildi á takmörkunarsvæðunum. Helstu rökin eru að eftirspurn hefur vaxið eftir fjölbreyttari þjónustu í stafrænu formi. Frumvarpið leggur ríkar skyldur á rekstrarleyfishafa leigubifreiða en heimilar þeim einnig að framselja hluta af þeim skyldum til leigubifreiðastöðva, kjósi þeir að hafa afgreiðslu á slíkri stöð.
Með frumvarpinu er lagt til að til verði tvenns konar leyfi til að stunda leigubifreiðaakstur, rekstrarleyfi og atvinnuleyfi. Annars vegar rekstrarleyfi sem veitir leyfishafa rétt til að aka og reka leigubifreið. Rekstrarleyfishafi skal vera skráður eigandi eða umráðamaður bifreiðarinnar. Hins vegar atvinnuleyfi sem veitir leyfishafa rétt til að aka leigubifreið sem er í eigu rekstrarleyfishafa. Kveðið er á um að rekstrarleyfishafi þurfi að hafa lögheimili á evrópska efnahagssvæðinu, virka starfsstöð á Íslandi og hafi fullnægjandi fjárhagsstöðu.
Forsaga og samráð frá upphafi
Heildarendurskoðun laga um leigubifreiðar hófst með skipun starfshóps um endurskoðun á þeim reglum sem gilda um leigubifreiðaakstur á Íslandi í október 2017. Starfshópurinn skilaði tillögum í skýrslu í mars 2018. Þar kom fram að breytingar á gildandi lögum væru óhjákvæmilegar þar sem þau samrýmdust líklega ekki ákvæðum EES-samningsins.
Frumvarp þetta byggir að meginstefnu til á tillögum sem starfshópurinn lagði til í skýrslu sinni auk þess sem umsagnir í samráðsferli hafa verið hafðar til hliðsjónar, en það var tvívegis lagt fram í samráðsgátt stjórnvalda.
Eftirlitsstofnun EFTA (ESA) hóf frumkvæðisathugun á leigubílamarkaði árið 2017 en þá hafði stofnunin nýlega komist að þeirri niðurstöðu í rökstuddu áliti að leigubifreiðalöggjöf í Noregi uppfyllti ekki ákvæði EES-samningsins. Í nóvember 2021 birti ESA rökstutt álit þess að efnis að íslenska ríkið brjóti á skyldum sínum gagnvart EES-samningnum, einkum er varðar rétt borgara til að hefja og stunda sjálfstæða atvinnustarfsemi.
Það er hún Hugrún Ósk í NorType sem velur föstudagslagið þessa vikuna. Um val sitt segir hún:
Þrátt fyrir hótanir samstarfsfélaga minna um að ég yrði síðasta manneskjan sem væri skorað á, sökum arfaslaks tónlistarsmekks (að þeirra mati), þá er komið að mér að láta ljós mitt skína. Ég þakka Óskari fyrir að hafa trú á mér.
Í þessum töluðu orðum ligg ég í sólinni á Tenerife. Það hefði því legið beinast við að splæsa í lög eins og Sandalar með Ladda, nú eða Sólarsamba með Magga Kjartans. Ég hugsa að ég væri þá ekki að vinna mér inn nein stig frá samstarfsfélögum mínum svo ég læt það vera, í bili.
Þetta var alls ekki einfalt val. Ég hlusta mikið á Rammstein og HAM, sem er helsta ástæða athugasemda téðra samstarfsfélaga. Mig klæjar í puttana að velja lag með þeim hljómsveitum en ég er ekki alveg viss um að það myndi slá í gegn hér, svo ég geymi það til betri tíma bara. Í þau (ör)fáu skipti sem ég fæ tækifæri til að stjórna tónlist í gleðskap er mitt fyrsta val alltaf tónlist frá því í kringum 1980 (+/-). Ég viðurkenni samt að það hefur ekki alltaf slegið í gegn þegar ég set á lög eins og Wuthering heights með Kate Bush. Það eru kannski einhverjir vina minna sammála samstarfsfélögum mínum… Mitt næsta val til að reyna að vinna til baka vinsældar-stigin sem ég tapaði með elsku Kate Bush er þá tónlist Lizzo eða Lil Nas X, en ég veit ekki hvort myndbönd þess síðarnefnda myndu vekja lukku inná innri vef ríksstofnunnar.
En nú að föstudagslaginu. Ég er pjúra „millenial“ og ólst upp í níunni eins og sumir kalla það. Ég hlustaði mikið á tónlist með eldri systur minni því það var jú, allt töff sem hún gerði. Ég get samt ekki annað en hlegið þegar ég sé fyrir mér mig 8 ára að öskursyngja með hljómsveitum eins og No Doubt, Skunk Anansie og fleirum, í bleika herberginu mínu, umkringd nýklipptum barbídúkkum.
Mig langaði því að velja lag sem hefur fylgt mér lengi og vekur upp góðar minningar; lagið Don‘t speak með hljómsveitinni No doubt. Ég man eftir að horft aðdáunaraugum á söngkonuna Gwen Stefani, án þess að hafa minnstu hugmynd um hvað hún var að syngja.
Ég skora svo á Nínu í NorType til að velja lag næst. Vonandi njótið þið dagsins, kveðja úr sólinni!
Þegar starfsfólk Samgöngustofu missir nákominn ættingja sendir mannauðsdeild samúðarblómvönd og kerti, heimsent frá blómabúð.
Vanalega fær mannauðsdeild upplýsingar frá deildarstjóra, við biðlum til ykkar að láta Ólöfu eða Helgu vita svo það fái örugglega allir sendan samúðarblómvönd þegar við á.
Við biðjum ykkur að senda okkur tölvupóst á samskipti@samgongustofa.is ef þið eruð með hugmyndir eða tillögur um atriði sem má bæta inn á planið.
Markmið Markmiðið er að ná betur utan um skipulagða kynningu á verkefnum Samgöngustofu, innanhúss og utan.
Hvað er planið? er ekkert einkamál. Það varðar okkur öll, verkefni allra sviða og allra deilda. Til að það blómstri sem mest þarf samstarf við alla stofnunina. Gott væri ef starfsfólk gæti skoðað með opnum huga hvaða verkefni gætu mögulega átt erindi við aðra. Stundum bara okkur hin sem hér störfum, en stundum einnig við fólk utanhúss, hagaðila eða almenning. Við notum ýmis verkfæri og veljum þau eftir tilefnum. Til dæmis innri vef, ytri vef, Facebook, föstudagskaffi og fréttir til fjölmiðla – svo nokkuð sé nefnt.
Við biðjum ykkur um að senda okkur póst á samskipti@samgongustofa.is varðandi allar hugmyndir og tillögur sem deildin eða sviðið ykkar gæti haft um verkefni sem gætu passað á Planið. Þetta geta verið mál sem varða til dæmis nýjungar, breytingar, þjónustu, innra starf, árleg verkefni, úttektir, samfélagsmál, samvinnumál, mannauðsmál, fræðslumál, mannlega þáttinn og fleira.
Út er komin ný aðgerðaráætlun um viðbrögð við bráðamengun utan hafna og notkun skipaafdrepa. Aðgerðaráætlunin fjallar um hvernig bregðast eigi við vegna óhappa á sjó er varða skip í efnahagslögsögu Íslands sem ógna siglingaöryggi eða hætta er á að valdi umhverfistjóni. Áætlunin er sameiginlegt stjórntæki Umhverfisstofnunar, Landhelgisgæslu Íslands og Samgöngustofu. Henni er ætlað að tryggja fumlaust verklag og framkvæmd viðbragða vegna bráðamengunar.
Þetta er þriðja útgáfa aðgerðaáætlunarinnar en hún var fyrst gefin út 2014. Áætlunin er í sífelldri endurskoðun, þar sem tekið er mið af atvikum og æfingum til að bæta áætlunina. Í þessari útgáfu er uppsetningu breytt, til að vera í takti við hinar ýmsu áætlanir Almannavarna en þær er að finna hér. Evrópusambandið hefur einnig í þróun áætlun um notkun skipaafdrepa, sem skarast við þá áætlun sem hér er. Áætlun Evrópusambandins má nálgast hér.
